Våt mia-z è rire
Comedeye e troes akes da Michel Robert
dierin rapontiaedje - last update: 2004-12-04.
Deujhinme ake.
Troejhinme ake
On seul decôr, ki mostere ene coujhene-livigne. Li mwaisse-intrêye est a gåtche, å fond, ki dene sol botchreye.
Li decôr est pårti e deus bokets: les troes cwårts del sinne, c' est l' livigne, et l' restant, a gåtche, c' est l' dvant l' ouxh. Gn a ene ôte botchreye a schape a hintche, di l' ôte costé del voye.
Å fond a gåtche, gn a èn ouxh ki va so l' erire-coujhene, et eviè l' djårdén; divant, a droete, èn ouxh ki va ezès tchambes.
Come meubes : ene tåve, des tcheyires, on manaedjî (grand meube avou des bidons) et on divan. Gn a eto on buro avou on telefone dissu.
S' i fwait trop stroet sol sinne, on pôrè rsaetchî li boket d' gåtche ki mostere li rowe.
Les sinnes d' ådfoû polèt esse djouwêyes ådvins.
|
Ågusse |
On botchî d' 58 ans. |
|
Vinçant |
Li fi da Ågusse et d' Berandjire, 25 ans. |
|
Berandjire |
Li mame, 50 ans. |
|
Djef |
Li botchî metou di l' ôte des costés del rowe, on Flamind, 58 ans. |
|
Mariete |
Li feye da Djef. |
|
Mme Djåmin |
Ene pratike, ene linwe d' aspik, 60 ans. |
|
Mme Benitot |
Ene ôte pratike, ene linwe d' aspik eto, 60 ans. |
|
Mireye |
Ene canlete. |
|
Cristene |
Ene ôte canlete. |
|
Li tchomeu |
On stadjaire O.N.E.M, 35 ans. |
|
Hipolite |
Èn ome politike araedjî, 45 ans. |
|
Li curé |
40 ans. |
|
Li gamén |
12 ans |
Si on n' a waire di djouweus, on pout rsaetchî Mireye & Cristene evoye.
Sinne 1/1: Ågusse et Vinçant
Cwand l' toele si live, i fwait tot noer. A gåtche, gn a ene loumire ki s' aloume el rowe. Gn a on cok ki tchante; li werene d' amon Djef s' esprind; on voet des efants passer po ndaler a scole, et des femes ki dviznut dvant l' ouxh.
Adonpwis, gn a pus nolu el rowe.
Foite loumire dins l' botchreye.
Ågusse est ashî al tåve. Il est ki ddjune tot léjhant s' gazete.
Vinçant amousse el botchreye.
0001 Vinçant (Tot rwaitant s' monte d' èn air xhinåd): Vos estoz dedja levé, popa !
El va rabressî et cweri ene djate dins l' manaedjî
0002 Ågusse: Hé m' fi, on n' a pus vint ans. Dj' a on må d' tiesse a fé peter les menindjes d' on tchampete.
0003 Vinçant (Tot s' vudant ene djate): Ca n' m' esbare nén, pask' ayir, les pintes tcheyént co bas. Comint est i possibe ?
0004 Ågusse (li fén avou èn air di deus airs): Hela vos ! Paski ça n' vos di rén di boere on vere å cåbaret ! Ou purade paski vos n' avoz nén l' tins.
0005 Vinçant (tot s' ashidant): Comint ça, nén l' tins ?
0006 Ågusse: Bén, on n' såreut aler boere å cåbaret, eyet frecanter dins tos les cwéns C' est l' tins ki vos manke a vos.
0007 Vinçant: Cwè çki vos vloz dire ?
0008 Ågusse: Ci n' est nén on rprotche savoz m' fi. C' est l' djonnesse hin ça.
I s' sovént
Mi eto, cwand dj' a cnoxhou vosse maman, dji n' sondjive pus a dmorer å contwer. Asteure ci n' est pus l' minme.
0009 Vinçant: Ci n' est nén ene råjhon po s' fote des tchikes a-z è piede li memwere.
0010 Ågusse: Vos voeroz bén k' après 30 anêyes di mariaedje, on a tenawete dandjî di s' candjî les idêyes. Eyet dpus, cwand dji tchait avou Djef, c' est todi l' minme. I n' est jamwais presse a rintrer.
0011 Vinçant: Cwand vos tcheyoz avou Djef ! Ci n' est nén målåjhey, vos estoz todi eshonne !
0012 Ågusse (Ki s' aprotche del finiesse dinant so l' ôte botchreye): Ca, c' est l' vraiy c' est come on fré por mi. Ca fwait pus d' cwarante ans k' on s' kinoxhe. Dji m' rapele co li djoû k' il a-st arivé par ci. Avou ses parints, il avént l' air biesse a crever. Lu, i n' saveut nén dire on mot, il esteut må nipé ...
0013 Vinçant (Ki rit): I lyi nd a todi dmoré ene pitite sacwè.
0014 Ågusse: Ni riyoz nén di ci ome la. Il a yeu bråmint do merite.
