Vera

On roman ki s' passe el Crimêye.

 dierin rapontiaedje - last update: 2004-08-13.

 

 (Cadre, personnages et chronologie) Adrovaedje.

 (Première partie) Prumire volêye: Vera 1.

 (Deuxième partie) Deujhinme volêye: Vera 2

 (Troisième partie) Troejhinme volêye: Vera 3

 (Quatrième partie) Cwatrinme volêye: Vera 4

Cénkinme volêye:

Li manaedje Zande va todi dpus a schî-fesse.

Cotaeyaedje:

22. Zande Marinov, bokion po s' plaijhi.

23. Li perlinaedje.

24. Li raploû d' Kîtche.

25. Zande rivént el Crimêye.

26. Li tchôcaedje da Tansou.

 

22. Zande Marinov, bokion po s' plaijhi.

Borispol, e l' Oucrinne, e moes d' may 1999.

Gn a nén si bea moes k' el moes d' may dins les grands fayis do payis d' Borispol, 30 km a Bijhe di Kiyev. Tote li veye, k' a dmoré recloyowe dins tere tot l' tins do long ivier oucrinnyin, si dispiete tot d' on côp. Li ramaye si rimplixh do tchant des fåbites et des mazindjes. Ké tchalminisse, cwand vos trevåtchîz les gonxhires di ttå matén ! Vos vs croerîz a l' Operå Bolchoy.

Zande Marinov prind todi condjî å moes d' may et l' aler passer dilé s' viye mame a Borispol. Cwantes côps Batisse Tchårlinov ni l' a-t i taené por zels aler e vacances eshonne a l' etrindjî. Todi ås cénk cints diales, et co pus lon, saiss, lu: Olande, Izlande, Espagne, Tunizeye, Gwadaloupe, Sri Lanka, Kenia.

Zande l' evoye boler, a tot côp bon:

- Va s' ti fé cori araedjî! Dji nd a d' keure di vey des belès femes et des beas payizaedjes di totes les cognes. Les femreyes, ça n' amoenne ki des displits. Dj' end a ddja assez avou ene, et c' est co ene di trop. Si dj' åreu sepou, dj' åreu dmoré vî djonne ome et viker sins må sins rujhe, trankile come Batisse... Nén twè, saiss, mins sapinse a çk' on n' dit.

Tant k' ås beas payizaedjes, gn a rén d' té k' les bwès et les hés d' Oucrinne, la k' dj' aléve pormoenner avou m' pa cwand dj' esteu djonne."

C' est dins ces grands bwès la k' il est pol moumint.

Davance, i s' fijheut aconcoister pa s' feme et les pus djonnes des roufions, les cis ki n' estént nén co trop hôt dins leus scoles.

Il arivéve minne k' i les meteut e scole po on moes dé Dimitri Petrov, on mwaisse di scole do hamtea. "Ça lzî fri do bén", dijheut i. La, il aprindront li vraiy accint oucrinnwès et les vîs mots d' nosse payis. Nén l' oucrinnwès ki les politikîs d' ouy vos cpitèt al tévé, avou totes les ratourneures do rûsse. Eyet l' croejhete !

So ç' pont la, Tansou, si feme, n' esteut nén contråve. Åresse, ele ni voeyeut nén todi l' adire inte li rûsse et l' oucrinnwès. "Cabu blanc, blanc cabu", dijheut ele. Et fé des fråzes mitan mitan avou des mots oucrinnwès stitchîs di håre et dins les codjowaedjes e rûsse.

Leye, c' esteut l' tatår k' ele vleut k' ses efants såyénxhe. Et po ça elle aveut bén adiercî s' côp. Ses troes roufions estént des féns cnoxheus do tatår, et l' cåzer sins l' sibrognter, dijh côps mî k' el Zande Marinov lu-minme.

****************

Ses vacances, lu, li Zande, c' est d' aler rovrer å bwès come bokion, come il î aléve avou s' pa estant roufion.

Ci djoû la, diviè cwates eures di l' après-nonne, Zande ripasséve dins li scole da Dimitri avou ene schlidêye di bwès.

Li ptit gayot esteut saetchî pa Bixhete, ene grosse cavale oucrinnyinne, k' il aveut todi a si vî soçon Natoli, cwand i vneut burziker dins les bwès tins di s' condjî do moes d' may. Dimitri vneut do fini ses lçons d' l' après-prandjire. I l' arinne insi:

- Tinoz! Kî vola kî ! Les bokions vacancîs sont rarivés. Comint k' ça s' fwait k' on n' a nén co veyou vos råpéns e scole?

- Ciste anêye ci, dj' a rivnou tot seu. Li feme esteut malåde. Si ridveut ele aler a l' ospitå po s' fé corwaitî les boyeas, et passer å scaner, et co des prijhes di sonk.

- Rén l' laid, dj' espere?

- Neni, elle a todi malårdé insi. Elle a todi pete u vesse. Tel kinoxhes bén, dowê ?

- Dj' ô bén k' ele fjheut pacô del coûtresse d' alinne.

- Oyi, pu ça a stî des mirinnes; pu on nucrê el pwetrene; pu li stoumak; pu les mås d' tiesse. Dji n' ti cåze nén des rognes inte les årteas, et les maladeyes di feme. Dj' estans dins les docteurs cåzu on moes so deus.

- Ça t' es bon. To n' aveus k' fé di t' maryî. Waite, mi, come dji vike pepermint, mi, droci. Dj' aprestêye mes scoles ene dimeye eure å niût. Pu loukî les novelès tchinnes parabolikes disk' a onze eures. Ass veyou mi nouve antene-schiele ?

- O kéne biesse ! T' endè doet aveur, des tchenås, avou on sfwait agayon.

- Taiss k' oyi. Et dj' elzès louke tant ki dj' vou, ca dji n' speye nén li hanete po l' amagnî. Gn a ene meskene ki m' vént fé a marinde on djoû so deus, des djotreyes ki dji rtchåfe li londmwin, avou ene såçusse u on biftek edoirmou el paile. Ene brijhêye å matén avou ene dobe crinme. Li cinsresse d' astok mi vént mete on lite di laecea tos les djoûs cwand elle a tot modou, al viesprêye. Djel leye boure tot douçmint so m' crapåd tote shijhe. Ça fwait ene bele sipesse crinme å matén.

Li dimegne, mi ptite gote di vodca, kécfeye bén deus, après messe. Pu, di l' après-dinner: al pexhe, al tchesse, al fotbale, shuvant l' såjhon. On côp l' moes, dji va a Kiyev po vey djouwer teyåte, avou ene viye amisse k' est divoircêye. Mins dj' a metou les ponts so les I. C' est djusse po ene shijhe u deus pa moes.

- Et ti n' rigretes måy di n' pont aveur yeu d' efants ?

- Pocwè fé ? Cwand k' i sont ptits, c' est bråyes et faxhåds, et moståde totavå. Cwand i sont-st al laidådje, ti nelzî såreus ddja fé schover ti dvant-l'-ouxh. Docô k' il ont ene eure di libe, hay evoye a dåripete !

- Mins inte les deus, t' as cwandmwinnne do plaijhi avou zels. Metans cwand ti båshele ti vént rabressî, et fé l' gåtêye so t' schô, cwand ti rvéns hodé di ti ovraedje. U la come l' anêye passêye, ki mes deus refoircîs gaméns ont vnou bouter avou mi et bwejhler tote ene pårt di bwès. Troes gros houpîs ki dj' aveu ratchté a "Drî les Fas". Tot rceper, finde et tcheryî!

- Oyi, dj' els a veyou î aler, cabén k' i ploveut. Des ptits stocaesses, tes djonnes ! Åresse, li pus vî d' tes fis, dji l' a yeu e scole cåzu cénk ans å lon, si djel tén bén. Il esteut bén a si ovraedje. Li pus djonne, lu, esteut pus djouwete, mins ça pasrè, saiss.

- Voess bén k' c' est plaijhi eto d' end aveur, des efants!

- Mins mi, mafrike, dj' end a ene grosse trintinne tos les djoûs å matén. Et dj' a po fé avou zels... Mins la k' i m' vént ene apinse. Pocwè k' on n' freut nén ene escursion dins t' pårtaedje, et twè lzî mostrer l' cwåcwå di çou k' c' est l' ovraedje di bwejhleu. Li samwinne ki vént, ça t' îreut, ça, sabaye?

- K' i våye! Mins djudi, dabôrd, ca londi et mårdi, dji va moenner m' mame addé s' soû, a Novgobork.

- Bouxhans l' martchî djus po djudi, dabôrd. Et mierkidi, t' elzî vénrès ddja dner scole so les usteyes et l' motî do bokion. Si ça t' ahåye, todi.

- Iva ! Dji loucrans d' aprester ça a môde di djin. Dj' apoitrè des hepes et des cougnets, et ene viye ricepe a deus mwins, et ene rifindrece, li soyete et l' gretoe

Albouneure. Ké plaijhi d' fé handele avou twè !

****************

Les efants estént tot binåjhe di rexhe foû del rotene, avou on novea scoleu et des scolaedjes pus addlé l' bouye di leu parints.

End aveut sacwants ki leu pa esteut ovrî d' bwès, dins l' sovxhoze forestî di Xhashnov. Mins dispu cénk ans, on djåzéve di privatijhî totes les societé d' estat. Ça fwait k' il alént motoit dveur divni des ptits boskiyons a leus boûsses. Et leus råpéns les aler aidî tot djonnes. C' est çou k' elzî pindeut å nez, todi. U bouter po des grossès soyreyes k' alént ratchter l' cayet, et, sorlon les nouvès lwès do capitalisse diner a leus ovrîs des mo ptitès cwénzinnes.

Fini l' trevéns comunisse, la k' on-z aveut s' pwin cût. Nén viker so blancs poes, mins tertos å minme livea. Elzès fåt vey, ouy, les noveas ritches: des ancyins aparatchniks k' ont divnou traeyincieus [business-man]. I s' recresnut come on cok so si ansinî, et vos loukî did hôt, vozôtes, les noveas moudjiks.

Ca l' paradis k' on aveut prometou å tcheyaedje do meur di Berlin aveut radmint divnou èn infier po les ptitès djins. A Kiyev, metans, to rvoeyeus des bribeus a grand côps ki vnént stinde leu mwin al rexhowe des eglijhes, novelmint rdrovowes po les djins aler rfoumer leu-z opiom, sapinse a Karl Marx. Et des rôbaleus come divinltins, avou des viyès håres, ki tournént les viyaedjes po-z aveur ene djate di sope, et vinde des bonmartchîs GSM et des lunetes di solea.

****************

Les efants, di dj', estént firs come ene poye ki vént d' trover on vier cwand il ont arivé zels vint, valets et båsheles, emé l' fayi, sol tchantî d' abataedje.

Zande aveut leyî ene grosse hesse, a mitan etaeyeye å dzo, pol flaxhî djus divant zels. Il aveut stî rcweri ene fonne boutrece, et l' emantchî so ene pîce cwate metes longue - ene pitite beyôle ki trinnéve å mitan do fayi.

