dierin rapontiaedje - last update: 2004-01-12.

Dji rwaite sins les vey les shijh set vudès botayes ki sont dvant mi, sol tåve do cåbaret. Dji voe ddja a mitan bablou. Portant, ersè al nute, dji m' a co prometou a mi-minme ki dji metreu ene ahote a l' bwesson. Dji m' mareye dimwin et dji n' wangne nén grand tchoi come pitit tapeu so éndjole dins ene foû ptite PME. Et divant waire, gn årè deus bokes a nouri, pu - plait-st a Diu - troes.

Dj' a vint-troes ans. C' est pår li bele ådje po s' maryî. Dji n' mi såreu pus passer d' "ça". Dj' a viké cåzu troes moes avou ene feme di sacwants ans pus viye ki mi, et k' aveut ddja coûtchî avou ene peclêye d' omes. Kés nutes k' on s' payive ambedeus ! Ele m' apoirtéve todi ene boune botaye k' on vudive inte deus "ahessaedjes". Des "ahessaedjes" di totes les cognes, on-z î a veyou les trinte-shijh figueures del camassoutra.

Mins cisse Ghennou la, c' esteut ene feme, sapinse k' on n' dit, ki n' valeut nén tripete. Les djins ont cmincî a djåzer, les vijhéns riyént d' leye cwand elle aléve å botike. Les soçons m' dijhént: "T' årès des coyes avou ç' cånoye la. Ele ti va haper e si havroûle et ti n' ti sårès distraper. Des sfwaites, on dmeure avou zeles ene samwinne, cwénze djoûs, pu on lzès hene ås riketes et rcandjî.

Awè ! Åjhey a dire ! Mins cwand djel revoyive a Swira, i n' si passéve nén troes djoûs k' ele mi rihoukive so mi axhlåve [portable], et m' taener po poleur vini passer li semdi et l' dimegne avou mi. Ele m' apoirtéve on batch di bire, et ene botaye di wiski. On s' aprestéve ene cråsse eurêye li semdi a nonne. Et en avant la musique !

***************************

K' aveu dj' bén fwait å Bon Diu po-z aveur ene sifwaite mame ?

Ene mere, c' est l' feme ki vs coprind ådzeu di totes les ôtès femes. On dit k' les sôdårds, sol tchamp d' batreye, tot ctrawés des bales di l' innmi, divant d' mori, i djhèt come dierin mot "Moman !".

Li minne, a mi, c' est ene viye haeyåve. Nén viye dins l' civil : ele m' a yeu a 21 ans; ele n' a co ki li ptite cwarantinne. Viye dins ses tuzas.

C' est leye k' i fåt ki cmande a tertos.

I lyi fåt dmander si idêye po totafwait. Et po ene vesse må tournêye, ele vos brogne on moes d' astok.

Dji lyi åreu bén stî dire ki dji m' vleu maryî avou Zoubida. Mins djel saveu bén d' avance. Elle åreut dit k' ele ni vleut nén. Pocwè ? Paski c' est ene crapåde di viyaedje, ki m' mame ni cnoxhe nén s' famile, et tchik et tchak. Mins copurade pask' elle aveut dins l' tiesse k' i m' faleut tchoezi li feye da Mbarka, k' ele preye tofer a vni passer cwénze djoûs e nosse måjhon. Ele ni dit rén, mins on voet bén k' ele vôreut bén k' ça prinde.

Hind, li feye da Mbarka, dabôrd, ele n' est nén contråve. Por mi, c' est come ene soû. On-z est tofer come tchén et tchet, leye et mi; c' est bén l' prouve k' on-z est come fré et soû. Mins ci n' est nén d' ene soû ki dj' a dandjî asteure. C' est d' ene feme, en vraiye feme. Ghennou m' a aprind tos les toûs et les catoûs di l' amour. Nén l' amour avou on grand A. L' amour del tchå, des mwins ki tchåspougnèt tot vosse coir, des lepes k' aduzèt les coines les pus muchieyes di voste antomeye, les ongues ki grawtèt vosse pea, k' el dischavèt.

Dj' aveu ça avou deus femes e minme tins. Li prumire m' a aprind cåzu totafwait, et mi, dj' a racsegnî l' deujhinme.

