6.

Adon, mi scolaedje a ataké:
- Dji vs disfind d' eraler e l' årmêye! Èn ome sins scolaedje, end aléve-t i l' Conte Von Altburg, est come on moncea d' årzeye k' on n' a nén prusti ni afiné! I n' rishonne a rén! I n' sieve a rén! Nos frans d' vos èn ome di bén!

Ça fwait k' on m' a trové on mwaisse po m' aprinde a lére, a scrire ey a comprinde nén seulmint l' almand, mins ossu l' francès et ene barbôjhe d' inglès. Li Conte tineut a çou ki dj' léjhe les meyeus scrijheus di s' bibioteke: di Leibniz a Montesquieu tot passant pa l'Encyclopédie eyet Hume... A mi idêye, li Conte lu minme ni droveut måy onk di ses volumes, mins il inméve bén d' saveur k' i ls aveut... Il inméve bén d' è dvizer, sins jamwais ls aveur lî, avou des soçons ki lyi vnént fé des complumints. Kéke feye si voleut i siervi d' mi po s' fé croere k' il aveut conoxhou eyet compris tote li syince di nosse sieke?

Dji trovéve dins m' novea vicaedje des plaijhis k' dji n' î åreut måy oizou sondjî: po on prumî, esse seur di mougnî tos les djoûs a tins a eure, eyet nén l' disgostante cabolêye k' on nos sierveut dins les Redjimints avou do fayé spès vén. Neni: des longuès fenès eurêyes avou des påstés, des polets, des rostis, des spésreyes, des véns tchoezis... Deuzio: dj' aléve aveur l' ocåzion do hanter l' grand monde, li bele literateure, les belès comeres des salons...

On cåzéve bråmint, di ces trevéns la, di djins k' on loméve (ou ki s' lomént zels minmes) les filozofes. Dj' end a yeu onk come sicoleu... On bea cåzeu avou ene peruke, ki sayive di m' fé acroere totes sôres:
- Veyoz, Monsieu l' Conte, l' ome n' est nén come les biesses ki vikèt totes seules å fond des bwès ou del mer! Nén èn etrindjî e monde! Li tere n' est nén on payis innmi! I vos fåt soçner avou ls ôtes! Πtrover do plaijhi! Ou, si vos n' è trovez pont, è fé! Al plaece ki vs î vikez! Inte les djins k' vos hantez! Vos seroz èn ome di bén, Monsieu l' Conte! Plaijhant! Vos cachroz a siervi a åk!... Rinde li tere pus doûce eyet ses djins pus binåjhes!
Portant, sol tins ki l' mwaisse di filozofeye berdeléve, dji n' saveu rvey ôte tchoi k' les awousses furlêyes, a Lene, li bataye di Mögluk, li vårlet sclindjî po-z aveur arinné l' fi då Conte...

Rén a fé! Li Conte aveut decidé k' dji sereu come zels, les clapants filozofes: sipitant dins mes dvizes! Capåve do djåzer d' tot l' minme cwè, tot l' minme cwand!

On m' fijheut lére el dilon^6.1:

Memwere Evoyî a l' Academeye def Syincef di Kronftadt
po Dire åf Ogneffèf djinf do Waitî a zelef
avou lef Frutf Etrindjirf
Raminéf def Novelèf Teref houte del mer,
come lef Crompiref & li mayiffe & lef Tomatlef,
ca il Apoirtèt totèf fôref di laidèf Maladeyef & mete è
Dandjî li Cruftyinté
pa leu Goffe Emacralant & leu Cogne Langoureufe & co pa
def ôtèf voyef
(Prumî Prif)

El dimår, dji dveu spepyî:

Celebråcion do Novea Inftrumint do Docteur Guillotin
ki Permetrè do Vudî Reutabale lef Prijhonf Bôguieyef di
Moudreuf, Affazinf & ôtef Revinteuf Coftant å Rweyåme di
France Doze Meye Saetchf di Frumint l' An & Trinte Shijh
Meye Touneaf d' Aiwe

Et insi tos les djoûs, des meyes di pådjes å long...

Cwand mi scoleu a pinsé k' dj' è saveu assez po bate ene copene, i s' a arindjî po k' dji soeye priyî dins l' Monde.

