3 C' est todi ene novele djoye di vey l' oronde ramoenner l' prétins.

4 Bén vite, ele trove tchåsseure a s' pî, et les acoirdances atakèt d' ene plinne pîce. Li måye gruzinêye des doûs respleus a l' oraye di s' monkeur po l' adawyî.

5 Padrî l' veye poite do stå, les orondes ont catchî leu niyeye; li ni d' plomes ahoute tote li covêye.

6 So l' trevén d' cwénze djoûs, li frumele va cover djoû et nute. Onk di ses cwates maténs, les poyons vont vni foû del schågne.

7 Ces djonnes rafårés tchiptèt sins rla. Di nole eure å matén disk' a l' alnute, les parints lzî apoirtèt totes sôres di moxhetes.

9 Dizo èn abatou, i gn a on vî tracteur qui n' sieve pus a nolu.

10 Portant li måvi n' a rén trové d' mî ki do fé s' ni a l' copete do moteur.

11 Totes sôres di halenes et målès moxhetes sont-st astitcheyes ås djonnes. Cisse kimelêye-håsplêye di målès biesses sont hapêyes pa les måvis, gråce a zels nos nd estans cwite po tofer.

12 Tos ces oujheas nos acpagntèt tot å long des såjhons; sins zels, nos viyaedjes et nos campagnes ni serént nén çou k' i sont.

13 Nos inmans rtrover divins les viyès pires li sovni di nos tåyes Tos ces temons, nos les volans wårder po les mostrer a nos efants.

14 I nos fåreut ossu prinde asteme a totes ces ailêyès pieles ki sont l' agremint di nos bwès et d' nos djårdéns. C' est on patrimoenne ki nos dvans adegnî a totes foices.

15 Divins tos ces oujheas, li tcherdin est bén li pus bea et l' pus gåy.

16 Vocial li bele niyeye do tcherdin; les djonnes vinèt d' disclore.

17 Les ptits poyons froûleus sont restchåfés pal mame. Li pere si tchedje di fôrer tote li famile.

18 Li mame si clintche viè les ptits et ripårtaedje l' amagnî. Les poyons riçuvèt tchaeconk kékès bonès goirdjeyes.

19 Ele rafûle asteure les djonnes, nos mostrant li rglatixhaedje d' ôr del noere aiye.

20 Les frisses zuvions do prétins fjhèt rflori li bea payis d' Heve.

21 Avou on spitaedje di fleurs a n' nén croere, les åbes sont spanis.

22 A l' intrêye d' ene tchabote d' ene melêye, on cradjolé oujhea atchôke si tiesse.

23 Li djoli betche-fier est on mwaisse gripeu; i s' agrawtêye ås coxhes po cweri a magnî.

24 Cwand les djonnes ont cwénze djoûs, i gripèt a l' intrêye d' el tchabote po rçure li betcheye.

25 Li grande foice do djoli betche-fier est d' apicî les waerbeas magneus d' bwès. Mins li proye est foû mezeure et l' djonne oujhea ni sait pa wice l' apicî. Tot l' minme, vo l' la rpaxhou po on tins.

26 Vocial seur èn oujhea carapmint utile. Sins lu, k' advénreut i di nos waides et d' nos bwès ?

27 ... Ces waides et ces préreyes k' on a tant ctapé et distrût nawaire... mins on î dvreut loukî come li poupå d' nos ouys, afîsse ki nos rdjetons polénxhe profiter di leu beaté.

29 Divins ene niyeye di fènès coxhetes, les djonnes ritchåds si vont enûler.

30 Li pus spitant est dedja evoye.

31 Ces oujheas haspoyous sont les djonnes do såvadje colon, k' on lome ossu colon monsåd.

32 Si vite ki l' colon potche so l' ni, lès djonnes el kissaetchèt po avou l' betcheye.

33 I vont cweri zels minme li boleye rapoûlêye el face des parints.

35 Avou ene boune betcheye, li grijhe fåvete si winne divins les bouxhons.

35bis Cwand les ptits voeyèt l' mame, i drovèt leus betchs tot tchîptant. Sins piede nou tins, nosse coraedjeuse fåvete fwait l' manaedje tot oistant les schites des djonnes.

36 Li rodje fåcon est èn oujhea rapace. I tchesse sortot les soris et les rates, et kécfeye des ptits oujheas.

37 Les djonnes moxhets ravizèt a des boulets d' blanke linne.

38 Li mame rintere d' el tchesse avou ene rate, mwaisse amagnî do rodje fåcon.

39 Tot fén droet, li rpårtixhaedje atake. Mintnowe divins les grawes, li rate est discôpêye et pårteye inte les ptits.

40 A l' ådje d' on moes, les djonnes fåcons cwitront l' niyeye la wice k' ont veyou l' djoû.

41 I fåt saveur ki tos les moxhets sont-st utiles. Målureuzmint on lzî a sovint tapé l' hate et i sont ctchessîs come des emacralés. C' est a n' nén croere, ca i nos dishalèt di totès sôres di målès biesses.

