Il a cwité s' veye avou deus djonnes omes po ls aler mete a houte djusse divant k' les Almands n' arivexhe. Els a moenné a pî disk' a Hu, la k' il ont passé Mouze. Mins i n' åreut polou dmorer la, sins sepi cwè et kesse avou s' feme et ses efants et il a rivnou åd triviè des campagnes edjalêyes. I gn a avå les voyes, dit-st i, des hiedes di refudjîs. Les tropes amerikinnes sont-st al diloujhe. Les Almands ont moussî dvins come divins ene live di boure. On djåze di viyaedjes broûles et d' massakes di pôvès djins. Asteure, on lyi a dné a boere et a magnî et i s' rischape ene cope d' eures. Dimwin, el polans dju leyî nd aler ?

Gofin (ki lyi dene on vere) : Awè ! Dj' end a les pinses ! Mins divant k' endè våye, dj' el vou cwestiner mi-minme. Dj' a des afwaires a lyi dmander.

(I boet ene goirdjete.)

Awè ! On n' s' atindeut nén a çou ki ns atoume so les rins. On croeyeut kel måle biesse esteut moite, mins elle aveut co del foice assez po dner des laids côps d' grawe. N' espaitche ki, må po d' tins, cwand li brouyård si levrè, nos avions les språtchront dzo leus bombes....

Tot ratindant, nos estans en erî del bataye. Mins po kibén d' tins ? Di tote manire, nos n' avans nén a tchoezi. I nos fåt tni so plaece disk' a tant d' esse sicorou. Et les djins do viyaedje, ladvins ?

Pieret : Tant k' asteure, i tnèt l' côp. Mins i crevèt d' sogne et i vikèt retrôclés dvins leus cåves. C' est a schipe si les biesses sont fôrêyes et les vatches modowes. Mins l' curé dirè l' messe di meynute. Î vénroz vs ?

Gofin : Awè ! C' est mi dvwer di mostrer l' egzimpe. Mins dji n' vou nén k' on soune les clotches. Ci n' est nén l' moumint d' nos fé rmårker.

Pieret : Ripasroz vs fé matene e m' måjhone après messe ? Maria a-st aponti del vete tripe, et po m' pårt, dj' a polou såver kékes botayes di vî bourgogne. I m ' shonne ki c' est l' moumint d' elzès vudî... Mins end årè co po dmwin.

Gofin : Dji sayrè d' î tuzer s' i n' est nén trop tård. Ca divant çoula, i m' fåre fé l' tournêye di mes omes.

Sinne cwate : Gofin, Pierret, Tombeu

Tombeu intere tot efouwé.

Tombeu : Captinne, captinne !

Gofin : K' av' don, coporå ? C' est l' Celene ki vs a foirci ?

Tombeu : Nonna, captinne, c' est l' patrouye do lieutnant Steward ki vént d' rintrer ! Et...

Gofin : Et cwè ! M' alez vs dire çou ki s' a passé ?

Tombeu : Il ont toumé so des Almands. Li lieutnant a stî acsû al djambe. I piede bråmint do sonk et on l' a moenné å docteur..

Gofin : Et pu, et pu...

Tombeu : Deus des Almands ont stî touwés. Li troejhinme a tapé la s' fizik et on l' a fwait prijhnî....

Gofin : Et wice est i ? Dj' el vou vey todroet.

Tombeu : On vos l' va amoenner sol côp, tchîf. Mins ni vs ewaerer nén : les omes ont volou rvindjî li lieutnant Steward et il a rçuvou ene volêye di pougns el gueuye !

Gofin : K' on m' l' amoenne chal todroet.

(Tombeu sôrteye)

Sinne cénk : Gofin, Pieret, pwis Tombeu et Carl

Pieret : Volez vs ki dji m' rissaetche Captinne ?

Gofin : Ki do contråve, Mayeur, ki do contråve. Vos kinoxhoz l' payis cint côps mî k' mi. Dji va pår seur aveur mezåjhe di vos loumires.

I s' passe on moumint. On voet k' les deus omes sont nierveus, impacyins, i trefilèt mins n' motixhèt nén.

On etind on bardouxhaedje el montêye. Li poite si drouve et Tombeu tchôke divant lu èn ome, tiesse nowe, avou des noers ouys, moussî a sôdård amerikin. L' ome a ses mwins loyeyes.

Gofin : Cwè çki çoula vout dire ? A cwè djouwe-t on chal ?