Asteure, i fåt ki dj' tchoezixhe. Li prumire, dji lyi a dit di n' pus vni dé mi, ki c' esteut fini inte di nozôtes. Mins ele ni m' vout nén låtchî. Ele mi houke traze côps par djoû so mi axhlåve. Dji lyi respond sol telefone do patron, po k' ça n' soeye nén si tchir. Dji lyi dirè, å patron, si l' facteure do moes ki vént est pår trop salêye, ki c' est mi k' a houkî ci limero la et ki dji lyi rpayrè les telefonaedjes.

Zoubida, c' est ene feye di boune famile. Nosse pitit djeu - ele vént dire bondjoû a s' soû d' laecea ki dmeure dins l' cwårtî ådzeu d' nozôtes el veye - a duré di trop. Si pa a sintou l' agnon. Cwand il a-st aprin ki s' feye aveut dislodjî, i s' a måvlé jamwais parey.

Cwand elle a rivnou e s' måjhone on semdi, il a prind on grand coutea d' boutchî - bén rawijhî, nén ene amedroûle -, et il a vnou aviè s' feye. I l' aléve touwer, sins manke. Lacobén ki l' mame et les soûs s' ont metou inte di zels, et ki m' binamêye a peté å diale amon ene vijhene.

Li crime d' oneur, cial, ci n' est nén on moude. On hape, al boune, ene troejhinne di moes d' prijhon. Et on mousse foû avou l' tiesse å hôt, tot s' recrestant. On-z a spåmé l' oneur del famile.

Por zels, Zoubida est divnowe ene sins-oneur, djusse pask' elle a fwait cnoxhance avou mi sins ki ç' soeye ådvins del famile. Mins mi, dji m' vou maryî avou ene sins-oneur, paret.

Rimetoz è ene, gårçon !

*******************

On bouxhe a l' ouxh.

- Intrez si c' n' est nén l' diale !

C' est Abdelrazaq, li djonne sicalot - et l' cujhnî - del pitite laeceareye " Halib Zawiya " ki mousse e buro do patron. Il est dijh eures å matén.

- Cwè vouss ? Dji t' a ddja dné des çanses po-z aler fé t' martchî pol marinde, dowê ?

- Oyi, chef. Mins dji vs vôreu bén djåzer di vosse fiyåsse, Kamal.

- Dji n' ratind k' ça. Pocwè k' i n' est nén so si ovraedje, ci-la ? I n' lyi fåt nén pinser ki dj' el va payî a n' rén fé. Et les papîs d' docteur, atchtés po 50 dirhams, ni vont nén dins nosse societé.

- Il a sacwants mehins.

- Ké sôre di mehins ? Si ça a a vey avou l' ovraedje, låtche ti saetch ! Si c' est s' veye privêye, ci n' est nén l' moumint d' endè djåzer. To rpasrès m' trover å mess sol tins d' aprandjire.

- Ça a a vey avou s' veye privêye, mins c' est on laid cayet : i fåt trover ene vudance docô.

- Kimint ça ? Cwè çki to m' zûnes la, la, twè ?

- Dji vs el va dire platezak : il a-st afroyî ene crapåde. Li pa del båshele a seu cwè et il a prin on grand coutea, et voleur touwer s' feye.

- Et cwè çki dj' a a vey avou ça, taiss, mi ?

- Li glawene s' a rassåvé dé Kamal; elle est e s' tchambe, dins l' cazer, astok di l' laeceareye.

- Nodidju !

- Cwè çk' i fåt fé ?

- Ki Kamal tere si plan. Li ci ki djowe avou l' feu, i finixh todi pa s' broûler. Ça fwait deus ans k' i les fwait totes avou les femes. Il a dispuçlé ene crapåde ? Bén k' i våye passer ses cénk ans å pote. C' est ça l' tarif, amon les noerès cotes. Si to vous ratchter l' djudjmint, i m' fåt ecråxhî l' pate do djudje. Cénk miyons, k' ça costêye. Dj' a yeu l' cas avou l' fi d' on soçon cwand dj' esteu a Rabat. Dji n' a nén cénk miyons a coschirer po Kamal. K' i våye fé des xhuflets, ça lyi pasrè l' tins et ça l' frè tuzer a l' såme d' ene vicåreye. Li ci k' a magnî l' diale, k' i magne pår les coines !

- Mins li gamene nel vout nén mete å tribunå, ele si vout maryî avou lu, et lu, il est d' acoird.