Les gaméns ont astoké l' boutoe a on vî sto et mete li fonne conte l' åbe, pu s' pinde après pol tinkyî. Li pîce fletche mins l' åbe tént co. Zande escourcixh li tronçneuse - li rcepe-å-moteur k' on dit en oucrinnwès - et co rsoyî ene taeye evoye. Pu on ptit côp d' abatrece å mitan, la k' gn a l' nieron d' l' åbe. Asteure, i sait k' ele va ndaler; i fwait rescouler les efants ki rwaitnut. Et ås troes ptits "abateus" :

- Asteure, fijhoz verdjî comifåt l' boutoe !

I s' ripindèt après, di tot leus pwès.

Ådzeu, sol buk di l' åbe, li fonne a dischindou di dijh cintimetes, et dmorer la ahavtêye. Li coxhlaedje a bodjî ene pitite miete.

- Co on côp !, dit-st i Zande et i fwait flitchî l' pîce d' on grand côp.

Li grande hesse si leye endaler, douçmint aprume, pu etrinnêye pa s' pwès, si vént aflaxhî å pî des efants, ki s' ont ratroplé åtoû do mwaisse Dimitri.

Li brut do coxhlaedje ki djond tere, et l' cracaedje do stok cwand les dierins atnas ont schorté, et l' mitan des efants ont la dmoré ståmusses.

Nén po lontins. Tchaeconk a stî rdjonde si ptite ovraedje ki Zande lezî aveut dné. Les båsheles ont rsoyî les pus ptitès coxhes; elle ont-st aprin a sonner les rondéns. Sonner on bwès, c' est peler li schoice a ptitès schirådes so ene binde di tchaeke des costés.

Les valets ont findou ås cougnets avou l' merlin. Zande elzî aveut apresté des belès droetès rouyetes, ki n' plént må d' schetler.

End a minme onk k' a rcepé al soyete-å-moteur: on ptit stocaesse k' aveut ddja stî bwejhler avou s' pere. El faleut vey tini l' tronçneuse tot ascoxhant et ployî so ses djnos ! On vrai bwejhleu d' mestî !

Zande li hazéve, didins l' fayis; i passéve d' on grope d' efant a l' ôte et lezî mostrer kimint s' mete po soyî, kimint tni on cougnet, et hay vos nd åroz. Et Dimitri k' el shuveut, el respliker ås cis et ås cenes k' estént on pô deurs del coprindeure.

Dj' è respond k' il åront doirmou come des taessons, tos les tchots, cisse nute la !

 

23. Li perlinaedje.

todi a Borispol, e l' Oucrinne, e moes d' may 1999.

 

Nén come Zande!

Dispoy li djoû k' il aveut racocoisté Vera e s' tchambe, i gn aveut on drole di sintimint k' aveut moussî dins s' coir. Ça fjheut ki, cwand il esteut tot seu, sins rén d' ôte a fé ki d' tuzer, ses pinsêyes ralént viè l' glawene.

N' esteut ça nén li minme sinsåcion ki, cwand il esteut on refoircî gamén, -- po dire li veur, dispu k' on refoircî gamén mins nén co on ptit djonnea --, il aveut dné radjoû a ene crapåde ki rivneut e vacances a Borispol.

Ciste ådje la, cwénze, saze ans, les grandès djins l' lomèt li laide ådje.

Laide, ci ådje la ? Nén cwand to rsondjes al påye ki t' aveus dins l' coir li djoû ki t' as prin t' velo, avou deus ôtes roufions di ti ådje, et-z aler rtrover Raysa et si copleuse, k' avént vnou e bwès pa èn ôte roti.

Ké coehisté, ké påjhûlté låvå, ashîs ambedeus dins les setons, avou l' ôte cope di grands efants on pô pus lon, et l' dierin roufion, come li cénkinme rowe d' ene tcherete, ki "tneut l' tchandele", tot wårdant les velos.

Mins seur k' i s' recretéve ossu, li råpén, di ddja esse emé les radjoûwisses, et vey çou k' c' esteut do hanter. Et k' i n' aveut co k' traze ans, lu, paret !

Vos n' serîz nén si fir, vozôtes cwate, si vos sårîz k' i va bérade ales ramter totavå, et fé do racuze-pote, et ki tot Borispol serè divant waire å corant d' vosse furdinne.

Cwè çk' il aveut fwait avou Raysa ? Rén ! Nén ddja oizeur l' aduzer avou s' mwin. Djusse dimorer la, cweri des mots a dire, des mots ki rmoussént e s' gozî cwand il arivént so les lepes. Rén dire, alfén, u cåzu rén, u des bièssès sacwès k' i n' si sovént pus çou k' elle a respondou.

Et mågré tot, trover ki l' tins n' a pont d' rasta, ki les minutes xhårèt, volèt, sitepèt-st evoye bråmint trop vite. K' el solea est ddja so l' Ombrant. K' i fårè bénrade rebroker eviè Borispol, pa les stroetes pî-sintes emé l' bwès, pu sol hôt-tidje ki corèt so l' crestea. Adonpwis, dischinde sol veye, Borispol, k' est metowe dins ene foxhale, schavêye dins les grandès pleneurs d' Oukrinne.

******************

Li londmwin del sicole dins les bwès avou les scolîs do mwaisse Dimitri, Zande a stî rcweri on vî becson k' il aveut rabôré dins l' forni dilé leu måjhon. El espoûsler comifåt, rigonfler les pneus, recråxhî li tchinne et les cåbes des frins, et vo l' la presse por lu fé çou k' il aveut lomé dins lu-minme "si perlinaedje".

Il a prin li ptite gritchete ki monte dirî Borispol. Ene miete djus d'alinne, il a epoenté li Hôt-Tidje pu pedaler a si åjhe disk' å Bwès do Bahotea. C' est dins ç' grand bwès la ki, la totaleure 30 ans, il aveut dmoré dilé ene crapåde di si ådje, nén co rsouwés dirî les orayes ni onk ni l' ôte. Il avént dmoré la deus eures å lon, di dj', cåzu sins dvizer. Adon, il aveut rsintou ene påjhûlté e si åme, li minme ki cwand, djoû après djoû et nute après nute, i rsondjive a Vera.

Il a rtrové a pô près l' clairisse k' i s' î rapoûlént avou les djonnes do hamtea cwand k' il estént des "ados". I s' î a ashî dins les fenaesses come davance, et pinser a Vera.

Il aveut sovnance des sayes d' evoyaedje å lon des pinsêyes ki les sincieus rûsses do tins d' l' URSS end avént studyî les pondants et les djondants, les boutants et les royants. Dinltins, Batisse lyi aveut sovint mostré des papîs ladsu. Zande, sins end aveur li prouve, aveut dins s' tiesse k' il aveut des dons parasicologikes.

Eto, il evoya on tuza a Vera. Ene sote pinsêye: li pus biesse des pinsêyes k' on djonnea evoye a ene djonnete. I lyi djheut:

- Dji vos a todi bén inmé come copleuse. Dji n' di nén "eployeye", ca dji vos l' a todi dit: fijhoz come si l' buro Marinov sereut da vosse. Mins asteure c' est ôte tchoi ki dji rsin por vos: dji vos voe voltî.

Vo t' la crås avou ça , Zande Marinov !

Ti, èn ome fwait, li boss d' ene PME, ki tertos rwaite come ene djin bén rashîte, ti voes voltî ene glawene ki ti n' sai ddja si ele n' a pont galant.

Oyi, da ! Ça c' est ene sacwè k' i fårè di tote foice lyi oizeur dimander.

******************

Po vni e velo disk' arci, Zande a souwé ene tchimijhe.

K' i waite bén a lu di n' nén esse croké, la, tot frexh di tchôd, k' i s' ashîd sol froede yebe. I n' fwait nén co la si tchôd po rsaetchî inla s' paltot.

Il a distoirtyî s' marinde, des fadêye avou del sirôpe dissu.

I s' rapinse, cwand il esteut ptit k' i gn aveut todi deus pailons d' laecea ki tchåfént sol dirî del sitouve. Do cô k' il estént po boure, on les meteut lon erî d' l' aisse, et li crinme montêve tot doûçmint. Les vatches d' adon, ci n' esteut nén co les grandès cafloreyès dneuses, k' il ont-st apoirté d' Pologne et del Daenmåtche lanawaire, et ki "pixhnut" des 20-30 lites di laecea, et co hay. Neni, cwand il esteut djonne, c' esteut des ptitès grijhès vatches, des emîtrinnes, ki dnént cénk a dijh lites, mins nén dpus. Mins ké spès laecea, la, ti, monparan. T' aveus cåzu on doet d' crinme cwand tel leyives sol sitouve tote li nute.

Adon, å matén, i prindeut cisse crinme la -- tchaeke efant aveut droet a on dmey- pailon -- et l' sitinde so ene rosteye. Ene rosteye, c' esteut ene pîce di pwin griyeye dins l' cofe del sitouve, u sol take do crapåd del tchambe divant.

Disso l' coûtche di crinme, i rmeteut co ene pitite coûtche di sirôpe. Li maxhaedje del blanke crinme et do noer poeret dineut ene coleur come les polenes di poyes. C' esteut insi k' on les loméve, ces tåtes la: des strons d' poye.

C' est çou k' il a sayî di rfé avou del makêye atchtêye dins les noveas grands botikes k' ont flori a Kiyev dispu li dishonnaedje di l' URSS.

Asteure, li Zande magne si tåte; i s' a vudî ene castêye di cafè.

I s' rimimbere Raysa, la di dipu d' vint ans, cial, dins ç' bwès ci, motoit dins s' clairisse ci. I tuze a Vera, et c' est l' minme toctaedje ki vént cabardouxhî dins s' coistrece.

L' anêye ki vént, seur k' i priyrè a vni avou lu e l' Oukrinne, e moes d' may. Come ci sereut clapant di fé eshonne des longuès pormoennådes dins les fayis åtoû d' Borispol.

Ele lyi a raconté k' elle aléve voltî dins les "Crimski Gori", cwand elle esteut ås umanités, avou les djonneas et djonnetes di si atenêye. Les båsheles dimorént raddimint padrî. Mins leye, elle esteut padvant, avou les pus stocaesses des valets. Gn aveut nouk a lyi prinde po-z achever les gritchetes, cwand les pazeas s' avént alårdji et divni des grandès waides et k' i shuvént a bouf, avou l' såme d' ariver al cahoute metowe ådzeu do tiene, la k' s' divént tertos rtrover.

Dayeur, c' est a cåze di ç' pont la k' ele ni s' såreut etinde avou Esmayel. Dj' ô bén, k' elle esteut todi stitcheye avou les valets, et asteure avou les omes fwaits. Åresse, c' est po ça k' on n' si såreut pus passer d' leye å Buro Marinov. Cwantes pratikes k' avnèt al riçujhinne et dmander, tot d' ene trake: est ç' ki Mamjhele Vera est la?

Ci pont la et co bråmint des ôtes.

Esmayel est on Tatår. Il est djalot. I n' sopoitrè nén ki s' feme soeye todi avou des ôtes omes. Esmayel si feme, ele serè reclôse e leu måjhone. Ele frè a marinde, li manaedje, schover les poûssires, refaxhî les efants.

