Dressêye:

• I n' fåt nén dner ça a Tibî Meyî.

I n' fåt nén dner ça a Tibî Meyî.

Dinltins, a Djimbe, i gn aveut on vî pôve k' on loméve Tibî Meyî.

Dji n' vos såreu dire si c' esteut s' vraiy no u on sobricot. I lodjive li diale al boûsse, sapinse k' on dit; dj' ô bén k' i n' esteut nén foû ritche. I dmoréve dins ene pitite cahoute metowe djondant les vevîs d' Mussi, la k' on djheut ki, dinltins, i gn aveut yeu on viyaedje k' aveut stî distrût pal pesse.

Po wangnî kékes sôs, il eterprindeut sacwantès corwêyes dins les bwès, po onk u l' ôte. I ramasséve des coxhes dins les pårts di virêye, i fjheut des faxhenes k' il aléve vinde ås djins por zels esprinde li feu, u broûler dins les tchminêyes k' on-z efoume les djambons. Avou les rames di bôle, i fjheut des ramons, et cwand i nd aveut on cint, gn aveut on tcherieu ki passéve et ki les prindeut. C' esteut po xhover dins les oujhenes, dijheut i.

La, wai, k' on bea djoû, vo l' la toumé so ene ancyinne aire di fåde. I gn aveut del bele noere tere a make. Djustumint, Batisse do Tchesse mônêyes è dmandéve todi po ses ereyes di fleurs. La nosse Tibî Meyî k' è raplenit on saetch a houpe et i l' va poirter å Batisse ki lyi a dné ene pitite dringuele, come di djusse, don.

Li Batisse, i freut spès û çk' i s' piedreut, la, lu. Il a passé l' noere tere avou on ptit raidje, et il a fwait des potêyes avou on ptit broustiyon d' djeraniom. Et i les a vindou beazè tchir a des tourisses.

Nosse pere aveut veu l' coup d' temps. C' esteut èn ome foirt curieus so tos les cayets d' bwès. D' ayeurs, il esteut todi stitchî dins les côpes et les virêyes. Et il aveut ça d' bea: i vleut todi aidî les målureus è lzî mostrant comint fé po tirer leu plan tot seus. "I våt mî lezî aprinde a mete ene bricole, k' i djheut todi, ki delzî poirter on live tchôd dispindou."

Il aveut cåzé d' l' afwaire del noere tere a èn ome d' Anvers ki vneut al tchesse a Bestin et ki fjheut dins les fleurs. " Dj' è vou bén tant k' vos nd ôz, aveut i respondou, mins i mel fåt fene raidjeye: vos n' ôz k' a l' passer comifåt et s' l' apleni e saetchots d' dijh kilos."

Dj' avéns on vî diale al gregne, ki n' aléve pus. Dji m' aveu amuzé a-z è dismonter les troes raidjes. Dj' aveu remantchî on toû di plantche tåtoû do pus fén, po fé on cwåré raidje come, dinltins, les djins raidjént leus dinrêyes avou, po tirer les payetes et les nichtés foû des grins. Nosse pere m' a voyî pol poirter a Tibî Meyî.

"Wai, di dj' , vos n' åroz k' a l' pinde après l' mwaisse viene del cahoute, avou ene tchinne, po-z aveur pus åjhey. Adon, vos n' ôz k' a mete del tere di fåde didins et kscheure li raidje po fé toumer l' poûssire so on saetch sol daegne." "bén åy!" aveut i respondou.

Dj' aveu co boevou avou lu ene djate di tene cafè, et l' afwaire aveut dmoré la.

Li vikereye end aléve pyim pyam e viyaedje, come d' alaedje. Nosse pere aveut rascontré on côp u deus Tibî Meyî, et s' lyi dmander cwè pol raidje. " I va bin !" aveut i respondou.

C' est on côp k' dj' aveu rpassé pal cahoute, po-z aveur ene banslêye d' estales d' abataedje. (Dji saveu bén k' els aléve ramasser padrî les bokions k' abatént ås hesses e Miyan Fayis). Divant d' moussî al cahoute, dji tape mes ouys pa padrî, et cwè çki dj' voe ?

Li bea raidje di nosse diale k' esteut rabocté avou des treyis d' fier po fé ene cadje a lapén !

L. Mahin, Av. Lux. 09-02-93 & 26-02-93; Cahiers Wallons 56, (1993), 103.

 (Back textes Louline Voye) Hay ervoye so l' pådje des scrijhaedjes da Louline Voye.

 (Back textes Louline Voye en wallon commun) Sicrijhaedjes da Louline Voye fwaits u redjårbés e rfondou.

 (Back textes en wallon) Ralans sol pådje des scrijhaedjes e rfondou walon

(Back homepage Louline Voye) Hay ervoye so l' pådje divantrinne da Louline Voye.

(Back) Hay ervoye al mwaisse-pådje

Sicrijhaedjes eplaidîs so les fyis avou l' åjhmince do scrijheu. On les pout rcopyî et redjårber tot rahoucant l' adresse did so les fyis.

Édition en ligne explicitement autorisée par l'auteur. Reproduction et adaptations autorisées en citant la source Internet.