Textes en wallon commun sur l'actualité internationale

Sicrijhaedjes e walon so des tinmes eternåcionås

 dierin rapontiaedje - last update: 2006-06-01.

 Dressêye:

 2005: rétrospective. K' ele soeye longue et roede…

 2003: Afrique de l'Ouest: l'enlisement ? Afrike Coûtchantrece: tot ki toûne li cou ?

 2003: Vingt-cinq ans de régime islamiste en Iran. L' Iran da Xhomeyni: 25ans après.

 La corruption dans le Tiers-monde et ses conséquences prochaines. L' abribance e Tîce-Monde.

 Septembre 2001. Les attentats de New-York et Washinton et le problème palestinien. Les atacaedjes di Noû-York et Washington eyet les Palestinîs

 2001: L'avenir de la Palestine et d'Israël. L' apartheid n' est nén moirt.

 Les émeutes en Kabylie 2001: un "remake" di printemps berbère ? Bontins cabile 2001 : Li dj'-end-a-m'-sô del djonnesse aldjeryinne.

 2000: L'Afghanistan après des années de conflit. L' Afganistan veyou d' ådvins.

 Analyse de l'année 1998 sous l'angle du droit international. Droet eternåcionå : co todi les ptits k' on spotche ?

 Indonésie, mai 1998: Suharto, un réformateur pris au piège du clientélisme familial. Suharto, on grand candjeu ki s' a leyî emantchî pa ses efants.

 Actualité africaine 1997: Di ces tins cial avå ls Afrikes.

 Les écoliers d'Afrique. L' Afrike des scolîs.

 1996: La guerre civile au Liberia. Liberia, li dierinne guere di discolonijhaedje ås Afrikes.

 Situation au Rwanda en 1995: interview d'Omer Marchal: Metans-les onk d' on costé eyet l' ôte di l' ôte ! on responda avou Omer Marchâl, on fén cnoxheu do Rwanda. (1996).


Rétrospective 2005

K' ele soeye longue et roede…

 

…et k'ele våye disk' å dbout…

Dji vos cåze di l' anêye 2006, come di djusse. K' alîz ddja tuzer, vozôtes, godis !!!

Mins riwaitans on pô kimint çk' ele a corou, noste anêye.

Beldjike, Palestene et boûsses

Les ptits Bedjes ont stî di dnêye po les pôvès djins k' ont pierdou ttafwait tins do radmarêye do 26 di decimbe 2004. Dipus d' 50 miyons d' uroliårds. Gn a des sôdards do Djeneye k' ont stî bouter zels-minmes e Sri Lanca. Proficiåte, mes cousses.

Todi come todi, li vicåreye politike a dné ses margayes et ses herlemes. Li prezidint Vau Cau, ki voeyeut voltî l' walon, a dvou taper l' cote sol håye. Vo l' rila simpe pårlumintî. Po muchyî les hignes et les hagnes et les poujhaedjes sins les cagnotes des lodjmints sociås, les sindicats on fwait metinguer les ovrîs, paski l' govienmint tuzéve ås pinsions d' leus efants et leus ptits-efants.

Såf ki, asteure, cwand on rwaite li vicaedje des djins e l' Afrike u e l' Azeye, i m' avize k' on s' plind d' åjhe. Si on sereut dins on camp d' refudjîs palestinîs å Liban, resseré sins ddja ene cwåte d' idintité dispu cåzu 60 ans, cwè direut on ?

Sereut on binåjhe kel gros Sharon a bagué evoye del Binde di Gaza - ene tere nén pus grande ki nos Redîmés Payis - avou l' idêye di zweper 40 åcint del Cisdjordaneye sins k' les ôtes payis n' trovénxhe a rdire ?

E 2005, les martchîs ås tites ont bén gripé, mågré kel petrole montéve eto (a 72 dolår li bari, on n' aveut måy veyou çoula). Et l' ôr n' a nén låtchî do griper nerén. D' åbitude cwand l' ôr et l' petrole montnut, les boûsses baxhnut.

El Beldjike, les sins-posse ni dvront pus aler ponter al comene; li dierin côp ci fourit e moes d' decimbe 2005. Mins s' fårè-t i co wårder si cwåte di pontaedje po-z î mete ses condjîs et ses ahotes a cåze d' ene croke u l' ôte.

On mousse, voye non voye, eviè l' e-goviernance. Les sins-éndjole voeront co do tins.

Terorisses, mondialijhaedje, abagance

E 2005, on-z a co voeyou des ewaerantès afwaires e l' Irak (axhoraedjes di totes les cognes), el Djordanreye ey e l' Inglutere (potchaedje di bombes), e Liban (assazinaedje di gaztîs et d' politikîs).

Mins ça a todi stî come ça dispu kel monde est monde. Et les terorisses ont co des belès anêyes divant zels, copurade paski l' mondialijhaedje, ki n' a pont d' ahote, aritchit todi dpus les ritches et cåvele todi dpus li fossé k' i gn a avou les pôves.

Les pôves ki, cwand les tévés n' elzès vnèt nén raguignî, crevèt todi d' fwin come des moxhes, come e Nidjer. Ça fwait ki totes ces djins la ni tuznut k' a ene sôre: vini e l' Urope u e l' Amerike bijhrece po bouter.

Mins on n' les vout nén. on-z a ptchî d' evoyî les guernåtes [crevettes] pa batea e l' Afrike po-z esse siplitcheyes, et les ramoenner pa camion (et manni l'air avou l' cobroûlêye essince) ki d' ascoyî a Ostinde des splitcheus(es) d' Afrike u d' Azeye.

Ça fwait k' on-z a todi on sistinme di handele, la k' les martchandeyes polèt voyaedjî totavå, mins les ovrîs, nén.

Drole di mondialijhaedje !

C' est la kel batch si rtoûne sol pourcea. Les ebagants foû d' Afrike et d' Azeye sont presses a magnî Mouze et les vås po moussî e l' Urope e stoumeligne [clandestin]. Avou ene riguilete di moirts, neyîs el Mîtrinne Mer, sitofés dins les camions u dins des contners k' ont candjî leu foye di voye.

Et l' bastixhaedje di l' Urope ?

L' Espagne vént di dner leus papîs a dipus d' 200.000 clandestins: des Ecwatoryins, des Roumins, des Marokins, des Colombyins. Mins cwand çki les 25 payis d' Urope si metront d' acoird po ene seule politike ascoyance des abagants?

E 2006 ?

Asteure k' i sont metou d' acoird, come ene seule djin (?!) sol buddjet 2007-2012… mins nén so ene mwaisse-lwè !

2005 dins l' pitite soce des waloneus

Come l' Acsegnmint et l' Culteure ni sont nén co todi a Nameur, cwè vôreuss fé d' grand, hê, ti !

Les soces rotnut todi, et les gazetes ossu, c' est on miråke. Gn a todi 12 rivowes so les axhletes des waloneus nåcionålisses (les localisses, li pus grosse peclêye, i n' lijhnut kel cene di leu coine).

Les Noveles des Walons Scrijheus d' après l' Ban-bwès n' ont nén staté avou l' moirt da Rodjî Viroux, come c' esteut a rcrinde. Li "Coutcouloudjoû" rexhe asteure tos les troes moes mins il est pus spès.

Li soce des Rcåzeus, k' aveut dhoté a Bietris, a raviké a Bive. Les "Scrijheus do Cinte", ont stî priyîs do djåzer do walon pa des soces cultureles do Roman Payis. On-z a eplaidî on "Tintin" avou l' accint d' Nivele…

Li rfondou walon

Ene pougneye di djintis ovrîs fwait tcheryî tecnicmint li rfondou. L' unifyî walon cmince a esse ricnoxhou foû des soces di waloneus… mins on l' eploye todi ossu waire, et nouk ni s' î a metou emey les ancyins waloneus.

Cobén ki…

Djôr Sfasi, 23 ans, et k' a skepyî el Roumaneye, a ratourné e walon on gros boket do såmtî [psaltier]. Po on noûwaloneu, on lyi pout dner l' plouma !

L' eciclopedeye Wikipedia rote todi mî, avou cwate cénk bouteus a tinzayeure. Elle a cmincî l' anêye avou on pô moens di 4000 intrêyes et l' atcheve avou dabôrd 6500. Ça fwait cwandminme cåzu 7 intrêyes par djoû. Ci n' est nén ene tchitcheye.

Å posse et dins les lives

Mins, e moes d' djanvî 2005, li novea boss di radio VivaCité a fwait tourner on papî come cwè, poy k' on wårdéve ene emission e walon, on n' pleut pus passer des plakes e lingaedje walon foû di ciste emission la. Fåt-st araedjî !!!

Gn a yeu deus noveas romans e walon di des djins d' mestî di cisse sôre di scrijhaedje la: li Lucyin Somme et si copleuse dins l' minme coleccion d' romans, Chantal Denis.

Tant k' a Djhan-Pire Dumont, ene des pus capåbès penes do 21inme sieke, li Coirneu d' Hu lyi a rexhou s' live di noveles "Contes di m' payis et d' co pus lon".

Mins, di cåze di margayes divintrinnes emey les Hutwès(ses), li Djhan-Pire a decidé, tot d' on côp, di n' pus rén fé pol walon.

Bén damaedje !!!

 

Vola ! Dji leye ouve. Dji n' brai nén mins dj' end a gros… mins dji m' rafeye tolminme di meyeus djoûs po onk di nos béns les pus precieus : li lingaedje di nos djins.

Boune anêye et totès sôres di bouneurs, sapinse k' on n' dit.


Lucyin Mahin, li 31 di decimbe 2005.


Afrique de l'Ouest: l'enlisement ?

Afrike Coûtchantrece: tot ki toûne li cou ?

 

Togo : ça sint l' agnon.

Marok: aroke do Sara Coûtchantrece; kiminçmint d' atacaedjes terorisses (may 2003).

Aldjereye: disdut terorisse dispu 11 ans.

