E nosse pitit viyaedje d' Indji, on dit sovint k' i n' si passe jamwais rén ! Et portant !
Portant, çou ki va shure vos frè motoit dire li contraire ! Vos voeroz ki l' bouneur n' est nén tofer la k' vos pinsez !
Leyîz la vos tourmints, vos mås d' tiesse, et fjhoz come mi:
Drovoz seulmint vos ouys, ou bén leyîz vs aler tot doûçmint, et... sondjîz !

Li moes d' djulete di l' an deus meye aveut stu vraiymint on moes d' plouve ki minme les gotes estént nåjheyes di toumer. Ploure, k' il a fwait, ki tot l' monde ni fjhéve pus ki d' djåzer d' çoula ! Minme les paraplus end avént leu conte d' esse ramoyîs !
Tot l' monde ratindéve ki Marie-Pierre Mouligneau (li feme a l' televuzion ki nos djåze tos les djoûs do tins k' i va fé) nos djhaxhe ki l' solo aléve rivni !
Po on côp, l' I.R.M. ni s' aveut nén trompé. Awousse si metéve å bea, come po s' fé pardoner et nos fé rovyî les lavasses k' on vnéve d' edurer !
Et rovyî ! On l' ava vite rovyî ! On ravikéve !
On oyéve tot avå les eclameures des efants ki polént rdjower a l' ouxh, les rires des djins ki sopént so leu terasse, dizo leu parasol et ki profitént l' mî possibe do bon tins...
Di tos les costés, on sintéve vini les odeurs di tchå cûte å bwès et assåjhnêye ås yebes do sud del France...
Les wasses estént dedja la, sôles et sotes, et tourniként come des bizawes åtoû des tåves di djårdén ! Ele vinént boere a grossès leupêyes les resses di rôzé vén k' on aveut vudî !
Les swerêyes estént si doûces k' on poléve end aler e purete disk' a bén tård...
C' esteut l' osté tant ratindou et les djoûs corént påjhûlmint dizo on cir sins nûlêye...