Victor Enclin.

Florintene.

(novele)

 

I.

Li novele s' aveut spårdou didins l' viyaedje : i gn aveut èn ôte monnî a Djalifè. Çou ki vleut dire ki l' mwaisse do molén et k' el fijheut ndaler disk' alôsse, vineut do lower a èn etrindjî, èn ome do costé d' Bastogne.

O, les moléns n' manként nén, dinltins, åtoû d' Witri, li viyaedje d' Årdene la k' dji vna å monde. Cwate monnîs si partaedjént l' cliyintale : les deus monnîs d' Vlaiveye, el grand et l' pitit, li monnî d' å Tchinne et l' ci d' Djalifè.

Li ptit monnî d' Vlaiveye esteut ptit, come ès no l' dijheut : el bossou. Bråve ome, å resse, et todi d' boume umeur. I fjheut ses tournêyes lu-minme. Il aveut on ciertin nombe di pratikes, assez po viker, trop pô po divni ritche. On-z åreut dit k' ès no di "ptit monnî" l' espaitchive d' agrandi s' comiece.

Li monnî do grand molén, lu, aveut l' moyén. Ossu, i l' prindeut pus a si åjhe, et i n' voyadjive nén. Endaléve kî vleut codure ès grin et rcweri s' farene.

Li molén d' å Tchinne ni fjheut waire pårler d' lu.

C' esteut l' molén d' Djalifè k' aveut l' pus d' vogue. On prijhive li grin d' ses meules. Et odzeu d' tot, l' ognesté do monnî. Avou lu, pont d' ehale. On saveut çk' i dveut raveur di farene et d' grouxhes (gruches) et jamwais, on n' l' aveut prin a defo.

Li dierin mierkidi d' avri, di cisse anêye la, li monnî aveut fwait l' toû do viyaedje avou on grand maigue ome, ki n' droveut cåzu nén l' boke. C' esteut s' replaeçant.

(a shure)


Victor Enclin, Editions Mauflorie, Tellin, sins dåte.


(Back homepage) Alans rzè al mwaisse-pådje.

 (Index par auteur) Indecse des oteus.

 (Back textes en walon comun) Ralans sol pådje des scrijhaedjes e rfondou walon.


Sacwants scrijhaedjes di cisse waibe cial polèt esse dizo abondroets; nos les rsaetchrans foû s' i fåt.

Some texts published on this site may be affected by copyrights and eventualy need to be removed in the future.