Moritanreye: todi higne et hagne al tiesse do payis.

Senegål: Li Cazamance (boket nonnrece) dimande d' esse dislaxheye.

Siera Leyone: rexhe di 2 ans d' on mo laid tchinisse (150.000 moirts).

Liberia: guere civile dispu 1989.

Coisse d' Ivwere: guere civile dispu èn an (2002).

Nidjeria: apougnaedjes pol petrole (Nonne); Les Estats d' Bijhe todi pus a l' aschate rilidjeuzmint.

 

Kî çki n' a nén co dins l' tuza l' imådje d' el Coisse d' Ivwere, modele di påye et di diswalpaedje, avou on bon vî prezidint Houphouet-Boigny ki moennéve li payis dispu des razanêyes come on bon pere di famile ?

Bawaite ! Dispu 2002, c' est l' guere civile, et on voet nén kimint k' on ndè rexhrè foû.

Kî çki n' si ratuze nén do Marok, on payis Muzulman ki raloye li tradicion eyet l' modienté, avou tot on peupe ki shût si rwè, come ene seule djin.

Bardaf ! Les atacaedjes terorisses do moes d' may 2003 vinèt mostrer ki, cial eto, li diswalpaedje s' a fwait a pårti des ritches et eviè les ritches. Si, di 1990 a 2000, les rintrêyes par djin ont rmonté di 700 a 900 euros (par an), li nombe di pôves (k' ont moens di 30 euros par moes) a co rhôssî di 5 åcint.

Sins conter li spene dins l' pî do Sara Coûtchantrece, la ki l' Marok, grandiveuzmint, est d' acoird avou tote les rexhowes atåvlêyes pa l' ONU, al condicion k' el ancyinne colneye espagnole dimoraxhe on boket do Marok !

Astok did zels, l' Aldjereye.

Onze ans après li tchessaedje-evoye des islamisses do FIS del politike, li payis n' a nén co seu saetchî s' tiesse foû des strins. Asteure, i s' batèt ådvins do pårti FNL (ki moenne li payis) po saveur kî çk' i vont "mete prezidint" ås vôtaedjes di 2004. Les djins nd ont d' keure di politike, et rwaitî les politikîs come des båyåds.

Nouk ni parpinse les dmandes di liberté culturele des Berberes. Les militaires ki sont mwaisses a Aldjî fwaiynut todi les cwanses di n' rén aveur oyou. "L' arabe est l' seu lingaedje del Republike." Il ont rcopyî ça d' ene sadju, va, taiss. On voet bén k' il ont stî colnijhîs 130 ans å long pås Francès.

Tant k' al Moritanreye, li dierinne saye po disdjoker l' prezidint Maawiya Would Taya (si t' aprins ç' no la so dijh sigondes, dji t' paye des tchitches) n' est viye ki di sacwants moes (avri 2003). Dispu ki les moenneus do payis ont fwait camaeråde avou Israyel, et drovi ene ambassåde a Nwattchote, i fwait todi pus "tinkyî" dins l' mwaisse-veye. Dins on payis islamike, la k' el Saddam Hossin aveut bråmint des soçons, vos sintoz bén k' ça n' plait nén a tertos les bresse-dizeu bresse-dizo avou ls Israyelîs.

Et, come totavå e l' Afrike, cwand gn a des cis ki n' sont nén d' acoird avou les tchîfs, on lzès tchôke el piole.

Li Moritanreye n' a nén ene plaece come l' Aldjereye u l' Coisse d' Ivwere sol tchantî politike. Nerén, c' est l' djondeure inte li monde arabe et l' Noer Continint.

... Et l' corin d' ene sitindêye di payis, avou do bardouxha et des revintreyes. Ça a fwait dire a sacwants k' on va motoit aveur la dvant ses ouys ene novele Yougoslaveye:

Å Liberia, ça fwait 14 ans ki les margayes inte les Noers "amerikins" da Tchåle Taylor et les Noers do payis (do LURD) durèt. Po vey kî çki serè mwaisse do payis et copurade des rivires ås diyamants. Tchaeke côp k' on sene ene påye, come lanawaire e Gana, les fiziks ridjåznut li samwinne d' après pask' i gn a on tchîf u l' ôte k' on-z a rovyî cwand on-z a pårti l' wastea.

Et les ptitès djins, zeles, sont tchesseyes evoye so les tidjes et les pazeas.

Asteure, li Tchåle Taylor est ametou divant on tribunå d' l' ONU po crimes di guere el Siera Leyone.

Come nos l' djhéns cial padzeu, el Coisse d' Ivwere, ça n' va nén mî. Dispu ki on-z a sayî di disdjoker li prezidint Gbagbo, les revinteus ont stî rboutés mais i sont todi mwaisses di lådjès stindowes do payis.

Et nén moyén d' arindjî les bidons politicmint, shonne-t i ås corwaiteus del politike ivweryinne.

Ça va nén mî ôte pårt. Li Nonne do Senegål, li Cazamance - cåzu disloyeye djeyograficmint do restant do payis pal Gambeye - si vout dislaxhî d' Dakar.

Å Nidjer ey å Mali, c' est des etneyes ki vlèt aveur dipus a dire dins l' viernance di leu contrêye.

Å Togo, ça sint l' agnon eto. Li prezidint Eyadema a stî rlomé (pol cwantrinme côp). Mins ci côp ci, i n' aveut rén trové d' mî ki d' espaitchî si bateu [adersaire] di s' prezinter.

Ça aveut ddja stî inla avou Hassan Watara, el Coisse d' Ivwere, k' on djheut k' i n' esteut nén Ivweryin pask' i s' mame provneut do Bourkina Fasso.

Gn a k' el Siera Leyone ki shonne esse rapåjhtêye après onk des pus teribes macsådaedjes di l' istwere del dislaxheye Afrike: cint a 200.000 djins - a l' avirance - î ont leyî leus hozetes. Dispu 2001, les Inglès î ont vnou fé l' police, et on-z î a evoyî dipus d' 17.000 Bleus Casses - les sôdårds di l' ONU -, sipårdous pattavå l' payis, copurade dins les xhaerbenreyes ås diamants [champs diamantifères]. C' est po-z esse mwaisse di cisse ritchesse la ki les Siera-Leyonîs s' avént pingnî des moes d' astok.

Dipus ki l' diale a, dipus k' endè vout.

Sacwantès loukêyes di solea

Li Senegål est todi sol droete voye, democraticmint tuzant, avou on prezidint (Abdoulay Wade) k' esteut dins l' opoizicion, et k' a wangnî si ashidwere lweyålmint, ås vôtaedjes. Et l' ancyin prezidint (Abdou Diouf) s' a houwé evoye come on bon pierdant. Eto a-t i a bén merité si posse di prezidint del Francofonreye.

Li Marok vént do viker des vôtaedjes po les comenes la ki bråmint des djonnes s' avént metou so les lisses - et passer. Et les djins ki cmincèt a dmander des contes ås mayeurs et scabins. Et l' tévé ki filmêye les margayes des rtournaedjes di cazake po fé les conseys, et fé ôre platezak ki sacwants ont payî les djins po vôter por zels. On l' dijheut ddja dinltins, mins nén dvant on filmeu pol tévé.

E Liberia, li Tchåle Taylor, tchôkî evoye pås Amerikins, a bén volou ndaler. Mins tot dnant li sidje di prezidint a si aidant, Moses Blah. C' est ddja mî k' rén, ont i dit les "LURD".

Mins c' est nén po ça k' on-z est al taeye ås fraijhes…


L. Mahin, li 26 d' awousse 2003.


Vingt-cinq ans de régime islamiste en Iran

L' Iran da Xhomeyni: 25ans après

Çou k' i gn a d' bén avou l' Daegntoele, c' est k' on pout voyaedjî sins mete les pîs foû di s' måjhone. Et atôtchî des pekêyes di djins ki vs dijhèt l' leur, sins ratna, ki c' est bén l' diale ki vs årîz rescontré podbon si vs årîz prin l' areyoplane et vosse saetch-å-dos.

C' est come ça ki dj' a stî passé deus troes samwinnes e l' Iran.

Les imådjes totes fwaites di l' Iran, c' est les femes ås noers lénçoûs so leus dos, les molas ki sont mwaisses di vosse vicaedje di tos les djoûs, et les metingues la k' on broûle li drapea amerikin et on macrea d' oizires ki rprezinte Mononke Sam.



on vî mola

Avou l' idêye dirî l' tiesse ki tos ls Iranyins sont d' acoird avou ces apinses la, et ki l' veye esteut bén pus plaijhante do tins do Tchè (li Sha k' on cnoxheut bén el Walonreye pask' il estént tofer e foto avou s' feme, li princesse Fara Diba, dins l' Påtriyote Illustré).

Ki tertos n' soeye nén d' acoird avou Ali Xhameney, li shuveu da Xhomeyni, l' ome k' est al tiesse - podbon - do payis, on l' a ddja bén veyou cwand li prezidint Xhatami a stî nomé e 1998 avou cåzu 70 åcint des vwès.



A hintche Xhomeyni, l' askepieu del republike islamisse; a droete, Xhameney, si shuveu el plaece di moenneu del revolucion.

Tén ! La ddja ene sacwè k' i m' fåt m' rilever, mi k' est a l' awaite, djoû après djoû, des dujhances des payis arabes. C' est seur nén dins on payis arabe k' onk k' est contråve avou li Grand Moenneu do payis, pôreut wangnî des eleccions et divni prezidint, minme si c' est on posse a mitan onorifike.

Shakla Lahiji, k' a ene gazete po disfinde les droets des femes, nos esplike ene miete kimint k' ça s' pout fé.


Shakla Lahiji (S.L.) - Nosse civilizåcion egzistêye dispu 2500 ans avou ene cåkêye di peupes k' ont-st evayi nosse payis. Nouk n' a seu distrure nosse lingaedje et nosse tuzance, ni l' Grand Zande [Alexandre le Grand], li Grek, ni les Romins ni les Arabes, ni les Rûsses, ni les Ingliches.



