Chandeleur. Tchandleuse.

• Matî l' moxhlî (A. Lenfant).

Carnaval. Cwårmea.

• Page du carnaval. Pådje do cwarmea.

Li tins håspele.

Li solo d' fevrî s' a catchî,

Låvå, houte di Mefe, la padrî

Ene gordene di plopes. On djoû evoye !

Fåt î racsure totes les poûssires di totes nos voyes ?

Li tins a ståré totes ses eures

Bén lon so les prés et l' djouxhire,

Les pî-sintes et l' bouxhon sins fleur.

Li tins håspele, i payteye co so ene oirbire.

L' ivier tricbale ses vis bihots

Et måss acourt avou s' solo.

Dji n' a k' des viyès håres trawêyes

Po vey ponde les prumirès fleurs di l' anêye.

Loukîz l' ki va ttavå les prés,

Fé sene del mwin a on sourdant,

Bate li mzeure avou ene tchanson,

Rimpli l' vevî et s' astårdjî, nosse pitit ru

Måss seme ene lavåsse, ene pinsêye,

Dins nosse djårdin ki dj' va prusti,

Po-z î fé crexhe li powezeye

Et redjårber li tchenowe tiesse di nosse påkî.

Ferdinand Flaba, divins: Les Cahiers Wallons, 56, (4), do moes d' avri 1993.

E moes d' fevrî.

E fevrî, moes gris come do chlam

Nos avans cobén ene drole d' idêye

D' fé çou k' nos binamêyès mames

Disfindèt e nosse Walonreye.

Nos leyans goter e nosse cô

Del nivaye ki dene des frumjhions

Et nos fjhans des grands schirés trôs

E cou d' nosse bea noû pantalon.

A côp seur, on moumint après

Nos estans tot bleu moirts di froed

Adon, corant come des bidets

El måjhone, nos rmoussans, honteus

Po nos reschandi ene miete,

Nos rloucans danser les blamêyes

El tchiminêye plinne di soketes,

Et nos rovians totes ces tchitcheyes.

Pos nos rmete, nos nos raletchans

Avou ene tåte plakêye di tchoco

Tins k' e nosse cabu, nos nos djhans:

"Seur, binamés, nos l' serans co !"

Henri-Thomas Maron, divins : Bulletin Wallon, 02-03.

Fevrî.

Fevrî, etot metant s' nez foû

A l' air di dire: gn a rén ki presse

Troes côps so cwate et sins må d' tiesse

Dji fwai m' buzogne so vint-ût djoûs

Cwand i voet li tchandleuse si lver

So ses betchetes, ritnant si alinne,

Avå les eglijhes i s' pormoenne

Et tape on côp d' ouy so ls åtés.

Il est malén come on vî rnåd

Avou l' ivier i djowe al catche

I n' a waire di bons toûs dins s' saetch

Et todi l' pîce po mete e trô

Portant bénrade dins nos djårdéns,

Si l' froed n' fwait nén trop d' mariminces

I coverrè les ptitès sminces

Tot rsaetchant ses mofes tot douçmint

Mågré k' afeye si flåwe solea

A nos finiesses vént fé rizete

Tot ratindant por lu lver l' guete

Ki måss l' åye metou dins s' tchena.

E. Tilleux, divins Li Chwès, fevrî 2002.

Proverbes sur le mois de février.

Sipots sol moes d' fevrî

Cwand l' bijhe roveye fevrî, ele ni roveye nén may.

Si fevrî djowe di s' dirî, måss trouve ses poteas plins.

Plouve ou moes d' fevrî våt d' l' ansene.

Nive do moes d' fevrî våt fumî

Mete djanvî so fevrî

Fevrî a onze beas djoûs

>> Cwand i fwait laid l' doze di fevrî (disfondowe pol rimaedje: fèvrîr), i fwait laid shijh samwinnes etires:

C' est dins l' moes d' fevrî ki les femes cåznut l' moens

Fé des ouys come on marcå å moes d' fevrî

Février dans l'almanach de Han.

Fevrî.

Fevrî ! Rafroedi moes d' fevrî !

Les loumires del Tchandleuse ki blamtèt a l' eglijhe n' ont nén tchessî les noereurs di l' ivier. I cbijhe laidmint dispoy sacwants djoûs. Li bele tinre nive do dierin moes a divnou ene deure crosse, aclapêye so les teres.

" Dji n' vôreu nén esse al copete di Soyire avou l' panea dins mes dints" dijheut i nosse pere e rintrant tot vessou. Al copete di Soyire ! On tiene padrî l' viyaedje, raezé, asplati come ene tåve. C' est la k' el bijhe shofele et xhufele a plaijhi ttå long d' l' ivier.

Ele rabote les rotches et s' aratchî ås bouxhons di spenes po s' vini rabate dins l' Grande Schavêye.

L' Aiwe-di-Lesse, dins l' foirt vî tins, passéve par la, å pî des grands tienes : Fåle, Bwinne, Tinémont, Soyire et l' Tiene d' Uk. On djoû, a foice di soukî sol rotche di Fåle, elle a passé å triviè d' on plin côp. Li Trô des grotes, padrî, l' a avalé tote etire. Li grande Schavêye s' a vudî do côp et les tienes s' ont rtrové tot vîs, foû d' aiwe, a pîs dischås.

Ådjourdu, tenawete, cwand i rlegne a blame, et k' el Gofe di Fåle ni sait tot boere a fwait, li Lesse riprind cobén l' voye del Grande Schavêye et les tienes, tot binåjhes, di s' ritrover les pîs dins l' aiwe, si djhèt k' il ont djéryî lontins assez après.

André Henin, divins: Årmonak do Payis d' Han, Les Cahiers Wallons, decimbe 1974.

 Si des mots difficiles se présentent à vous sur ces pages, allez voir s'il ne sont pas expliqués dans le Splitchant motî do walon (avec brève traduction française), ou dans le Wikipedia, l'encyclopédie en wallon (suivez: "Pordjet Esplicant Motî").

 (Back index par sujet) Alans rzè a l' edesse des sudjets.

 (Index par auteur) Djivêye des scrijheus. (dont les textes sont disponibles en wallon commun) Djivêye des scrijheus k' ont scrît u k' ont stî rashious e rfondou walon

 (Back textes en wallon commun) Ralans sol pådje des scrijhaedjes e rfondou walon.

(homepage wallon commun) Alans rzè eviè l' pådje moennrece do rfondou walon.

 (Back homepage) Alans rzè al mwaisse-pådje.

Sacwants scrijhaedjes di cisse waibe cial polèt esse dizo abondroets; nos les rsaetchrans foû s' i fåt. Sacwants bokets scrîts ezès walons coinreces polèt aveur sitî ene miete rassonrés po poleur shuve pus åjheymint les mwaissès-rîles do rfondou walon.

Some texts published on this site may be affected by copyrights and eventually need to be removed in the future.

Certains textes peuvent avoir subi des modifications mineures pour faciliter leur insertion dans le projet de langue nationale pan-wallonne.