On côp vindous mes tchesteas, mes prôpietés el Hongreye ey el Pologne, mes måjhons, mes rintes eyet mes mousmints po payî les femes eyet les detes di djeu, on côp k' dj' a yeu stî fén discwårlé, sins rén, tot l' monde m' a retchessî. Pus nouk ni m' acontéve. Il a falou k' dji voye doirmi sol pavêye ou sol soû des eglijhes, eyet briber djusk' a tant ki l' curé m' oblidje a peter å diale a côps d' baston. Les bribeus inte di zels ni valént nén mî k' les monsieus, les sôdårds ou les tuzeus: nos nos pesteléns po on fayé canada eyet nos ns åréns yeu macsådé po ene mastoke.
Tapé foû d' ene veye, dji xhinéve mi voye djusk' al cene d' après, sins pinser a rén; li fwin m' fijheut sôrti do bwès po raler briber dins les rouwales ou bozer ene sôre ou l' ôte a mindjî - et pu on martchand ou ene binde di råpéns m' cotchessive foû des meurs eyet tot ratakéve: i faleut tcheryî pus lon. Et l' astcheyance, d' ene veye a l' ôte, m' a ebouré djusk' e l' Årdene.
Ti pôreus bén pinser, lijheu, come c' est l' môde asteure, ki dj' åreu trové
dins les bwès ene miete di påjhirté... Ou minme di liberté, deliberé
k' dj' esteu d' mes ritchesses, di mes boignes sondjes eyet d' mes zines di
mwaistrî tot eyet tot l' monde... Pus foirt ki mi, ene sakî, po trover
s' bouneur a viker insi, enocin come ene biesse... Doirmi al tere, å pî des
åbes, so sacwantès fetchires, ramouyî del plouve, mougnî des pious, tofer avou
l' fwin ki capougne li vinte, a n' croxhî k' des fayemes, des petches, des
spirous, a n' boere ki l' aiwe des richots...
Pont d' binåjhté drola nerén, por mi. Nén k' dji rmeteu m' vicaedje di
ç' moumint la å ci do tins k' dj' aveu bråmint des cwårs, do tins
k' dj' aveu des léts d' plomes eyet des cråssès eurêyes... Neni, ô. Pus rade
paski, a m' shonnance, rén n' aveut candjî: ti novea vicaedje? Nén moens
disgostant k' l' ôte, valet! Li gosse des spirous eyet des petches våt bén
l' gosse des polets eyet des wasteas; les pious ki t' hagnèt valèt bén
les cossins d' plomes.
Ti plaece? Cache todi, ê! C' est nole påt!
So l' Anuti