******************

Zande si ratuze.

Di, blanc, cwand ti t' cougnes el tiesse k' Esmayel ni s' såreut etinde avou Vera, ni sereuss nén djalot, twè l' moncadet ? N' åreuss nén cråndimint l' beguén po ç' crapåde la ?

Et si Esmayel toûne åtoû d' leye, c' est di t' difåte. C' est twè k' els a coplé, dipus d' on côp, po des ovraedjes k' il î alént dmorer avå les voyes disk' a meynute meyzeure.

Bén c' esteut po diswalper l' Buro Marinov, taiss. To n' es pus do tins d' l' Union Sovietike, paret, ki t' aveus les ålouwetes ki t' tcheyént el boke totes fricassêyes, avou les grossès cmandes di l' Estat. Gn aveut k' a-z ecråxhî l' pate do Directeur di l' Ahessance des scoles, des administråcions, et ti vindeus (adon) 500 copiutreces d' on côp, et facturêyes tchir et vilin, cobén.

Cwand t' î rsondjes, a ces grossès dondons di djéndjoles la k' avént tot djusse 5 kilowoctets d' ovrante memwere. I faleut rcandjî deus côps d' deure plake po-z ecôder totes les trawêyes cåtes ki dnént les traitmints des maréns del shijhinme flote. Li shijhinme flote, c' est l' cene del Noere Mer; elle esteut edjîstrêye å poirt di Sebastopol. Asteure, i s' l' ont pårti e deus, li mitan po l' Rûsseye, k' est revoye a Flovorosiyisk, et l' ôte mitan po l' Oucrinne, todi a Sebastopol, mins avou cåzu pupont d' liårds. Minme les dôféns-sôdårds, dressîs avou des colés electronikes ki c' esteut lu k' aveut edvinté, l' amirålté les vout vinde al håsse.

Asteure, les administråcions rastrindèt tertotes. Mins davance...

End aveut i wangnî des cwårs, insi, å cmince, sins må sins rujhes.

Mins, dispu 1997, k' i gn a ene cwénzinne di martchands d' éndjolreye rén k' a Simferopol. C' est l' ci ki boute a môde di djin ki wangne, et les ôtes dimornut foû voye. Et al fén, diveur taper l' ouxh sol beur.

C' est po ça kel cope Esmayel-Vera, c' esteut l' prumire ekipe do Buro Marinov. Vera, todi avnante, todi plaijhante et foirt capåbe tecnicmint; Esmayel, malén kel diale, ki cnoxheut come si taxhe les dujhances di tos les peupes del Crimêye: les Tatårs, les Rûsses, les Oucrinnyins, les Almands, les Turks et les sacwants Walons, come li Batisse Tchårlinov. Esmayel, c' esteut co l' ci ki parpinséve les "sistinmes D" po racopler les copiutreces bulgåres avou les scrireces turkes et des triclêyes d' ôtes emantchaedjes inla.

Ene bele cope, po l' ovraedje, Esmayel et Vera.

Mins foû d' l' ovraedje est çk' i gn a ene sacwè inte di zels ?

Tén ! I m' shonnéve ki, ene des mwaissès atuzes di t' filozofeye, c' est di n' nén tchôkî t' narene dins l' veye privêye di tes eployîs, ti, Zande Marinov ?

Mins gn a-t i åk inte Esmayel et Vera ? Dji vôreu bén saveur cwè. Dj' î a ddja tuzé co traze côps: i n' sårént viker come ome et feme. Elle est deus troes ans pus viye ki lu. Ça n' si voet nén, dins les Tatårs, èn ome ki spoze ene feme pus viye ki lu. Et leye, ele serè djinnêye, el société, di dveur dire ki si ome n' a måy sitî a scole. Cobén ki, leye, elle end a-t a keure, di ç' pont la. Do costé des familes, c' est l' cene da Esmayel ki n' accepteyront måy Vera, ene baståde, sapinse zels.

Ça l' fwait araedjî, li Zande, des sfwaits djudjmints. Come si ene djin e pôreut åk di çou ki s' a passé inte di s' pa eyet di s' mame, la des ans et des razans. Si c' est ça çou k' les canleus lomèt traitiveuzmint ene baståde, k' end ass, des pareyes, come copleuse, et minme come kipagneye !

Mins t' end a ddja ene, Zande Marinov, di cpagneye. Et ene bele feme, cobén, ki bråmint des omes del hôte a Baxhatchasaray et minme a Simferopol, årént voltî a leu bresse, po-z aler l' semdi å restorant u å teyåte, u minme peter on rigodon dins onk des novea dancignes di Yalta u Alouchta.

Ez-zîn fî d-defla, wa aaragou harrîn.

C' est on spot tatår ki Zande si rapinse docô, cwand on lyi dit ki Tansou est ene foirt bele djin et k' dabôrd, i n' si dvreut nén plinde.

K' end a-t i d' keure, del beaté, si c' est po viker cohigne cohagne då matén disk' al nute et do prumî d' djanvî å trinte-ey-onk di decimbe ! Si c' est po dveur briber disk' å droet di poleur coûtchî avou leye. Si ç' bea coir la est toltins dvant vos iys, mins ki vos nel poloz aduzer, ki vos nel poloz candozer, fiesti, prusti avou vos mwins. Udon, c' est tot fjhant tote ene ceremoneye: priyî l' djin å restorant, lyi fé ene bistoke, lyi apoirter des fleurs.

******************

Et Vera, leye, kimint çk' ele sereut ?

Zande si rapinse, honteuzmint, li prumî côp k' i l' a-st aduzé. C' esteut la deus ans, tins do cwareme muzulman.

Ciste anêye la, il avént yeu si tant d' ovraedje k' i n' aveut sepou aler disdjuner tos les djoûs a Yalta, come el fijheut les anêyes di dvant. Ça fwait k' i magnént leu prumire eurêye -- li disdjune, u l' soper dabôrd -- å buro. Tant k' al marinde -- u dinner -- il avént assonré ene pitite coujhene å depot, astok del tchanbe da Vera. Zande evoyive Esmayel ås conissions diviè dijh eures et cwand il aveut tot atchté, i l' aléve moenner å depot. I rivneut co bouter ene eure so s' buro. Pu, eviè meynute, il aléve ridjonde les deus ôtes, k' avént fwait d' aprester l' amarinde. Come i fjheut frisket -- li cwareme moslimî touméve e moes d' djanvî -- il alént magnî dins l' tchambe da Vera, la k' on-z aveut astalé on ptit tocoe å bwès. I magnént so ene pitite basse tåve, a môde tatåre.

Å pus sovint on-z apoirtéve li lélêye di tchå avou les verdeures ki bagnént dins ene mo picante såce. Tchaeconk prindeut on boket d' pwin, et trimper l' betchete dins l' såce. Pu apicî, inte li pôce, li londi et grande dame, on ptit boket d' tchå et on cougnet d' crompire. Li canada, u ene ôte verdeure si spotchive après l' pwin. I n' dimoréve pus k' a drovi ene grande boke et avaler l' betcheye.

On côp par samwinne, i fjhént do plof, avou do riz, del tchå et des raecenes.

Après marinde, i dmorént la ene eure a dvizer di traze et d' catoize, tchaeke refûlé dins on spès covtoe.

Cwand Batisse Tchårlinov a sepou ki les deus coperes et l' comere magnént tos les djoûs a Toptoukay, i s' î a fwait priyî. "Dji vos frè des boûketes" a-t i dit. Vos n' åroz måy gosté åk di si bon.

Batisse a amoenné les ingredyints: del farene di boûkete, des oûs, do laecea, des corintenes et di l' ôle d' olive. C' est Vera k' a fwait l' cadon. Après, c' est Esmayel k' a tchåfé l' ôle d' olive dins l' pailete, ene pitite pailete esprès po les vôtes.

Vera vude ene loçlêye di cadon dins l' pailete. Ça petreye. Cwand ça a prindou ene miete, el fåt rtourner e l' air et k' ele ritoume dins l' paile so l' ôte des costés. I fåt bén awè l' toû.

Batisse lezî a mostré pol prumire.

Après, c' est Esmayel k' a sayî et il a yeu radmint atrapé l' toû.

Vera a vlou sayî. Ele s' a rescoulé ene miete, kihossî l' paile on côp u deus, come po prinde si alondon al vude. Adonpwis, fé potchî l' boûkete e l'air. Ele (li boûkete, dabôrd, nén Vera !); elle a rtcheyou rployeye so leye-minme ene grosse mitan dins l' paile, va co bén ! On-z a achevé del ritourner al fortchete.

Zande n' a nén vlou esprouver. Il aveut trop sogne di n' nén poleur adiercî s' côp, et les ôtes li balter.

Esmayel a continouwé a cure les boûketes et les astapler so ene grande assîte.

Après els ont rivnou magnî dins l' tchambe da Vera.

Ki n' esteut ele fire, nosse ptite djin, avou ses troes omes åtoû d' leye, a magnî les glotinreyes ! Et schoûter Batisse dire tos les pondants et les djondants del boûkete ! Wice k' on l' coûtive, kibén k' ça rind et, copurade, l' uzance di fé ces ptitès vôtes la - zels-minmes lomêyes des boûketes - å Noyé, dins l' payis di ses tåyes, li Walonreye prûsyinne.

Todi a rôbaler sol Daegntoele, Batisse aveut toumé so ene libe eciclopedeye so les fyis, la k' il aveut trové tot l' pona et l' cova sol boûkete, et e walon, cobén. Docô, i l' aveut ratourné e tatår.

- Vos rvénroz co dmwin, edon, monsieu Batisse ? aveut ele låtchî Vera

- Si vos m' priyîz si binamêymint, pocwè nén ? Aveut i respondou l' gros ome.

Il a yeu l' coye. Li londmwin, si feme si rapoentéve di Kiyev. Elle aveut prin condjî pol restant del ramdinne, k' elle aléve passer avou lu a Simferopol. Faleut vitmint egadjî ene meskene po lzî aprester totes les eurêyes inte Solea djus et Solea Lvant. Etur les amagnîs, on djouwreut å cwårdjeu, al kine et ås ôtes djeus, po coschirer l' tins.

'L a co falou astapler ene novele antene-schiele avou 225 tchenås. Come ça on doimreut di 5 eures å matén a nonne, et les djournêyes serént foû coûtes. On n' les voereut ddja passer. Si n' si sintreut on nén awè fwin.

Zande lu, si meta a aler pus yeure a Toptoukay, tot-z apoirtant ene pitite ovraedje a fé avou Vera inte onze eures et meynute, tins k' Esmayel aprestéve a magnî.

On djoû, dji n' sai pa ké sint, on vna a djåzer di moennaedje d' oto. Vera aveut passé s' permis mins ele n' aveut måy moenné, après les lçons d' oto-scole

- Si vos vloz, dji vos frè raprinde cwand vos åroz bén l' tins, et k' i gn årè waire di trafik avå les voyes.

C' est Esmayel k' aveut recassî, va-z è vey pocwè:

- Et pocwè nén, asteure, del shijhe, did cial al veye et rivni ?