Persepolis, li veye basteye på Grand Zande, la cåzu 2500 ans.

Paski pocwè? Paski, ådfoû, nos avans todi bén wåde di dire amen ås cis ki s' ont rindou mwaisses do payis, mins åddins, dins nos måjhons, n' a nouk ki nos a måy espaitchî di critiker setchmint et cråndimint les moenneus do moumint.

Vos l' divrîz sepe, vozôtes, les Bedjes. Vos nos avoz avoyî on batayon d' superdjindårs, ki vosse rwé Yopôl II s' aveut metou d' acoird avou li Tsar eyet li Sha, po vni peter l' djaive å peupe ki dmandéve, e 1908, tot biesmint ene Mwaisse-Lwé [constitution]. Ils ont macsådé nos djins a Tabriz, mins i n' ont nén fwait long feu, et on ls a revoyî avou l' cawe inte les pates.

Li Ranteule: - Et cwè çki vos rprotchîz å redjime des ayatolas, dabôrd ?

S.L. - Les djonnes ni vos l' catchront nén: i vlèt dipus d' liberté. Gn a l' mitan des 64 miyons d' djins k' ont ådzo d' 25 ans. I n' ont nén cnoxhou les emantchreyes do redjime do Tchè, k' a peté å diale e 1978. Mins i savèt bén ki, si i s' vont pormoenner tot s' tinant pal mwin divant les djins, gn årè on bassixh, on vî lanchture fijheu d' moråle, k' elzî vénrè bawer: « Pocwè ki t' téns ç' crapåde la pal mwin ? T' a sogne k' on n' tel vegne haper ? »

Et i fåt schoûter et clôre si linwe.



I fåt hanter nén trop près onk di l' ôte, si vos n' vloz nén aveur les lanchtures a vos guetes.

Mins asteure, avou l' Etrernete et les antenes-schieles [paraboles] k' on monte catchetmint, tos les djonnes voeyèt kimint çk 'on vike foû payis et i nd ont leu sô. Nosse peupe n' est nén on peupe k' on tént reclôs; c' est on peupe k' a todi stî gaiy, dins l' fond. Et ça nelzî va nén d' aveur moens d' abondroets ki les pareys a zels e l' Urope u e l' Amerike. Ni rovians nén k' gn a on miyon d' Iranyins ki dmorèt e l' Amerike bijhrece, copurade e Canada, ey e l' Urope. Et k' avoyèt tofer des noveles ås cis do payis.

L. R.: -Ça fwait k' el revolucion, ça a stî on grand måleur, dabôrd ?

S.L. - A nonna, don, vos. Ni m' fijhoz nén dire çoula. Minme po ls abondroets des femes - droldimint -, li revolucion a stî ene avancêye. Dji vos va dire kimint.

Dizo l' ancyin redjime, les pôvès djins n' årént seu evoyî leus feyes ås univiersités. Gn aveut fok 35 åcint des femes ki savént lére et scrire. Asteure, end a 74 åcint. Do tins do Sha, gn aveut on tîce [un tiers] des studiants k' estént des cmeres. Asteure, c' est mitan mitan. Et ça s' rissint dins des mestîs come medcén: onk so troes, c' est ene feme.

Tot conté tot rabatou, les femes iranyinnes asteure sont pus ustieyes po rclamer leus abondroets. Mins c' est l' veur ki, po les mousmints a mete so s' dos, c' est co todi li lwè di dveur catchî ses tchveas et les rondeurs do coir ki va.

Èn ôte dominne la ki l' revolucion a amidré pår les cayets, c' est dins les campagnes. Li novea Redjime, dispu 1980, a metou en alaedje çou k' il ont lomé li Croejhåde pol bastimint. Tos les viyaedjes ont stî radjondous pa des belès lådjès voyes di tarmak, et on-z î a metou l' loumire et l' telefone.

Come l' essince î est li meyeumartcheye sol daegn (nén ddja 5 cenes å lite), ki l' corant, come li pwin, est subzidyî, les viyaedjes ricmincèt a viker. Copurade dispu k' on-z a rpårti les teres, et les dner ås cis k' elzès cultivèt podbon. Des trevéns do Tchè, disk' ezès anêyes 1970, ene pougneye di gros prôpietaires estént come les signeurs del Moyinådje, et des viyaedjes etirs estént da zels. Mins fåt dire li veur, li dierin Impreu Mohammed Raza Pahlavi aveut ddja enondé ene campagne di rpårtixhaedje des teres k' a stî continouwêye pås noveas mwaisses do payis.

S' on dmande si l' novele guere des Amerikins disconte di l' Irak va candjî ene sacwè po ls Iranyins, on vs respond hatche et matche :

- Cwand l' Saddam a touwé on miyon d' djins - des deus costés - c' est ls Amerikins k' el sotnént, por zels distrure nosse revolucion. Asteure, li batch s' a rtourné sol pourcea. K' i tirénxhe leu plan inte di zels.

- Tote hagnûlisté des Amerikins aflåwixh li camp Xhatami (les « bråves ») et c' est mwais po les djins aveur dipus d' libertés.

- D' èn ôte des costés, les bruts d' guetes dins l' Gofe ont fwait rmonter l' petrole. E 1998, li bari d' petrole si vindeut a 11 dolårs, siconte di 36 dolårs e 1991. Asteure, e moes d' måss 2003, i rbetche ås 30 dolårs. Çoula, c' est ene benediccion po l' Iran.

- Cwand ls Amerikins ont tchessî les Talibans d' Afganistan e 2001, gn a dipus d' on miyon di refudjîs afgans k' ont rebagué e leu payis. Ç' a a stî ene fameuse sipene foû do pî d' l' Iran, k' edjîstréve dipus d' deus miyons d' djins ressåvés d' leu payis, bråmint des Afgans et des Kurdes irakyins. Si ls Amerikins kitchesrént l' Saddam, ces-ci eto (les Kurdes d' Irak), pôrént rwangnî leu payis et aswådjî d' ça ostant l' economeye di l' Iran.

Mins mågré tot, cial, on-z a pawe ki, après l' Irak, les Amerloxhes ni s' aresteyrént nén...


L. Mahin, li 26 di fevrî 2002, divins Li Ranteule, l° 25-26, bontins esté 2003.


La corruption dans le Tiers-monde et ses conséquences prochaines

L' abribance e Tîce-Monde


El Djadida (Marok), coulot El Ghorba, li 20 di djanvî 2003.

Dji vons dmander cwè et kesse amon des djins ki dmorèt la, avou m' fi, k' a on dvwer di scole so les coulots d' barakes [bidonvilles].

Dinltins, les bidonveyes, e Marok, c' esteut avou des toles et des plantches. Asteure, å pus sovint, c' est des meurs di mwelons. Li toet, c' est co fwait avou des toles å cminçmint, mins docô ki les "barakîs" ont ene miete di spågne, i fjhèt mete ene tchape di beton.

A hintche, des barakes di plantches (1978), a droete, ene pitite maçnêye cassene (2003).

Mins on lodjisse avou des meurs et on toet d' beton ci n' est pus ene barake, c' est ene måjhon. Les coulots d' barakes ont divnou, pitchote des "bidon-borks". Oyi, apus ki, dins ene måjhon måjhon, i gn a eto l' aiwe, et l' corant et les ahesses, les tchiyotes ki vudèt dins ene saiwire, cwè et l' comene paye des djins po ramasser les nichtés [détritus].

Cial, rén do tot d' tot ça ! On va cweri si voye d' aiwe al fontinne tos les djoûs, a pî, et poirter les bidons al mwin, si c' est nén trop lon. Nolu n' a co sondjî a redvinter li hårkea [système de portage de deux seaux sur un bois sculpté à la forme de l'épaule].

Si c' est pus lon, on va a l' aiwe avou ene berwete. Les "bidons-bordjoes" n' ont nén l' ådjeu di s' siervi des ågnes, come les djins des viyaedjes, ki tcherdjèt l' bådet, estô do bassa [au lieu du grand panier pendant sur les flancs], avou deus plinnès djusses [outres] d' aiwe. Mins dins les baracaedjes, eyou vôrîz k' i lodjrént, les ågnes ? N a nén ddja del plaece assez po mete tos ls efants.

Les mannestés, on les stitche dins on grand saetch, pu ls aler hiner evoye avå les tchamps, dj' ô bén : pus près d' èn ôte coulot d' barakes ki do vosse.

Mins kimint k' ça s' fwait k' l' Estat leye fé çoula sins moti ?

A ! li govienmint ? Li "Maxhzene", come on l' lome cial (on mot arabe k' a dné l' walon "magazin", paski li wårdoe ås dinrêyes, dinltins, il esteut wårdé pås sôdårds et manaedjî pås eployîs do rwè).

Vos sintoz bén ki tos les gros golés (minisses, govierneus d' province et hay vos nd åroz) ni metèt måy leu pîs dins ces coulêyes la. Le seul riprezintant do "Povwer", c' est l' tchampete. C' est lu ki voet di ses propes ouys k' on-z aprestêye vola on hopea d' såvion, des saetchs di cimint, et on moncea d' mwelons. I sait pår bén ki l' londmwin, gn årè cwate meurs d' astampés et on toet d' toles et k' i fårè on procès et on buldozer po les vni dårer djus.

Adon, cwè çki s' passe ?

Bén c' est åjhey a sondjî, don. On djemixh, on s' fwait laid divant l' tchampete. On somadje k' on n' a nén la wice lodjî, k' on n' såreut aler lower el veye, et tchik et tchak. Tot fjhant ces xhinêyes la, on lyi ecråxhe li pate, sapinse k' on n' dit. On lyi tchôke deus gros biyets dins s' mwin, et on lyi "stoke li pougn", ça vout dire k' on lyi rclôt l' mwin dsu, po k' i n' vos les rinde nén.

