Vera

On roman ki s' passe el Crimêye.

 dierin rapontiaedje - last update: 2004-11-15.

 (Cadre et personnages.) Adrovaedje.

 (Premier épisode.) Vera 01

 (Vocabulaire.) Målåjheys mots.

 

2. Li disfindeuse des abondroets des femes.

Acmesdjide (Simferopol), Måjhon del Feme Tatåre, li 13 di djulete 2000.

 


Sefica Gasprali, l' Ancyinne

Sefica Gasprali, li Djonne, esteut al boune. La cåzu 20 ans k' elle aveut cmincî si croejhåde po les abondroets del feme tatåre el Crimêye. Ele ni fjheut ki rshuve les passêyes di si ratayone ki poirtéve li minme no, Sefica Gasprali l' Ancyinne, ki si poirtrait pindeut å meur del grande såle del Måjhon del Feme Tatåre di Simferopol (Acmesdjide e lingaedje tatår).

Amon les Tatårs del Crimêye, come dins bråmint des payis muzulmans, c' est les omes ki saetchèt tant k' plèt li coviete di leu costé. Portant, l' Alcoran, sapinse li Sefica, aveut waitî di rinde des abondroets ås femes k' ele n' avént måy yeu divant ça. Savoz bén, endaléve-t ele, ki dins l' societé rûsse, a falou ratinde 1950 po ki l' feme marieye polaxhe amonter on botike sins l' åjhmince di si ome. Ezès payis moslimîs, les béns del feme sont tofer da sinne et c' est co l' ome ki doet payî, lu tot seu, po les costindjes do manaedje.

C' est ça l' atuzêye, todi.

Mins dins l' podbon, li societé est télmint dizo l' mambornance des omes ki les femes sont sovint si honteuses d' aler dvant les djins k' ele ni oizèt nén dmander leus pus biesses abondroets.

C' est po ça ki cwand Vera Tchoubarov l' aveut vnou trover avou si noer ouy, et lyi conter si spoûle avou l' bea Esmayel Celebicihan, si sonk n' aveut fwait k' on toû.

Sapinse Vera, l' Esmayel aveut profité d' leye cwatre ans å long. On grand foirt ome, i l' aveut do côp racové, come ene covresse cove ses poyons, cwand ele s' aveut prezinté å Buro A.B. Marinov, e 1996, po-z aveur di l' ovraedje do côp après ses scoles. C' est målåjhey po ene båshele di viker tote seule dins ces payis la, copurade en on ptit viyaedje.

Pask' el buro Marinov, il esteut astalé dins on zônigne a Toptoukay. Toptoukay, c' est on gros viyaedje 10 km lon di Baxhatchassaray. Baxhatchassaray, c' est ddja on gros bork, mins avou des djins co ene miete retrôclés. Li veye a stî, dins l' vî tins, li mwaisse-veye del Dutcheye di Crimêye, on "xhanat", cåzu dislaxhî d' Istamboul.

Baxhatchassaray est metowe å fén mitan des voyes inte Acmesdjid-Simferol, ene nozêye pitite veye univiersitaire, li poirt di Sebastopol, wice ki les Rûsses avént pierdou l' guere di Crimêye e 1855, eyet li veye touristike di Yalta, sol Noere Mér eto, la ki Churchill, Roosevelt eyet Stalene si pårtixhît l' monde e 1945.

Li Buro Marinov, i s' ocupént d' efoirmatike: éndjolreye, programes eyet siervices. I boutént avou totes sôres di societés: ttossu bén les soyreyes di bwès des montinnes, ki les otels et les sanatorioms do boird del Noere Mér. Avént minme fwait martchî avou l' acwariom di Sebastopol, po l' ahessaedje et l' etertinance des colés electronikes k' i metèt so les doféns dressés.

Avou si ptit rôlea di politecnicyinne, eyet si memwere so l' Etrernete, a on moumint ki ça esteut co tot bea tot novea el Crimêye, nosse Vera aveut ene plaece tote trovêye dins ciste eterprijhe la, wice k' elle aveut fwait enawaire on stadje di troes moes.