- Pocwè nén? aveut i dit Zande.

- K' i våye shofla-t ele Vera, tote efoufieye.

******************

Å cmince, Vera rôléve come ene aprindisse ki n' a måy yeu on volant dins les mwins.

Ele ni saveut passer les vitesses. Ele ni sepeut prinde les tournants. Pacô ele les rcôpéve et des ôtes côps ele ralårdixheut pår, et si rtrover di l' ôte des costés del voye. Cawnd ele passéve ene ôte oto, ele si rmeteut a droete trop timpe, et rcôper li dvant a l' ôte, ki fjheut aler ses fåres pol brognî

Zande saya di lyi aprinde a passer ses vitesses. Come ça n' aléve nén co avou ses consiaedjes i n' trova rén d' mî ki di mete si mwin sol cene da Vera, ki tneut l' tén-cawe et tchôkî l' deujhinme, pu l' troejhinme pu l' cwatrinme. I n' avént måy sitî disk' al cénkinme, ca gn aveut waire di belès longuès droetès voyes dins l' cotoû.

C' est enocinnmint ki Zande aveut prin l' mwin da Vera po passer les vitesses. Li prumî côp, todi ! Pu li deujhinme, et l' troejhinme côp i s' aveut sintou tot mouwé. A on moumint dné, tot croejhant ene ôte oto so ene pitite voye lérece, Vera n' aveut nén rmetou ene pitite vitesse, et voleur rimete des gaz e cwatrinme. L' oto aveut stofé les fåres aloumés. Docô, Zande s' aveut clintchî sol moenneuse po-z aler shofler les fåres. Li boton, so ces Volga la est metou tot a hintche. Tot s' clintchant, di dj', tot l' coir da Zande aveut dmoré, ene houbonde, plaké conte li ci da Vera.

Abele k' adon, si sonk n' aveut fwait k' on toû !!!

******************************

Zande aveut dmoré tot l' après-marinde dins ses tuzinaedjes. I n' sinteut nén ki ça s' rafroedixheut dins l' fayis. Il esteut tevozè avou Raysa et téle ôte feye avou Vera e pinsêyes, dj' ô bén. Mins çou ki n' si rindeut nén conte c' est k' i gn aveut rén ki candjive dins bataedje di s' tchok-tchok, cwand i passéve di ene a l' ôte.

C' esteut l' deujhinme laidådje, ki s' winne dins vos tripes et vos boyeas come li prumire, cwand vos estoz on djonnea d' ene sazinne d' anêyes.

C' est l' diale di l' après-nonne, sapinse zels.

Tant k' a Zande, ça lyi aviréve esse purade ene andje k' on diale.

 

24. Li raploû d' Kîtche

Kîtche, li 28 di måss 1998.

Cwand to n' as pont d' tchance, to sereus martchand d' tchapeas ki les efants vénrént å monde sins tiesse.

Tot cåzant d' tiesse, li Zande Marinov si tneut l' sinne dins ses mwins, les deus keudes so s' buro.

Les rascråwes avént tcheyou sor lu ene après l' ôte. Come dit li spot : i n' esteut nén co rsouwé d' ene walêye ki l' ôte lyi arivéve so s' dos.

Po cmincî, c' est l' copiutrece-abruvoe [serveur central] del societé aveut calpeté, et nén moyén do rapexhî les dnêyes. Gn aveut bén des copeyes håre et hote so des plaketes. Mins va, la, twè rabocter tot çoula come ça esteut arindjî dins l' mwaisse éndjole.

Il aléve faleur des moes po rmete les brebådes eshonne.

Après, c' esteut l' ONSS ki lyi aveut toumé so s' dos.

On ptit controleu hape-tchå k' aveut abroké on bea djoû sins dmander radjoû. C' est k' i vleut raveuri tote li contabilité 5 ans en erî, nost ome. Tot ça, po vey si l' patron n' aveut nén metou come costindjes sol dos del societé des sacwès ki lyi siervént dins s' manaedje, les frigos et l' coujhnire, metans. Paski, dins ç' cas la, ça dveut esse riprin come advintaedje valant salåre et lu payî dso les 20 åcint di lwès sociåles.

Zande l' a evoyî boler. I s' dijheut kel Surté Sociåle n' aveut nén l' droet di vni rnaxhî dins ces contes la. Ki c' esteut la l' ovraedje des contribucions. Et k' el fayé controleu n' aveut nén l' droet di s' prezinter e l' eterprijhe sins dmander radjoû.

L' ôte n' a nén leyî ouve. Il a co vnou bouxhî a l' ouxh on deujhinne côp. Zande l' a evoyî amon Natasha, k' esteut responsåve do persounel a ç' moumint la. Cisse-ciale lyi a dné totes les foyes di declaråcion di tos les ovrîs. Mins l' ôte n' a rén volou prinde. I n' vleut nén aveur a fé a ene eployeye; i vleut djåzer avou l' patron.

Zande n' a nén vlou ployî. I lyi a rclapé l' ouxh å nez.

- T' es biesse a magnî do four, lyi aveut i dit Batisse. To lyi åreus yeu dné 150 grivenes (30 uros) po lyi ecråxhî s' pate, et i t' leyive e påye. Wai, asteure, i t' fårè dipus d' deus miyons (4000 uros) po t' disfernukî. Cwand i vont prinde leus barinmes, i vont vleur moirdicusse ki 5 åcint des costindjes, c' est des advintaedjes ås ovrîs muchyîs po n' nén payî l' ONSS.

C' est l' Batisse ki l' aveut co saetchî foû di spexheur:

- Dji va cåzer por twè a ene soçondje k' est mwaisse controleuse a Yalta. Motoit k' ele pôrè arindjî çoula. C' est ene ki n' si leye nén stoker l' pougn [corrompre] cisse-lale.

******************

Li feme l' aveut rçû, foirt polimint. Zande lyi djha platkizak ki li ptit controleu hape-tchå aveut sayî d' l' abriber.

- Oyi, on l' conoxhe bén, ci-la. Mins li batch s' a rtourné sol pourcea. Dispu don, il a stî prin sol tchôd fwait, et evoyî å yoyo po ene afwaire di fås tcheke. Come il aveut do souke [diabète], i lyi faleut ene pileure d' insulene totes les 6 eures. Et il a-st atoumé k' on l' a metou al piole on wekene ki les wårdeus d' prijhon estént e greve. Gn a nolu ki s' a rtourné d' lu, cwand i s' a coutchî so s' bedreye, come po doirmi. Il a rade sitî dins l' coma, sins ses pikeures. On l' a rtrové moirt li londmwin å matén.

- Li Bon Diu si åme !

- Et l' Diale ses oxheas ! On-z a conté k' il aveut distourné dipus d' 500 miyons. I prindeut les prumes d' acoûtchmint des overresses tatåres. Ces-lales ni sont nén si sûteyes ki les ôtes po vey k' on ls a groujhî, et ni oiznut nén aler rclamer.

Il apicive les ewalpeures avou les tchekes des prumes divant k' ele ni rexhénxhe al posse. I rwaitive li limero d' l' operåcion, pu i moussive el contabilité cintråle, a pårti di si éndjole. Il aveut hapé l' passe-avant [code secret] dji n' ti sai kimint. Et il evoyive les liårds so des contes del mafia rûsse, ki blankixheut les cwårs, et payî ses ahesseus dins ses handeles låvå. Paretreut k' il a bén deus bildignes a Moscou, avou tot cwårtîs k' i louwe beazè tchir.

- Li Bon Diu a ene longue vedje. C' est nén lu k' endè profitrè, asteure.

- Neni.

- Asteure, mi: et cwè dins tot ça ?

- Vos, dj' a tot ene dossire sor vos. I vos a noeri pår. Dji n' sai cmint fé po vs distraper. Sayîz todi d' trover des vraiys advintaedjes ki vos dnez a vos ovrîs, et ki n' sont nén contés dins leus gadjes: amagnî, lodjmints, et vos nd åroz.

Zande a declåré li ptite tchambe ki vera lodje divins, li ptite måjhon do wårdeu do depot, les marindes k' i payive, a Nooman et a Esmayel et sacwantès ôtès tchitchêyes.

Nén grand tchoi, va, tot ça.

Li mwaisse controleuse sicrijheut tchaeke côp k' i djheut åk. Et dmander a tot côp bon: "Et kibén k' ça våt, çoula ?" Zande respondeut oniestrumint.

Cwand il ont yeu tot fwait, i s' ont dné ene boune pougneye di mwin come divant l' guere. Et Zande a ralé tot contint.

Ene sifwaite sipene foû do pî, a-t i pinsé.

- Dji vos evoyrè l' note, aveut ele dit li ptite feme, tot l' baltant.

Sacwants djoûs pus, tård, li note ariva, come d' efet. Mins c' esteut ene salêye. Troes miyons, dj' ô bén: 30.000 grivenes (6000 €).

Cwè çk' i faleut fé ? C' est lu-minme k' aveut siné les foyes di declaråcion, et avirer çou k' les paymints e nateure valént !

******************

Li prumî måleur, c' esteut l' indjolreye k' aveut tourné do cou.

Deujhinme, i s' aveut fwait sinte pa l' Surté Sociåle.

Et pol cougnet, la k' i s' rind conte, wai, asteure, k' i n' ritrove nén les plaketes avou les programes po cmander ås dåféns.

Dji vos nd a ddja djåzé, dowô ? C' est ene pitite tchike electronike k' on mete dins l' oraye des dåféns. C' est on pordjet diswalper pa l' Acwariom di Sebastopol, po les "dåféns-sôdårds".

Les "dåféns-sôdårds", c' est po les biesses ki boutèt po l' årmêye. I sont capåbes d' aler plaecer des menes dizo on batea u on somarén innmi.Seulmint, il ont cobén des zines, et on côp so dijh, i n' schoutèt nén leu dresseu. Et esse capåbe, adon, d' aler mete ene mene dizo vosse prôpe somarén. C' est ene ehale, ci côp la !

Avou les tchikes kel Buro Marinov aide diswalper, on va poleur ricmander dåféns-sôdårds d' å lon, cwand il avire k' end alèt foû voye. U minme les "diskimander" si pa des côps, i "rtoûnrént cazake" et fé l' contråve di çou k' on rawåde di zels.

C' est on programe classé u "copete-sicret". Et i doet aveur tot fwait po dins ene cwénzinne di djoû. S' i n' rimete nén l' mwin dso, i lzî fåt riscrire. Ôtmint, il atraprè les KGB d' Oucrinne et d' Rûsseye so ses rnos.

Dji di bén d' Oucrinne et d' Rûsseye. Paski, li mwaisse etcherpinteu do pordjet, c' est l' 6inme Flote Sovietike di Sebastopol. Et, mågré k' la dipus d' shijh ans ki l' Oucrinne s' a dislaxhî del Rûsseye, li 6inme Flote Sovietike n' a nén co stî pårteye inte les deus noveas payis. Åresse, ci programe vola a stî enondé divant l' dishonnaedje di l' URSS.

******************

Bouter dåre-dåre tote ci samwinne ci, sins rén fé d' ôte, po retcherpinter les programes ?