C' est çoula k' on lome l' abribance : i n' vos a nén bribé ci trintinne d' euros la. C' est vos ki l' a-st abribé. Come si vs lyi årîz dmandé k' i vos bribe sacwants liårds, et shuvanmint clôre les ouys. Çou k' on dene po-z ecråxhî l' pate, ça n' si lome nén del cråxhe, ça s' lome des bribreyes - co on bea mot walon ki ls Inglès nos ont vnou haper, "epronter" sapinse les linwincieus -

Mins l' tchampete, lu eto, i gn a des cis ki l' awaitèt. Dins l' schålance des eployîs d' l' Estat å Marok, c' est çou k' on pôreut lomer on mwaisse-tchampete. Si vos l' avoz rovyî, vos alez aveur ene deujhinme vizite, ci côp cial, bråmint pus mançante, et criyî Barabasse po dire ki dmwin, li grosse pêleuse serè la avou l' buldozer po spansler vosse cassene.
Alez, hay, co 20 euros foû d' vosse boûsse, et on n' è cåze pus.

Dins nost egzimpe, nos avans ddja bén veyou deus piceures del corupcion: aprume : c' est todi les ptitès djins ki payèt; deujhinnmint li ptit eployî ki vos avoz-st abribé, i pårtixh li "stocaedje" avou les cis ki sont pus hôt dins l' adminstråcion por zels clôre les ouys.

Minme djeu avou l' djindåmreye, et les polices di totes les sôres. Les båraedjes so les voyes, metans. Rôlez xhiltanmint avou ene camionete sins frin, sins loumires, sins assurance, et s' dinez ene boune dringuele ås policîs, et vs iroz disk' al Meke en oto.

Paski çou ki dji vos a dit pol Marok, c' est Piron parey e l' Aldjereye, Tunizeye, Libeye, Edjipe. Et dins tote l' Afrike ! Ça a divnou telmint rbatou [banal, commun], ki les djins cloyèt tertos leus ouys, et esse les prumîs a tinde leus mwins et stoker les pougns totavå, cwand c' est po-z aveur on papî, ene gratificåcion, u po fé moussî leus efants dins les bankes, les administråcions les grandès societés.

Les cis k' ont åk a dire, i sont tertos broûlés et schôdés : il ont sovint payî po-z aveur leu plaece, et i sont les binawreus rçujheus des dringueles ki les cis ki sont odzo d' zels hapèt ås ptitès djins.

Ci sistinme la, rote todi d' mî a mî dispu k' les payis del tîce-daegn sont moennés avou des administråcions come e l' Urope. Et il a ene consecwince direke : les ritches divnèt todi pus ritche, et les pôves, todi pus pôves - dji l' a ddja dit traze côps, mins djel ridi co -.

Et gn a nolu ki trove a rdire ?

Cåzu nolu. Dispus leus belès anêyes e 1960-1970, les socialisses et les comunisses ont stî: soeye-t i spotchîs (Edjipe), soeye-t i amidrés, tot les fjhant moussî dins les govienmints (Marok), soeye-t i k' il ont divnou zels-minmes des dictateurs (Sireye, Irak, Libeye).

I gn a k' ene binde ki djhèt, francs come des tigneus, ki l' abribance et l' gåtaedje do sistinme politike ki va avou, est mwaijhe : c' est les islamisses. Fåt dire li veur wice k' il est !

Po ça ki, dins dijh, cwénze ans, cwand les peupes arabes si vont revinter, onk après l' ôte, siconte di leu goviernants, gn årè k' les islamisses ki seront presses po profiter di ces revolucions la.

Mins ça, c' est ene ôte pwaire di mantches a-z espliker ! Motoit bén èn ôte côp.


L. Mahin, li 25 di djanvî 2003.

Li clasmint do stocaedje di pougn avå l' Daegn


Analyse de l'année 1998 sous l'angle du droit international

Droet eternåcionå : co todi les ptits k' on spotche ?

Li ci ki corwaite et carwaitî [dévisager sous toutes ses coutures] li droet eternåcionå, a yeu do rloucaedje [des choses à voir] e l' anêye 1998.

Les Amerikins, co on côp zels, sont des djins mo spepieus e leu payis, disk' a conter les djermons [spermatozoïdes] di leu prezidint sol cote di dzo di si mayon Monica. Et ci prezidint la, po n' si nén fé fote a l' ouxh, vna dmander pårdon divant tertos, et tchoûler " Non moman, dji nel frè pus ".

Po distoumer l' atincion di ses fivîs [fivî, habitants du même fief, compatriotes], li Clinton n' a rén trové d' mî ki di låtchi sacwantès bomblotes sol Soudan eyet l' Afganistan.

Al manire d' on rossea tchén [lâchement], come di djusse: e tchôcant so des botons a pårti di bateas k' estént ki naiviént 1000 km lon. Çou k' on lome saetchî dins l' dos. N' a nén rwaitî k' aléve sicafyî des dijhinnes d' enocins. Dji vôreu bén vey l' Irak ki vénreut tirer ene V2 [un missile de croisière] so l' oujhene Pfizer di Baltimore. C' endè freut onk di herleme [concert de récriminations].

Portant, on pôreut ttossi bén rclamer [affirmer] ki l' Amerike ecoraedje li terorisse passif tot leyant li Netaniahou fé ses zines, ses vires et ses makets [tous ses caprices]. Li ci k' end acwire [chercher noise] èn ôte, il est mitan responsåve do pougn al gueuye k' i rçût après.

Portant, franc come on tigneus, li Clinton ratakéve å Noyé, so l' Irak, al fene mitan do cwareme moslimî.

Paski pocwè ? Paski l' Irak, li Soudan et l' Afganistan, c' est tos payis muzulmans ki n' tchantèt nén sol minme violon ki nosse grand fré amurloche.

Avou ké droet eyet ké permission, tos ces bombardaedjes la, mel dirîz bén ? Nén li cine di l' ONU, todi : i n' l' aveut nén ddja dmandé. Paski, nosse Clinton end a yeu håsse, ni pus ni moens.

Bismark, et après lu, li kaizer Wiyåme, tot Boches k' li estént, avént, al boune, li politesse di declårer l' guere divant d' ataker on tîce payis, la, zels.

Ostant tins d' l' atacaedje di l' oujhene di droukes [pharmaceutique] di Khartoum, ki po les bombardaedjes di l' Irak, les ôtes payis ont fwait les robetes di croye [ont joué les beni-oui-oui], et dire amen, come tofer. L' Inglutere a minme tchaké dins ses mwins pol bombardumint do Soudan, et voyî des fleurs å Prezidint U.S. Po l' Irak, ont minme evoyî des avions tchesseus Tornado po-z aconcwester [accompagner] les B12 då Bili.

On voet co ben ciddé ki, cwand k' on cåze li minme lingaedje, on-z atrape, voye non voye [que l'on le veuille ou non], les minmès idêyes. Inte deus åtchetes [entre parenthèses], si on djoû li Walonreye ni djåzréve pus k' el francès, ci sereut on raloyaedje de facto a Paris et ås tuzêyes paridjotes [parisiennes]. Di mu ké langue ki ti dvizes et dji t' dirè çou ki t' as dins l' cabu ! Si vos vs vloz rinde mwaisse d' on peupe, hapoz lyi si lingaedje.

Rivnans drî rinne [derrière la rêne = à nos moutons].

So l' tins k' les Amerikins caberdôxhént so ls Arabes, a Wîne [Vienne], noste ancyinne mwaisse-veye [capitale], l' A.E.A., l' Adjince Eternåcionåle po l' Enerdjeye Atomike [A.I.E.A.] ni parvineut nén a fé vôter ene åjhmince [agrément] por zels poleur inspecter l' årmumint nawearin [nucléaire] dås Israyelîs.

Zels, i plèt touyî eyet brouyî [faire ce qu'ils veulent] come i vlèt, mins l' Irak, lu, ni pout nén bodjî d' ene pate sins s' fé broyî l' ôte.

Tant k' a l' Inde eyet l' Pakistan k' ont fwait tchaeconk cénk shijh sayaedjes [expérimentations] di bombes atomikes tins do pretins 1998, on lezî a côpé les corions del boûsse, po les puni di n' nén aveur schoûté les grands, k' elzî avént bén disfindou di s' amuzer avou leus forwårdés djodjowes [jouets réservés].

So ç' tins la, Amerikins ey Uropeyins tchictént et-z atraper li hikete [tergiverser] å Kosovo. Pocwè disfinde des ptits k' on spotche s' i n' ont pont d' petrole ni diâle di rén, copurade si c' est des mawometans ?

Mågré tot, e 1998, gn a yeu sacwantès avanceyes sol tchimin d' ene meyeute djustice pattavå l' bole.

Po cmincî, å pretins, a Rome on-z a parvinou a-z amonter on tribunå poennå [pénal] eternåcionå k' irè sins ahote [permanent]. Come di djusse, l' Amerike et Israyel ont vôté disconte. Les ôtes payis ont stî dacoird, mins s' a-t on decidé k' on n' s' î ocupréve nén del drouke, ni do terorisse.

Dispu èn an, èn ôte tribunå speciå, li ci d' Arusha o Kenia, eva pyim pyam, mins rote tolminme. Il a cmincî a rexhe des sintinces. Inte di zeles, ene codanåcion a moirt d' on minisse k' aveut adjinçné li spata [extermination] des Toutsis e 1994. Ene feme, ene sicabene [femme échevin], a stî codånêye a 15 ans. Deus ancyins mayeurs ont stî codånés al prijhon a perpete, dj' ô bén [c'est-à-dire] : po leu veye durante.

Eyou les va-t on reclôre, alez dmander, dazår ? Li reglumint est clair: c' est l' prezidint do tribunå ki tchoezixhe li payis wice ki les codånés vont aler el gayole. L' eguegne [le problème], c' est k' n' a waire di payis ki s' ont metou volontaires po ene sifwaite ehale [embarras].