Tombeu : Tårdjîz on pô, tchîf. Dji m' vos va raconter l' afwaire.

Gofin : I sereut tins, ca ou bén dji dvén sot, ou bén tot rote cou dzeu, cou dzo vaici.

Tombeu : Gn aveut ddja tot on tins, tchîf, kel patrouye do Lieutnant Steward esteut-st evoye. Tot s' passéve bén, cwand il ont prin l' voye di Hesse al Pire. Les omes rotént des deus costés del voye, e tirayeu. Il avént målåjhey roter, ca l' vint d' bijhe elzî evoyive el djaive ene fene poussire di nivaye et il efoncént dvins les consires disk' å mitan d' leu coxhes. C' est adon k' il ont toumé sol l' djipe.

Gofin : Kimint ça, ene djipe ? Cwè est ç' co k' ces colibetes la ?

Tombeu : Bén ene djipe k' esteut-st el nivaye disk' ås aessis, et k' troes sôdårds amerikins souwént sonkenaiwe po rmete sol voye.

Gofin : Abeye, abeye. C' est k' i m' freut dåner !

Tombeu : Nos omes ont stî tchôkî å cou del djipe po-z aidî leus camaerådes, dismetant ki li lieutnant tapéve ene copene avou leu tchîf. Seur k' i s' a rindou conte k' i gn aveut ene sacwè d' drole. Todi end est i ki l' ome a sôrti s' revolver et a tiré so nosse lieutnant. Mins l' coporå Collins, ki s' dismefyive et k' esteut a l' awaite a tiré sor zels et end a touwé deus. Li troejhinme, ci-chal, a levé ses bresses tot breyant "Camaerade". Et nos l' avans fwait prijhnî. Et...

Gofin : Et cwè ?

Tombeu : Et on s' aporçuva k' ci n' esteut nén des vraiys Amerikins, mins des Almands moussîs a Amerikins.

Gofin dmeure on moumint tot paf, pu vore sol prijhnî et lyi råye si mousseure. O voet èn unifôme almand dizo s' cazake.

Gofin : Sint nondihu !

Tot l' tins del sinne, Pieret a louki l' prijhnî. Asteure i s' aprepeye et li rleve li tiesse.

Pieret : Carl ?

Carl : Awè, mwaisse, c' est mi !

Gofin : Kimint ? Vos l' kinoxhoz !

Pieret : Awè ki dj' el kinoxhe ! Målureuzmint ! Il a dmoré dijh ans a m' siervice. Il a stî traitî come èn efant del måjhone. Pu on bea djoû, i nos a leyî la et il a bizé evoye (i s' enondeye). Li laid potince ! Li djubet. Mins, il aveut-st avou l' tins d' fé ene laide keure. (I håsseye si baston so Carl). D ' abandner ene pôve feye ki s' aveut leyî alourdiner di ç' bea djodjo la et k' il aveut fwait grosse. Måssî rowe ! Crapuleus ! (I vôre dissu po l' flayî avou s' baston. Carl li toûne li cou po s' waeranti, dismetant ki Tombeu ritént Pieret et l' saetche en erî.)

Gofin : Maria ? C' est ci-chal ki...

Pieret : Maria, awè ! (a Carl). Ratind, vårén ! Dji t' va spiyî li schrene !

Gofin : C' est tot, asteure ! Hale, la, Mayeur ! Hale vos di dj' ! Cist ome est prijhnî di l' årmêye amerikinne et vos n' avoz rén a vey avou ça. Av' comprin, nodigate !

(Pieret s' apåjhtêye on pô)

Leyîz nos fé, asteure. Vos alez rintrer todroet e vosse måjhone et dji vs disfind, dji vs disfind, vos di dj', d' endè peter on mot a ene sakî.

Pieret, måva, groumeye on n' sait cwè inte ses dints et sôrteye.

Sinne VI : Gofin, Tombeu, Carl

Gofin : A nos deus, asteure, camaeråde

(a Tombeu) : Metez vs al machine a scrire, coporå.

(I prind Carl pal hanete et l' fwait s' ashir so ene tcheyire)

Ashidoz vs, mi pit fi, vos serez mî.

Tombeu s' a stî mete padrî l' machine et va taper çou ki s' va dire.

Gofin (ki brait) : No, pitit no, gråde, unité, måtricule.