Tén, la rén ! Ass dedja rovyî ki, dimwin t' as on raploû a Kîtche. Les fabricants d' tchikes electronikes di tote li Daegn k' î vont vni prezinter leus dierins trovas. Li Pentium II d' Intel; ene novele "pouce" des Djaponès d' NTZ; et co ôte tchoi d' noû do costé des Motorola.

Ebén vo l' la, louke, li pîce po mete e trô ! tuze-t i Zande tenoncô nosse Zande. Xhiltante idêye, la, ça, valet, blanc ! Dji m' ti va fé dire ås militaires di Sebastopol k' on va diswalper des noveas programes, pus poûxhants, avou les novelès tchikes. Dabôrd, i lyi fårè ene rawete di tins po ndè vni å coron.

Insi, i pôront, bråmint pus a leu-z åjhe, avou l' aidance des deus djonnes edjenieurs ki sont e stådje, rifé l' ovraedje k' a stî pierdowe. Et minme pus djintimint et pus ovrûlmint [efficacement] ki ça n' esteut.

******************

Kîtche aveut stî tchoezeye pås raploujhisses paski c' est ene veye al frontire inte di l' Oucrinne et del Rûsseye. Waite: on pô come Estrasbork, e France,metowe a tchvå so France et Almagne.

Eto, Kîtche n' est nén si touristike ki Yalta mins c' est tolminme sol mer. Les otés, a Kîtche, costèt deus côps meyeumartchî k' a Yalta. Minme po les endjolîs ritches come Rotchile, ene mastoke, c' est ene mastoke.

******************

Zande aveut idêye d' aler å raploû avou tote ene asmala: Vera et Natasha, et les deus stadjaires ki dji vs dijheu enawaire.

Mins, cwand si feme Tansou a seu k' il aléve a Kîtche, elle a rclamé po-aler avou zels, por leye rivey des parints et des vîs camaerådes. Kîtche, c' esteut l' veye la k' elle aveut passé tote si djonnesse.

******************************

On måleur n' avént måy tot seu, vos a dju dedja dit.

Li djoû di dvant l' raploû, la bén kel grosse berlene Mercedes shijh plaeces ki Zande vleut fé l' voyaedje avou, a stî rmolowe pa on djonne tchåfeu. Il a rtourné l' tcherete dins les catoûnreyes des Crimski Gori. I n' mankéve pus k' çoula !

C' est co l' Batisse ki les disroké.

- Gn a l' viye Lada di m' feme. Dji tel vou bén pruster. Mins nén d' kession di s' ecassî a shijh ladvins. Gn a plaece ki po cwate djins.

Zande s' a rezoû a n' nén prinde les stadjaires. Åresse, i n' fåt nén k' il è sepénxhe ditrop. On n' sait jamwais, k' il irént vinde li programe a ene ôte societé.

I s' vont lever al pikete do djoû. Zande irè cweri Vera å depot et Natasha les ratindrè divant l' gåre di Baxhatchassaray. I pasront pa Yalta, po prinde Tansou.

Come dit, come fwait.

Cwand il est avou ses deus tecnicyinnes, Zande et gaiy come on pénson. Il a rovyî totes les rascråwes.

- Dji vos dmande escuze, nos damjheles, di vos moenner dins on sfwait tacot. C' est n' est nén, ciete, di vosse livea. Mins i fåt fé avou çou k' on-z a.

- Çou ki conte, c' est k' ele rôle, recasse-t ele Vera do côp. Plait-st a Diu k' elle nos emoenne a Kîtche... et nos ramoenne.

Ké binamêye, ci ptite kimere la. Come c' est drole ki, tchaeke côp k' el Zande va ene sadju avou leye, i s' sint trankile come Batisse. Paski Vera vos a-st arindjî l' tournêye d' avance. Si a-t ele telefoné ås pratikes (u ås ahesseus). Et aveur tos les papîs k' i fåt dins s' saetch, les catchets del societé s' il astchait; les carnets d' tchekes s' endè fåt, et tot l' sint-friskin. Ele sait a kéne eure ki les bankes cloyèt, la k' gn a des pompes a essince ki vindèt del sins-plonk et ki dmorèt drovowes tote nute, et tchik et tchak.

Po Zande, Vera, c' est come l' Aviedje ridischindowe do cir. L' andje gårdyin k' on pout conter sor leye cwand on-z est må prin, ki vs rissaetchrè bénrade d' imbaras.

Come il a yeu bén råjhon di lyi dner on posse dins s' societé.

Purade, di fé on novea posse por leye, poy ki li posse k' ele diveut aveur al contabilité & siervice après vinte, c' est Natasha k' î aveut moussî deus moes dvant ki Vera ni si rprezinte, on côp k' elle a yeu s' diplome.

Fåreut co k' elle åye si permis d' codure, por leye moenner l' oto, et lu, so ç' tins la, bouter so ses programes, sol tins k' i voyaedjnut.

******************

On-z aprepeye di Yalta. Zande cwite l' otovoye po prinde å court et-z avni å coulot des villas, la ki s' feme dimeure.

Dji vos a ddja dit ki Zande ni rvént nén tos les djoûs dé s' feme. A ç' moumint la k' on cåze, i lodje co å buro a Baxhatchassaray. L' anêye d' après, i va baguer, et s' fé on ptit cwårtî a Toptoukay, å depot, la ki Vera a si ptite tchambe.

Vo l' la arivé al måjhon. Il est set eures å matén. I fåt co deus grossès eures po-z ariver a Kîtche. Li raploû atake a 10 eures. Gn a pont d' tins a rvinde.

Pôreut vali ki Tansou soeyaxhe presse !

Zande soune al xhilete, et moussî el måjhone. Tansou est dispiertêye et ele didjune avou l' pus vî des valets. Elle est co e cote di nute. Li meskene est evoye rewaeyî les ôtes efants por zels aler a scole. Zande est reyusse. Mins i n' dit rén. I rabresse Tansou. Mins ene munute après, i doet låtchî:

- Abeye, binamêye, nos n' avans ki nosse tins. Dji vos aveu dit k' i faleut pårti po set eures.

- Dji so presse, voeyoz bén. Dji m' mousse, et m' makiyî. Dins ene munute, dji so la.

Zande dit bondjoû ås deus ptits efants. Pu i dmeure la stampé, e poice, ki pestele après Tansou.

Alfén, i rmousse e l' oto. I boût. Mins i nel pout nén mostrer. I n' va nén cwandminme taper s' feme a l' abaxhe divant des eployeyes. S' i sereut tot seu avou leye, i coinreut po dire k' il est grand tins d' endaler.

Troes cwårts d' eure k' il a falou a Tansou po esse fene presse. Elle a-st arivé riletcheye come on vea k' a deus meres. Ene fene taye a panea, carimadjoylêye, ene noere marone avou ene lådje cingue. Makiyaedje foirt honteus [discret] mins avou des féns sorcis et do noer d' ouy - ene viye ricete del beaté tatåresse -.

Zande aveut stî roed bleu sot di cisse feme la, et il î esteut co. Mins enute, ele lyi aléve fé piede ene eure di s' raploû. Motoit l' eure ki li pus clapante idêye aléve esse dite, por lu s' endè siervi po ses adjinçmints tecnikes.

******************

Il a co ça e tiesse deus eures pus tård, cwand il arivît å Palå des Congrès di Kîtche a Kîtche: li pus xhiltante idêye aveut kécfeye dedja stî spårdowe, les ôtes buros l' avént apicî, et lu aléve esse come on båyåd dins kékes moes, cwand ene novele edvincion aléve s' eshuve.

Fåt-st araedjî !

Zande ehåsta les deus tecnicyinnes:

- Dixhombrans nos. Alez abeye !

I dna raddimint les seroûles di l' oto a Tansou, por leye aler vey ses parints come covnou.

Vera a rexhou d' l' oto roedebale et abeye shuve li Zande ki brokéve eviè li rçujhinne do raploû sins rtourner s' tiesse. Il esteut d' kession di s' aler fé rashire sins tårdjî, et aveur on passe-avant avou s' no.

Natasha, k' esteut pus camaeråde avou Tansou ki Vera, dimana co èn åvé avou leye, l' aidî a rcandjî l' reglaedje do sidje do moenneu; ratinde k' ele s' abitowe å contak et vey po les lampes di l' oto k' ele n' aveut måy moenné des pareyes.

On voeyeut bén k' Tansou esteut mwaijhe. Mins ele ni peta nén on mot. Cwand ele sourit fé aler les vitesses, ele demara d' ene trake tot fjhant on ptit sene arvey a Natacha.

******************

Savoz bén çou k' elle a fwait, li bele Tansou ?

- Pocwè diss "li bele Tansou" avou ene air di deus airs, ti, li scrijheu ? Ti soténs, pol seur, ci grand flandrin la di Zande Vassiliovitch. Et li ptite cånoye ki l' a shuvou come on ptit tchén, sins s' amayî d' mi, et si dji sepreu moenner ç' viye tcherete di Lada la. C' est di s' difåte, å Zande, si l' Volga est arokêye. El dene a moenner a tos ses eployîs. Ene oto, c' est come ene feme: i n' a k' en ome k' a l' droet del tchåspougnî. Et asteure vo m' la oblidjeye di moenner ç' vî zénk di Lada Zaparoyetz. Est ç' ki dj' oizreu aler vey èm monfrere avou èn sfwait agayon ! Dj' åreu l' air biesse, dowô, vos.

Douvént k' i n' a nén prin l' Masvitch. Ça, c' est ene bele longowe oto; on n' åreut nén stî recassîs come des rolmopes dins on bocå. Neni, i faleut aler ebouter di tote foice des matchandijhes a Sebastopol, sapinse lu. Come si les pratikes di Sebastopol n' årént seu ratinde on djoû !

Et ç' pitite guintche di Vera la, cwand elle årè tot tourné åtoû d' mi ome, mi manaedje serè gåté. Mes efants n' såront måy aler ås hôtès scoles, ca ele li spoujhrè d' tos ses liårds. Åresse, i n' aveut k' fé d' egadjî cisse houre la. Natacha, c' esteut bén assez. Do moens, leye, ele sait respecter li feme di s' patron.

Waite asteure, vo m' la ki tchoûle come ene madlinne ! Dj' årè les ouys tot rodjes cwand dji va-st avni addé m' monfrere. Et s' feme ki m' va co dmander cwè et kesse avou s' linwe d' aspik. Dji so capåbe di m' taper a braire divant leye. A ça jamwais !

Saiss bén cwè, båshele ? Dji m' ti va raler dé mes efants, et nén cwand cwand ! Li Zande n' årè k' a saetchî s' plan avou ses deus copleuses. I n' a k' a louwer ene oto u rivni e tacsi. Dj' n' såreu pus adurer des sfwaitès calinreyes."

******************

Savoz bén çou k' elle a fwait, nosse pôve Tansou ?

"Nosse pôve Tansou" a dju dit. Voeyoz bén ki dji m' fwai må d' vos, edon, nosse dame. Ça vos va, ça, come piceure, po dire çou k' dji va dire ?

