1.

- Justin! Rivnoz!
- Rivnoz, Justin!
- Maria Deyi! A des pareyès ådjes!
- Tot nou e Mouze å moes d' Nôvimbe!
- Justin! Soeyoz djinti! Alez!
Mins m' pårén Justin dmoréve la sins moti, å fén mitan d' Mouze, a fé l' plantche; i bodjive télmint waire ki t' åreus yeu dit ene grosse coxhe schetêye, tcheyowe d' èn åbe malåde après èn oraedje, et ki saiwe doûçmint evoye so les aiwes...
- Djel a todi dit, k' il esteut fén sot!
- Il a l' diale e s' capotene ou cwè?
- Pa on froed parey, i n' sorvicrè nén lontins!
- Dji vs e preye, Justin!
C' est m' matante Fine ki creye et ki brait.
- Tot l' monde vos rwaite!
C' est l' vraiy... Tot l' viyaedje est la, rashonné å boird di Mouze, po rwaitî m' pårén Justin ki noye e savene... Li mônî est la avou l' mônresse... Zande, li cabartî... Et Djôr, li passeu d' aiwe! Et Djåke, li batlî! Eyet tos les ôtes... Tén! Vola minme nosse curé k' abize avou s' cote rilevêye! Åzès finiesses do tchestea, les ridôs s' ont ene miete adrovou... Seur ki l' tchesturlin rwaite li paskeye di cresse! Pa drî li - vouss wadjî? - si feme rodjit d' ene sifwaite furdinne! Et les efants s' coboutèt po vni al finiesse!

Gn a ki m' pårén ki dmeure påjhire

- Justin, rivnoz! Tot l' monde vos rwaite!
Mins Justin, lu, i rwaite li cir sins crankyî. Di tins-in-tins, on l' voet a poenne k' i bodje doûçmint ses bresses po dmorer a plaece.
- Djåke, abeye!, dit-st ele mi matante, prindans vosse barke po l' aler rcweri!
- Djel a saetchî foû di l' aiwe ir po l' remantchî.
- Mon... sieu Colot! - c' est l' curé, djus d' shofla, ki saye di criyî - Co... Colot! Ci n' est nén... nén... d' on bon crustin... çou k' vos fijhoz la!
- Justin! C' est mi... Vosse sour! Rivnoz! I fwait froed! Vos vs alez neyî! Djôr, vosse naçale, eyou çk' elle est?
- Elle est trop lon erî!
- Prindans m' barke da mi, dit-st i l' vî Flupe.

Mins vola k' on-z etind l' vwès da m' pårén; i n' a nén bodjî, on croereut k' c' est on moirt ki cåze:
- S' i gn a ene sakî ki vént, dji m' neye!
Et tot d' on côp, tot l' monde si tait...
Come les tropeas d' moxhons k' leu araedje est côpêye pa l' anuti! Pinsez! Dispu cénk ans ki m' pårén aveut raparetou... rivnant d' on n' sait wice... on n' l' aveut måy etindou dire on mot! On l' pinséve divnou moya!
- Ôôô, ki m' matante fwait; et ele tchait flåwe dins les bresses do curé, ki n' sait si si rlidjon lyi permet d' tini ene feme dins ses bresses; ene feme, si viye soeye-t ele, c' est må! Li må, c' est l' diale! Li diale, c' est esse metou al kestion et broûlé! Tot pierdou, i leye toumer m' grosse matante, plaf! ki s' dispiete do côp et s' rimete a criyî, d' ashide dins les broûs del voye:
- Ôôô Justin! Et ele ratake a tchoûler.
- Avoz trové ene barke, po fini? ki pårén boerlêye.
- Oyi, binamé fré! Mi matante a cåzu zoublé d' djoye... Riprinde espwer! Et årdant! Fé vni l' barke da Flupe!
- Coraedje, Justin! Nos arivans tot d' shûte! Ni bodjîz nén...
- Rén di tot! dit-st i m' pårén. Dji n' vos vou nén vey, ni nolu... Dji vou k' mi ptit-fi vegne dilé mi!
Ci côp ci, c' est d' trop! Mi matante tchait flåwe po d' bon. Tot l' monde mi rwaite sins comprinde...
- Il est divnou sot, gn a rén a fé!
- Dji m' î va! di dj'.
- Neni! Mi, dji m' î va! dit-st i m' vî mononke, ki n' a nén l' air trop seur di li portant. Djel va rcweri... Ni crik, ni crak!

