Vera

On roman ki s' passe el Crimêye.

 dierin rapontiaedje - last update: 2005-01-10.

 (Cadre et personnages.) Adrovaedje.

 (Premier épisode.) Vera 01

 (Deuxième épisode.) Vera 02

 (Troisième épisode.) Vera 03

 (Vocabulaire.) Målåjheys mots.

 

4. Zande Marinov.

Zônigne di Toptoukay-dilé-Baxhatchassaray, li 20 di decimbe 1998.

 

Zande Marinov a s' vinte bén guedé pal sipesse sope et påzès maxheures al yogoûte k' i vént do magnî amon Noomane Hiridoglou, leu mwaisse-vindeu. E cisse termene do cwareme moslimî, li ramdinne sapinse k' on n' dit e tatår, c' est nén åjhey po ene djin di tirer s' plan po dmorer a djon cour et bouter del djournêye. Eyet magnî, boere eyet doirmi del nuteye.

Dins les familes, li cwareme est ene ocåzion k' on si rtrove tertos eshonne, cwand l' solea distele, åtou d' ene boune cråsse sipesse sope avou des bokets d' tchå, des oûs, eyet des poes d' souke tot ronds, didins. C' est l' disdjune sapinse k' on n' dit; u, prin mot po mot, li ddjuner. Dj' ô bén ki "didjuner", c' est si saetchî foû del termene di djune k' on-z esteut ddins tins del nute, tot magnant d' l' åmatén. E ramdinne, c' est parey, mins on s' haetche foû del termene di djune did tins del djournêye, tot magnant a l' anuti.

Alegzander Bassiliovitch Marinov, li valet des grands bwès d' Oucrinne, sikepyî a Borispol, nén lon erî di Tcherniguev - Zande Marinov, ki dji l' lomrans - li Zande Marinov, dabôrd, est la so s' buro, ki pinse, li låme al coine di l' ouy, a ses efants.

Kéne idêye di s' bukêye di feme di n' måy pretinde a vni dmorer ciddé, a Baxhatchassaray, dilé si ome.

Assuré, Baxhatchassaray, c' est ene veye di l' åmitan do payis, ki n' a nén l' cogne di Yalta, la ki l' Tansou dimane asteure.

Elle a todi trové ene peclêye d' escuzes po n' nén vni a Baxhatchassaray: les scolaedjes des efants, swè-djhant bråmint meyeus a Yalta, l' airance di l' åmitan do payis, trop froed tins d' l' ivier eyet trop tchôd distins d' l' esté, avou des poûssires di cinses cwand l' air vént d' la-hôt et les anichtantès foumires do zônigne cwand l' vint dene did pa låvå. Sapinse leye, c' est ça ki lyi baye ses coûtresses d' alinne, si tchipta, ses sinuzites avou on breya come ene Madlinne, et ses mås d' tiesse a s' taper li cawoûte å meur.

Po dire li veur wice k' il est, li Tansou, elle a todi pete u vesse. Et cwand ça n' lyi va nén, c' est todi l' air di Baxhatchassaray li dfåte, cabén k' ele n' î åyaxhe pus stî dispu ene u deus samwinnes.

"C' est come ça avou l' asse vos amake-t ele avou l' asgur d' on mådjuster d' univiersité. Li coir emonçlêye les mwaijhès nodeurs, et pu tot d' on côp, ça s' dislåtche. C' est la li sovnance des celures !"

Elle a-st oyou braire on vea, mins s' ni sét ele pus dins ké ståve.

E ces etrevéns la, i n' fåt nén ndaler disconte. Minme si ele n' a måy sitî e scole, çou k' ele deye, franke come Batisse, c' est pårlaedje d' Alcoran - paroles d' Evandjîle, direut-st on pamon vozôtes.

La deus ans, Zande Marinov eraléve tos les djoûs d' ramdinne po disdjuner a Yalta, ene grosse eure lon en oto, pal sitroete voye di tienes ki gripe et ki craweye ezès Crimski Gori, les montinnes di Crimêye, li brostion coûtchantresse do Cocåze. Cwand l' oto esteu pacô e rak, i dveut prinde l' otobusse, mins ça fjheut, adon, on voyaedje di deus eures.

Do tins k' i vleut co ben fé ces coratreyes la, li Buro Marinov n' aveut co waire d' ovraedje, et s' serént i botike eviè cwatre eures, po leyî les eployis tatårs eraler e leu måjhone aprester li spesse sope å poes d' souke et les maxheures al yogoûte, et-z atchter les soucrêyès biscûtes et les conins d' beguene, ene sôre di ratchitcheye date d' avår la.