Pocwè nosse Walonreye ni freut ele nén comiece di ses prijhons. Come ça, les gros k' iront (motoit) al piole po l' afwaire Ogusta seront-st e boune kipagneye. Si on lzî dmande ene foto-sovni - raddimint, dabôr, divant k' les bribeus d' miyons beljes ni soeyénxhe rilåtchîs po boune kidujhance [bonne conduite] - i front surmint tertos des vizaedjes ... come des poites di prijhon !


L. Mahin, li 6 d' octôbe 1998.


Rwanda: gn a pont d' fén k' ça s' rapåjhtaxhe.

 Metans les onk d' on costé eyet l' ôte di l' ôte !

on responda avou Omer Marchâl, on fén cnoxheu do Rwanda

Li Ranteule: - Metans les onk d' on costé eyet l' ôte di l' ôte ! Fijhans on Toutsi land eyet on Houtou land. C' est çki l' O.N.U. est motoit an trén d' ponre po sayî d' rexhe foû do bardoûxha do Rwanda. I paretreut ki Daniel Arap Moy, li prezidint do Kenia, ni sereut nén disconte. Cwè ndè djhoz, ô, vos, Omer Marchal ?

Omer Marchâl: - Ene americanreye di pus ! Paski ces djins sins tuzance la ont pårvinou a speter djus leus indyins, et raclôre li restant dins des eclôs, i croyèt k' i plèt uzer did sifwaitès emantchreyes pattavå l' Afrike.

L. R.: - Pocwè k' ça n' ireut nén, ô, vos ?

O. M.: - Prumirmint: paski les Batoutsis et les Bahoutous ni vikèt nén dins des culots diferints do payis, come vs avoz les Flaminds et les Walons, metans. Et k' adon, i fåreut djusse fé baguer sacwants meyes djins ki vikèt so les abornaedjes. Voci, dins tchaeke viyaedje, vos avoz des Batoutsis eyet des Bahoutous. Deujhinmmint: noûf côps so dijh, les Batoutsis ont ene sôre d' ovraedje: i tnèt des vatches, eyet les Bahoutous, ene ôte sôre: i cultivèt. E l' Afrike, ni rovyîz måy ki c' est l' etcherpetaedje u l' distcherpetaedje di l' agriculteure ki fwait k' on payis est d' asgur u nén d' asgur. Waitîz co l' Aldjereye.

L.R.: - Les Toutsis, c' est des dispindeus d' gayole, s' apinse k' on dit, des grands epatlés, cwè. Ci côp la, les Houtous, c' est des bråmint pus ptitès djins, dowô ?


Des Toutsis: Louke on pô kés grandès bardaxhes di djins !

O.M.: - Cor ene ôte idêye tote fwaite. Do vî vî tins, c' esteut motoit bén inla; oyi, c' ere dandjureus linsi dins l' tins. Mins pus Asteure, nén dins les veyes, todi. Dj' aveu on fel soçon, Gervais Matshyali k' ere on Bahoutou, et c' esteut ene grande bardaxhe. Si féme, ene Batoutsi, c' ere ene pitite rabougroute. Teyoricmint, ça åreut dvu esse djusse li contraire.

L.R.: - Ey i djåzèt l' minme lingaedje ?

O.M.: - Taiss k' ây, li kiniarwanda. Ça s' pôreut bén, metans on Bahoutou k' a bén travayî, k' i rçuvixhe ene u deus vatches d' on Batoutsi por lu les wårder. Vint ans pus tård, c' est tot on tropea. Ça fwait k' s' i va a Kigali, et k' on l' lome " l' ome ås vatches ", c' est cåzu sinonime di " Batoutsi ". Et li, i lairè seur les djins dire, naturelmint. Ça fwait ki srè rbatijhî come Batoutsi, poy k' il a des vatches.

L.R.: - Ci n' est nén pus målåjhey ki ça ?

O.M.: - On flaxhe todi ene miete, come d' alaedje. Mins li ptite simince ki s' va piede a droete et a hintche, leye. Ça, c' est seur li vraiy. Dayeurs, ça advint e tos tchamps tos payis. Li baståd - såf respect - d' on Batoutsi et d' ene feme Bahoutou, ci serè ene grande pirtche come si pére, mins on l' lomrè Bahoutou come si mere.

L.R.: - Douvént k' i gn aveut k' les Toutsis k' avént des vatches ?

O.M.: - Les Batoutsis, c' est des Xhamites. Ça vout dire ki leu ratayon, c' ere Xham, li deujhinme valet da Noyé. Paret i k' i n' esteut nén l' mitan d' ene biesse. Av sovnance di l' Åtche da Noyé ? Yahvé aveut cmandé a Noyé di prinde ene cope di biesses di tchaeke sôre. Ça fwait k' il aveut prindou ene vatche, et dandjureus on gayet avou. Xham ere dins l' Åtche ki rloukive li cdujhaedje del vatche. Ey i s' dijheut dins lu-minme: " la ene biesse ki n' costeye nén grand tchoi et ki rapoite gros. Ele rimougne deus côps çou k' ele mougne [ele riwame]; li flate, ça n' sint nén mwais; on l' pout fé souwer et s' li broûler; on z endè pout fé do moirtî. Ele vele des veas k' on put touwer po del tchå. Ça dene do laecea; on pout boere si sonk. "

L.R.: - Come c' est l' môde avår la, nonfwait ?

O.M.: - Awè. Ça fwait ki, cwand il ont djondou tere sol Mont Ararat, et Noyé di dire a s' valet di vni tcherwer avou li - Noyé, c' ere on cultiveu, don, li -, et bén nosse Xham a respondou: " nonna gråce ! Mi, dji n' so nén on tcherweu, la, mi. Dji so-st èn acleveu. " Et hay evoye avou les vatches ! Et todi rote et todi rote tot rmontant l' aiwe-di-Nîl pal Hôte-Edjipe, avå les stindêyes di yebe di l' Abissineye et les hôts-plazreas do Kenia et d' l' Ouganda, disk' o Rwanda.

L.R.: - Et les Houtous estént dedja la, dabôrd, zels ?

O.M.: - Oyi, vos. Ça fwait k' cwand il ont veyou ariver ces vatches la avou leus longuès coines, il ont dit k' c' ere des antilopes.


Des vatches Ankole, avou leus longuès coines.

L.R.: - Si dj' coprind bén i gn aveut nole vatche avår la divant k' les Toutsis n' arivénxhe ?

O.M.: - Djusse !

L.R.: - Ça fwait k' c' est bén les Toutsis k' ont vnu colonijhî les Houtous ?

O.M. - Ça, c' ere li råjhonmint socialiveus da on parey a Mitrand. C' est bén po ça k' i s' a si tant ctapé po sotni Habyarimana, - l' avant-dierin prezidint do Rwanda; c' est cwand il a stî touwé en avion o moes d' måss 1994 ki l' berdoûxha a cmincî - cabén k' i cloyeut les ouys divant l' propagande des peupe-sipeteus des milices Houtous. On tuze naturelmint a Radio Mille Collines k' evoyive tot d' djoû des messaedjes po-z animer les Houtous a disschafyî do Toutsi, et tot ça légålmint.

L.R.: - Dji djheu ça po vs fé daler, don. Vos pretandoz k' ça a stî l' fåte des Beljes eto, k' ont distrût l' aschålance del sôcieté did ladrî cwand il ont-st oblidjî les Toutsis a pårti les vatches avou les Houtous. C' esteut e 1958; dji m' brouye ?

O.M.: - Ây mins dji n' disfind nén les Beljes po tot, savoz. I n' valèt des côps nén mî k' les Francès u les Amerikins. Dji n' disfind nén les capitalisses nerén. Mins, ces ånêyes la, c' est les biestreyes des socialisses k' ont stî les pus consecantes. E 1958, ç' a co todi stî les sindicats socialisses k' ont fwait fé greve ås mineus del Gécamine, et k' c' esteut les mwaisses-ovrîs beljes ki dvént miner les locomotives. Po les Katanguès, des blancs ki vnèt d' Brussele po dmander ås Afrikins di n' nén bouter, et des ôtes blancs k' ovrént a leus plaece, c' ere li monde cou dzeus cou dzo.

L.R.: - C' est co parey ådjourdu: des djins ki n' î cnoxhèt rén ki vnèt lancer des boignes messaedjes, come li skepiaedje d' on Houtou land et d' on Toutsi land. Nonna ?

O.M.: - Dins l' tins, z avîz des agents territoriaux, des Flaminds u des Walons, sovint des cis ki savént leu pårler flamind u walon. Et il aprindént raddimint li kiniarwanda. I gn aveut nolu a lzî prinde rapoirt al kinoxhance do payis. Mins on n' les aschoûtéve nén.

L.R.: - N' avoz nén ovré djustumint come agent territorial, vos ?

O.M.: Siya, et on n' nos schoûtéve nén, di-dj' . Mins on schoûtéve les ptits franskiyons beljikins (des Flaminds u des Walons) ki vnént del mwaisse-veye avou leus maletes rimpleyes d' idêyes foû scwere. Veyoz bén k' c' est co parey enute. Les Occidentaux vlèt epoirter leus idêyes, leu cdujhance, leu sistinme d' economeye dins des sôcietés pår diferintes des leurs. C' est on peur ricolonijhaedje, et c' est bén pus pire ki l' prumî côp, paski ça n' si voet nén directumint. Lonveyanmint, ça dene des situwåcions come vos avoz l' Aldjereye d' Asteure. C' est çki pind å nez d' tos les payis d' Afrike po les ånêyes 2000 et des. Pôves nozôtes eyet les tchéns d' tcherete !

L.R.: - Vos m' parexhoz fén disbeli ?

O.M.: - Vos veyoz ene ôte rexhowe po l' Afrike, vos ? Por zels, li devlopmint, c' est po les ånêyes 2100 et des, nén dvant. Et après on peur ridiscotaeyaedje di tos les payis, bråmint pus près des peupes k' î dmanèt.

