|
|
Textes en wallon (normalisé) sur l'amour, les femmes et le mariage. Sicrijhaedjes e walon so l' amour, les femes eyet l' mariaedje. |
|||
|
|
Textes en wallon (normalisé) sur l'amour, les femmes et le mariage. Sicrijhaedjes e walon so l' amour, les femes eyet l' mariaedje. |
|||
dierin rapontiaedje - last update: 2005-01-10.
Dressêye:
Billet d'humeur et autres textes philosophiques. Tuzinaedjes.
Poésies charmantes. Rimeas a l' aiwe di rôze.
Première rencontre. Pol prumî côp.
Nostalgies. Diloujhmints.
Déceptions amoureuses. Coûtès djoyes.
Textes mysogynes. Sicrijhaedjes di hait-l'-feme.
Vieux couples. Vîs manaedjes.
Prostituées et maladies vénériennes. Houres, harotes, et pinikes.
Nouvelles pour adultes. Paskeyes avou l' blanc cwårea.
Vocabulaire spécialisé. Li motî di l' amour, des femes et do mariaedje.
End a k' end ont a rvinde;
End a des cis k' end ont pont.
End a ki partaedjèt avou tolmonde;
End a k' endè sont rade rapias.
End a k' el fijhèt et c' est leu djeu;
End a ki breyèt pask' i n' savèt pus.
End a k' end ont pus,
Et minme k' end ont jamwais yeu.
End a ki sont binåjhes et c' est tant mî våt.
Mins çou k' i n' a d' seur, c' est ki, po ndè profiter,
I fåt esse a deus.
Thys Claudy, foû di El Bourdon, 563 fevrî 2004.
Paskeye novele d' ene djonne marieye et d' on pôve må-maryî.
Djonneas et djonnès feyes,
Acoroz tertos ci !
Dj' a fait ene bele paskeye,
C' est po nos bén dvierti.
Mi, dji n' mi såreu taire,
Cwand dji dvreu esse blåmé;
Nos rirans d' ciste afaire,
Wårdans d' nos dischiter !
(... moi, je ne puis me taire / quand bien même je devrais être blâmé / Nous rirons de cette affaire / Mais essayons de ne pas en chier dans nos frocs)
L' ôte djoû dvins ene taviene,
On cminça a m' conter
Ene tourneure des pus fenes,
Dji fou tot ewaeré.
Dji tronnéve so mes djambes
Et s' fijha dj' co ôte tchoi;
Tot å pus bea del tchambe,
Dji fjha on grand gros pet !
(... Je tremblais sur mes jambes / Et je fis même encore autre chose / Au beau milieu de la pièce / Je sis un grand gros pet.)
Ça ! i fåt dji vs el deye
Tot come on l' a conté:
C' est d' ene plaijhante djonne feye
K' s' åyaxhe voltî maryî
Po dbiter s' martchandeye,
Come pôrént tertotes fé.
Ni pinsez nén ki dj' reye,
Ca il est arivé.
Elle aveu-st ene bele robe,
Des beas volants d' coton,
Des cotes al novele môde
Et des solés mignons,
Des cwefeures a dinteles,
On bea ruban d' ôr fén...
Mins çou k' el rindéve bele,
C' esteut s' vertugadin !
Vocial on bea djonne ome
Ki dji n' vos lomrè nén,
K' el pinséve bele et bone,
Va ! nos ndè rirans bén !
Si l' båshele aléve tchir,
El shuveut tos costés...
Vos ôroz d' kéne manire
K' il a stî atrapé !
(... Si la fille allait chier / Il la suivait de tous côtés / Vous allez comprendre de quelle manière / Il a été dupé.)
Ci conteu d' caracoles,
Tot hantant come on sot,
I lyi dmanda l' parole,
Ele li prinda å mot.
Il acora-st e l' veye
Po-z atchter des dorlots...
On rirè pus d' ene feye
Di vey on té loigne sot !
Li båshele bén binåjhe
A tot fait aprester
Po covri ene bele tåve
Po cwand serént spozés.
Djambon et tchår salêye,
Çoula n' î mankéve nén,
Des floyons, des dorêyes
Et des botayes di vén.
On les moenne a l' eglijhe
Avou basse et violon:
Vocial ene grande sorprijhe
Et on bea cariyon !
