dierin rapontiaedje - last update: 2004-06-04.

Dressêye:

• À propos d'une sous-espèce remarquable du hêtre. Li faw di Verzy (Louis Baijot).
• Quelques oiseaux de chez nous. Les oujheas d' amon nozôtes. (Léon Demarche).

A propos d'une sous-espèce remarquable du hêtre.

Li faw di Verzy.

- Vs alez co todi fé vos pormoennådes, Emile ?

- O, oyi ! Li samwinne k' est houte, dj' a stî do costé di Rvin, sol Platrê d' Rôcroyî, avou des forestîs francès et dj' a veu ene vraiye merveye !

- Di cwè k' vos vloz cåzer ?

- D' ene hesse come dj' end aveu jamwais pont veyou. Mådjinez on faw, deus troes metes hôt, ascwati come ene covresse, avou les brantches ki pindèt ttåtoû, e rond, disk' a tere, et les foyes si serêyes k' on n' åreut seu vey houte.

- Vos m' sibarez, Emile !

- Dj' î esteu ostant k' vos. C' est bon k' les gåres m' ont espliké ki c' ere ene sôre di toirtchåde hesse, ene sacwè d' fén råle sol payis, et ki provneut d' on grand bwès do costé d' Rinse, el Tchampagne, e viyaedje di Verzy. C' est po ça k' on l' lome : "Li faw di Verzy".

I n' è faleut nén dpus po k' al nute, dji plonke so l' éndjole et mete li rcwirrece "Google" a l' ovraedje. Çou k' dj' î a discovrou, dji nel såreu tni por mi tot seu. Fåt k' dji vs è cåze.

Ces hesses la, come l' Emile end a veu ene, di tote li tere, on n' è trove, po bén dire, ki dlé Rinse, dins l' grand bwès d' Verzy, on viyaedje del montneye di Rinse (288 m. hôt), nén lon del voye ki va so Chalons-el-Tchampagne, e wangnant on pô so Epernay.

I gn aveut la, e 6inme sieke, dins ç' grand bwès la do dominne del "Comandreye do Timpe", on moustî dicåcî a Sint Båle, k' aveut stî askepyî e 664 pa Sint Nivard.

On vout ki les moennes, so leu passadje, plantént todi des hesses. Li toirtchaedje do faw di Verzy, ça åreut stî ene rascråwe evoyeye po pûni les djins d' Verzy.

Li no d' l' åbe e sincieus latén, c' est ki est: Fagus Sylvatica L. var. Tortuosa (Pepin, 1861). Dj' ô bén k' il a stî batijhî pa on lomé Pepin e 1861. Var. Tortuosa, dabôrd: c' est assez dire ki c' est crawieus, et nén on pô.

Tré kel pî u k' ene brantche a on pô crexhou, li crawieuse få fwait keude so keude dins tos les sinses. C' est po ça ki nost åbe ni vént nén bén hôt, mins k' i crexhe purade come on parasol u on paraplouve.

I fouye pus tård ki les ôtès hesses. Les foyes sont pus ptites et pus serêyes so les boutes di l' anêye. Et come i crexhe moens vite k' els ôtes, i prind raddimint l' cogne d' on paraplouve cwand i dvént vî et d' ene covresse cwand il est pus djonne.

On-z ôt brutyî ki ç' sereut ene mutåcion k' åreut amoenné en téle codujhance.

On-z esteme ki les pus vîs des åbes, les cis ki vnèt d' peri, årént eter 350 et 500 ans. C' est nén åjhey d' elzî conter les crexhinnes.

Si c' est a Verzi k' on-z è rascontere li pus dins l' monde (668 e 1977 et come 800 asteure). Il è vént kéconks ossu e l' Almagne, do costé di Hanôve. End a eto sacwants dins l' Sud del Suwede et plik plok e Daenmåtche.

Cwand on-z è rescontere dins les bwès francès, end a nouk po dire comint k' il ont la vnou.

A l ' univiersité d' Montpellier, li mådjuster Bernard Thiebaut a fwait des rcweraedjes sol faw di Verzy. Il a trové des diferinces dins les djinnes di l' åbe. Les grinnes k' il a rsemé et k' ont bén vlou djermer ont dné des hesses normåles, des crawieuses et des mitan mitan, mins ça n' vout nén co dire tcherete.

Come les branches do faw di Verzy pindèt disk' a tere, ses branches si marcotèt åjheymint, minme dins l' bwès; et ces marcotes la crexhèt tot ossu crawieuses, minme si on les rpike pus lon, dins on pair u ôte pårt.

Totes des crawieusès hesses ki crexhnut el minme plaece, come di djusse, ça a fwait rsoude les viyès croeyances et les fåves do vî vî tins.

Pår divant dvant l' askepiaedje do moustî Sint-Båle e 664, gn arot dja yeu drola, do tins des Celes, on nîme dicåcî a Baal, onk des diès celes. Pu vî k' ça, on-z î a eto rtrové ene hatche preyistorike.

El Moyinådje, li (doûce) croeyance vleut ki les fås d' Verzy estént ene rascråwe k' åreut stî avoyeye pa Båle, li diè cele del tonoere, po pûni les djins d' Verzi. Pocwè ? I nel dijhèt nén.

Co enute, des croeyances k' i gn a s' aspoyèt so les cénk croes des fås (ene blanke, ene noere, ene vete, ene rodje et ene djaene) ki les moennes årént planté dins ces bwès la åtoû do viyaedje di Verzy.

I fjhèt etervini des viyès uzance chinwesses; il î sereut kession d' loumire do djoû, des ekinokes, des 5 elemints, des rantoeles solreces et teresses, des movmints del tere et k' è sai dj' ?

Des ôtes pretindèt vey on sene a vey avou l' sacraedje des Rwès d' France. Adon, ça s' fijheut a Rinse. Et li djoû di dvant l' sacraedje, les rwès vnént priyî dins ces bwès la.

Leyans don å résse ces doûcès croeyances la. Riwaitans seulmint les fås d' Verzi come ene curiosité del nateure ki, dayeur, les forestîs sognèt ås ptits agnons.

Et c' est foirt bén insi.

Louis Baidjot, foû di: Coutcouloudjoû, l° 99-100, nov.-déc. 2003.

 Dipus d' racsegens sol få d' Verzy (e walon).

 Dipus d' racsegens sol få d' Verzy (e francès).

 Li pådje då Louis Baidjot.

 Si des mots difficiles se présentent à vous sur ces pages, allez voir s'il ne sont pas expliqués dans le Splitchant motî do walon (avec brève traduction française), ou dans le Wikipedia, l'encyclopédie en wallon (suivez: "Pordjet Esplicant Motî").

 (Back index par sujet) Alans rzè a l' edesse des sudjets.

 (Back textes en wallon commun) Erdalans sol pådje des scrijhaedjes e rfondou walon.

(Back homepage) Alans rzè el mwaisse-pådje

(homepage wallon commun) Alans rzè eviè l' pådje moennrece do rfondou walon.

Sicrijhaedjes eplaidîs so les fyis avou l' åjhmince do scrijheu. On les pout rcopyî et redjårber tot rahoucant l' adresse did so les fyis.

Édition en ligne explicitement autorisée par l'auteur. Reproduction et adaptations autorisées en citant la source Internet.