L.R.: - Nos n' serans todi pus la po vey si c' est l' vraiy.

O.M.: Pôreut nén vali !


L. Mahin, divins: Li Ranteule lº 2; ivier 1996.

 Roman sur fond de génocide Rwandais: Li batreye des cwate vints.


Actualité africaine 1997

Di ces tins chal, avå ls Afrikes


Afrike bijhrece : Des vôtaedjes e l' Aldjereye.

Ene novele ricete po wangnî des eleccions democratikes nén democraticmint : vos fjhoz on novea pårti, li pårti do Prezidint. Come di djusse, tos les gros menirs des buros d' vôtaedje (inte di zels, des tchminantès djusses [urnes ambulantes]) fijhèt del riclame por lu. Mins vos leyîz, eto, l' ancyin Pårti Unike aler rcwester [quémander] des vwès. Li restant, des grumiotes, c' est po les islamiveus nén trop d' aschate [non extrémistes] d' Ennahda, les moderniveus da Sayd Saadi et les socialisses do F.F.S.

" Ça fwait ki l' Aldjereye, k' a stî minêye 40 ans avou on Mustî Unike, li serè asteure avou deus Pårtis Unikes ", endalèt-i, mocrês, les gaztîs et gaztresses.

Å réss, on n' les a waire leyî forguiner [fureter] dins ces afwaires la. Il ont stî reclôs dins les grands otels et s' lezî dnéve-t on les noveles å conte-gote, bén relîtes [triées] divant.

Yamin Zerwal va-t i adiercî s' côp come li Pinotchet ? Dj' ô bén : reyussi a diswalper l' economeye d' on payis avou 10 ans d' dictateure ? Les mzuras [paramètres] macro-economikes sont bons mins c' est paski les petroles si vindèt tchir et vilin ces tins ci.

So ces etrevéns la, les ptitès djins, zels, sont todi schafyîs [massacrés] påzès moudreus, soeye-t i l' årmeye, soeye-t i des islamisses åzès fiziks [islamistes armés] do G.I.A. et di l' A.L.S.

C' est todi les ptits k' on spotche !

Afrike Coûtchantrece : Siera Leyone, on novea Liberia ?

Li prezidint a yeu l' maleur di fé moussî foû d' prijhon des militaires rediveus [rebelles]. Do côp k' il ont stî a l' ouxh, i n' ont rén trové d' mî ki di tchessî li Prezidint evoye.

Bon et biesse, ça cmince pal minme lete.

La dsu, li Nidjeria a-st adåré avou si årmêye po... disfinde li democraçreye !

Ça shonne todi drole d' ôre çoula dins l' boke do djenerå Sami Abasha. Paski lu-minme, il a disdjoké on prezidint k' aveut wangnî ås vôtaedjes. Et c' est co nosse bea Abasha k' a fwait pinde 8 sicrijheus ki disfindént li culteure et les droets do peupe Ogoni, ki les puss a petrole lezî distrujhèt leu payis sins lezî rinde di paymint.

Fåt hoûler avou les leus et bawer avou les tchéns !

Mîtrinnès Afrikes: Do bardouxha ezès Congos.

O Congo-Braza, c' est l' ancyin prezidint comunisse, Denis Sassoum Nguesso, k' aveut l' tins long, et k' a pris sacwants tanks po-z aler fé do roumdoudoum dins Brazaveye. Les Francès n' fijhèt pont d' bén [sont inquiets] et reboirdèt [évacuent] leus copatriyotes. Il avént repeté avou ls Amerikins a Freetown (Siera Leyone) li samwinne di dvant, come nos vos l' dijhént enawaire.

Di l' ôte costé d' mouze [fleuve], a Kinshasa, on rpout dvizer do Congo et des Congolès, sins si fé traiter di colonialisse.

Lorint-Dziré Kabila va-t i reyussi a wårder li mwaistrijhe di ci grand payis la ? Copurade : va-t i poleur mete ene ahote a l' abribance [arrêter la corruption] ki splawneye [ronge, pourrit] tote l' administråcion lavola ?

Sacwants Beljes ki handlèt [" font "] dins l' diyamant et dins l' ôr e Katanga / Shaba nos djhèt ki les sôdårds da Kabila nelzî dmandèt puch di " dringuele " come c' esteut l' uzance do tins da Moboutou. I lzî ont minme payî l' essince k' il avént-st epronté.

Çou k' i gn a todi d' seur, c' est ki l' Congo di dmwin serè sconte di France, ki tneut trop veyanmint avou l' Moboutou.

Mins nerén, li Novea Congo serè bresse dizeu bresse dizo avou ls Amerikins et les noers Nonne-Afrikins [Sud-Africains noirs], des cåzeus d' inglich eto. Dj' ô bén ki li ci ki djåzrè l' inglès serè veyou pus voltî ki l' ci ki dvizrè l' francès. U minme li flamind (a môde Africaans) ca les diyamantîs da De Beers, bråmint des Boers africaners k' epoirtèt so Anvers et Roterdam, avént felmint ecråxhi nosse marxhå Moboutou eto. (On marxhå ki n' a måy ferè on tchvå, savoz; pôreut vali !)

Li ci ki raetcheye e l' air, ça lyi rtoume todi so si narene.

Afrike nonnrece. Grand bazår åzès drougues.

Li grand tribolaedje k' on djheut si les noers arivént al moennance do payis n' a nén etervinou. C' est a n' nén croere, mins c' est onk des payis les mî manaedjîs d' avår la, et çoula pa èn ome, li Nelson Mandela, k' a passé 36 anêyes di s' vicåreye el gayole.

C' est minme ene des plus ahivantès [croissante, florissante] economeyes do continint.

Florixhante, eto, po les smocleus d' droukes [trafiquants de drogues]. Si vos nel sårîz nén co, c' est l' Afrike k' a divnou li grand Bazår [supermarché] eyet li dispatchigne - li plake toûnrece, sapinse k' on n' dit - del drouke ki s' epoite d' on pô pattavå l' daegn.

Il est a rilver ki ci n' est nén fok di l' epoirt-espoirt. Ça s' vind bén ås djins do payis, avou. C' est minme les prumîs alouweus sol daegn etire di mandrague, li drouke saetcheye foû del harloucrale (mandragôre).

On dit todi k' gn a pont d' si grand må k' i gn a on ptit bén [à quelque chose malheur es bon]. Ciddé fåreut dire : n a nou si grand bén k' i n' a-st on ptit må [toute médaille a son revers].


 L.M. li 8 di djun 1997, nén eplaidî.


Les écoliers d'Afrique

L' Afrike des scolîs

L'Afrique des écoliers

Mourad, 15 ans, si ptite malete dizo s' bresse, tind si doet ås otomobilisses li long d' ene voye tarmakêye, ene sadju ås Afrikes. Djel kedje eyet lyi dmander cwè. Tos les djoûs, i va fé, todi en otostop, 15 km å matén et 15 km al nute, po-z ariver e scole, pa des côps a tins, pa des côps nén a tins. A nonne, i va nd aler mareder dins on ptit botike avou ene faguêye di makêye so on dmey pwin francès. Par nute, i va waitî di reboirder e si måjhon po-z î ariver viè les 7 eures 8 eures del shijhe. Mwints côps, a ces eures la, gn a pupont d' loumire, et s' va-t i studyî ene miete et fé ses bouyes di scole al wåmele.

Mourad, 15 ans, le cartable sous le bras, tend son doigt aux automobilistes le long d'une route goudronnée, quelque part en Afrique. Je le charge et je lui demande un topo.

Chaque jour, il va faire en auto-stop 15 km le matin et 15 km le soir pour arriver à l'école, pas toujours dans les temps. A midi, il va aller déjeuner dans une épicerie, avec un sandwich de fromage blanc sur une demi baguette. Le soir, il va tenter de rentrer chez lui, pour arriver vers 7-8 heures du soir. Souvent, à ces heures là, il n'y a plus de lumière et il devra étudier et faire ses devoirs à la lueur d'une bougie.

Ki va-t i don studyî ? Bråmint des cayets, et ça depind beacop des payis. Mins onk dins l' ôte, vos rtrovroz todi ces caracteres chal:

- des lçons patriyotikes ki vantèt les beatés do payis eyet li sepyince et li bon djudjmint di si mineu.

- des lçons d' cårcul, di syince et minme di rlidjon, ki sont, noûf côps so dijh, dinêyes dins on lingaedje etrindjî po l' efant.

- l' aprindaedje d' on grand lingaedje eternåcionå mins k' on n' cåze nén e viyaedje (francès, inglès, rfondou arabe u minme kiswahili u africaner).

Que va-t il étudier ? Beaucoup de choses, variables d'un pays à l'autre. Mais, toutes choses étant égales par ailleurs, on retrouvera les caractéristiques suivantes. - des leçons de patriotisme qui vantent les beautés du pays et la sagacité ainsi que le bon jugement de son leader. - des leçons de calcul, de science et même de religion, qui dans 90% des cas, sont données dans une langue étrangère pour l'enfant. - l'apprentissage d'une grande langue internationale mais qu'on ne parle pas au village (français, anglais, arabe classique, même kiswahili ou afrikaner).

C' est råle, vormint, di trover des sistinmes u çk' on scole ene miete dins l' lingaedje des djins. C' est k' i gn end a, dê, ene cachonêye, di ptits lingaedjes do payis, ås Afrikes.

C'est vraiment rare de trouver des systèmes où une partie de l'enseignement se fait dans la langue des populations. Il faut dire qu'il y en a une flopée, de langues régionales, en Afrique.

Ci sistinme di scolaedje la esteut disk' enawaire, riwaitî d' on bon ouy påzès scolîs et påzès parints. Les cis k' avént stî e scole alént awè des belès plaeces, si moussî avou l' costeume et l' cravate tos les djoûs, et n' awè k' on bik a-z aspougnî did tot d' djoû. Nén on bik Bic, savoz, on bik Parker. Li scole fijheut des grete-papîs.... pa des côps sins papî, paski les administråcions n' avént pont rçû di budjet po ça.