La l' Flupe k' adaye e saetchant s' barke.
Mins l' tins k' i s' decide, et dj' a stî pus rade ki lu... Dji xhore et m' cotaper inte les bresses ki sayèt di m' rastini... et hop! dji zoubele el barke distatcheye... Ele hosse ene miete... Avou m' randon, tot d' shûte trop lon erî do boird po k' on m' sepe ridjonde.
- Rivnoz, Emile! creye-t i l' curé ki, come d' åbitude, ni sieve a rén å mitan d' ene sinne k' i fwait shonnance di mwaistri.
- La l' pårén et li ptit-fi e Mouze, asteure!
- C' est tote li famile, k' est sote, por mi!
- Mes rames plonkèt doûçmint e l' aiwe... Sipesse et vete... Li froed pice mes mwins totes rodjes... Ene miete roedes... Les boerlaedjes des djins, å boird, si pierdèt el foumire k' emonte foû d' leu boke.

- Pårén?
- C' est vos m' fi?
- Oyi.
Si coir miernou est tot blanc; on direut k' il a stî stocaesse, et adon abumé raddimint pa dji n' sai cwè. Di tenawete, ses bresses tournèt doûçmint... Et l' aiwe tchapote on pô åtoû d' li. I rwaite co todi l' cir; les nûlêyes ridèt-st evoye...
- Nos n' nos conoxhans waire, endon, m' fi? - Oyi pårén.
Ça! Cwand dj' esteu gamén, on m' aveut raconté k' il esteut moirt dispu lontins; cwand? comint? gn aveut jamwais rén moyén d' saveur, ni di m' pa, ni, on côp k' mes parints on stî moirts, do mononke et del matante di m' pa, ki dj' aveu stî dmoré avou. Et pu, on matén, gn aveut cénk ou shijh ans d' ça, mi pårén aveut raparetou!
- Cwand c' est k' dj' a rarivé, k' avoz pinsé?
- Dj' a stî binåjhe!
- Ni mintixhoz nén po m' fé plaijhi! K' avoz pinsé?
- Dj' a yeu peu.
- Douvént?
- Dj' a yeu l' idêye ki... ki vos estîz... drole!
- Douvént?
- Dji n' vos aveu måy veyou... On m' aveut dit k' vos estîz moirt...
- Et vo m' la come on rivnant! Mwinre et måssî... Sins on liård...
- Oyi mins vos avîz l' air d' aveur conoxhou des payis et des djins k' on nd a måy oyou cåzer avår ci!
- On dijheut ça?
- Oyi... A mi, on n' dijheut nén grand tchoi, mins... dji schoûtéve... pa côps, cwand on cåzéve di vos...
- Et k' avoz oyou?
- Ki vos vs avoz egadjî sôdård, et pu k' vos avoz dzarté po-z aler viker amon les Turks, ki...
- Åwe! Doûçmint! Vos vos brouyîz, come les ôtes... Neni, nén tant k' les ôtes...
Si vizaedje divneut deur et bleu come del pire. Et portant, dj' aveu l' idêye k' ene sôre di sorire fijheut frumjhî ses mashales...
- Savoz bén pocwè çki dj' m' a tait, cåzu cénk ans e rote, dispu ki dj' a rivnou? Pask' i gn aveut d' trop a dire... Paski dj' n' esteu nén seur ki ça sievreut a ene sacwè... Portant... Dji vs åreu bén yeu volou conoxhe... Asteure, c' est trop tård...
- Si vos vloz...
- Taijhoz vos. Nos n' avans waire di tins. Aschoûtez mu! Vos avîz peu d' mi, dijhoz, pask' i gn a on trô dins m' vicåreye; vos n' savoz nén d' cwè çk' elle a stî fwaite. Vos vôrîz bén croere, motoit, k' elle n' a nén stî ttafwait come li cene di nos djins... Nén ttafwait... Mins dji n' è pou rén... Rén di tot...
Di n' pus ramer, dji sinteu mes mwins s' aroedi; li froed picive. Et dji m' rind conte asteure, des anêyes et des razanêyes après cite après-nonne la... Dji n' a måy tuzé, sayî d' ramoenner m' pårén el barke!
- Dji n' è pou rén... Si vos voloz... Schoû... T' irès dins m' tchambe... Ti sais bén lére, dwai?
- Oyi.
- T' irès sinti padzo m' payasse... Gn a des fouyas... Lîs les... C' est... por twè... Cwand t' årès tot fwait d' lére... t' årès kéke feye l' idêye ki twè et tos ls ôtes, vos estoz pa dvant on meur... I n' est nén si spès k' i nd a l' air... I crake pa tos costés...
Ci côp ci, pårén begyive - dji n' comprindeu pus k' a mitan tot çou k' i m' dijheut. Si pea esteut tote bleuwe, si coir roed come on glaeçon. Si vwès todi pus fwebe. Tot d' on côp, il a criyî:
- Foutoz l' djus!
Il aveut tot fwait d' cåzer... I s' taijheut po d' bon et po tofer.
Tot doûçmint, si coir a comincî a rider so Mouze, et s' refonçant ene miete divins les aiwes.
Dj' a oyou hoûler tot djusse pa drî mi. Tins k' pårén m' djåzéve, on-z aveut stî cweri des ôtès barkes. Elle arivént trop tård. Li viye matante, crawieuse et bårbowe come ene djaeye, sayive di tchoûler come i fåt k' on tchoûle dins des pareys cas; mins come on n' aveut måy veyou ene sifwaite afwaire, ele ni saveut nén trop comint s' ebouter. Elle end esteut tote disvoyeye.
Djåke et Zande sôrtént l' coir foû d' Mouze et l' sitinde dins l' naçale.

