Page des catastrophes naturelles

Pådje des grossès rascråwes del nateure.

dierin rapontiaedje - last update: 2004-08-10.

Dressêye:

Les incendies de forêt. Les feus dins les bwès.

Les tremblements de terre. Les tronnmints d' tere.

Les criquets-pélerins. Les potchas-pelrins.

Inondations. Les grossès aiwes.

Août 2004: invasion de retour en Mauritanie.

Moritanreye (awousse 2004): li rarivaedje des djonneas d' Afrike bijhrece.

Nouwatchote, prumire samwinne do moes d' awousse 2004.

Ene volêye di djonneas d' potcha-pelrins, rivnous d' Bijhe, a-st evayi l' veye di Nouwatchote. Tot çou k' esteut vete î a passé: les påmîs [palmiers], les fleurs; minme li rmouye do stade olimpike di fotbale k' i gn a nén dmoré ene yebe.

Et rén moyén d' fé: on n' pout stritchî do pwezon å mitan des djins ! I fåt ratinde ki les djonneas cwiténxhe, les shuve ene djournêye; waitî la k' i vont passer l' nute, et poudrijhî [pulvériser] avår la.

Kimint k' ça s' fwait, dabôrd k' on-z anonce ci rascråwe la dispu l' waeyén-tins 2003 ?

A-z ôre li posse, les payis d' Afrike Bijhrece ont fwait leu bouye. So tot l' prétins, li Marok a rclamé aveur soûfaté [traité] 350.000 ectåres: ostant k' el Roman Payis. Les djonneas n' ont nén rmonté pus hôt k' les montinnes di l' Anti-Atlasse, a Nonne do payis.

E l' Aldjereye, on-z a stritchî eto a make. Les potchas ont cwand minme arivé a Bedjaya, 200 km a Nonne d' Aldjî. Mins i n' ont wai fwait d' damadje.

Asteure, gn a des nouzomès stindêyes al Nonne di l' Aldjereye et sol Sara Coûtchantrece k' i gn a yeu nolu po-z aler vey çou k' i s' î passe. C' est k' vola, i n' fwait nén trop seur s' î pormoenner. So tot l' Sara, å djoû d' ouy, gn a des bindes di hapeus d' boûsse et des smocleus [contrebandiers] di totes les cognes ki rôbalèt avår la.

Ça fwait ki nos potchas ont polou ponre a leu-z åjhe dins totes ces coines la. Les oûs ont divnou des molons. Les molons ont disclô, les potchas s' ont ratroplés. Et hay ervoye, asteure, eviè Nonne, la kel såjhon des plouves d' inte les tropikes va fé crexhe del verdeure a golafer plantiveuzmint. (A Bijhe, c' est l' esté: totafwait est souwé: gn a rén a magnî drola.)

Li dierin abrocaedje des potchas rimonte a 1989. Po ndè vni mwaisse, li F.A.O. a furlé 300 miyons d' dolårs. Did la, l' idêye di fé des plans po diswalper li lûte espaitchrece [lutte préventive]. C' est çou k' a stî fwait å Levant d' l' Afrike, po les payis del Rodje Mer (Edjipe, Soudan, Yemen, Arabeye, Somaleye, Eritrêye). Ça a costé 8 miyons d' dolårs.

Ça n' a nén stî fwait pol Coûtchant (Payis d' Afrike Bijhrece et Sahel Coûtchantrece). Et asteure, on-z a dedja coschiré bråmint dpus dispu l' Bontins 2004. Et, dji crin foirt kel pômagne ni vegne sitrinde les boyeas des pôves payizans moritanyins dins les moes ki vnèt.

Minme si les bayeus d' cwårs sont di dnêye ?

Inte li moumint k' on dneu d' liårds [bailleur de fond] dit k' il est di dnêye, dabôrd, i fårè des samwinnes u des moes disk' a tant ki ces çanses la ni divnénxhe des bidons d' pwezon po touwer les potchas, et des avions avou des stritchetes po travayî podbon. So ç' tins la, les potchas åront tot l' tins di vni rloper les coûteures [cultures] des ptitès djins do Sahel.

Mî våt alouwer ses sôs dins des canons et des tanks po touwer les Irakyins et les Palestinîs, dandjreus.