Jusqu'il y a peu, ce système éducatif était apprécié des élèves et des parents. Les personnes scolarisées accédaient à un poste envié, s'habillaient avec un costume et une cravate chaque jour et n'avaient à manipuler qu'un stylo à bille, de préférence un Parker. L'école créait des bureaucrates... parfois sans bureau car leur administration n'avait pas reçu de budget à cet effet.

La cénk u dijh ans, li FMI (li caisse ås manoyes eternåcionåle) et li Banke Daegnrece ont-st arivé come deus tchéns o mitan do djeu d' beyes. Il avént leu scorijhe, et ça a chlaké, da, c' est mi ki vos l' di. Ça fwait k' i gn a mwints batchlîs, et minme les liçancîs, ki s' ont rtrové boirgnasse, avou leu rôlea dzo l' bresse, mins nole bele plaece djondant.

Il y a cinq à 10 ans, le F.M.I. et la banque Mondiale ont fait irruption, comme un cheveu dans la soupe, armés de leur couperet budgétaire. J'aime autant vous dire que ça a fait mal, très mal. En conséquence, de nombreux bacheliers et même des licenciés se sont retrouvés Gros-Jeans comme devant, avec leurs diplôme sous le bras mais aucun boulot à la clef.

Boirgnasses, båbôs et tot biesses, pask' i n' avént aprindou nou mestî, et s' ni savént i co, mwints côps, pus djåzer li lingaedje di leus tayons. Retchessîs på sistinme ki lzi aveut prometou monts eyet vås. Retchessîs pal sôcieté tradicionire, pusk' il avént rnåké so ses valeurs. I nelzî dmoreut k' ene tchôze: cweri par bele u par laide di schiper voye foû d' leu payis, eviè l' beni-monde.

Interdits et stupéfaits, parce qu' ils n' avaient appris aucun métier, et avaient même oublié leur langue ancestrale. Rejetés par le système qui leur avait promis monts et merveilles. Rejetés par la société traditionnelle dont ils ont renié les valeurs. Ils n' ont plus qu' une solution: chercher par tous les moyens à fuir leur pays, pour s' en aller vers le Paradis Terrestre.

Li beni-monde, par zels, c' est li France u l' Amerike, k' on lzi a tant bassiné leus beatés tot åddilon di leus studias. Li beni-monde c' est la wice k' on pout dire et scrire tot çou k' on-z a sol cour, wice ki les djins ni mintèt nén, ni hapèt nén li bén do soçon, u çki tertos a d' l' ovraedje dins les buros, et passe si djournêye inte li taprece, li waitroûle, li soris, et les ôtes djonnes del dierinne marke di copiutrece, avou ene tchike å Pentium, come di djusse.

Le Paradis terrestre, pour eux, c' est la France ou L' Amérique, dont on leur a tant parlé tout au long de leurs études. L' éden, c' est là où on peut dire et écrire tout ce qu' on a sur le coeur, où les gens ne mentent pas, ne volent pas, où chacun a un travail dans un bureau et passe sa journée entre le clavier, l' écran, la souris et les autres périphérique de l' ordinateur dernier cri, avec micro-processeur au Pentium.

Dire ki, cwand les Francès ont-st avnou e l' Aldjereye diviè 1860, i vlént francijhî tote ces biesses d'indigènes la ki n' fijhént ki "flamenter" leu-z arabe. Asteure, i dénrént bén ene bleuse vatche po k' les Afrikins n' åyénxhe måy oyou cåzer del France.

Dire que, quand les Français arrivèrent en Algérie, vers 1860, ils voulaient franciser l'ensemble de ces " idiots d'indigènes, qui ne faisaient que baragouiner leur arabe ". Actuellement, ils donneraient tout l'or du monde pour que les Africains n'aient jamais entendu parlé de la France.

Li batch si rtoûne todi sol pourcea !

Tel est pris qui croyait prendre!


Lucyin Mahin, divins: Li Ranteule l° 3; prétins 1997.


Indonezeye, may 1998

Suharto, on grand candjeu ki s' a leyî emantchî pa ses efants

Louwis catoize derit (dijha) "L' estat, c' est mi". Gn a bråmint des cis ki n' estént nén des rwès-soleas et k' ont rprin ciste atuze la a leu conte. Nos pinsans å Marcos des Flipenes, u å Mobutu do Congo-k'-a-stî-Zayire. Sovint, leyèt tourner leu payis e cou d' poyon [péricliter] eyet si rimpli les potches, u purade les contes e banke e l' Swisse u ås Iyes Cayiman, avou les cwårs ki l' FDM (Fond Daegnrece åzès Manoyes, I.M.F, F.M.I) prustêye a leu payis.

Ahmed Suharto n' esteut nén pår ci sôre la. Estant djonne oficî, i disdjoca [renversa] Soekarno, li prumî prezidint di l' Indonezeye dislaxheye [indépendante]. Soekarno esteut on comunisse vî sistinme, ki minéve li payis avou ene economeye d' estat acalurdêye [appesantie] pa les aparatchikes.

Suharto, li zûnant djonne oficî k' el tapa djus, vola candjî tot çoula en on clapant adjinçna capitalistiveus. N' aveut nén må adiercî si côp, savoz ! La co 10 ans did chal, li boûsse di Djakarta esteut prezintêye come ene des wangneuses dins les djonnes martchîs-ås-tites [bourses émergentes]. Ci n' fourit ki lanawaire, cwand les studiants indonezyins ont fwait leu may 98, k' on cnoxha les pondants et les djondants do capitalisse candliveus [clientéliste] al môde Suharto.

Les grands magazins, les lenes d' avions, li bastimint, les fabrikes di bouwêye [savon en poudre] u di spå [boissons gazeuses], disk' ås winaedjes (payaedjes) so ls otorotes, tot çoula est dås efants, pitits-efants, neveus et neveuses, près-parints u près-soçons da Suharto.

Divins on sfwait sistinme monopolisse, ti sins bén k' on n' si djinne waire po fé des tursiveuzreyes [affaires irrégulières], dolmint ki ça rapoite. Metans les planteus d' åbe a cawoutchou, al plaece di payî des buls des pêleuses, des peloders, des terasseuses, des tracses et des livleuses po distrîxhner des bokets d' aforesse [forêt] tropicale, i fjhèt camaeråde avou onk del famile "ringnante" et dizo si warantixhaedje, i fotèt li feu åzès bwès. Ciste anêye chal, avou li grande setchresse ki li payis a viké, ç' a stî ene calamisté. A té pont ki minme li Malezeye et Singapour on stî efoumés. On ptit Tchernobil di mannixhaedje di l' air [pollution atmosphérique] avou les foumires des feus d' bwès.

Å cminçmint do moes d' may 1998, les studiants end avént leu sô. Ont-st apresté des grands rotaedjes pattavå l' payis. Les ptitès djins s' ont metou voltî avou zels. Des côps ça a stî pu påjhule, come l' asyinne [sitting] dins li pårlumint. Mins des ôtes côps, ci fourit li bardôxha: ont broyî les magazins d' åzès Chinwès, les cis k' on lzi fwait tofer poirter li dôlêye [boucs émissaires]. Ene ôte feye, ont bouté l' feu a des botikes et l' årmêye a respondou a côps d' vraiyès bales. Shijh cints moirts, et co hay !

Asteure Suharto a tapé si dvantrin sol håye, on djoû d' acinsion, li 21 di may 1998. O momint ki vos liroz çoci, gn årè co bråmint d' aiwe k' årè corou so Djava, Sumatra eyet Boirneyo, et vos såroz mî k' mi si Suharto n' a nén rexhou pa l' ouxh po rmoussî pal finiesse, tot metant èn ome di strin, waranti pa l' årmêye, e si plaece.

Dj' ô bén [ce qui signifie]: vos såroz si may 1998 a stî a môde di may 68 u di djulete 1789.


Lucyin Mahin, divins: Li Ranteule n° 8, erire-såjhon 1998.


L'Afghanistan après des années de conflit

L' Afganistan veyou d' ådvins

On responda da Eliane Dutoet des M.S.F.

Li Ranteule (L.R.): - Vos, Eliane Dutoet, vs estoz mwaisse-adjinçneuse [coordonatrice] do ravitaymint [aide alimentaire] po Médcéns Sins Frontires e l' Afganistan. Ké noveles avå drola ?

Eliane Dutoet (E.D.): - Si dji vs di "Pont d' noveles, bounès noveles", dji vos conte des mintes.

L.R.: - C' est l' veur ki l' Afganistan est on payis wice k' i n' e sûne [filtre] waire di nouves. Dispu 20 ans, on rprind les viyes, eyet les rakeude, dowô ? Des moirts et des coixhîs a dikedaye, kécfeye ?

E.D. - Neni ca neni ! Bråmint moens ki dinltins, todi. Dji n' disfin nén les Talibans, mins asteure, todi, ci n' est pus bardôxhaedje et racabardôxhaedje di canons et d' roketes tote li sinte djornêye. N a bråmint dpu d' coehisté [calme, sécurité] ki tins del guere des chefs, divant l' redjime taliban.

L.R.: - Nos fåt dire åzès lijheus(es) ki vos cnoxhoz mo bén l' payis, poy ki vos î fouriz ossu timpe k' e 1985. Cwè çk' a candjî, po les femes, dispu don ?

E.D. - Oyi, dji sé bén ki les gazetes des payis do Coûtchant sont pår esclawêyes [hyper focalisées] sol situwåcion des femes amon ls Afgans. Mins 90 åcint do payis, dins les ptits viyaedjes, dj' a sovnance ki dji m' î porminéve eviè 1985. Totes les femes estént ddja refårdelêyes dins des fulårds so leu tiesse. Asteure, c' est co Piron parey. Avou nosse ravitaymint, dj' alans eto dins l' vå do Panchir, wice ki c' est li Cmandant Massoud k' est mwaisse. Dji vos pou acertiner ki les femes avår la ni sont nén pus a la môde ki leus copleuses ezès payis cmandés pås Talibans.