Et di ç' moumint la et po tot l' rimanant di m' vicåreye, tot l' viyaedje m' a rwaitî come èn assazin: i faleut bén k' ene sakî soeye coupåbe, dwô! Pol monde ni pus tourner sot! Dji n' aveu nén touwé m' pårén, portant! Et dispu ki dj' a lî ses papîs - ses papîs k' nouk ni saveut k' i ls aveut scrît, mi pårén ki persone ni saveut k' i saveut bén scrire - dj' è so co pus seur.

Dji nels a savou lére tot d' shûte... Dj' aveu minti: adon, dji n' saveu ni a ni b. Si dj' a apris, c' est seulmint po saveur speli les fouyas da m' grand-pere. Et ça n' a nén stî åjhey...

Ci n' est nén m' prôpe istwere ki dj' vou raconter ciddé, mins i fåt tot l' minme ki dj' deye k' après l' moirt da m' pårén, dj' a stî metou a l' ouxh do viyaedje. Nouk ni m' a rén dit... Mins i n' faleut waire di compurdixheure... Nolu ni m' acontéve pus! Tot l' monde mi tapéve des pezantès ouyådes... Pezantes! Di rprotches! Mi mononke et m' matante m' ont consyî d' aler cachî après di l' ovraedje lon do hamtea... Åd triviè des gueres et des revolucions ki dj' a veyou, des cint mestîs et d' tos les voyaedjes ki dj' a fwait, dji wårdéve les fouyas da m' grand-pere dins ene potche, dissu m' pwetrene; dj' a apris a lére et a scrire; eyet c' est l' istwere di m' pårén Justin ki dj' a riscrît droci, sins candjî on mot, a pårti des fouyas trovés pa dzo s' lét, el cinse di Lene.