Lucyin Mahin, li 10 d' awousse 2004.

Février 2004: urgence acridienne en Mauritanie et dans les pays voisins.

Potchas pelrins (fevrî 2004): i strénd pol Moritanreye et avår la.

Mierkidi 18 di fevrî 2004. Les djins d' El Djadida (Marok), e s' dispiertant, alèt-st aveur on drole di waitrê: des trûlêyes di potchas pelrins avå les rowes del veye.



On pôve potcha mierseu: ces-la n' polèt må.

C' est k' i gn a yeu grande air dispu on djoû u deus, et ces biesses la ont stî apoirtêyes på vint, a pårti del Moritanreye, 2000 km lon.

Dispu 1993-1995, gn a pus waire yeu d' abrocaedje di potchas pelrins a pårti des payis do Sahel. Ça fwait 10 ans sins rascråwes, la, ça. Mins ça pôreut bén rivni ciste anêye ci.

Douvént k' i gn è ra strapance e 2004 ?

L' anêye a stî foû boune po ces gros coks d' awousse la, k' on lome e sincieus latén Schistocerca gregaria, et ki, cwand ça lzî tchante, kiminçnut a s' ratropler e foû grands djonneas et avorer so les vijhéns payis.



On djonnea d' potchas si voet did foirt lon.

E l' esté et e "waeyén-tins" 2003, gn a yeu des plouves sol Sahel, bén spårdowes so les såjhons. Tantea k' i gn a, a l' avirance, 400.000 ectåres la k' les crikions s' ont mopliyî, dispu l' moes d' octôbe 2003. C' est vormint on djonnlaedje come en on labo, eva-t i Hami Ben Halima, li responsåve do programe F.A.O pol dizingnaedje des potchas-pelrins.

Tos les payis do cotoû del Moritanreye, Mali, Niger, Aldjereye, Marok et Libeye ont dné on sfwait côp di spale ås Moritanyins, tot lzî evoyant des avions, des djipes, des baris d' pwezon po touwer les potchas, et des ahesses di stritchaedje.



Ene djipe avou ene sipritchoûle padrî.

Disk' asteure (10-02-03), les ekipes monåcionåles ont poudrijhî 300.000 ectåres. Mins çou ki dmeure (100.000 ectåres), c' est co bén assez po-z enonder des grands rabindlaedjes. L' ahike, po-z aveur tot dzingnî, c' est k' les caisses sont vudes. Sapinse li F.A.O., i lzî fåreut ouy (24-02-04), sitrapiveuzmint, 9 miyons d' dolårs po stritchî li restant des epestiferêyès waides: 6 miyons pol Moritanreye, et pol Mali, li Nidjer eyet l' Tchad, on miyon po tchaeke.

Si les critchons s' ratroplèt, a ç' såjhon ci, les djonneas si metront-st a voyaedjî so Bijhe, ça vout dire eviè les payis d' Afrike bijhrece. C' est po ça ki l' Marok et l' Aldjereye ont, sûteymint, evoyî di l' aidance ås Moritanyins.

Cwè çki ça fwait come damadje ?

Cwand cisse plôke la voet del verdeur, i brokèt dsu todroet, et s' endè fote plin leu panse - so vosse respet. Mins loukîz vos-minmes: on potcha magne si pwès tos les djoûs. Come si vos, vos frîz rinchinchote avou 50 kilos di tchå et d' crompires, djoû après djoû.

Seul solåciaedje [consolation]: cwand les potchas ont tot magnî les oidjes, les påmîs, li niebé, les waides et les bouxhons, et tot ratindant d' esse sitréndou pal setchresse ki va s' eshuve, les djins d' avår la alèt passer kékès samwinnes a s' gueder tot magnant des potchas.

Ça s' greye so on tocoe, come ene fornêye al tchå. Ça gostêye come des pates di gurnouye, paret i.

Dj' inme ostant por zels ki por mi !

Li rcete des potchas.

Vos n' savoz nén çou k' est bon, respond-t i Mouaad Ayt Lahsen, on djonne årtisse ki provént del Nonne do Marok. Dj' end a magnî dipus d' on côp, mins dji m' rissovén aprume di l' anêye 1994, la k' dj' esteu a l' internat a Foum Zguid.