Divant si accidint, Justinyin - mi, don!, i fårè bén ki dj' m' î afaitixhe - aveut dedja yeu l' ocåzion do hanter li sålon del Barone Vazet-Fuhdimplacz... Mins dj' esteu trop djonnea, di ces trevéns la! Nén co rsouwé pa drî mes orayes! Nén ddja on Mozart! nouk n' aveut surmint pris asteme a mi. Ça n' sibarreut nolu do m' vey ene miete candjî... Asteure, i faleut monter sol sinne. Ou dischinde e l' arinne.

Les vårlets nos ont drovou l' ouxh d' a rowe... On colidôr... Ene viye comere ki m' rabresse pa dzo les montêyes - Vazet-Fuhdimplacz dandjureu - eyet m' dimander des noveles di m' santé, da m' popa... Les grés... On dobe ouxh ki s' tape å lådje - shuvoz mu, don, ni m' leyîz nén tot seu - et vola l' éndjole. I gn a la

ene bladje crapåde ki djouwe, a môde di pope mecanike, des sinnetes nôbes so on clavcin pus hôt k' leye

on Prince rûsse ki conte li bataye, fwaite a Barnadodine, conte des såvadjes Suwedwès ki, edjalés so plaece, sipiyént come do veule å prumî côp d' såbe

ene cortizane di Brindisi etourêye d' omes a djnos come des coshets åtoû d' leu mame

on filozofe francès acertinant k' did ci cints ans, tos les lingaedjes di Babel åront disparetou, a pårt l' Itålyin, li seul lingaedje po fé del muzike, eyet l' francès, li seul lingaedje po tuzer, sinti, pezer, conter, djudjî, vey clair, comprinde eyet fé do comiece

on crås bankî, soriyant tot seu e s' coine, ki s' blanke peruke di sclimboigne lait passer ene topeye di noers tchiveas

on curé, oteur, dit-st on, di dijh-nouv sayes po l' abolixhmint del rilidjon

on Conte suwedwès ki splike - dins èn almand come del verdjale - comint çki si redjimint a cohatchî des meyes di Rûsses al bataye di Barnodotir

li mwaisse del marine di l' Impire, ki n' prétind nén monter so on batea « såf li djoû ki l' mer toûnrè a vén! »

on grand sincieus inglès, k' aråvlêye l' idêye do dner des negues a mindjî åzès peupes crustins ki sofrixhèt del pômagne

ene viye princesse a mitan sote, å troes cwårts tchamossêye, k' a stî, dit-st on, li mayon då pa da l' Impreu, et ki fwait åtoû d' on roufion nén co doze ans vî

on pondeu ki wangne si crosse, come les rwenes sont-st al môde, tot pondant po tos les nôbes di l' impire leus tchesteas tournés a bricayons

I gn aveut la on grand powete eto... on mwaisse rimeu! Astampé å mitan d' on rond d' tcheyires, ses iys après les andjes pinturêyes å plafond, i fjheut aler ses bresses, londjinnmint, come s' i bagnaxhe dins del djelêye... Si ptite boke fardêye di rodje esteut arondeye come s' i tetéve ene flûte k' on n' veyeut nén... Si tiesse si clintchive doûçmint so ene sipale, pu l' ôte... Après ene hapêye di dansreye so plaece, il a ataké a susiner s' tchîf d' ouve... Tot plin, tot plin des coplets, avou come on respleu ki dijheut a pô près çouchal:

Doûs zuvions del vesprêye, oyoz vs les trisses ploras
Del båshele da Minos, sol rotche la k' on l' loya?
Ses låmes avizèt l' låme rascodou e Nôvimbe
Påzès Ninfes Libétrides, k' ont, ciete!, on si bea Nimbe...