Nosse pôve Tansou, di dju bén, ele s' a djoké sol costé, rescouler dins ene fåsse voye, pu rprinde li rote e contråve sinse, direk so Yalta.

******************

Zande a stî ståmusse cwand il ont yeu fwait leu raploû. Biesse a magnî do four, k' il esteut ! I n' s' aveut ddja metou d' acoird avou Tansou po vey a kéne eure k' ele les vénreu rcweri. Elle esteut evoye dé s' fré, mins i n' avént nén l' telefone.

El voeyant e mariminces, les adjinçneus do raploû lyi volnut payî l' oté. Mins il a ptchî di leyî l' tchambe a ses deus copleuses.

Tant k' a lu, i va dmander a on raploujhisse, èn edjenieur rûsse k' il aveut stî sôdård avou lu, d' el moenner disk' a Hassanbey, li ptit hamtea, 20 km lon d' Kîtche, ki Tansou si fré î dmoréve.

Mins vaila: pont d' Tansou. Pôreut nén vali k' ele avaxhe yeu èn accidint ! Aprume ki c' est ene waeraxhe po moenner, li Tansou. Elle a ddja rtourné l' oto on côp, la ene cénkinne d' anêyes.

Zande a coûtchî amon s' sorodje. I n' a waire doirmou et fé des tchôcmwårs. Si feme esteut moite. Gn aveut les djindårs kel vinént ramasser, pask' on-z aveut brutyî ki c' esteut lu k' l' aveut touwé. Et lu, li pôve laid mcoye, i n' åreut sepou dire si c' esteut l' veur u k' c' esteut ene minte. Adon i s' dispiertéve tot frexh di tchôd.

Li londmwin, il a stî rtrover Vera et Natasha a l' oté. Il ont prin on minibusse shijh plaeces po raler a Yalta.

Cwand il ont rarivé al villa, Tansou esteut ki meteut des linçoûs al soreye. Elle aveut todi yeu ptchî di bouwer les blancs al mwin. C' esteut ene meskene k' elzès vneut striyî sol plantche bouwêyrece. Après ele les stindeut so li rmoye.

Ele n' a rén dit et Zande nerén, cwand il a rmoussî el måjhone. Si esteut ç' l' alaedje dins l' manaedje Zande Marinov. On manaedje k' aléve sol kinkin dispu dedja ene tchoke.

Motoit bén k' gn a des djins inla, ki serént bén djinné s' i n' årént nen ene sakî pindowe å clå, djoû après djoû, po brognî dsor leye. Et ki sont fén dzôrnés cwand totafwait va å pere des pôces.

 

25. Zande rivént el Crimêye.

Li 2 d' djun 1999.

Li condjî d' Zande a Borispol esteut a s' difén. Dins sacwants djoûs, i lyi fåreut rebaguer sol Crimêye.

I decida k' i n' erireut nén a Yalta, cwand i rarivreut a l' aeyopoirt. C' esteut Vera k' i vleut rvey li prumire. Et passer s' prumire shijhe låvå avou leye.

Lyi dmander si, kécfeye, ele n' åreut nén idêye di s' maryî.

Ca il aveut bén pezer et cpezer dins s' tiesse. Si veye avou Tansou rishonéve todi dpus a èn infier.

Dispu k' il aveut aprin a moenner a Vera, i sortént cobén zels deus po l' ovraedje, leye ki codujheut et lu ki bouteut a ses programes, po n' pont piede di tins.

Purade dit: ki vleut bouter a ses programes.

Mins, po dire li veur, tré k' il avént fwait dijh cwénze kilometes, i lyi aspitéve ene apinse, et i s' meteut a ramter avou si copleuse.

Di tot et d' rén. Des côps, foirt filozofike so les atuzlêyes da Marx, Lenine u Trotsky. Afeye, c' esteut so les etrevéns politikes: do prumî minisse Lazarenko k' aveut distourné 20 miyons d' dolårs des caisses di l' Estat oucrinnyin, et k' aveut peté å diale avou on passe-poirt panameyin.

Et tchik et tchak.

Kécfeye eto so li rlidjon.

Dinltins les crustins ortodosses estént portchessîs pås comunisses. Dispu 1992, li rlidjon aveut stî declarêye libe et les djins avént rdåré viè les eglijhes k' avént stî rassonrêyes so wai d' tins. E l' Oucrinne, les muzulmans, bråmint des Tatårs, alént rpriyî l' vénrdi, et dmander condjî ene dimeye-djournêye po ça.

Zande esteut d' ene famile ortodosse, mins i s' aveut fwait muzulman.

Po dire li veur, il aveut bén falou k' i s' kiviersaxhe po s' poleur maryî avou Tansou. Dji n' sai nén si vos l' savoz, binamêyès lijheuses, mins ene feme muzulmande ni s' pout nén maryî avou onk ki n' l' est nén. Vos avoz ddja bén veyou, dins nosse roman, çou k' aveut-st arivé a Vera si mame k' aveut spozé on Rûsse. Si famile ni l' aveut pus rwaitî.

Dispu 1995, on-z a cmincî a sinte ki les djins vlént eto fé rmoussî les pratikes et les uzances rilidjeuses dins leu vicaedje di tos les djoûs. Tansou s' a metou a dire ses priyires cénk côps par djoû. Et a critiker Zande pask' i boeveut di tenawete on ptit vere di gote. Il aveut divnou muzulman. I dveut shuve les dujhances di ses frés di rlidjon ki n' boevnut pont d' alcol.

Natasha Stitz, leye provneut d' ene famile almande. Protestante ! Ele kimincive a fé des rmåkes, cwand dins s' contabilité ele trovéve des traces di çou k' on lome des "dringueles", k' on dene a des directeurs u des politikîs po-z apicî on martchî. Metans pol gros contrat avou l' Acwariom di Sebastopol, on-z aveut stoké l' pougn a deus amirås, on Rûsse et èn Oucrinnyin. Les protestants, foirt sitraegnes, ont todi stî conte l' abribance. Et Natasha, avou.

Et l' Batisse Tchårlinov, ki dinltins, breyeut e toetea k' il esteut atêye et ki tote les rlidjons, c' esteut des carabistouyes po "sognî" les målureus ! « L' opiom do ptit ! endaléve-t i sins låtche; Marx l' aveut bén dit ! »

Asteure, li Batisse, il esteut bråmint moens ragadlant so ç' pont la. Cåzu djinné, divant des djins come Nooman Hiridoglou, on muzulman foirt praticant.

Åresse, li vénrdi, on-z aveut dvou candjî l' aeura po leyî Nooman aler al moskêye. On cloyeut l' magazin a 11 eures. Ça n' ridroveut k' a 3 eures di l' après-nonne.

Et Vera dins tot ça ?

Leye ossu, elle aveut stî prinjhe dins l' movmint. Di tenawete, Zande lyi vneut dire bondjoû e s' tchambe å depot. Des côps k' i gn a, el trovéve avou on noret so s' tiesse, ki djheut ses priyires.

Mins nén cwand il endalént dins leus tournêyes. Teyoricmint, elle åreut dvou s' arester a nonne, a cwatre eures et a l' solea djus (cwand il arivéve k' i s' anutixhént) po dire ses åvés. Mins ça, ele nel fijheut nén. Ele les ratrapéve li londmwin, dijheut ele.

Zande, lu, il esteut muzulman so papî, mins i pinséve k' el Bon Diu n' aveut nén ptchî ene rilidjon dipus k' ene ôte. Et ki totes les djins d' boune volté irént direk å paradis. Por lu, c' esteut acertiné.

Va èn ôte råjhonmint kel Zande fijheut voltî. S' el Bon Diu aveut askepyî les pourceas, c' esteut po k' on lzès magne. Li disfinse ki les rlidjons djwive et muzulmande ont conte les pourceas, c' est a cåze di des maladeyes ki s' atrapént e magnant del tchår di pourcea, dinltins. Li trikinôze, avént i dit les sincieus. On ptit vier k' el tchalon si mete dins les mashales et ki vos rascråwe cwand vs magnîz del tiesse pressêye u des coisletes må cûtes.

Come, å djoû d' ouy, les cushets sont corwaitîs dins les abatwers, gn a pupont d' trikinôze, et gn a pus nou risse. Dabôrd, les teyolodjins muzulmans el divrént rotorijhî.

C' est çoula ki Zande tchantéve ås cis kel volént schoûter.

Cwand Vera oyeut çoula, ele li forbateut. L' Alcoran aveut dischindou do cir, dicté på Bon Diu a Mawoumet. Çou k' esteut dvins esteut "parole d' Evandjîle" -- si vos m' permetoz cisse ratourneure la, nén trop catolike ! --

Eto, pol pourcea, et po les gotes et l' bire, c' est totès sacwès disfindowes pa l' Alcoran. Gn aveut ni stike ni broke !

Batisse aveut bon do plaider avou zels tenawete. Il aveut stî so tos tchamps payis, li Batisse. I vos rplakéve ki les muzulmans do Camrone, i boevént des aperitifs et del bire. Por zels, dizo 10 grés d' alcol, ci n' esteut nén disfindou. C' esteut des "soucrådes". E l' Indonezeye, i n' fijhént cwareme (dimorer tot d' djoû a djon cour) k' el prumî et l' 27inme djoû del ramdinne.

Et c' est l' pus grand payis moslimî sol Daegn !

Vera aveut response a tot. Mins al fén, cwand les omes vlént di tote foice aveur råjhon, ele lezî leyive li dierin mot tot cloyant l' plaidaedje avou on:

- C' est l' Bon Diu ki sait cwè!

******************

Ça fwait k' les programes da Zande n' avancént waire, tins des tournêyes ki c' esteut Vera ki moennéve l' oto. Mins ké påye k' i rsinteut dins s' coir, li Zande, cwand il esteut so les voyes avou Vera. Come on ptit gamén ki va en escursion. I nd esteut ddja efoufyî deus troes djoûs d' avance. Tantea ki c' esteut cåzu totes les samwinnes k' i saetchive si plan po-z aveur di l' ovraedje ådfoû avou l' glawene.

Çou ki fourit rapoirté a Tansou ! (Des djins "tcharitåves", end a dins tos les payis).

Docô ki Vera a cmincî a moenner l' oto da Zande so les voyes do cotoû d' Baxhatchassaray, Tansou a yeu les orayes ki zûnént. Et l' telefone ki xhiltéve. C' esteut sovint ene vwès d' ome, ki djåzéve tatår avou l' accint des montinnes. (Po Tansou ki djåzéve come a Kîtche, ça lyi shonnéve on cpité lingaedje, foirt payizan.)

L' ome dijheut:

- Schoûtez bén, nosse madame, i vos fåt raguider voste ome. On l' a co veyou ersè so ene voylete avou s' sicretaire. I s' ont djoké dins on ptit bwès et i s' ont rabressî.

- Et vos vos estîz la po tni l' tchandele ?

- Neni, mins on m' l' a acertiné.

- Dabôrd, avoyîz m' li ci k' els a veyou.

Et ele lezî rclapéve li telefone.

Sacwants djoûs pus tård ça ratakéve. Ci côp cial c' esteut ene feme, todi avou l' minme accint.

