Page de Guillaume Smal.

Li pådje da Wiyåme Smal.

 Dressêye:


Democraceye !

Non, dji di non !
A tos les cis ki fjhèt des diferinces
A tos les cis ki n' djåzèt ki d' vindjince
Ki må-moennèt des omes sins disfince

Non, dji di non !
Po ces omes k' on a resseré
El prijhon, padrî des bårbulés
Pask' i n' avît nén l' droet d' pinser!

Non, dji di non !
Po totes les bombes ki språtchèt tot
Totes ces bombes la, tapêyes pa des sots,
So des efants ki rcwerèt l' solo

Non, dji di non !
Po totes les biestreyes des grandès djins
Ki metront bén vite nosse tere a rén.
S' i n' sondjèt nén ås leddimwins !

Non, dji di non !
Po tos les efants ki morèt d' fwim,
Po tos les efants ki stindèt l' mwin.
Et k' on lait s' edoirmi tot doûçmint

Non a tot ça, dji di non !
Po k' les efants do monde etir,
Ritrovexhe alfén leu sorire.
Po k' i polexhe alfén viker
Divins on monde di liberté !


Guillaume Smal, djanvî 2002, nén eplaidî.


Wiyåme Smal vént d' vudî å moes d' djun 2002 on live titlé «Sondje d' ene nute d' osté ?»; vo ndè chal les deus prumirès pådjes (rimetowes en ortografeye pan-walone):

On bea moes d' awousse.

E nosse pitit viyaedje d' Indji, on dit sovint k' i n' si passe jamwais rén ! Et portant !
Portant, çou ki va shure vos frè motoit dire li contraire ! Vos voeroz ki l' bouneur n' est nén tofer la k' vos pinsez !
Leyîz la vos tourmints, vos mås d' tiesse, et fjhoz come mi:
Drovoz seulmint vos ouys, ou bén leyîz vs aler tot doûçmint, et... sondjîz !

 

Li moes d' djulete di l' an deus meye aveut stu vraiymint on moes d' plouve ki minme les gotes estént nåjheyes di toumer. Ploure, k' il a fwait, ki tot l' monde ni fjhéve pus ki d' djåzer d' çoula ! Minme les paraplus end avént leu conte d' esse ramoyîs !
Tot l' monde ratindéve ki Marie-Pierre Mouligneau (li feme a l' televuzion ki nos djåze tos les djoûs do tins k' i va fé) nos djhaxhe ki l' solo aléve rivni !
Po on côp, l' I.R.M. ni s' aveut nén trompé. Awousse si metéve å bea, come po s' fé pardoner et nos fé rovyî les lavasses k' on vnéve d' edurer !
Et rovyî ! On l' ava vite rovyî ! On ravikéve !
On oyéve tot avå les eclameures des efants ki polént rdjower a l' ouxh, les rires des djins ki sopént so leu terasse, dizo leu parasol et ki profitént l' mî possibe do bon tins...
Di tos les costés, on sintéve vini les odeurs di tchå cûte å bwès et assåjhnêye ås yebes do sud del France...
Les wasses estént dedja la, sôles et sotes, et tourniként come des bizawes åtoû des tåves di djårdén ! Ele vinént boere a grossès leupêyes les resses di rôzé vén k' on aveut vudî !
Les swerêyes estént si doûces k' on poléve end aler e purete disk' a bén tård...
C' esteut l' osté tant ratindou et les djoûs corént påjhûlmint dizo on cir sins nûlêye...

Li live, di 40 pådjes, e papî d' bone cwålité, pout esse comandé po 8 ¤ tout houcant l' oteur å 042.75.32.52


(Index par auteur) Indecse des oteus.

(Back homepage) Alans rzè al mwaisse-pådje.

 (Back textes en wallon commun) Ralans sol pådje des scrijhaedjes e rfondou walon.


Sicrijhaedjes eplaidîs so les fyis avou l' åjhmince do scrijheu.

Edition en ligne explicitement autorisée par l'auteur.