Mins on n' egadjive nén voltî å Buro Marinov. Copuvite on s' dimefyive des poirteus d' rôlea. I sont sovint grandiveus et s' n' adurèt i waire li vicåreye d' ene pitite eterprijhe a s' boûsse, la k' on doet poleur bouter disk' a nole eure al nute, et minme disk' al noere nute, cwand gn a ene sacwè di strapant amon ene boune pratike.

On-z aveut accepté Vera come "sitadjresse-après-ses-scoles" avou les pinses k' ele diveut cweri après d' l' ovraedje ôte pårt. Mins e ratindant, ele poleut låvå aprinde a-z ovrer dins ene ekipe. Ça valeut mî ki di s' aler reclôre e leu måjhone, a fé les schieles et les poussires, eyet rovyî tot çou k' elle aveut-st aprin ezès scoles.

On lyi aveut dné ene tchambe po rén en on depot, dins on hamtea deus kilomete lon do buro. Ele s' aveut metou bén voltî a djins å hamtea, aprume avou l' famile do wårdeu do depot. Tos les djoûs al nute, cwand ele rarivéve e si cotche avou si biciclete, ele si discandjive raddimint, rissaetchî si marone-djine, si taye et si ptite calote, eyet mete ene grande lådje fene cote po-z esse a si åjhe, avou on noret d' tiesse po ravôtyî ses tchveas. Adonpwis, hay evoye ! Ele dåréve amon Loxhdidja li feme da wårdeu, et coschirer li shijhe a-z aprester a soper et a tatler.

Cwand elle aveut dandjî d' ene sacwè: rifé si velo, rabocter ene dresse, si fé remoenner å hamtea, del nute, cwand avént dvou travayî disk' a meynute meyzeure, c' esteut l' Esmayel k' esteut, a tot côp bon, li mandaye di siervice.

Por lu, on payizan Tatår ki n' aveut måy sitî e scole, divni l' copleu-aidant d' ene indjenioresse, c' esteut monter d' on plin côp ene driglêye di boursons sol schålance sociåle. Copurade cwand l' patron, ki voeyeut bén ki ces deus la s' etindént come deus lives e l' avoenne, les apwairyive sovint po des evoyaedjes å lon.

Cwand l' éndjole d' ene soyreye sketéve, et k' faleut evoyî ene sakî å mitan des bwès c' esteut l' Esmayel ki fjheut tchåfeu et nosse Vera k' aléve vey cwè. To n' aléves nén tolminme evoyî ene pitite fråjhûle comere fene mierseule å mitan des bokions, et faleur motoit ovrer so l' éndjolreye disk' a nole eure å matén, u minme diveur lodjî amon les djins po rpinde les disboctaedjes-raboctaedjes li londmwin.

Di copleu-aidant, l' Esmayel divna, pitchote a midjote, li galant da Vera.

Mins nén dvant les djins; neni, saiss, twè ! Pol societé, pol famile, pol patron, Vera si dveut di dmani ene pitite comere comifåt, ki n' aveut måy pont cnoxhou d' ome. Et s' diveut ele co, come di djusse, dimorer båshele etire, k' on-z aléve dandjreus maryî a on docteur, èn indjenieur, èn eployî avou ene bele plaece. U, al dierinne tchuze, avou on cuzén u on parint al cwatrinme botnire. C' esteut l' uzance insi, låvå, come c' est a po près l' alaedje avå tote li djin d' l' Islam, di Cazablanca a Kwala Lompour.

Vera, vos l' voeyoz bén, a on no et on ptit no rûsses, ki provnèt di s' pa. Mins ci-cial aveut peté å diale, sins leyî d' adresse, cwand elle aveut cénk ans, et leyî la hatche et matche Vera si mame k' esteut Tatårresse, et ki l' aveut-st aclevé amon si grand-pere eyet s' grand-mere. Ça fwait ki, å parfond d' leye-minme, Vera si sinteut di pus Tatårresse ki Rûsse.