- Taiss k' åy, k' il ont ndalé enute å matén, tot yeure, eviè Acmesdjite. On a veyou Zande Bey ki lyi meteut si aburtale di surté, tot s' clintchant sor leye. Et ci ptite lexhe la, ele riyeut. Elle aveut tchatch.

- Kel Bon Diu les benixhe !

- Et kel diale les apice ! I vos fåt fé ene sacwè, Lalla Hadja. Ôtmint vos åroz ça a vos guetes.

- Dabôrd, leyîz m' les rnetyî mi-minme, mes guetes. Çou k' n' a inte mi et mi ome, ça n' rigåde ki mi. Bounnute !

Ça fwait ki, cwand Zande a decidé d' aler tot seu passer s' condjî e l' Oucrinne, Tansou end a profité po fé mwin basse sol Volga da Zande. « C' est ddja todi ene k' i n' årè pus po rôler les tchmins avou cisse guimbixhe la. »

Tansou a volou ki si oto dveut dmorer deus troes djoûs å gåraedje po rfé l' moteur. Ele boeveut d' l' ôte, paret. Et elle diveut di tote foice aveur ene oto po moenner les efants a scole. Li scole esteut el corin-veye, lon do coulot d' belès måjhons la k' i dmorént.

Batisse Tchårlinov, ki tneut l' pot droet cwand Zande n' esteut nén la, n' a rén trové a rdire. Tansou a vnou cweri l' oto a Baxhatchassaray. Zande n' a rén sepou d' tot ça. Cwand il esteut dé s' viye mere e l' Oucrinne, i n' vleut rén saveur di çou ki s' passéve a l' ovraedje.

- Les condjîs, c' est les condjîs, dijheut i. Dji rprin ddja des dossires assez, et mi copiutrece axhlåve po bouter. Dji n' va nén esse e condjî et arbeter come on sclåve avou l' telefone. Et m' ehaler di çou ki s' passe 1500 km lon. »

Ça fwait k' Tansou a yeu l' oto, et l' wårder.

C' est çou k' Zande a-st aprin cwand il a houkî Vera, al fén di s' condjî, et lyi dire del vini prinde a l' areyopoirt li prumî d' djun, a 7 eures al nute.

******************

Vera n' aveut nén vnou tote seule. Esmayel esteut avou leye. Zande n' a rén trové a rdire, pask' i ploveut a rlaye di bok.

- Dj' aveu sogne di m' piede dins les otovoyes do novea areyopoirt, dijha-t ele, Vera, po dire pocwè k' elle aveut Esmayel a ses coirdeles. Dji n' so nén co la si boune tchåfeuse po ndaler tote seule pa ç' tins la. Aprume avou l' grosse camionete.

- Li feme n' a nén co ramoenné l' Volga ?

- Neni.

- Pocwè ? Elle a dandji d' deus otos ?

- Dji n' è sai rén.

C' esteut Esmayel ki moennéve.

Zande a dmandé l' pona eyet l' cova so tot çou ki s' aveut passé å Buro Marinov tins di s' condjî. On côp, c' esteut Esmayel, l' ôte côp, c' esteut Vera ki respondeut.

Li camionete Mazda k' il estént ddins, c' esteut ene oto d' ocåzion k' il avént atchté a on Bulgåre. On djheut k' c' esteut des otos hapêyes, k' on lzî rcandjive li limero d' tchessî et l' limero d' moteur el Bulgåreye, et les rvinde foirt bonmartchî e l' Oucrinne.

Gn aveut troes plaeces padvant. Et i n' î fjheut nén lådje. Po esse a si åjhe, Zande s' aveut metou å mitan. Mins ses bresses estént å stroet. Els a stindou des deus costés sol dizeu del dossire do grand tripe sidje.

Dins on tournant i s' s' a sintou resseré ene miete pus foirt siconte di Vera. Il a bén veyou ki s' cour toctéve a tot scheter. Il a leyî rider s' gåtche mwin, k' esteut aspoyeye al gåtche finiesse, sol pawene sipale da Vera. Adon, c' est come si on corant electrike l' åreut yeu djondou.

I n' a nén oizou wårder si mwin so li spale da Vera; il a fwait shonnance di rén et il a rapougnî l' abertale.

A ! Si Zande pôreut aveur ene pouce éndjolike, metowe dins l' cervea da Vera et da Esmayel a ç' metou moumint la ! Et lére leus pinsêyes, leus sintas.

Esmayel, di tenawete, i rwaite a coirnete so s' droete, dins l' glaece. Vera, leye n' a nén crankyî. Tote ene tchoke, ene a nén onk des troes k' a drovou s' boke.

C' est Zande k' i fåt ki ratake a djåzer. I cåze do tins k' il a fwait sol moes. Adon, i respondnut tertos, tchaeke a s' toû, et dvizer di traze et d' catoize. Mins nouk ni sårè måy çou ki s' passe dins leus troes tiesses.

Et insi disk' å zônigne !

La, l' Esmayel a distcherdjî Zande et Vera, et aler remoenner l' oto al societé.

******************

Zande et Vera ont ndalé tchaeke dins leu tchambe, sins moti.

Mins, èn åvé après, Zande bouxheut a l' ouxh del tchambe da Vera. Et dire d' ene pitite flåwe vwès.

- Vera Aminievna !

Il a oyou li ptite djin si lever, vini a l' ouxh, et disserer les troes ferous. Avou on ptit riya:

- Intrez, Zande Bassilovitch.

- Vos m' avîz dit ki vos n' avîz pupont d' paltot ki våye pol plouve. Vo cial on bon spès anorak d' Oucrinne, waeranti po les grands froeds.

Li båshele a drovou l' paket, riwaitî l' mousmint, li sayî, si loukî dins l' grand muroe, a l' ouxh di s' wårdurôbe.

- Vos n' årîz nén dvou, Zande Bassiliovitch. Dji so binåjhe, vormint. Dji pôrè aler conte bijhe, l' ivier ki vént.

******************

Mins tuze on pô, Marinov ! Ele t' a dit k' ele n' aveut pus rén a s' mete a s' dos po rexhe a l' ouxh. Et ti n' as ddja veyou k' elle aveut ene bele novele camizole di noer cur, avou des bruns cwårés. On foirt nozé modele, al môde. N' est çu nén èn ôte galant ki lyi a ofri ?

Il aveut bén veyou, li grand båbô d' Marinov. Mins i n' va nén aler sondjî pus lon, saiss, lu. Et seur nén pinser a må.

A må ? Pocwè, ci sereut må k' èn ôte galant lyi åreut yeu payî, e minme tins, èn ôte paltot ? Poy k' ele n' aveut pus rén a s' mete a s' dos po ndaler dvant l' ouxh !

******************

Elle a fwait ene caftire di té! Elle a vudî deus veres. Zande s' a ashî al tere. C' esteut ene åbitude, avou les bassès tåves a môde tatår. Vera lyi a stî abeymint cweri ene pea d' moton, por lu n' nén esse cou so daegn. Ele s' a ashî al tere, avou, di l' ôte des costés del tåve. A môde di rén, Zande a stindou ses djambes dizo l' tåve. Il a djondou les pîs da Vera. Djusse les aduzer, pu les serer avou ses pîs tot djhant:

- Vos avoz des pîs come des grognons d' tchén, Vera Aminievna. Leyîz mu vos les reschandi.

Vera n' a nén movté.

Il ont co dmoré ene grosse eure - et co hay - a ramter di traze et d' catoize.

******************

C' est a pårti di ç' djoû la kel Zande a stî bråmint pus sovint sohaîtî l' bounnute a Vera. S' ashire a l' tere come il avént fwait l' ôte djoû, et s' resserer les pîs po s' les reschandi. Pu s' ashire sol lét onk a costé d' l' ôte po rwaîtî des fotos, cwand Vera fijheut ses scoles d' edjenieur, lére des lives so les Tatårs, et hay vos nd åroz.

On djoû, Zande a metou del viye muzike d' Oucrinne et aprinde Vera a danser ene danse did dinltins, come ene måtche, k' on toûne tot resserant l' comere, por leye èn nén toumer.

Adonpwis, aler todi on pô pus lon dins les aduzaedjes.

Et pu vini a dvize del veye privêye del cråpade. Nén lyi dmander platezak s' elle aveut on galant. Zande n' åreut oizou. Mins lyi fé raconter ses prumîrès amours.

- Vos endè dvoz aveur yeu, des galants, Vera Aminievna. Riwaitîz ci pove cråpåd la, so les fotos di l' escursion cwand vs estîz åzès scoles. Ça creve les ouys k' i djéreye après vos.

- Taijhoz vos, Zande Bassiliovitch. C' esteut co on påpåd, don. Cwè vôrîz k' dj' åreu fwait avou lu ?

- Vos nd avoz yeu des pus vîs, dabôrd ?

- Gn aveut on prof di programaedje k' esteut roed bleu sot d' mi. Kibén d' côps k' i m' a priyî e s' måjhone, dins l' pus tchik coulot d' Simferopol !

- Et il esteut co djonne ome ?

- Oyi.

- Et pocwè n' av' nén hanté avou lu ?

- Pocwè ? Va-z è vey ! Li veye ride afeye sins k' on nel såye vierner. Rén n' vos rtént cwand vs estoz studiante, cåzu tote seule å monde. Mins totafwait vos ractént po n' vos nén leyî fé çou ki pôreut esse ene biestreye. C' est télmint åjhey di s' acdiner a èn ome. Mins après, i vos hene evoye come ene rikete, avou des royes so vos coines.

- Les omes ni sont nén tertos les minmes. End a ki cwerèt di fé plaijhi a leu cpagneye, mins ki sont ctchinés po leus poennes. Les femes vos fjhèt èn efant a l' ome k' elle ont kécfeye veyou voltî. Mins après, ci ome la, ci n' est pus k' onk k' a li dvwer d' elzî dner tot çou k' ele péynut après. Abele cwand ele vos ont fwait deus troes zwers !

- Les femes ni sont nén tertotes les minmes !

- Ça c' est m' rinde li manoye di m' pîce !

- Fåt todi aveur ene pîce po mete e trô cwand on est feme. Et cwand on naiveye inte deus u troes peupes, les Rûsses, les Oucrinnyins et les Tatårs, tchaeke di zels avou des atuzes nén les minmes, i s' fåt saveur agritchî å vierna. Mi mame vout di tote foice ki dji spoze on muzulman. Mi prof di Simferopol esteut èn ortodocse foirt poirté so li rlidjon. I n' s' åreut nén cviersî a l' islam po m' maryî, a dju les pinses, todi.

- Disk' a wice ki vs av' sitî avou lu ?

Vera ava on ptit riyoe et baxhî les ouys:

- Disk' eyou vloz k' ene Tatåresse åye li droet d' aler ?

- I n' vos a måy volou rabressî ?

- Siya on djoû, nos esténs ambedeus dins si oto, inte Simferopol eyet Djonkay. I s' a djoké li long del voye. I fjheut brune. I m' a assaetchî a lu.

- Et cwè avoz fwait ?