Carl : (come onk k' est fornåjhi et k' est disgosté d' tot) : Renard, Carl, Feldwebel al deujhinme divizion Waffen S.S.; Måtricule 768 5439.

Gofin : Pocwè estoz vs moussî a amerikin ?

Carl : Paski dji fjheu pårteye d' on grope k' a stî evoyî å mitan l' årmêye amerikinne. Nos esténs la po fé araedjî l' bazår, po sayî do plonkî voste årmêye e marimince et del fé tourner sote.

Gofin : Et ki fjhîz vs cwand l' patrouye vos a toumé dsu ?

Carl : Nos ns avéns pierdou.

Gofin : Pierdou ? Onk k' a viké chal pus d' dijh ans ! Vos m' prindoz po èn ôte surmint !

Vos a-t on dit çou k' i vs arivreut si vs estîz prins ?

Carl (ki sospire) : Vos poloz fé çou k' vos vloz avou mi. Dji m ' è fote.

Gofin : O k' åy ! O k' åy ! Mins nos n' alans nén fuziyî èn ome li nute di Noyé. Coporå, alez resserer l' prijhnî el cåve. Vos lyi dinroz po boere et po magnî. Et on bon covtoe...

Tombeu (å prijhnî) : Alez ! Vén avou mi...

(I sôrtèt).

Sinne VII Gofin, Maria.

Gofin dmeure on moumint tot seu, sondjeu. I rote tot avå l' plaece. Maria intere tote foû d' leye.

Maria : Wice est i ? Dj' el vou vey ! K' end av' fwait ? Dji sai k' il est chal...

Gofin (saizi et djinné) : Maria ! Ki vnoz vs fé chal ? Ki s' passe-t i ?

Maria : Vos, ça va, hin ! Nén mezåjhe do fé l' inocin. Mi mononke m' a tot raconté. Carl est vaici et dj' el vou vey !

Gofin (måva) : Vosse mononke n' åreut i nén polou clôre si clapete ? Dji lyi aveu dné l' ôre do n' djåzer d' tot çoula a nolu.

Maria : Et vos croeyoz, grand båbineme, ki cwand dji l' a veyou rintrer tot tournisse, dårer so l' bari d' peket et noper en erote troes grandès gotes avou des mwins ki tronnént. Vos croeyoz, vos, ki dji n' a nén adviné sol côp k' i s' passéve ene sacwè d' drole. Et dj' a stî si taenisse ki dji n' l' a nén leyî e påye tant k' i n' m' åye avou vudî s' saetch. Mins, wice est i, dj' el vou vey. (Ses niers petèt; ele atake a sogloter).

Gofin (ki l' prind dvins ses bresses et saye del rapåjhter.) : Tchoûlez, mi amour. Tchoûlez si ça vs fwait do bén. (El leye si rapåjhter ene miete. Ele xhoube ses ouys avou s' noret d' potche, shofele si narene...)

Maria : C' est l' vraiy çou k' on dit ? Il est avou les Almands ? Dji n' el pou croere.

Gofin (ki sospire) C ' est l' vraiy, awè, målureuzmint.

Maria : Ci n' est nén possibe. On l' årè foirci surmint...

Gofin : Foirci di s' fé S.S. ? Di s' moussî a amerikin ?

Maria : Motoit esteut ç' on toû afîsse do dzarter ?

Gofin : I n' årè nouk a l' croere, si afwaire n' est nén boune...

Maria : I serè prijhnî. On l' metrè dvins on camp...

Gofin : Il esteut moussî a amerikin, Maria...

Maria : Ki voloz vs dire ? On n' el va tolminme nén...

Gofin : Li reglumint est clair, Maria. Et nos estans-st e guere.

Maria plore tot doûçmint.

Maria : Tolminme, dj' el vou vey. Dji vou sepi pocwè k' i m' a leyî la, adon k' i sepeut ki dj' esteu grosse di lu et k' i m' aveut prometou l' mariaedje.

Gofin : Ci n' est nén possibe.

Maria : Ni compurdoz vs nén ki dji n' vicrè måy e påye si dji n' sai li cwè et l' kesse so ciste afwaire la. C' est ene sacwè ki dominrè todi mes pinsêyes, come ene araegne ki m' rognreut l' cervea; ki dj' endè serè tchôkêye del tchôde måke tote mi vicåreye. Et ki m' fårè-t i dire a m' fi, si fi, cwand i serè grand et k' i vôrè sepi cwè so s' pere ?