Fåt nén esse nareus, séss, li prumî côp k' on-z est priyi en ene famile tatåre, et k' on n' est nén erotiné a ces amagnîs la. Do salé et do soucré eshonne : ene date, ene kirêye di sope, ene soucrêye biscûte al låme, ene ôte kirêye di sope. Après, z avoz do pwin di rgon et des oûs cûts deurs. Po vos dissoeler, vos vos ploz rassapiner di maxheures di prin laecea avou des frûts del såjhon. Cwand l' cwareme - ki s' discale di 11 djous tchaeke anêye eneviè l' solea - cwand l' cwareme toume e l' esté, c' est purade des fikes et des reujhins. Cwand c' est e l' ivier, les yogoûtreyes si maxhèt purade avou des pemes u des poeres. Cwand c' est å bontins, avou des bilokes, des fraijhes, des åbricots, des messes. Tant k' a l' erire-såjhon, c' est purade des pemes d' amour (des orandjes) et des mandarenes, ubén des cûtès poeres di cwin.

Tansou a ça d' bea. Gn a nouk a lyi prinde po fé a magnî. Si specialisté, c' est les tchibouriks: al tchå, ås cartouches (crompires) u å cabu.

Les tchibouriks, c' est come des gozås, mins avou del fene påsse, a môde del cene di pidza, et ådvins, c' est come do hatchisse foirt picant, avou do poeve et des ptits agnons. Po les fé, on spotche å rôlea on méron del rondeur d' ene plake lazer. Vos metoz vosse hatchisse di tchå, di canadas u d' cabu so ene mitan, pu rcovri avou l' ôte mitan. Adonpwî vos metoz cure, deus minutes di tchaeke costé, dins ene payele avou del tchôde ôle.

Zande Marinov esteut rindou après les tchibouriks. Si mame endè fjheut deus côps par samwinne po cwand les efants rintrént di scole, copurade e l' ivier. Cwand k' i studyive a Kiyev, après les scoles di l' après-nonne, i rprindént l' metro po rdaler å campusse; i s' djoként tofer, avou les soçons et les soçondjes, amon les martchandeas k' avént leus toeteas åd dilong des bånes di metro, et ki boerlént, po s' reschandi: "tchôds tchibouriks ! gariatchi tchibouriki ! tchôds tchibouriks".


vôtes-gozås al tchå (tchibouriks).

C' esteut inla, va, dandjreus, ki Tansou aveut-st abetchté li Zande Marinov, la ddja ene hapêye, cwand boutéve co po on patron, a Kîtche, a l' ôte dibout del Crimêye. Èn ome, ça s' apice motoit avou l' conin, mins ça s' wåde avou l' bodene.

C' esteut merveye, åraeze, k' ele l' åyaxhe wårdé disk' asteure, ca dispu k' avént hanté, pu s' maryî dins l' rite muzulman, c' esteut tofer cohigne cohagne inte li Zande Marinov eyet si feme Tansou. Elle aveut d' kî tni. Si pere esteut on revinteu tatår k' aveut prin l' maki siconte des sôdårds di Stalene cwand tcheriént evoye les Tatårs foû do payis e 1944.

Pa li lwè des Sovietes limero 5859ss, Stalene ameta li peupe tatår en etir di fé avou ls Almands, k' avént avayî li Crimêye e 1942. Il anixhila li Republike Sovietike Otonome di Crimêye, et moenner evoye, di foice, di pus d' on miyon d' Tatårs eviè l' Ouzbekistan eyet li Kazaxhtan po les femes, et viè les fosses del Sibereye po les omes.

Kîtche, c' esteut-st on passaedje oblidjî po ces pôves djins la, k' il avént ecassi dins des tcheretes a boûs, et k' i tchessént, sovint sins lzî dner nè a magnî nè a boere, eviè l' Azerbayidjan, divant d' els emoenner co pus lon. On hopea did zels alént mori sol voye, di fwin u d' minêyes.

Tansou si pa, end aveut schapé mwintes, tot-z atacant les convoyes di tcheretes avou ses couz di l' Armêye Blantche, eyet muchyî les refudjîs dins les cahoutes di bierdjî, e miercorin des Crimski Gori. I n' aveut nén måké, tot passant al vinvole, di spater sacwants sôdårds då Stalene. Les Tchetchenes, 50 ans après ni fjhèt nén mî k' ça.