0015 Vinçant (Ki s' leve): C' esteut po rire hin popa.
0016 Ågusse (Ki n' l' etind pus): Vini par ci, ossu dins les cinses, avou ses parints, esse må payî, esse li rizêye di tot l' viyaedje, eyet esse arivé a çou k' il est asteure ...
0017 Vinçant: Vos î estoz po ene sacwè popa.
0018 Ågusse (Todi sondjåd): Ene miete oyi
Reyalisse
Vos voeyoz m' fi. On n' a nén tertos l' tchance ki vos avoz eyet ki mi dj' a yeu, awè on popa k' aveut ene afwaire ki tournéve bén, ki n' aveut k' a drovi si boke po-z awè ene sacwè. Eyet çoula dji m' è rindeu bén conte, eyet cwand dji rwaitive åtoû d' mi et ki dji voeyeu tote li mizere, c' est adon ki dj' a coprin k' i faleut ki dji fwaiye ene sacwè. C' est insi ki dji m' a prin d' amisté po Djef. Après l' sicole, i vneut droci avou mi, i s' interesséve a l' botchreye. Cwand dj' a rprin les afwaires di m' popa, Djef a travayî por mi. Après sacwantès anêyes, li vî Udjinne a rmetou si botchreye, li cene k' est an face. Djef m' a dmandé s' el poleut bén rprinde a s' conte. Dj' i l' î a côp bouté on côp d' mwin.
0019 Vinçant: Ça, c' est vraiymint di l' amisté.
0020 Ågusse: Mins asteure dji pinse k' i m' l' a bén rindou.
0021 Vinçant: Comint ça ?
0022 Ågusse: Bén oyi pusk' il a ene feye ki vos atire bråmint ... eyet ki sait on djoû, ele mi dinrè ptete on ptit fi ?
0023 Vinçant: Hé la ! Dji n' so nén co maryî savoz, ci n' est nén co sérieus a ç' pont la.
0024 Ågusse: Fåt nén dmander cwand ça srè sérieus ... (Vinçant hôsse les spales) Vos estoz
todi eshonne?
0025 Vinçant: Oyi. On s' voet tenawete on côp.
0026 Ågusse: Tenawete sovint, ou adon,. . .
0027 Vinçant: Dji l' voet voltî si ça pou vos fé plaijhi.
0028 Ågusse: Ca m' fwai plaijhi, oyi. Eyet a vos eto surmint.
0029 Vinçant: Popa!
0030 Ågusse: Et dji vos comprind. Ci ptite djin la est si avnante, djinteye eyet çou ki n' gåte rén, elle est vayante come cwate.
0031 Vinçant: Elle est co ene miete djonne.
0032 Ågusse: Taijhe tu, fonce Alfonse! Si dj' aveu co vint ans, laid godom. Eyet d' pus, dj' a l' ådje di esse Grand-Pere.
0033 Vinçant: O, o.
0034 Ågusse: Tut tut, dji sai çki c' est. Cwand m' Pa m' a atchté m' prumî velo, dj' a sketé des kilometes a m' fé mori.
0035 Vinçant: Popa!
0036 Ågusse: Bén cwè ?
0037 Vinçant: Dji n' voet nén l' rapoirt.
0038 Ågusse: Ça vout dire, ki, ki, dins l' veye m' garçon i n' fåt nén d' awè peu d' pedaler. Eyet ki l' tins di, di d' aler fé m' båbe eyet vey çou k' vo mame foufyive.
0039 Vinçant: (S' ashid å buro) C' est ça dji m' va continouwer mes comandes.
(a shuve)
Michel Robert, modêye 1997.
Si des mots difficiles se présentent à vous sur ces pages, allez voir s'il ne sont pas expliqués dans le Splitchant motî do walon (avec brève traduction française), ou dans le Wikipedia, l'encyclopédie en wallon (suivez: "Pordjet Esplicant Motî").
(index des pièces de théâtre présentées en wallon normalisé) Djivêye des pices di teyåte prezintêyes e rfondou.
(Index des åteurs présentés sous forme pré-normalisée) Djivêye des scrijheus eplaidîs dizo cogne årmonijheye, mins tot wårdant ene miete l' accint. (Index des åteurs dont les textes sont disponibles en wallon comun) Djivêye des scrijheus k' ont scrît u k' ont stî rashious e rfondou walon
(Back textes en wallon comun) Erdalans sol pådje des scrijhaedjes e rfondou walon.
(Back homepage) Alans rzè el mwaisse-pådje
(homepage wallon comun) Alans rzè eviè l' pådje moennrece do rfondou walon.
Sicrijhaedje eplaidîs so les fyis avou l' åjhmince do scrijheu.
Li djouwaedje di cisse pîce cial divant les djins si frè tot payant ls abondroets al SABAM.
Redjårbaedje e rfondou & metaedje so les fyis
|
|
|
|