Gofin (après aveur tuzé) : vs avoz motoit råjhon. Dji n' divreu nén, mins dji vs el va leyî vey. Dijh munutes, nén ene di pus.

Coporå ! (I houke Tombeu ki vént vey cwè) Alez cweri l' prijhnî !

(I rawårdèt tos les deus sins s' loukî, sins moti...)

(Tombeu amoenne Carl k' a l' air esblawté pal loumire et ki n' voet nén Maria.)

Gofin (Tot sôrtant avou Tombeu) : Nos dmorans chal tot près. breyoz et nos serans la sol côp ! Et n' rovyîz nén : dijh munutes, nén ene di pus !

Sinne VIII : Maria, Carl.

Maria (cåzu tot bas) : Carl ! (I rleve si tiesse) (Pus hôt) Carl !

Carl : Maria !

Ele s' aprepeye, et l' rilouke.

Maria : I vos ont batou ? (i n' respond nén et ele si va taper tot conte lu)

Mi pôve fi ! Mi pôve pitit fi !

(I dmorèt on long moumint insi, sins moti)

Maria : Mins ki s' a-t i passé ? Pocwè m' avez vs leyî la, sins måy diner d' vos noveles ? Vos n' vos dotroz måy di tot çou k' dj' a veyou et eduré chal.

Carl : Tot çoula, c' est di m' fåte. Awè, dj' el kifesse... Mins mi avou, dj' end a veyou les set croes... Vos avez dvou pinser ki dji vs aveu rnoyî; Ki dji n' esteu k' on djannesse, on prometeu d' bons djoûs... on rénnvåt, tot djusse bon a stronner l' poye sins l' fé braire, pu, si côp fwait, a cori evoye come on hapeu d' tåte ås efants. Et portant... Vos è sovnoz vs, Maria, di ç' tins la ki nos fjhéns nos biestreyes tot nos catchant d' vosse mononke.. ?

Maria : Come si ç' sereut ir...

Carl : Et ki vos estîs so des tchôdès cindes, la ki vos passîz vosse moes... ?

Maria : Dj' end a co les fives rén k' d' î rpinser.

Carl : Nos nos voléns maryî, mins po çoula, i m' faleu des papîs del comene wice ki dj' aveu vnou å monde, la bén lon, après Måmdey. Dj' aveu sogne d' î raler ca disk' après l' guere di catoize, nos esténs prûsyins. Et si l' curé di m' viyaedje n' aveut nén fwait sepi å vosse ki m' mame esteut-st al moirt, dj' åreu motoit dmani chal. Adon dj' î a stî, tot vs prometant di rvini å pus rade avou les papîs po nos poleur maryî.

Maria : Et vs n' avez nén rivnou. Vos m' avez abandné... Dj' a dvou saetchî m' plan tote seule, sopoirter les mocreyes et les råtchåds des målès linwes...

Carl (tot l' båjhant so l' front) : Cwand dj' ariva-st å viyaedje, mi mame esteut ddja sol tåve... et dji n' a ddja avou l' tins del mete e waxhea ki dj' aveu stî racuzé come dizarteu, la k' Hitler aveut mobilijhî tos les djonnes omes do viyaedje. C' est inte deus djindåres ki dj' a veyou mete mi mame el fosse. Pu, sins piede di tins, i m' ont moenné a Cologne... Dji n' aveu k' ene idêye e l' tiesse : cori evoye po vos vni rtrover. Al gåre, come on dschindeut do vagon, dji tchessa on pougn el gueuye å djindåre k' esteut dvant mi et dji fila come on live. Målureuzmint dji m' ala trebouxhî dvins des valijhes k' ehalént l' passaedje, et on m' rapiça.

Adon, m' pôve poyon, on m' evoya dvins on camp... Po m' aprinde.... Et dj' a stî aprin. I gn aveut la tote li rascaye do monde... et on nos a fwait tchoûler des låmes di sonk. On-z a divnou des machines, presses a touwer pere et mere s' on nos l' kimandéve, et on nos a-st evoyî sol front rûsse. Et dji n' esteu pus k' on leu å mitan des leus. Come les ôtes, dj' a hapé çou k' dji poleu, dj' a broûlé des viyaedjes, foirci des femes, mascråwé des pôvès djins... A, c' est k' dj' esteu on fel sôdård : dj' ouri li "croes d' fier", dji divna sordjant et i gn a waire, la k' mi unité aveut stî distrûte, on m' houca po moussî el Waffen S.S.