-Ô!
- Kéne merveye!
- Bravissimo, Maestro! Bravissimo!
- Avoz vs oyou les sons, Contesse: « Doûs zuvions del vesprêye... »!
- Et come les imådjes sont noveles! « Ses låmes... li låme... »!
- O fortunatam rem publicam, si quidem hunc poetam habuerit!
- Eyet les rimes! Kénès trovayes!
- Oh dear! Dji so tote mouwêye! I fåt k' dji pleure!
- Mins, di dju po dire ene sacwè, i gn a pont d' låme e nôvimbe...
- ...
- !
- !?!
- ...! ...!
- Ô!
- Co... Comint?
- K' a-t i dit?
- K' i gn a pont d' låme e ...!
- Di cwè! Mins k' î conoxhoz, vos, la dvins, djonne huzea?!
- Portant, nozôtes, al cinse...
- ...
- !
- ?
- !?!
- ...! ...!
- Ô!
- Co... Comint?
- K' a-t i dit?
- Al cinse!
- Ô!
- K' î conoxhoz, a l' årt des vers?!
- Djans, Maestro! Djans!
- Dji n' lairè nén ahonti l' powezeye pa on... on såvadje sins consyince! Avoz lî les Raiteurs? Li Rétorike da Aristote? Li De Grammaticis et de Rhetoribus da Suétone? Les Institutiones grammatices da Pricyin?
- Djans, Maestro! Dji so seure ki l' Conte n' a måy volou rabaxhî Fêbus! Endon Conte? Vinoz avou mi, dji vs vôreu bén prézinter...

Li Baron Vazet-Fuhdimplacz m' a pris på bresse eyet nos avans bouté å lådje, tins ki l' fi da Fêbus continouwéve a s' forsôler et a emacraler les schoûteus avou ses tites e latén:
- Li Doctrinale Puerorum?! Li De Partibus Orationis?! Li...

Li five aveut rtoumé po ç' shijhe la! mins do côp, li Monde s' aveut fwait ene idêye disseres mi... Li Conte, croeyant s' mete a houte des côps d' linwe åd fwait del rivnowe da s' fi, aveut fé cori l' boigne istwere k' il aveut emantchî lu minme: si valet schapé foû del vweteure pa miråke, rascodou eyet lodjî pa des payizans pask' il aveut pierdou s' tiesse, pu rivnou a lu...

On m' prindeut po on dmey sot.

Li paskeye å sålon del Baron Vazet-Fuhdimplacz n' a rén arindjî - ti sins bén! Vormint, il end aveut wårdé ene sacwè, di si accidint, li Conte Justinyin Von Altburg! « Nozôtes, al cinse! » A-t on idêye! Vos vos rindoz conte!

Dji n' poleu pus aler dins on sålon sins k' on bea cåzeu tape des sonetes so « m' passé d' cinsî »! S' il årént yeu sepou! Mi dji saveut bén cwè! Mi provnance! Djelzî åreut bén yeu volou dire! Nén l' fi do Conte, savoz! Nén ddja on baståd do minme song k' lu!

Dji rwaitive mes botes, come s' elle årént co stî totes frexhes eyet pezantes des broûs d' Lene, come si, pattavå les spès tapis eyet les pavmints cafloris, dj' åreu leyî pa drî mi des rotes ki m' racuzrént:
- C' est li! C' est Colot, l' fi do cinsî d' Lene! Nén Justinyin! Seulmint Justin! Riwaitîz pa drî s' mousseure: i n' est nén Conte! Rén k' on voleur!

On sbara a peruke, avou ene pelake di blanke poure dissu s' vizaedje ey ene noere moxhete croyeye so s' gåtche mashale, avou des ouys et ene boke di coloûte, lait tchair:
- Les filozofes sont clairs: téls les Romins å tins d' leu glwere, nos dvans travayî l' daegn, sourdant d' totes les ritchesses do payis. Nos ns î duvréns ateler tertos, endon, Monsieu l' Conte?
Eyet djiper les comeres! Des riyas tot betchous, tot pondants, ki m' fijhént tressiner et rodji...

- C' est çou k' nos sintans, et nosse manire di sinti, k' amoenne nos pinsêyes, minme les pus peures. Èn efant d' vårlet, ki si oda n' a jamwais stî eployî k' a fé l' diferince inte li hinêye di l' ansene eyet l' odeur des vatches, ni såreut ddja comprinde Lulli ou Spinoza. Minme si ene sakî sereut sot assez po prinde cit efant la, divnou djonne ome, eyet l' sicoler, on nel såreut måy amoenner a etinde des trop fenès råjhons:

Tot oyant les mots « ansene » eyet « vatche », les femes tournént leu vizaedje et fé « Ô! », come on-z åreut metou po d' bon on ståve ey èn ansenî inte les tåves do cafè; ele si rwaitént avou ene air inte deus airs, efoufieyes télmint k' elle avént bon d' esse chokêyes insi.