- Dji n' sai pus. Tot çoula esteut si novea por mi. Dji n' saveu cwè fé. I m' vleut rsaetchî m' taye, mins dji n' l' a nén leyî fé. Di totes façons, c' esteut sacwants djoûs divant d' aveur nosse rôlea. Li djoû k' on-z aléve endaler e condjî, et cwiter l' Academeye podbon, i m' a vnou trové, tot djinné. I m' a dmandé on sovni d' mi. Ene des calotes di toele ki dj' meteu tofer di l' esté. I m' trovéve si clapante avou.

- Mi avou, vera Aminievna !

Ti n' lyi oizreus dire, edon grand båbô d' Marinov ki, ti avou, les calotes da Vera, c' esteut bråmint åk por twè.

******************

Les eployîs avént ene pitite dresse å tchapåd do Buro Marinov, djusse a costé a l' ouxh da Zande.

Di l' esté, et minme å waeyén-tins, Vera î aveut todi ene calote u deus. Des ptitès calotes di coleur avou ene longue pene et ene blouke padrî. On djoû, Zande aveut pierdou l' sinne et il a dmandé po-z aveur li cene da Vera a pruster.

Cwand il a rintré å buro, après djournêye, il a bodjî l' calote. Pu i s' a metou a sinte si nodeur. Ene odeur di souweur di feme k' aveut amoussî dins li stofe. Il oda comifåt ci stofe la on côp, deus côps, troes côps. I sinta tos ses sonks si rmouwer. Come s' il åreut yeu, a ç' metou moumint la, li tchå del feme divant ses ouys, avou ses mwins kel prustixhént, avou leus deus coirs ki s' cafroyént.

Zande sinteut tot s' coir eschandi. I fjha come si ç' sereut podbon kel comere sereut-st avou lu, k' ele l' estchåfreut comifåt, k' ele li candôzreut disk' ezès sorcoines di si antomeye.

Zande ava s' plaijhi rén k' e houmant ene calote, ene calote plinne di souweur femrinne.

Mins nén tolminme ké femreye. Vera !

Kè drole, todi !

Dispu ç' djoû la, après l' shijhe, k' i passéve sovint a rnaxhî dins ses papîs et a lére e s' buro, Zande aléve cobén drovi li ptite dresse å tchapåd. Il prindeut ene pitite colote di toele, rodje djaene u kaki, et i l' odéve a grands respiras, come onk ki houme do crak.

26. Li tchôcaedje da Tansou

Li 16 di djun 1999.

 

Ene ki n' a nén dvou esse binåjhe ådla d' tot ça, c' est l' Tansou, edon ?

Taiss k' åy !

Et cwand elle atake, li båshele Necmatiar ci n' est nén al doûce. Ci n' est nén po rén k' elle est l' feye d' on rezistant.

Po cmincî, elle n' a nén vlou rinde l' oto del societé k' elle aveut vnou cweri, do tins k' Zande esteut e l' Oucrinne.

Zande l' a taené et lyi côper les amonucions. Dj' ô bén, i n' a pus ristî passer ses féns d' samwinne a Yalta. Cwand les facteures d' aiwe, di loumire et d' telefone ont cmincî a s' etaesler, et k' elle a stî djus d' cwårs, il a bén falou kel Tansou passe les bardouxhes.

Elle a aboirdé å buro, on mierkidi a nouv eures al nute.

I s' ont atouwé la ene eure å lon, avou l' Zande, come des tchéns d' barakîs. Cwè s' plént i bén barboter insi ? Et nén onk des deus k' åreut yeu tuzé: "C' est l' pus malén ki s' tait".

Et si vos lzî årîz yeu dmandé, cwand Tansou a peté evoye e breyant et tot rclapant l' ouxh do buro: "So cwè vs av' tant margayî, hon, ambedeus, dispu l' tins ?"

Ebén dj' è respon k' i n' vos årént yeu seu dire so cwè çk' i s' avént forbatou.

Dins ces bretes la, dins les manaedjes, vos fåreut aveur en eredjistreu. Totafwait î rpasse: dispus les acoirdances et l' mariaedje, li djoû des noices, li samwinne å blanc pwin [lune de miel], les ôtes voyaedjes, les parints, les efants, les cwårs, les ptitès zines et les gros dfåts, les schårds å sacramint.

Et cial, Tansou end est seure, end a, des schårds å sacramint, et divant les djins, cobén.

Portant ci n' est nén ça k' on cåze aprume. Ça a cmincî pa l' oto. C' est Zande k' apougne a djåzer:

- Pocwè ass hapé ciste oto la del societé ? Ti sais pår bén k' on nd a dandjî toltins.

- Dji n' a nén a dire pocwè. Dj' a des abondroets so ciste oto la, et sol société tote etire, et so tot çou k' est da tinne !

- Si t' end a mezåjhe on djoû u deus, tel pous vni cweri, mins el fåt ramoenner docô après.

- Dji n' a pus m' plaece dins ç' société ci. Cwand dji vén cial, dji so tote djinnêye. I m' riwaitnut tertos avou des airs di deus airs. Dji tel leye, cisse tcherete la; dji n' rimetrè pus måy les pîs dvins. Mins ci fås Pilåte la d' Esmayel, on bea djoû, i voerè di ké bos ki dji m' tchåfe. Dji lyi endè frè vey des vetes et des maweures.

Zande ra ses sonks on moumint. I saye di s' mwaistri. I candje di sudjet, et s' djoker d' atouwer Tansou.

- Et pocwè k' vos n' amoennez pus vos efants li mierkidi di l' après nonne, come l' anêye passêye ? Insi, on s' voeyeut, al boune, deus côps al samwinne.

- Si t' vous vey tes efants cial, i t' fåt cayî ci Esmayel Celebricihan la a l' ouxh. C'est l' prumire des condicions, si t' vous fé l' påye avou mi et avou tes zwers.

- Pocwè l' metreu dj' a l' ouxh ? Dji n' a rén a lyi rprotchî. C' est vos ki fwait do herleme avou rén.

- Li herleme ki t' dis, c' est paski c' est ti-minme ki m' acwire. Ti n' ti plais bén k' å mitan des disduts et des margayaedjes. Dayeur, les djins reynut tertos d' twè.

- Leyîz les djins å résse, s' i vs plait. Et ndè fé ene bounete a Matî. C' est nén ces djins la ki canlèt ki m' payèt m' cwénzinne, å coron do moes.

- Djans ! On n' si coprind nén, ti et mi. On n' s' a måy etindou, et on n' s' etindrè måy. Cwand dji saetche a håre, ti boutes a hote. Schoûte mu bén. Dji n' ti dirè k' deus sôres: ti henes ces deus måbelairs la a l' ouxh, u ti m' lais ndaler å lon, mi et mes efants.

- Et wice ireuss ? Ti n'as pont d' cwårs et ti n' as pont d' mestî dins les mwins. Ireuss briber avå les viyes ?

- Li Bon Diu sait parpinser les cis ki sont dins l' pehin. I n' avoye jamwais l' fa sins l' sorfa. Croess k' i gn a k' ti po-z aråvler les çanses ? Li cene k' a deus bresses et k' est reverante, ele saetche todi bén s' plan el veye. Våt bråmint mî po tertos k' on n' dimeure pus viker eshonne.

- Dji n' vos voe nén bén aler briber et viker el mizere, vos k' a todi volou moenner grande veye.

- Dji m' pou afaiti a tot. Dj' aveu dandjî d' moenner bele veye paski c' esteut l' role del feme d' èn edjenieur, on patron d' société. Si dji pete å diale, dji n' årè pupont d' role a djouwer.

- Et si on tuzreu å rvier. Estô d' endaler, vinoz dmorer avou mi cial a Baxhatchassaray. On rvindrè l' villa d' Yalta et on s' ahivrè ene bele pitite måjhon cial. Si on dmeure eshonne, totes les rascråwes vont ndaler totes seules, inte di zeles, les rujhes ki vos djhoz avou Vera.

- Bén t' es fén berdoûxhî, dandjreus, do tuzer inla. Est ç' ki l' trô d' Baxatchassaray est ene plaece po viker ? Pocwè n' vouss nén profiter del veye, ti avou ? Vén dmorer avou nozôtes a Yalta. Ti n' årès k' a raler on djoû u deus al samwinne el société po tni l' pot droet. Les telefones, ci n' est nén fwait po les tchéns ! Ti n' as k' a payî on novea ptit axhlåve a tos les responsåves, et ti les ténrès a l' ouy, minme di Yalta. Et dji m' ti va co dire åk: si ti dmeures co ciddé deus troes ans, retrôclé dins l' zônigne, ti dvénrès sot. C' est mi ki tel dit !

(Zande rimonte a smince. I ratouwe Tansou.)

- Mon Diu Deyî ! Bén c'est t'-minme k' a on bwès foû di t' faxhene, paret. Croess podbon k' on pout vierner ene societé 200 km lon ? Abele k' on n' ramasreut pus ene petsale, et k' i fåreut aler a Rêkem.

- Et come ti moennes l' atelêye, croess ki t' endè ramexhnêyrès måy on djoû, des hopeas d' çanses ? Asteure ti m' disvoyes; ti disvoyes tes efants. Croess ki t' vas adiercî t' côp insi et wangnî l' paradis ? Ti n' frès måy rén d' bon.

Zande ni respond pus. Il est la tot racrapoté so s' tcheyire. Il a prin s' tiesse inte di ses mwins.

Est çki Tansou a croeyou k' i s' sitopéve les orayes po nel pus ôre ramter ? Elle a rboerlé co pus foirt:

- Dji t' voe evi. Gn a måy nouk ki dj' a veyou si må evi k' ti.

Dji t' sohaite tot l' må k' on pout sohaiter a ene djin. Ti n' rahopelrès måy on magzå, c' est mi ki tel dit. Ti pous basti tot çki t' vous: ça s' distrurè a fwait. Ti serès tchôkî: tot çou ki t' eterprindrès ni reyussirè nén. Et ti sårès, po t' goviene, ki tchaeke côp k' i gn årè åk ki toûnrè do cou, ci serè mi les cåzes. Mi tchôcaedjes ti shuvrè djour et djourmåy.

C' est adon k' elle a moussî foû, et rclaper l' ouxh.

 

(a shure)

 


 Si des mots difficiles se présentent à vous sur ces pages, allez voir s'il ne sont pas expliqués dans le Splitchant motî do walon (avec brève traduction française). ou sur l'encyclopédie "Wikipédia"..

 Dipus d' racsegnes sol Crimêye.


(Back homepage Louline Voye) Hay ervoye so l' pådje divantrinne da Louline Voye.

 (Back textes Louline Voye en wallon commun) Sicrijhaedjes da Louline Voye fwaits u redjårbés e rfondou.

(homepage wallon commun) Alans rzè eviè l' pådje moennrece do rfondou walon.

(Back) Hay ervoye al mwaisse-pådje


Sicrijhaedjes eplaidîs so les fyis avou l' åjhmince do scrijheu. On les pout rcopyî et redjårber tot rahoucant l' adresse did so les fyis.

Édition en ligne explicitement autorisée par l'auteur. Reproduction et adaptations autorisées en citant la source Internet.