- A ! Ça, c' est ddja bråmint meyeu martchî. Cwè çk' on ratind dabôrd ? Alez s' cweri les notåres et k' on bouxhe li martchî djus, eco enute di l' après-nonne.

- Mins i n' a nén des sôs assez po payî l' dote.

- Kibén lyi fåt i ?

- C' est des ptitès djins. I n' dimandront nén mirabiliå. On metrè come so mi ake di mariaedje da minne : 5000 dirhams di dote: 3000 a payî docô - c' est pol bea-pé aprester l' djama - et 2000 pus tård, cwand on serè rschapé. Pu, i fåt payî les notåres. Dj' endè cnoxhe des bonmartchî. Et i lyi fåt des liårds po s' rabyî. Boutans, tot conté tot rabatou, 6000 dirhams.

- I n' a k' prinde çoula come dinî-diè so ses gadjes. Vos diroz å caissî k' i lyi aboute ci some la. Vola on ptit siné po ça.

Diale m' etchete ! Ça aveut stî roedabale !

T' as fwait po bén fé, valet ! T' as vlou rsaetchî t' fiyåsse foû di spexheur. Mins ass bén tuzé a totafwait ? Dandjreus ki l' bea-pé serè dacoird. Li fiyåsse do boss del laeceareye, c' est on bon pårti po s' feye...

Mins t' feme leye, li mame da Kamal, ki voeyeut ddja on grand mariaedje po s' fi, to n' l' as nén ddja atôtchî ! T' el prinds po rén, dandjreus ! Politicmint nén comifåt !

****************************

Diewåde ! Salamalek, k' on dit, nozôtes.

Dji m' prezinte tot d' ene trake : dji so Ghennou Bent Boughaba. Vos l' savoz ddja bén : dji so-st ene houre, ene harote, ene cånoye sapinse vozôtes. K' i våye ! Djel ricnoxhe bén voltî.

Mins ci n' est nén paski dji m' vå nén tripete - c' est come ça ki vos avoz dit, endon, ciddé ådzeu ? - c' est nén po ça, di dju, ki dji n' a nou sintimint dins l' capotene : vosse Kamal, dji l' a dins m' pea, sapinse k' on n' dit; dji so roede bleuwe sote di lu, pol dire håynetmint et cråndimint.

Et dji l' årè, cabén k' dji divreu magnî Mouze et les vås. Si dji sereu-st èn ome, dji direu: scheter m' dierinne marone po m' apougnî avou s' mame eyet s' påråsse.

La shijh moes did cial, - dji vneu di fé si cnoxhance, et inte deus pratikes, vini hanter avou lu - nosse pa m' a maryî d' foice a on gros bômel k' a on comiece di pexhons a Layoune, e Såra. Laid, vî, biesse, et ddja maryî avår la, et troes cwate efants, cobén. Dji sereu si deujhinme feme, po cwand i vént fé tourner si ovroe di metaedje e boesse di sårdenes, vocial, a Swira. Et k' il î doet dmorer troes cwate djoûs.

Cwè vouss ! Dj' a des royes a mes coines, et des parfondes, cobén. Dji n' såreu esse sipepieuse. Dji doe prinde çou ki s' prezinte, u purade, çou k' on m' prezinte, et ki n' est nén trop rwaitant. Mi pa ni vout nén ki dji dmeure al pêle fåte di cråxhe. Cwè djhoz ? Neni, nén cåzer d' cwefer Sinte Catrene: on n' dit nén çoula droci. Ni djåzez nén come dins vos payis d' måcroeyants, godom !

Li dote ? Åjhey : li vî strouk m' a atchté on cwårtî dins on novea bildigne. Nén l' foû grand lucse, mins ça va co; on-z a ddja veyou pus pire. Mins asteure ki l' apårtumint est a m' no, et rashî å cadasse dins les regues, cwè çki dj' a co dandjî d' lu, li martchand di scavetches. K' i s' våye fé cori araedjî, ås ziverkôfs et co pus lon.

Pocwè ? Ti m' freus bén rire ! Minme avou deus catchets d' cråvea - saiss bén, li bleuwe pilure po fé binder -, si kete ni tinkeye co k' a mitan. Fåt nén dmander !