- Kimint çk' on lzès ramasse ?

- C' est cwand on djonnea vént passer l' nuteye e vosse coulêye. I fåt saveur ki les potchas ni voyaedjèt nén del nute. A l' anuti, i dischindèt a tere, et pu, i n' bodjèt pus, i doirmèt. Vos prindoz on grand saetch, et vos n' avoz k' a mete vosse mwin a tere. End a tant k' on vout. Vos rivnoz avou vosse saetchêye al måjhon.

- Ça fwait cwantes kilos, ça, ene saetchêye ?

- Céncwante a cint kilos. Vos vudîz ça dins ene cabolêye di tchôde aiwe, avou do sé. Cwand ça a bolou ene miete, et k' l' aiwe s' a svinté, vos rmetoz co ene miete d'aiwe. Pu, cwand les potchas sont bén cûts, vos metoz ses spices dissu.



deus télêyes di potchas: boun apévos.

- Kimint k' ça s' magne ?

- A pô près come ene guernåte. Vos rsaetchoz les aiyes, les antenes, les pates pus tote li tiesse. Les boyeas endalèt avou l' tiesse. Tot l' restant est bon.

- Vos avoz dit k' on lzès pleut fé souwer po wårder ?

- Oyi. Cwand ele sont cûtes, vos les leyîz å solea dins des téles. Ça s' pout wårder deus troes moes. Nén assez po tni tote li pômagne ki shût on passaedje di potchas !!!

Lucyin Mahin, li 16 di fevrî 2004.

Les seyisses.

Din l' Cout n° 49, dj' ans vu k' nosse boune vîe tere esteut co plinne do vie et k' ile nos l' rmimberreut tenawete, cwand elle aveut håsse di stierni .

Ça li arive co sovint et dj' alans ndè cåzer on pô.

C' est cwè, on seyisse ?

C' est l' kischoyaedje del schoice teresse (ecorce terrestre) k' intervint cwand des foirçadjes internes su trouvat liberes d' on plin côp dins les profondeurs del tere. I plat-z esse du 3 sôrtes, dj' ô bén:

Pu bas k' ça, gn e pupon d' seyisse ki demarat.

Il arivat cwand les plakes su gugnat (s' entrechokent) u don bén cwand lu magma a prèssion ou mitan del tere rumonte dins les volcans.

Les ondes sismikes.

Les ondes ki provnat des seyisses sont du 3 sôrtes ossu :

L' etude des seyisses.

Les sismografes aredjistrat su papî les scousses, minme foirt febes, ki lzî parvunat. L' eure d' arivee des deus trins d' ondes , les P et S , les ransegne su la distance et su l' importance du seyisse.

Å pu k' les ondes sont discalees, ( dji vnans d' vey leu diferance du vitesse), å pu lon k' est l' mitan du seyisse.

Les degats et lu nombe du victimes sont sovint foirt importants, surtout si la scousse su fwait sinte din des culots foirt peuples, avu des båtimints nén todi capabes du resister a des fwåces pareyes. C' est po ça k' les djans nu rintrat pûs al måjon, peu d' esse raclôs dzou les decombes et k' i lodjat dvant l' uch.

Pou mzerer la fwåce du seyisse, on su siêve del chåle du Mercalli, ki va du I a XII, et ki mzere les degats survenus.

I, c' est on n' sint rén ;

II Kekes djins å rpôs plat sinte on pô yôk, surtout al coupete des hyôtes måjons ;

III Bramint sintat yôk dins les måjons et les lampes balançat ; mês rén a l' uch ;

IV Gn e co d' pu ki sintat yôk et les vites, les plats et les assietes boudjat. ;

V Les djins adoirmus su raveyat, les uchs clacat, les åbes balançat , les ptits cayets boudjat d' plaece ;

VI Tout l' monde sint yôk ; i fwait drole martchî ; les cades su dispindat et l' plafounaedje su find ;

VII Les djins ont du må a dmerer campes ; les åtos s' monnat må et les brikes cuminçat a disvaler ;

VIII Les tchåfeus ont co pu d' må a piloter, les måjons sins beacôp d' fondacions boudjat foirt, les ôtes, mwinsse, mês les brantches des åbes su brijhat ;

IX Gn e des gros degats a totes les måjons ; les måjons sins fondations tchandjat d' plaece ; la tere su crevåde ; les conduites cherat

X Bramint des måjons sont distroûtes ; des ponts ossu ; gn e des eboulmints ; les aiwes su distournat ; les astantches (digues) cherat ; la tere su crevåde co d' pu et les rays du chmin d' fier su twardat.