******************************

Ça fwait ki, etur Zande Bassiliovitch Marinov eyet si feme Tansou Arqiyevna Bacsani, c' esteut pus sovint margaye ki påye. Et c' est ki: Zande s' aveut erotiné a n' pus aler vey Tansou k' on côp par samwinne, li dimegne, come cwand k' il aveut amonté si ptite eterprijhe, al comince des anêyes nonante, eyet k' elle aveut di tote foice volou dmorer a Kîtche, astok di s' soû, mins a di pus d' 200 km di si ome.

Macté, c' est macté !

Mins cwand k' èn ågne fwait a s' môde, c' est ddja l' mitan di si amagnî ! Ça fwait ki Zande aveut leyî Tansou shure ses zines, ses vires et ses makets, et s' aveut i, cwatre ans å long, viké di pus d' troes eures lon di s' feme et d' ses efants. Disk' a çk' i ls oblidjaxhe, voye non voye, a vni dmorer pus près.

Après mwints halkinaedjes, tchictireye et anzinaedje, nosse bele Tansou aveut tchoezi Yalta.

Mins rivnans drî rinne.

******************************

Ça fwait ki, après li " ddjuner " et divant li marinde-dinner-soper, k' i fjhént diviè meynute ene eure å matén, Zande Marinov raléve o buro, lére ses gazetes, naivyî so l' Etrernete u ovrer so ses rcwerances sol lingaedje tatår, si grand pasmint d' tins.

Après li ddjune amon Noomane, il aveut leyî Vera ey Esmayel sol voye del moskêye, dire leus priyires di l' alnute. I lzî aveut dné des cwårs por zels aler fé les comissions, pu aprester a marinde al pitite coujhene do depot. Aviè onze eures, onze eures et dmeye, Esmayel aléve vini houkî Zande o buro por lu vni dinner avou zels, el pitite tchambe da Vera...

Ene cope di bråves efants, va, ces deus la. L' Esmayel, foirt siervicire, esteut todi pindou å clå po fé plaijhi a si patron. Vera, eto, c' esteut ene pitite comere mo sûteye ki riyeut tofer, foirt avnante avou tertos.

Di pus ki Zande aprindeut a mî cnoxhe Vera, di pus k' i s' rindeut conte k' il avént, ambedeus, bråmint d' idêyes e cmon. C' esteut plaijhi, vormint, di berdeler avou leye so tolminme ké sudjet - apu ki so li rlidjon - et d' vey k' i toumént tofer d' acoird, sovint leus deus siconte les ôtes bateus di dvize.

Esmayel, s' il esteut avou zels tins d' ces discutaedjes la, aveut bén sogne di n' nén moussî e djeu d' beyes. Paski, mo sovint, les dvizaedjes si fjhént e rûsse, pacô e l' oucrinnwès - e patwès, sapinse les Rûsses grandiveus -, eyet ki l' Esmayel, ki n' aveut nén stî e scole, ni s' sinteut waire a si åjhe dins ces ragadelreyes la. I djåzéve tofer tatår, cabén k' i coprindeut li rûsse et l' Oucrinnwès assez po saveur di cwè k' i rtournéve. Åraeze, il aveut todi si ptit tuza sol sudjet, et å pus sovint, ci n' esteut nén ene foû biesse idêye.

Mågré k' il estént, dins leu-z ovraedje, foirt sovint eshonne, Esmayel respectéve Vera, come on respecteye ene crapåde ezès payis muzulmans, come èn ovrî respecteye, avou, si chef dins l' schålance di l' eterprijhe. Si on sinteut, pacô, on ptit tinkia cwand Vera li voyéve fé des kerwêyes, ene miete trop sovint a s' gosse, i waitive di nel nén mostrer, eyet todi, al fén, bén schouter çou k' ele lyi djheut.

Zande Marinov si plaijheut bråmint mî e li cpagneye di ces deus la, k' avou si regrawieuse di feme. Copuvite dispu ki, la èn an u deus, cisse-ciale s' aveut tchôké el tiesse ki l' Vera tournéve åtou di si ome, eyet ndè divni fene djalote. Et rbouxhî sol minme clå, di l' åmatén disk' a l' noere nute !

A té pont ki l' vicåreye avou Tansou, ki ci fouxhe fok on djoû par samwinne, aveut divnou èn infier pol Zande Marinov.

 

(a shuve)