Dji cåze grossirmint ? Iva, mins dins nosse mestî, on n' est nén a l' après d' ça.

Djezuss Maria ! Feu d' infier ! Come c' est diferin avou Kamal. Dji lyi fwait aveur bon a make. Mins lu, i mel rind bén.

Mins, - li toursiveus godi !- tins k' i coûtchive avou mi del nute, do djoû, i nd aléve cortizer ene ôte. Et asteure, il ont fwait leu pantomime et dire ki c' est lu ki l' a-st afroyî. Po-z esse oblidjîs - swè-dijhant - di s' maryî.

Ça fwait k' dispu ene samwinne, i m' a revoyî a Swira. Dj' a bén say' del houkî å telephone, mins il a côpé li xhiltreye. Dji lyi soune djourmåy, mins ça n' respond nén, minme cwand dj' va dins ene cabene, por lu n' nén vey mi limero sol waitroûlete di l' axhlåve.

*********************

Ça fwait k' dj' a stî trover s' mame. Dji lyi a mostré ki si tchire Zoubida - tchire por lu, mins por mi, k' ele våye tchir e l' Aiwe do Bontins, et k' on voeye ès cou - , si binamêye Zoubida, dijhans, ebén, ele ni våt nén mî k' mi. Ene guimbixhe k' a ddja hanté avou deus troes djonneas, mins todi e muchiete.

C' est l' veur ki mi, gn a ki l' tram ki n' a nén passé sor mi. Dj' a stî l' tchersî des pôves, pu après, li ci des ritches. Mins mi, djel ricnoxhe; ça fwait ki dji n' pou k' m' amidrer. Dji vs promete divant tos les sints do Paradis - si dji sereu èn ome, dji direu so m' vé et so m' coye - ki, avou Kamal, dji serè li pus fidele des femes-e-s'-manaedje [femme au foyer].

Mins leye, ki çki vos dit ki, dimwin u après, ci n' serè nén eto l' cerijhî do viyaedje et ene cayeuse fineye ? On côp k' ele serè marieye, gn årè pus s' pa po tni l' ouy sor leye. Ti pinses k' i n' vénrè nén tni l' tchandele. Ça fwait k' adon, ele ni s' rasténrè pus waire. Mins todi fé ses mariminces catchetiveuzmint, ça !

Et l' dierin ki sårè k' il est coirnåd, ci serè t' fi, comere !

C' est çou ki dj' lyi a dit platezak, a Kamal si mame.

Dji lyi a si bén djåzé k' ele s' a leyî adire. Ele ni dinrè nén s' benediccion å mariaedje. S' el vout spozer di tote foice, si madrombele, ele lezî metrè des xhames el voye et des pires el roye tant k' ele pôrè.

Après, dj' a stî po ndaler amon l' pa del crapåde. Mins vaila dji n' a nén yeu tant d' aweure. I n' m' ont ddja volou leyî moussî. Ni s' pa ni s' mame ni s'a prezinté a l' ouxh. I m' ont-st avoyî leu fré. On grand castår k' a dmoré stampé sol pas d' gré et bårer l' intrêye di l' ouxh. Ôtmint, dji m' åreu yeu heré dvins l' coû divintrinne et il årént bén stî oblidjîs di m' riçure.

Dji n' a yeu k' l' ådjeu di dbiter mi messaedje al varade:

- Schoûtez bén ! Djihoz a vosse båshele k' ele si houwe erî d' Kamal. Dji so-st avou lu dispu cåzu shijh moes et dji ratind po dins troes cwate moes. I va esse oblidjî di m' prinde come feme, voye non voye.

I n' oizrè tolminme nén hiner si efant å batch ås mannestés, dowô ?

Li boket est foû.

 Si des mots difficiles se présentent à vous sur ces pages, allez voir s'il ne sont pas expliqués dans le Splitchant motî do walon (avec brève traduction française), ou dans le Wikipedia, l'encyclopédie en wallon (suivez: "Pordjet Esplicant Motî").

(Back textes en wallon commun) Ralans sol pådje des scrijhaedjes e rfondou walon.

(Back textes Louline Voye) Hay ervoye so l' pådje des scrijhaedjes da Louline Voye.

(Back homepage Louline Voye) Hay ervoye so l' pådje divantrinne da Louline Voye.

(Back homepage) Alans rzè al mwaisse-pådje.