Maria (doûçmint) : Mi, so ç' trevén la, k' acleveut vosse fi. C' est on vigreus valet. Il a vos ouys, Carl. A tchaeke côp k' i m' rilouke, c' est vosse louca ki m' rivént... et dj' endè so tote måle...

Carl : Dji vs comprin, et dji n' merite nén mi...

Maria : C' est l' vraiy ki vos m' avîz leyî la sins noveles, tote seule, el cwate ???? disk' al pipe !

Carl : O, dji sai... Dji n' a nole escuze... I gn a deus moes, on cwereut des sôdårds ki djåzît l' inglès et m' camaeråde si prezinta, et cwand i sepa k' esteut po-z aler e l' Årdene, i dmanda ki dj' î våye avou lu, la ki dj' esteu Årdinwès. Et c' est insi ki...

Maria : Mi pôve amour, come vos avoz dvou sofri ! (I dmorèt onk disconte di l' ôte)

Gofin (d' ådfoû) : Les dijh munutes sont houte. C' est tot, asteure !

Gofin et Tombeu moussèt el plaece.

Tombeu (a Carl) : Alez, valet !

Carl : Adiè Maria.

Maria (sayant del ritni) : Nonna, nonna, dji n' vou nén...Ele court come po l' ritni. Gofin l' arestêye tot l' prindant pa ses bresses.

(Tombeu et Carl sôrtèt.)

Sinne IX Gofin. Maria

Gofin rtchôke tot doûçmint Maria et l' fwait s' ashir so ene tcheyire. Maria tchoûle. Gofin ki s' a rsaetchî kékes metes en erî el rilouke tot tuzant.

Gofin : Insi vos l' inmez co, paret !

Maria : K' endè va-t i advini ? Ki lyi alez vs fé ?

Gofin : O, mi, rén do tot ! Dj' el va wårder chal el cåve disk' a tant k' nosse årmeye soeye la. Adon, dj' el rimetrè al police militaire. leye, ele l' evoyrè dvant l' consey di guere...

Maria : Mins pocwè ? I gn a rén fwait d' må tolminme...

Gofin : Rén fwait d' må ? Come vos î alez, Maria ! Li guere n' est nén on djeu d' mamjheles. Elle a ses lwès. Et il esteut moussî a amerikin.

Maria : Ki gn a-t i d' må avou çoula ?

Gofin : Vos estoz d' doûce croeyince,vos, Maria. Po les djudjes, l' afwaire serè claire: c' est on fås tchén, on tricteu, on espion, cwè. Et i n' tchictêyront nén.

Maria : Ki vloz vs dire ? I n' el vont tolminme nén...

Gofin : Fuziyî ? O, siya !

Maria : Ci n' est nén possibe ! Ci n' est nén djusse ! C' est mågré lu k' il a stî erolé e l' årmêye almande. I n' voleut nén.

Gofin : C' est l' vraiy, mins on n' l' a nén oblidjî di s' fé S.S. Et pu, n' a-t i nén broûlé des viyaedjes et mascråwé des pôvès djins.

Maria : Vos avoz schoûté padrî l' ouxh...

Gofin : Dji n' a nén schoûté dj' a-st oyou. Et si dj' a dmoré padrî l' ouxh, c' est ki dj' aveu sogne por vos... (Maria ratake a plorer)

Maria : Torade, cwand vos m' avoz dmandé ki dji dvénxhe vosse feme, dji vs a dmandé di m' leyî l' tins d' î tuzer. Asteure dji so d' acoird, djans. Vos n' sårîz trover ene feme ki vs serè pus amitieuse, pus fiestixhante et pus fidele ki mi. Dji vs serè devouwêye et doûmiesse tot do long di m' vicåreye. Dji vs el djeure, dabôrd...

Gofin (on pô setch) : Dabôrd ki cwè ?

Maria : Dabôrd ki vos lyi leyîxhe si tchance... Dabôrd ki vos l' leyîxhe end aler.

Gofin : Vos rindoz vs conte di çou vos dmandez la ?

Maria : Dji vs dimande djusse d' esse on pô midone li nute di Noyé, avou on pôve here k' end a veyou les set croes.

Gofin : Ci sereut dfali a mi dvwer. Et s' i nos evoyreu les Almands ?