Li båshele adjeneye
A l' åté, sol passe-pî,
Tot fjhant les cermonreyes
Kiminça a travyî !
(... La fille, agenouillée à l'autel sur le marchepied du prie-Dieu / Faisant les formalités d'usage / Commença à entrer en travail d'accouchement)
N' est ç' nén ene bele obåde
Po ci pôve aveulé ?
On criya "al moståde ! ",
Cwand i fourént ralés.
Li saedje-dame do viyaedje
Djha å novea maryî:
"Djihan ! prindoz coraedje,
Vos estoz pére... et fré !"
Schoûtez, tos vos, djonnes omes
K' ont volté di s' maryî,
Cweroz des nouvès tones
Ki l' cou n' soeye nén dfoncé !
Beacôp d' ces lådjès cotes
Ni cwerèt k' d' atraper
L' oujhea divins ene tchabote
Po l' aprinde a xhufler !...
(Ecoutez, vous, les jeunes hommes / Qui avez l'intention de vous marier / Cherchez des tonneaux neufs / Dont le fond n'a pas été défoncé / Beaucoup de ces robes larges / Ne cherchent qu'à attraper / L'oiseau dans le piège / Pour lui apprendre à siffler.)
Moray, chansonnier populaire liégeois, divins: Piron, M., Anthologie de la littérature wallonne, P. Mardaga, 1979. A propos des passages scatologiques dans les écrits wallons du 18e 19e siècle, lire: Sujets couverts et sujets tabous en littérature wallonne.
A rimpli m' cour di vos.
Dji vôreu fé por vos ene longue tchanson d' amour,
Ene tchanson ki direut les ptits bokets d' nos eures
Les mots sol blanc papî si vénrént mete a pîce
Come ostant d' såverdeas po tchanter vosse djonnesse.
Dji vôreu fé por vos ene longue tchanson d' amour.
Dji vôreu fé por vos ene bele istwere d' amour.
Ele contréve li solea cwand k' i s' live å bon tins
Po vni el coine do lét mete ene båjhe so vosse mwin
Pu cwand k' i rmonte vosse brès et caresse vosse vizaedje
S' i n' s' a nén astårdji al rondeur do coirsaedje.
Dji vôreu fé por vos ene bele istwere d' amour.
Dji vôreu fé por vos ene bele tchanson d' amour.
Ene tchanson ki contréve li coleur di noejhete
Di vos grands ouys d' efant semés d' ôr et d' payete
E l' tcholeur di vosse tiesse cwand k' ele si vént rpoizer
Påjhirmint so mi spale po m' raconter l' esté.
Dji vôreu fé por vos ene bele tchanson d' amour.
Dji vôreu fé por vos ene bele istwere d' amour.
Ele contréve li ptit banc ouski ns alans nos deus
Nos ashire al vesprêye po rwaitî tot sondjeus
Li bôlî s' erouni ås coleurs di l' otone
K' les prumirès fourmires montnut dzeu les måjhones
Dji vôreu fé por vos ene bele istwere d' amour.
Dji vôreu fé por vos ene bele tchanson d' amour.
Ene tchanson ki direut l' rodjeur di vos mashales
Cwand l' vint coscheut l' volet et shofele come on diale
Cwand l' feu dins l' tchiminêye nos raconte des istweres
Di nûtons et d' macrales ås shijhlêyes di l' ivier.
Dji vôreu fé por vos ene bele tchanson d' amour.
Dji vôreu fé por vos ene bele istwere d' amour.
Ene istwere ki n' åreut ni cominçmint ni fén
Mins, voeyoz, po vos l' dire, i m' fåreut si lontins
Ki dj' inme mî dmorer la adlé vos sins cåzer
A rimpli m' cour di vos, a vos rwaitî viker.
Et viker avou vos ene bele istwere d' amour.
Francis Hubert, divins "Li Chwès", djun 2001.
Cwand s' a volou mete e manaedje,
Vola bén ki l' djoû di s' mariaedje,
Nosse Djan n' aveut nén ddja on dnî
Pol curé k' a maryî l' tchårlî.
Dji vos frè di-st i, ene berwete.
Et vs åroz l' dossire di rawete
Ça va lyi a-t i respondou
Insi, dji n' årè rén pierdou.
