|
|
Page d' Emile Lempereur. Li pådje da Emile Lempereur. |
|
|
|
Page d' Emile Lempereur. Li pådje da Emile Lempereur. |
|
Dressêye:
Tiesses pelêyes
Li plouve, avou mes rwåds, so les pavés, si ståre,
S' leye rider dsu les toets, ridjibele ås pegnons
Porshût, come on spawta, les pôves pitits moxhons
Tchoftés d' el vir si spåde.
So leu pire hagneye et screpêye.
Pa les dints d' l' aiwe,
Les finiesses breynut mes pinsêyes
Ridant viè l' saiwe.
Tchaeke gote ki tchait est come ene låme
Ki trawe mes poennes, les anombrixh.
Dj' ô rahaener, sôtler, naxhî
Colåd-Rodje-Betch pattavå mi åme.
Di drî les håyes et les bouxhons
Ki n' shonnnut pus do tot les minmes
Et ki, pus jamwais, nel seront
Dji voe berloker, di sclimboigne
Tos mes espwers.
Do fond del rowe, triviè l' ridea
Ki mindje ou grete tote les måjhons
Et ki si rsint do contrucôp
Di mes pinsêyes,
Acournut mes vintès anêyes
Avou leu peu, leu soe del veye.
Kibén di stoeles vont esse hagneyes ?
E. Lempereur, divins Spites d' åmes, 1935.
(Mi et mi)
On ranxhe a l' ouxh
Kî çki m' disrindje a ces eures ci ?
I fwait si froed, i fåt k' i mousse
Dji m' sin si mierseu, disploussî
Dji drouve, c' est èn efant draené
Ki m' monte å cour dins ene taetche di nute
Dj' a malåjhey a li rconoxhe
Est i possibe ça sereut mi ?
I m' shonne ki dji riyeu todi
Cwand dj' esteu djonne
***
Mins vo n' la-t i nén k' i s' ashid so ene tcheyire
S' bladjot vizaedje volant des spites di feu
Adon s' astoke a l' anglêye, come dji fjheu
Po vir li plouve miyter dsu les trotwers
***
Dji vike trop d' reves, trop d' Lu
Come dj' a pômagne del veye
Dji nd a m' sô d' el vir ci
M' havter sins agoneye.
Dins des mwins d' nute, mi cour maflé
Clape des penas, pinsant pårti
Mins rén k' ene sovnance m' estourdixh
Mi prezinte el fwin då moxhet
L' ombe ki n' mi låtche jamwais
-Ni fouyaedje, ni nouwaedje, ni djoû-
Est ene sacwè ki vént
D' on bougnoû
***
Doe dj' vir evi m' passé?
Ça sereut m' trawer mi-minme
Raetchî dissu çk' a fwait
Ostant mes bresses ki m' tchinne.
S' i sereut co waire piyoteu
Ene miete moens hodisse et naxheu
S' i m' vénreut seulmint dire bondjoû
Sins tant m' holer, sins tot rnaxhî
Mins i gn a nén pus ptit raploû
Ki s' ralaedje-plin ni m' ouxhe froxhî
***
Vos, Doleur,
Dji vôreu tant conoxhe vosse djaeye
Eyet vos mwins, po vos stronner
Mågré l' lampe ki grandixh
Ses claireurs dins mes ouys,
Gn a-t i on vert-diåle a vir
Ene sititche dins m' cour ?
Dj' irè cwandminme
E mi-minme,
Po voyaedjî
" Bén prindoz ene tchôde, v' la vosse tcheyire
Eshonne, nos pasrans l' nute, nosse fré
***
On n' direut ki l' cir tchante di l' ombe
E.Lempereur divins Spites d' åmes 1935.
(Recoulotaedje)
Dji sere les ouxhs et les finiesses
Po n' nén k' el nute broke dins l' måjhone
On s' rafurleye dilé l' coulot,
Tchaeconk por lu, come des covresses
Mågré k' on fouxhe deus dlé l' tocoe
On n' s' afrankixh nén d' ene divize
Les cours mierseus, les cours schavés
Les åmes pus laides et pus pezantes
Avou les coirs, s' leynut baler
Dji sin so m' pea djômyî l' passé
Come ene pougneye di cindes broûlantes
(Index par auteur) Indecse des scrijheus. (dont les textes sont disponibles en wallon commun) Indecse des scrijheus k' ont scrît u k' ont stî rashious e rfondou walon
(Back textes en wallon commun) Erdalans sol pådje des scrijhaedjes e rfondou walon.
(Back homepage) Alans rzè el mwaisse-pådje
(homepage wallon commun) Alans rzè eviè l' pådje moennrece do rfondou walon.
Sacwants scrijhaedjes di cisse waibe chal polèt esse dizo abondroets; nos les rsaetchrans foû s' i fåt.
Some texts published on this site may be affected by copyrights and eventually need to be removed in the future.