Maria : I n' el frè nén; dj' ende so seure. Çou ki dj' so seure c' est k' dji n' såreu vey mi fi fé "a babaye Colas Roubin" so les djnos d' l' ome k' åreut fwait touwer s' pere. Tuzez î. Dji vs mete li martchî el mwin.

Gofin n' respond nén.

Gofin (sondjeu, tourmeté) : L' est bon, vos avoz fwait kine. Mins, est çki vos m' prometez ki...

Maria : Dji vs el promete.

Gofin : Vos alez rintrer e vosse måjhone. Vos ewalproz des mousseures d' ome divins do brun papî, et dvins ene eure, sins vs fé vey di nolu, vos l' vénroz mete chal e poice. Alez è, asteure.

Maria : Merci. (Come ele passe divant lu, ele lyi vout dner on betch, mins el ritchesse, måva.)

Maria sôrteye. Gofin dmeure tot seu. I n' tént nén e plaece et navtêye avå l' plaece tot tuzant. I s' sieve on vere di cognak. I boet on côp, pu va disk' a l' poite et houke après Tombeu. Tombeu ! Tombeu !

Tombeu intere.

Sinne X Gofin, Tombeu

Gofin (ki halkene) : Vén chal, valet,dji t' va dire çou ki t' fåt fé. (I sospire, pu come onk ki doet fé ene foice mins k' est bén decidé)

Ti m' vas aler cweri Zendaro et t' el metrè d' wåde pol prijhnî.

Tombeu : Zendaro ? Li moudreu del mafia ki vos vôrîz evoyî dvant l' consey di guere. Li ci ki côpe les doets ås moirts po lzî haper leus ronds d' ôr ? Mins...

Gofin : Awè valet, cisse schinaye di Zendaro. Zendaro, li hasse do raezoe. Ebén, t' el va aler cweri. Ti revoyrès li sentinele et ti lyi frès prinde si plaece. A meynute, cwand totes les djins seront rashonnêyes a messe e l' eglijhe...

Cwand tot l' viyaedje serè al messe di meynute. Vos deus, vos emoennroz l' prijhnî so l' voye do Poyou Sårt disk' ås Gregnes Broûlêyes et adon...

Tombeu : Et adon...

Gofin : (ki ravale si raetchon) I n' doet nén aler pus lon. On n' el doet måy ritrover. Et si, cwand minme, on rtrovéve on djoû s' cadåve, i n' deut aveur nouk a l' poleur rimete. I n' lyi doet nén dmorer ene medaye, on papî, on boton. Ci n' serè k' ein umbekend Deutsch soldat, onk di pus.

Tombeu : C' est on moude ki vos dimandez la...

Gofin : Awè, on moude... Mins binamé Bon Diu, ki pou dju fé d' ôte ? Si dj' el laireu bizer, av' l' acertinance, vos, ki n' irè nén rtrover ses camaerådes, nos dnoncî et ki dmwin, leus tchårs ni vénront nén distrure li viyaedje et mascråwer les femes et les efants. Et si nos l' wårdans, li djoû k' nos M.P. seront la, i n' tchictêyront nén, zels. El placront å meur po-z esse fuziyî !

Tombeu : Mi dj' inme mî d' esse Pilåte ki Djudas, ki, lu, s' a pindou di rmoird. (hagnant) Mins, c' est k' i gn a Maria.

Gofin (sondjeu) : C' est l' vraiy ki Djudas s' a pindou, la k' i n' a polou sopoirter s' petchî. Mi, i m' fårè viker avou mi rmoird. Ci serè come on catåre ki nole pile ni såreut aswådjî. Come ene rogne ki dji n' såreut greter. Tos les djoûs, dj' årè dvant les ouys li fi ki dj' årè fwait touwer s' pere. Tos les djoûs divintrinnmint, ene vwès m' traitrè d' moudreu...

Tombeu : Dji vs plin,..... mins dj' a des dotes... (I sôrteye)

Gofin : dmeure tot seu, on sint k' i tuze, k' il est tourmeté. I s' rimplixh on vere di cognak et boet ene goirdjete. A ç' moumint la on etind ene doûce muzike di Noyé, ene muzike di påye. Gofin schoûte on moumint, pu tot d' on côp, i prind s' vere et l' tape al tere di totes ses foices. Pu, i mete si paltot, prind s' casse. I shonne halkiner, va viè l' tåve, prind l' botaye di cognak et mousse foû.

Li toele toume doûcetmint

Jean pierre Dumont, Sint Fontinne, li 11 di fevri 2003.