Dins ç' societé la, çou k' åreut yeu stî normå, après li macsådaedje del Vera pa l' Esmayel, ç' åreut yeu stî di stofer l' afwaire. Zûner ki l' ome s' aveut courcé po des cayets d' cwårs, des liårds prustés k' ele ni lyi aveut savou rinde, udonbén pask' i n' si savént etinde e leu-z ovraedje, u åk inla.

Avouwer ki l' ome esteut djalot pask' ele rexheut avou lu et avou des ôtes, c' esteut on plan po k' ele si mete a dos tote si prôpe famile. On voet cobén, disk' ås djoûs d' enute, ezès payis muzulmans come li Djordanreye u l' Pakistan, des frés vini schafyî leu sour, pask' ele a manni l' oneur del famile (sapinse les måyes). C' est çou k' i lomèt les crimes d' oneur, come si on pleut aveur d' l' oneur tot ahessant si prôpe sour u si prôpe båshele. Å pus sovint, li moudreu ni s' catche nén di s' crime et s' si leyî apicî pås djindåres. Cwand ça passe mon les noerès cotes, il est codåné, al boune, a deus troes moes a l' amigo.

Mins après tot l' disdut k' il aveut metou-st en erote, l' Esmayel n' esteut nén co binåjhe. Asteure, c' ît lu ki vleut mete Vera å tribunå po "atteinte aux bonnes mœurs" et por lu si fé rpayî tot çou k' il aveut furlandé les cwatre ans k' il avént dmoré eshonne (todi sorlon Esmayel).

A-z oyant ça, nosse Sefica Gasprali aveut monté en ene araedje a-z endè spiyî l' manaedje.

"A ! ces måfjhants d' omes la ! I n' ont pår nou rastena, ca i n' ont pont d' ratna. I boutnut l' feu al gregne et i vôrént fé poirter li dôlêye å cinsî pask' aveut fwait do feu e si tchminêye. Tertos les minmes ! Si on n' areut nén mezåjhe di zels po fé des efants, c' est ene indjince k' i fåreut dzingnî del sitindêye del daegn. Come çou ki les Rûsses avént fwait avou nozôtes les Tatårs, et k' il ont bén manké d' adiercî leu côp."

Ele n' aveut pont d' rasta. Ele si ctapéve come on diale dins on benitî. Ele bodjive d' ene coine del plaece a l' ôte, come on dzi k' on-z a prin et l' mete å fond d' on saeyea.

- Schoutoz bén, camaerådresse Vera Aminievna, aschoutoz bén, diavouchca ! Li meyeu disfindaedje, c' est cwand k' on-z atake. C' est vos k' i fåt ki soeye l' ameteuse et l' atakeuse. Il a bouxhî sor vos, divant temons. C' est la l' seul fwait ki dj' avans dvant nos ouys. Atacans lu so ç' pont la.

- Mins s' i vént a m' codjåzer divant l' tribunå, et raconter totes les mintreyes k' i canle so m' conte. Ki dj' a coûtchî avou lu, avou èn ôte tchåfeu del societé, avou l' patron, avou les pratikes. . . ?

- Ni vos a-t i nén traité - so vosse respet - di "harote" ?

- Siya, et divant les djins, cobén !

- Deujhinme clawe di l' ametaedje, dj' ô bén: deujhinme chef d' acuzåcion: traitaedje et insule. La eto, i vos doet des damadjes-interesses.

Si Sefica aveut monté so ses grands tchvås, Vera, leye, esteut ashiowe mo påjhûlmint so ene tcheyire del grande tåve ås raploûs do locå des M.L.F. tatåres d' Acmesdjid. Ele tuzéve fer. Tot stombiant li Sefica, ele vineut d' escoursi ene mecanike k' ele ni saveut nén wice ki ça l' aléve moenner. Mins c' esteut trop tård po rivni en erî, asteure.

Vera n' esteut pus trop seure, asteure. Bawaite ! Ele trovreut todi bén on moyén po fé naivyî l' batea come ele aveut håsse k' i naiviaxhe, et lzî fé bate l' aiwe a tertos.

On-z est feme u on n' l' est nén.

 

(a shuve)