L.R.: - Tot çk' on berdele avår ci, minme dins nosse pitit monde des djåspinreyes [listes de conversation] e walon, c' est totès mintes, dabôr ?

E.D. - Nonna, dji n' a nén dit çoula. Mins c' est des sacwès ki s' passèt fok a Caboul. Caboul, do trevén [à l'époque] des comunisses, c' ere ene veye uropyinne, avou les femes dins totes les plaeces del sôcieté, dins les ospitås et les buros et mousseyes d' ene manire bén agritchante come a Moscou do tins del perestroyca. Asteure, c' est tot bounmint come en on gros bork do fén fond d' Afganistan. Po les Caboulresses, çi fourit [ce fut] pår èn eralaedje 20 ans en erî [un formidable retour en arrière], 20 ans, et co hay.

L.R.: - C' est pus målåjhey di pårti li ravitaymint låvå ki dins les ôtes payis ki vos î av' ovré ?

E.D. - Taijhoz k' nonna ! Ezès payis wice k' i gn a des gueres et des tchessîs-evoye [réfugiés], c' est todi l' minme traeyin. Fåt aler arindjî les bidons avou les boss do payis, por zels si leyî adire ki c' est des civils - et nén des sôdårds - ki vont rçure les ravitaymints eyet les mousmints.

L.R.: - Kén espwer av' po l' Afganistan ?

E.D. - Ki les djins rsepénxhe [puissent a nouveau] viker eshonne, on djoû, ça s' pout motoit bén. Mins po les mineus politikes si racomôder, gn a co des mantches a mete.

L.R.: - Et ene dobleure d' onk des costés, li cmandant Massoud u les Talibans ?

E.D. - Dji n' a nén les pinses ki ça s' pôreut fé. Tchaeke pårteye est sotnowe pa des payis vijhéns. Les Talibans på Pakistan, et minme l' Arabeye Sawoudite; li cmandant Massoud pa l' Iran et l' Ouzbekistan.

Fåt tuzer ki l' Afganistan, c' est ene plake toûnrece pa û çki l' petrole eyet l' gaz di tos les payis d' Azeye k'-esteut-Sovietike, pôrént esse evacuwés pa l' Oceyan Indyin. C' est a cåze di ces ådjeus stratedjikes la ki l' Brejnev evayixha l' Afganistan, e 1968, si dj' el tén bén; la ddja ene hapêye enno ?

L.R.: - Ça fwait ki l' avni est mo pôvriteus, dabôr, sapinse vos ?

E.D. - Gn a des Afgans ki ctapèt des hopeas d' cwårs po voyî leus efants e fråde a l' etrindjî. Mins po les ptitès djins, li cir est todi kerdjî, et co motoit po lontins.

L.R.: - Gråces, Eliane.

E.D. - Gn a rén avou ça.


Lucyin Måhin, li 6 di djanvî 2000.


Liberia, li dierinne guere di discolonijhaedje ås Afrikes

La tot djusse èn an, nos corwaiténs [analysions], dins l' Ranteule [l° 0.6, do moes d' djun 1995], li situwåcion o Rwanda. Nos djhéns, tot fjhant cåzer Omer Marchal: " Vos voeyoz ene ôte rexhowe po l' Afrike, ô, vos? [ki des novelès gueres civiles eter peupes d' on minme payis]. Por zels, li devlopmint, c' est po les anêyes 2100 et des [le 22e s.], nén dvant. Et après on peur ridiscotaeyaedje di tos les payis [redécoupage territorial général], bråmint pus près des peupes k' î dmanèt. "

Li Rwanda, c' esteut on payis ki tournéve bén do vî vî tins, mins avou èn adjinçnaedje del soce a môde del Moyinådje, målåjhey a radapter o monde d' enute, so kékès anêyes, todi. 

Tant k' o Liberia, c' est on payis pår artificire [artificiel], k' a skepyî dins les anêyes 1800 et des, e 1821, po mete les ponts so les I, po si vos serîz pa des côps spepieus. Et ki, cor on côp, nos a vnou dispierter on bea djoû o matén, et nos ehontyî [faire honte] d' esse del raece del djin [race humaine], k' i gn a waire di diferince avou les raeces di biesses.

Gn aveut-st on côp on cargo nidjeryin, li " Bulk Challenger ", ene viye caleze ki n' flotéve pus ki pa l' åjhmince do Bon Diè [par la grâce de Dieu], avou dvins, di pus di deus meye Liberyins, tcherdjîs come do bisteu. Li Côte d' Ivwere lezî aveut rfuzé pa deus côps l' djîsse [le gîte, l'hospitalité]. Et l' Gana les aveut revoyî el hôte Mér.

Sol batea, les refudjîs estént ecassîs onk dissu l' ôte, dizo l' tapant solea des tropikes, sins cåzu d' amougnî, sins rmédes, sins nete aiwe. Et les maclots [matelots] do " Bulk Challenger " lezî vindént a tchirès pêlêyes des sakeyès [misérables] boesses di cossieve ki l' ONU lezî aveut voyî.

- Pocwè ? Il avént des cwårs, dabôrd, ces djins la ?

- Ayôway !! Ces djins la, sapinse vos, c' ere co les binawreus, les ritches assez po sepe payî 75 dolårs US po skifter voye di l' infier di Monrovia. Monrovia ! ene veye sipérrece [ville-fantôme], avou des cadåves a totes les coines di rowe.

- et kî çki mine on sfwait disdut, paret, vos ?

- Des roufions d' 15-20 ans, avou des kalashnikovs u des vîs fals [fusils d'assaut], les ouys tot rodjes d' aveur foumé do hachich par nute.

- et i sont sconte di kî, taijhoz ?

- Siconte des " Amerikins ".

Leus " Amerikins ", ci n' est nén les Amerloches ki vos cnoxhoz, des grands stocaesses avou des bruns tchveas et des tchapeas d' coboy, a môde da J.R. dins " Dallas ", udonbén da Clint Eastwood. Leus " Amerikins ", da zels, c' est les efants et les ptits-ptits-efants des esclåves k' avént stî aminés des " States ", po les sconte-siclavadjisses poleur criyî e toetea k' il avént evoyî ces djins la " for them to find back their roots, por zels ritrover leus raecinêyes ".

Ces Amerikins la n' avént ki l' coleur del pea po les fé ravizer les djins do payis. Ôtrumint, il estént protestants, cåzént l' inglès, alént e scole, et rilouként foirt foirt djivismint [prétentieusement] les såvadjès negues des tribus d' avår la, ût côps so dijh animisses et analfabetes.

Ça fwait k' el fén des anêyes 1800 et des [à la fin du 19e s.], totes les Afrikes divnént, soeye-t i inglesses, soeye-t i francesses, u almandes, u portuguesses, termetant ki l' Liberia, droldimint, dimoréve dislaxhî [indépendant].

C' est k' les " Amerikins " avént-st enondé ene biznesse lavola: il escrijhént les bateas etrindjîs po deus côps rén. Les mwaisses di batea [armateurs] do monde etir s' î vnént fé eredjîstrer, et prinde çou k' on lome on " drapea d' coplaijhance ". Avoz ddja oyou dire, dandjureus, " té batea, k' åbanéve drapea liberyin " [battant pavillon libérien]. A on moumint dné, c' esteut li prumire flote sol daegn ! Bråmint des bateas petrolîs, dayeur.

Pus, å Liberia, gn aveut co les minires di fier (on prumî minrê, sapinse les féns cnoxheus) et l' tiraedje ås diyamants. Sins rovyî les cinses plantreces d' åbe a cawoutchou, cåzu tertotes då martchand di pneus " Firestone ".

Mins ci n' est nén totes rôzes et totes violetes di viker so ses rintes. Co pus rade cwand les pris do cawoutchou s' ont metou so ene avalrece [une tendance baissière], la cwénze ans did chal.

Li fornaiviaedje [dérive] cominça adon, avou, pol prumî ake, li flaxhaedje djus [renversement] des " Amerikins " påzès " tribus ". Li rvindje di l' istwere, li cene des sclåves dislaxhîs d' Amerike, k' avént divnou, zels eto, des colonijheus. Dj' esténs e 1980.

Et pus, ça a peté tot hute. Ene des pus nichès gueres civiles des Afrikes, avou, al boune, on miyon d' ebaguants [émigrés] so les deus ptits miyons et dmey di djins ki l' payis contéve divant guere. Et li spoûle [épisode] do " Bulk Chalenger " n' est k' ene pitissime anecdote, k' a stî mo mediatijheye. Mins ele nos mostere co bén, ene feye di pus, ki l' Istwere n' inme nén les racourtis et les sprints, minme si c' est les Amerikins ki les ont-st adjinçnés.


L. Mahin, divins Li Ranteule, 1, esté 1996.


 Si des mots difficiles se présentent à vous sur ces pages, allez voir s'il ne sont pas expliqués dans le Splitchant motî do walon (avec brève traduction française), ou dans le Wikipedia, l'encyclopédie en wallon (suivez: "Pordjet Esplicant Motî").


(Back index par sujet); Alans rzè a l' edesse des sudjets.

(Back homepage) Alans rzè al mwaisse-pådje

(Back textes en wallon commun) Ralans sol pådje des scrijhaedjes e rfondou walon

 (Back liste des articles journalistiques de L. Mahin) Ralans è sol djivêye des scrijhaedjes di papîs d' gazete da Louline Voye.


Sicrijhaedjes eplaidîs so les fyis avou l' åjhmince do scrijheu. On les pout rcopyî et redjårber tot rahoucant l' adresse did so les fyis.

Édition en ligne explicitement autorisée par l'auteur. Reproduction et adaptations autorisées en citant la source Internet.