I gn aveut d' ça ene bele hapêye
Et nosse curé, l' samwinne passêye
Etot rescontrant s' parwasyin
Lyi ratuza si egadjmint.
Oyi, di-st i l' Djan, dj' m' è rapele.
Mins vloz ki dj' vos è deye ene bele ?
Si vos m' plîz dismaryî, èndon,
Asteure, dji vos freu on begnon.
Léon Antoine, divins "Li Chwès", nôvimbe 2001.
Dispoy cwantes anêyes en erote,
Des djonnès copes ont ele vinou
Mårker leu ptit no dvins l' pelote
Do faw, sol tidje di Nawijhoû ?
Mågré les ans, les hasticotes,
Les letes elaxheyes ont dmanou
Rapinsant k' Pire inméve Charlote
Ou k' Djåke voeyeut voltî Djetrou.
Vozôtes, k' a vnou ci l' cour plin d' djoye,
Wice estoz vs, nozêyes marayes,
Et vos beas gawzins, wice sont i ?
Tot come les letes etermelêyes
Vos amours durèt ele todi
Oubén, n' a ç' sitî k' ene blamêye ?
Malåjheys mots : tidje : route de campagne – Nawijhoû : Nom propre (vallon étroit) – faw : hêtre – elaxheyes : enlacées – maraye : jeune fille - gawzin : jeune homme.
Constant Dehousse, divins " Låmes et djoyes d' amour " Printing & C°, Lidje, 1924, divins Coutcouloudjoû, nôvimbe-decimbe 2002.
Dji fhja vosse kinoxhance e nozé moes des fleurs
Et d' ces fleurs la, mamêye, vos m' avizîz l' pus bele;
Li poupåd d' vos noers ouys aveut li sclat d' deus pieles
Vos tchifes fjhént blåme ås rôzes, pal beaté d' leus coleurs.
C' est l' momint k' tot soreye el veye ki s' rinovele
K' el hinêye des clawsons rebôme di s' douce sinteur
Et ki l' cour amoureus rissusene di boneûr
Cwand l' nute vént loyminoye pol rafûler di s' vwele.
Ossu, dj' wåde li sovnance di nosse prumî radjoû
C' est la k' dji fjha siermint tot vs prindant ene tinrûle båjhe,
Di vs inmer come ene sinte, d'on vraiy et peur amour.
Dji vikéve on bea sondje cwand e moes del fenåjhe
Sins m' diner ene gote d' espwer, vous m' avoz-st abandné
Dispoy adon, li playe di m' cour a bén sonné.
Malåjheys mots : poupåd : pupille – Fé blåme : faire blémir de jalousie – hinêye : senteur – clawson : lilas – rissussene : chuchote à nouveau, sussure – loyminoye : lentement – rafûler : revêtir.
Charles Pholien, divins " Semåjhes ", sins plaece, 1953, divins Coutcouloudjoû, nôvimbe-decimbe 2002.
Si des mots difficiles se présentent à vous sur ces pages, allez voir s'il ne sont pas expliqués dans le Splitchant motî do walon (avec brève traduction française), ou dans le Wikipedia, l'encyclopédie en wallon (suivez: "Pordjet Esplicant Motî").
(Back textes en wallon commun) Ralans sol pådje des scrijhaedjes e rfondou walon.
(Index des sujets traités en wallon unifié) Djivêye des sudjets diswalpés e rfondou walon.
(Index des auteurs dont les textes sont disponibles en wallon commun) Djivêye des scrijheus k' ont scrît u k' ont stî rashious e rfondou walon.
(homepage wallon commun) Alans rzè eviè l' pådje moennrece do rfondou walon.
(Back homepage) Alans rzè al mwaisse-pådje.
Sacwants scrijhaedjes di cisse waibe cial polèt esse dizo abondroets; nos les rsaetchrans foû s' i fåt. Sacwants bokets scrîts ezès walons coinreces polèt aveur sitî ene miete rassonrés po poleur shuve pus åjheymint les mwaissès-rîles do rfondou walon.
Some texts published on this site may be affected by copyrights and eventually need to be removed in the future.
Certains textes peuvent avoir subi des modifications mineures pour faciliter leur insertion dans le projet de langue nationale pan-wallonne.
