Vera

On roman ki s' passe el Crimêye.

 dierin rapontiaedje - last update: 2004-11-24.

 (Cadre et personnages.) Adrovaedje.

 (Vocabulaire.) Målåjheys mots.

 

1. Li djudjmint.

Simferopol (Acmesdjide), Crimêye, li 20 d' avri 2001.

Li prezidint des noerès cotes do tribunå di prumî schalon di Simferopol, seccion des afwaires di moråle et boune codujhance, si stampa d' on lan eyet lére li djudjmint.

Avou s' pitite behotante vwès, avou si ptit coir di franc Mongol, racrapoté dvant l' ådje, et ses pates d' åwe ki rexhént foû di deus ptits ebridlés ouys, to n' åreus nén yeu croeyou ça d' lu: k' il aléve, nén honteus po on sô, cåzer di sudjets ki la nén co dijh ans, on n' endè djåzéve måy divant les djins, e tos ces payis la di çou k' a stî l' Union Sovietike et wice k' i gn a des muzulmans.

Mins nosse pitit djudje aveut veyou ki, dipus d' on côp, li rastena eyet li honteusté avént amoenné des fås djudjmints. Ça fwait k' il aveut prin l' abitude di lomer on tchet on tchet.

"Sorlon, les prôpes avouwaedjes di l' ametou, ci-cial a yeu des rlåcions, cwatre ans å long, avou l' ameteuse. Si cisse-ciale a mostré å tribunå on papî d' etiristé, c' est paski leus djouwaedjes amoreus si fjhént pår ådfoû: forfroyaedje do mimbe omrin; cafroyaedje des coirs avou li mimbe omrin etur les coxhes; raletchaedje eyet suçaedje do mimbe omrin. Eyet, di l' ôte des costés, tchåspougnaedje des nenès; catiaedje del conete; forletchaedje eyet suçaedje do pepion. Les deus djins del cope arivént a leu plaijhi pal voye di ces atoutchmints la."

Li ptit djudje, dirî ses spessès berikes, si rmådjinéve-t i li sinne, sol pitit tins k' i s' rischapa ? Nouk nel sårè måy.

 

I rataca d' ene trake:

"Si l' ameteuse a bén hanté avou dipus d' èn ôte ome sol trevén di ces cwatre ans la, et minme avou dipus d' onk e minme tins, ci n' fourit jamwais tot-z arivant a des sfwaitès rlåcions avou zels. Ele n' a måy fwait comiece, dinant dnant, des ptits plaijhis k' ele lezî acoirdéve: båjhes, sintaedje di ses nenès, forfroyaedje.

C' est po ça kel tribunå a bén vlou shure l' ameteuse, cwand ele riclame ripaymint po les egrossiaedjes et les insules vinant d' l' ametou ki l' a traité di "harote" dipus d' on côp, eyet divant temons.

Sorlon li lwè di ç' payis cial so l' moråle eyet l' boune codujhance, li delit di fé comiece di s' coir est amostré pa l' les caracteristikes ciddé-shuvant:

Prumirmint: racolaedje d' omes k' on n' conoxhe nén...

Deujhinmmint: ... ezès plaeces ki les djins î plèt tertos aler...

Troejhinmmint: ... conte paymint sol pî sol tchamp kel montant est directumint e rapoirt avou l' ake acoirdé.

Tos ces ponts la ni s' ritrovèt ddja dins li cdujhance di l' ameteuse.

Li pus bele prouve ki ses rlåcions avou l' ametou estént bén muchieyes, c' est ki pluzieurs omes, ki l' ameteuse hantéve avou zels, si rtrovént tos les djoûs ezès minmes buros. Nouk di zels ni s' dotéve ki li ptite djin si binamêye k' i baltént et k' i riyént avou leye tote li djournêye å lon, ele cortizéve eto avou l' ôte.

Esmayel Celebicihan, l' ametou e ci procès cial, n' aveut nou droet di prinde on coutea et di mancî l' ameteuse, cwand dischovra l' potêye, dj' ô bén li frecantaedje di Vera Aminievna Tchoubarov, l' ameteuse, avou si prôpe soçon. I n' aveut nou droet di haper ene brike eyet di bouxhî so l' ameteuse, å risse di lyi coschirer l' vizaedje po todi.

Ça fwait ki li djuri a shuvou li rcwestaedje di l' ameteuse et codåner l' ametou a 10.000 grivenes (li nouve manoye d' Oucrinne, a pô près 2.000 uros) d' aminde po coixhe et bôrinnes. Dj' ô bén: po-z aveur maké l' ameteuse e plin vizaedje."

Pol prumî côp, li ptit djudje, mostra ene miete si mwaijhixhmint, et candjî si vwès po dire, tot montant a sminces:

" Dispu cwand k' ene sakî ki djouwe avou ene comere, estô di s' maryî avou leye, pu kel traite di gåce divant tolmonde a l' droet d' el maker paski ci-ciale hante avou èn ôte valet po motoit sayî d' trover on marieu ?"

Dji n' so nén seur ki cisse fråze vola esteut dins l' rapoirt do djuri.

Li ptit rabodrou djudje riprinda, tot s' rimwaistrixhant:

"Mins nerén, li djuri n' a nén shuvou li dmande di l' ameteuse po damadjes et interesses moråls, poy ki c' est leye-minme k' aveut metou so pås so fotches ciste ecramireye la avou si toursiveusté. So vosse respet, li batch si rtoûne todi sol pourcea."

Li ptit djudje a figueure di Mongol rissaetcha ses berikes, come s' il åreut yeu dit "na!" po-z achever si spitch. Il apiça, do côp, èn ôte pactêye di foyes, loyeyes avou on corion elastike, el disloya et s' ricminça-t i ses lijhaedjes.

"Dins l' procès lérece, dj' ô bén wice kel pårteye ameteuse divént Esmayel Celebicihan, siconte di Vera Aminievna Tchoubarov, la k' l' ameteu rclame 20.000 grivenes po les costindjes dispinsêyes cwatre ans å long po l' pårteye ametowe, li djuri a rbouté li rcwesse."

Eyet li ptit Mongol ricmincî a s' måvler:

"Est çk' ene sakî ki profite do coir d' ene feme so totes ses costeures ni lyi doet nén payî on clapant vicaedje ! Est çki kéconk l' a måy oblidjî d' aler pormoenner avou leye disk' a Kîtche et Djankoy, di lyi payî l' otel u l' campigne a tchaeke côp k' alént al mer do costé di Yalta u d' Evpatoria.

Nos vicans asteure en èn ôte civilizåcion, pus dins li cene di nos vîs parints wice ki l' ome aveut tos les droets, ådvins et ådfou di si manedje."

I s' rischapa, et taper l' pougnêye di foyes so li scribanc.

"L' asyinne est foû !" måsgrogna-t i setchmint.

 

(a shuve)