XI Gn e pus grand tchôse ki tint, ni måjons, ni routes, ni ponts ; la tere glisse et i gn e des eboulmints ;

XII D' abôrd t' tafwait est distroût ; la tere gondole et i put tumer des grands pans d' rotche.

La deujime chåle pouz evaluer les seyisses, c' est la chåle du Rixhter, ki va du < 3.5 a + 8.

< 3,5 On n' sint rin, mês les sismografes ont aredjistre la scousse ;

Du 3,5 a 5,4 On sint la scousse, mês i gn e pont d' degats ;

Du 5,4 a 6 Les bons båtimints resistat, les ôtes, bramint mwinsse ;

Du 6,1 a 6,9 Put fwire bramint d' degats, 100 kilometes alantoû.

Du 7 a 7,9 C' est on trannmint d' tere " måjeur " ki put s' sutinde assez lon ;

Pa dzeu 8 C' est on foirt grand seyisse, ki va su rsinte su des çantinnes du kilometes.

Payis a seyisses.

Les seyisses sont les pu courants dins les påyis ki sont s' les bôrds des plakes, eyusku la prèssion est la pu fwåte. On put don cåzer del cinture du feu du Pacifike, des dorsales du fond des oceyans, del Mediteranee, del Est del Afrike, del Hymalaya, du Japon et del faye du Californie. Les pus grands seyisses arivant dins les payis les pu sudjets ås volcans . Dji sondje ki l' Japon, avu 1450 scousses par an e l' pompon des seyisses. C' est pa l' etude du tos les tran' mints d' tere, k' onz arive a counixhe lu ddins d' nosse tere.

Dins les pus teribes seyisses counus, les pu catastrofikes s' ont passe an Chine :

Les raz d' maree.

Can la tere tranne duzou les mers, a grande parfondeur, on n' sint rén su l' aiwe, mê les ondes, a raprotchant l' rivage, purdat ene fwace teribe, ki dene lu djoû a ene lame du fond ki put awe s' la côte, ene yôteur do 30 metes. Avu bén chur totes les destruccions possibes et imajinabes. Onz e vu, an 1960 on tran' mint d' tere du Chili antrinner ou Japon et a Hawaî, on " tsunami " u " raz do maree " catastrofike.

Fåt nén co nos plinde dins nôs payis. Dji sans co a cwète du bén maleurs.

Louwis Bêdjot, lu 17/9/99, divins Coutcouloudjoû l° 50.

 Si des mots difficiles se présentent à vous sur ces pages, allez voir s'il ne sont pas expliqués dans le Splitchant motî do walon (avec brève traduction française).

 Page des guerres. .Pådje so les gueres.

  (index des sujets) Alans rzè al djivêye des sudjets.

(Page d'accueil) Alans rzè al mwaisse-pådje

  (Page des textes en wallon unifié) Ralans sol pådje des scrijhaedjes e rfondou walon

  (Articles journalistiques de Lucien Mahin) Ralans è sol djivêye des scrijhaedjes di papîs d' gazete da Louline Voye

 (Index des auteurs présentés sous forme pré-normalisée) Djivêye des scrijheus eplaidîs dizo cogne årmonijheye, mins tot wårdant ene miete l' accint. (Index des auteurs dont les textes sont disponibles en wallon commun) Djivêye des scrijheus k' ont scrît u k' ont stî rashious e rfondou walon

(Page d'accueil du wallon commun) Alans rzè eviè l' pådje moennrece do rfondou walon.

Les tecses da Lucyin Mahin sont rcopiåves po rén, tot metant l' no do scrijheu, li limero del rivowe, et l' adresse did so les fyis.

Texts by L. Mahin are free, quoting the author, the magazine references, and the URL adress.