42 Tot balzinant e fond del vå, l' aiwe di Berwene si winne inte les poples.

43 Ele est sovint påjhûle et rglatixhante.

44 C' est dvins les såvadjès yebes ki l' fåbite di marasse a-st emantchî s' niyeye.

45 Come on spirou, l' oujhea s' agritche ås tidjes. Cou dzeu cou dzo, i dene li betcheye.

46 L' aiwe di Berwene est sovint boirdeye di teras d' årzeye.

47 C' est cial k' on pout vey li pus bea d' nos oujheas, li rwè-pexheu. Moussî come on milôrd, i fwait blawter å solea totes les coleurs di l' airdiè. Tot d' on côp, i plonke el claire aiwe.

48 Il est foirt adjet; li pexhon s' kitape resseré comifåt e triviè do betch.

49 Cwand l' pexhon est apicî, nosse rwè-pexheu mousse radmint en on trô tchaboté e tera. C' est la ki nost oujhea d' loumire catche si niyeye.

50 Mins li rwè-pexheu est foirt bea et il inme li pexhon. Tos les côps d' rossea tchén sont bons po l' distrure.

51 Portant, c' est totes les crasses ki nos tapans e l' aiwe ki lyi ont dné l' côp d' moirt. Asteure, sins lu, nos estans dhessîs d' onk di nos pus beas oujheas.

55 Divins on ptit sapén, deus betchs sititchèt foû d' ene grosse bole di duvet.

56 Li mazindje a l' longue cawe apoite l' amagnî a ses djonnes.

57 Ele tchôke si tiesse e ni afîsse di fôrer lès rdjetons.

58 Tricnonote, ele s' ehåstêye po-z aler haper des ôtès moxhetes.

59 Ene trawêye e fouyaedje mostere ene ewaerante niyêye pindowe inte les coxhes.

60 Li mwaisse del måjhone c' est l' ôrimiele. Divins cisse banse douyetmint gåliotêye, les oûs sont presses a disclore.

61 L' ôrimiele est èn oujhea pawoureus. On n' voet ki bén rålmint si rglatixhante mousseure.

62 Il est foirt midone avou ses djonnes. Ceréjhes et halenes, c' est l' djama d' tos les djoûs.

63 L' ôrimiele, k' on lome ossu måvi d' ôr, est li rwè des bwès. Kimint rivålijhî d' beaté avou lu ?

64 Ene coixheure e grand bwès evaheye di fetchires divént l' dominne d' on drole d' oujhea.

65 Vocial li galbåd, oujhea d' ledjinde k' on lome ossu crapåd volant. Parey a ene pelote d' åbe, i s' essoctêye å solea coûtchant.

66 Pititès boles di plomion, les djonnes do galbåd ripoizèt a l' tere avå les ramayes, paski nou ni n' a stî apontyî po les rçure.

67 Li solea s' lait djus, esprindant l' cir come on foyou.

68 Li crapåd-volant est èn oujhea d' nute, i s' dispiete cwand i fwait spès. Les djonnes bribèt l' betcheye; li mame si va ehåster po-z aler cweri a magnî.

69 Cwand ele rivént, ele nos mostere èn ouy ewaerant d' oujhea d' nute.

70 Li boleye di moxhetes prédjereye el face, est rindowe ås ptits .

71 Çou k' vos voeyoz la est foû råle. Bén pô d' djins ont-st avou l' ocåzion di sorprinde li galbåd divins ses ocupåcions les pus catcheyes.

72 Les grands bwès sont djîsse des oujheas rapaces.

73 Tot a l' copete do grand tchinne, vocial les poyons do hapeu d' wesses.

74 Les ptits sont bén fôrés; dedja on voet les prumirès plomes.

75 Li hapeu d' wesses ravize a on moxhet d' poyes. Portant i n' magne ki des wesses, del låme et des waerbeas.

76 Vochal l' amagnî principål do hapeu d' wesses: des torteas di ni d' wesses. Il est agrawté dvins les grifes et les djonnès wesses sont rsaetcheyes avou l' betch.

77 Li speciålizåcion do hapeu d' wesses el rind foirt utile. On n' sait comprinde k' i seoye co tiré djus pa des harloxhes k' i gn a. Eco on côp d' fizik tiré a l' vude.

78 C' est l' fén del djournêye; li viye cinse s' essoctêye.

79 Les dierins rais do solea fiestèt ine dierinne feye li tour d' inglêye.

80 La hôt, dzo les panes, les djonnès houprales sont todi covietes di blancs plomions.

81 Li houprale di clokî est surmint nosse pus bea oujhea d' nute. Åddizeur di çoula, elle est foirt utile, ca ele ni magne ki des soris et des rates. Portant, dvinltins, on l' loméve l' oujhea d' moirt, et cwand on l' apicive, on l' clawéve so l' poite del heure.

82 Dispoy ki l' monde est monde, les omes ont respecté l' nateure. Asteure, avou l' swè-djhant progrès, li nateure est atakêye totavå. Portant, puvite ki d' el mesbrudjî, l' ome divreut viker avou leye.

83 Ni tårdjans pus po wårder tot çou ki dene a nosse tere si beaté, si varyisté, si valeur, si veye.