Cwand dj' esténs djonnes, mononke Blanc Djôzef vineut tos les djoûs al shijhe. Ça s' coprind, don. I dmeure tot seu. Et nozôtes, djel fijhéns aler po k' i nos raconte des fåves.

O, ça n' aléve nén tot seu. Des côps i djheut :

Fåvi fåvon,
Troes vesses e posson !
Posson trawé,
Troes vesses a vosse nez !

Ucobén :

Gn aveut on côp, gn aveut rén yeu. Dji î esteu, mi. Et vozôtes vos î estîz ossu ?

Adon gn aveut rén a fé. Nos djhéns :

?????????????????

- Gn aveut-st on côp...

Adon, on åreut oyou zûner ene moxhe.

Et i racontéve des fåves pa bokets, come on fouyton al tévé.

Insi, les mehins do dierin leu del Vå.

Dinltins, on-z aveut foirt peu des leus paski, cwand il estént e binde, il ataként tolminme kî et tolminme cwè. Mins on nd aveut tant touwé k' i gn aveut pupont d' bindes et l' ci ki dj' vou dire esteut tot seu. Après on foirt ivier, il aveut yeu fwin. Tene come ene plantche, il aveut divnou flåwe, et couyon, avou.

Mins l' bontins esteut rivnou, et i contéve esse schapé. Et i s' pormoennéve e Trô do Rnåd. Et vo l' la ki tchait so on live prin al bricole. I s' raletchive dedja, mins la k' i rlive si tiesse, et i voet on grand demon d' singlé ttossu près do live ki lu.

On gros singlé avou des brokes come ça.

Et ki n' aveut nén l'air d' aveur sofrou d' l' ivier, lu. A ! si ç' åreut yeu stî cwand il estént ene binde, i l' åreut yeu lvé, m' singlé. Mins asteure...

Cwè fé ? Et i crevéve di fwin.

Mins vla-t i nén k' odzeu d' zels, bén ashî so ene coxhe di tchinne, gn a on spirou ki s' pete a rire divant l' sinne.

Et la l' singlé, vireus, ki boerleye:

- Taijhe tu, ti, po on toké ! Di nos purade çou k' i nos fåt fé.

Mins li spirou, lu, i n' dimandéve k' a fé durer l' cayet, et minme a l' ecramyî.

- Gn a on plan, dijha-t i, c' est do fé vni on djudje.

C' est k' il aveut raguidé on rnåd, céncwante mete lon did la, k' aveut sintou l' live, mins ki n' oizeut aprepyî.

- K' i våye, derit i l' grand demoné singlé. C' est do houkî on djudje.

Ça fwait k' el sipirou creye après li rnåd ki vént, tot s' dimefiyant tolminme. Cwand il arive dilé zels, i dit tot d' ene trake.

- C' est on laid cayet, savoz, ça, mes biesses. - i n' aléve nén dire mes djins, hin, ça s' coprind bén, dowô. C' est on laid cas po on novea djudje, aprindisse et novice. I m' fåt des esperts.

- Si vos vloz, dj' endè va cweri.

Come i cnoxhe bén l' Vå po-z î aveur sitî vnou dipus d' on côp scroter des poyes, i dischind li voye del Nouve Veye, et il arive å Pont d' Fier. Et il avize li vî tchén do molén. Et i lyi conte li spoûle.

- Ni vôreuss nén esse espert, ti ? dit-st i li Rnåd.

- K' i våye ! dit-st i l' vî tchén do Molén. Vo m' la espert, pocwè nén ?

Mins il è fåt co onk, et vla djustumint li tchet d' mon Modåve ki passe dissu l' vinta [vanne] et ki dischind tot do long des rowes do molén. Et li rnåd lyi conte li spoûle.

- Ni vôreuss nén esse espert ? dit-st i li rnåd.

Li tchet n' est nén vî, et i sereut tot fir d' esse lomé espert.

- K' i våye ! dit-st i l' tchet d' mon Modåve. Vo m' ci espert, pocwè nén ?

Mins so ç' tins la, gn aveut l' singlé et l' leu k' avént l' tins long. Et dmander å spirou d' aler vey so l' ôrire s' on n' voet nén co ariver li djudje et ses esperts.

Come dit come fwait. Et vola li spirou ki potche d' ene coxhe so l' ôte et divant wai d' tins, vo l' la rarivé.

Et i raconte çou k' il a veyou.

- Vo les la, mins kî k' est ! Li pus gros ramasse ene chôrcheye di pires tot vnant et l' pus ptit a on grand såbe k' i tént å hôt, et k' est co pus grand k' lu.

Bén oyi, tchén ki rployive si xhaléye pate et l' tchet ki s' ricrestéve tant k' i dressive si cawe å hôt, li pus hôt k' i pleut.

Vo les la ås cwate cints côps [très soucieux], et docô, la k' i s' etindèt.

- Schoûte, dit-st i l' singlé. Dji m' va fé on trô po m' mete. Ti m' rascoverrès d' fouyas, tot leyant ene oraye foû, por mi ôre çou ki s' va passer. Et twè, mousse dins ç' ronxhisse la.

Et i fjhèt come il ont dit.

Et la les ôtes ki s' amoennèt. Todi piyane miyame.

- Téns ! dijhèt i, wice sont i, les ametous ?

Seulement, i vos fåt dire k' i fjheut ene miete d' air et vla on foye ki tchait so l' oraye do singlé. Et ça l' catyive Et i fwait aler ene miete si oraye. Li tchet, lu, pinse ki c' est ene soris, et i zoupele dissu; si hagne- t i [et il mord] l' singlé on bon côp dins si oraye. Li singlé e voeyant ene si ptite biesse ki lyi fwait si tant do må, ni fwait ni ene ni deus et, hay evoye ! i pete å diale.

Li tchet, lu, e voeyant si lver ene si grosse biesse, gripe å tchinne, la k' i trouve li spirou et vo les la evoye onk après l' ôte.

Li leu, di s' ronxhisse, n' aveut nén coprindou grand tchoi, mins todi assez po fote si camp. Li tchén, cwand il a oyou ramxhyî dins  ????????????????? l' leu. Nén lontins, mins l' leu a todi pinsé k' on l' lancive.

Ladso, li rnåd, dimoré tot seu, a prin l' live, et l' a stî magnî dins s' terire avou ses djonnes.

Et nosse pôve leu, cwand il a yeu tot corou on boket, i s' a rtrové e plantisse di dzeu l' canadire. Et si a-ti co todi stî coûtchî sins soper.

(a shure)