|
|
Poésies wallonnes adaptées aux récitations. Rimeas a dire pa ls efants (e walon). |
|||||
|
|
Poésies wallonnes adaptées aux récitations. Rimeas a dire pa ls efants (e walon). |
|||||
Dressêye:
Elle end a fwait des kilometes
Nosse viye berwete.
Et s' end a-t ele yeu dsu l' dos
Des fagots.
Cwand dj' end aléns o Novea Ban
Avou Moman.
U a Blezî rcweri l' fôrêye,
Ubén l' bouwêye.
Enute, nosse viye berwete
Est pinsionêye.
Elle est lodjeye o ståve
Les panes å hôt
Kî çki vôreut co asteure
D' ene berwete sins moteur
Les djonnes endè vlèt pus.
Et les vîs s' savèt pus.
Po l' aidance k' ele nos a bayî
Dj' el leyrans o ståve
Ele l' a bén wangnî.
Y. Gourdin, divins: Noss vî Bertry, Foyer Culturel de Bertrix, 1991.
Cwand l' ivier ramoenne ses froedeurs
K' on n' ôt pus les oujheas tchanter
Et k' les cortijheas sins verdeure
Voeyèt leus åbes tot disfouytés
C' est l' såjhon k' on rcwire li coulêye
Si vite ki l' lampe s' aloume, on voet
Djonnes et vîs s' ashir al vesprêye
Åtoû do feu.
Åtoû do feu ! ….La, k' ele sont beles
Les shijhes k' on passe tot djåspinant
Tchaeconk apoite si ptite novele
Oubén kéke messaedje a l' avnant
C' est l' tins ki candje, Pire ki s' mareye.
Li vijhén k' bague al fén do moes.
I s' a dit tant d' afwaires pareyes
Åtoû do feu !
Li grand-pére, avou s' bleuwe bonete
Po l' cintinme feye, conte k' e s' djonne tins,
I voeya les Cozakes a s' poite;
Di çoula vola si lontins !
I les voeya coûtchîs sol tere
Divins l' nivaye, å pus noer froed
K' on a bon do schoûter l' grand-pére
Åtoû do feu !
Li grand-mére ki rloye si gåmete
Djåze conte li monde d' ouy tot hemlant
On n' voet pus ki des mamjhuletes
Ki djåzèt d' flokets et d' volants
Divins s' djonnesse, i faleut vey
Come les båshales estént d' adroet
Et l' grand-mére raconte tote si veye
Åtoû do feu !
Tot foumant s' pupe di porçulinne
On vî vijhén k' n' a co rén dit
Va dbiter des fåves po ene samwinne
So les macrales et l' blanc vénrdi
Lu-minme, i voeya troes blancs spérs
Ene nute k' endè raléve tot seu…
Come on fruzixh di ces istweres
Åtoû do feu !
On reye, et on djåze di vijhnaedje
Mins vola k' tchaeconk si sovént
K' a costé dmeure on pôve manaedje
Wice ki l' mizere est bén sovint
L' ivier est si rude ! Totasteure,
On dmandrè s' i n a des covtoes
Et l' vraiye tcharité si mostere
Åtoû do feu.
Mins pus nou brut ! …divins s' banse pleure
On bea efant rôze et nozé,
Ås lepes pareyes a ene pîxhe maweure
Do cîr, ene vraiye andje evolêye !
Li mére prind s' trezôr so ses brès,
Si ptit trezôr ås ouys si bleus
L' efant soreye come on l' abresse
Åtoû do feu !
Po m' pårt, dj' inme les djoyes del coulêye
Dj' els inme et dj' els inmrè todi.
Divins les måjhones disseulêyes
I m' shonne ki les coûrs sont rfroedis
La, ké bouneur voloz v' k' on åye ?
Ossu di dj' k' il est målureus
Et bén a plinde l' ome k' on n' voet måy
Åtoû do feu.
Åtoû do feu ! …La, k' ele sont beles
Les shijhes k' on passe tot djåspinant
Tchaeconk apoite si ptite novele
Oubén kéke messaedje a l' avnant
C' est l' tins ki candje, Pire ki s' mareye.
Li vijhén k' bague al fén do moes.
I s' a dit tant d' afwaires pareyes
Åtoû do feu !
Emile Gérard, sicrijhaedje emilé so Viker pa A. Delporte.
(Back homepage) Alans rzè al mwaisse-pådje
Index par sujet; Subject index; Dressêye des sudjets.
Index par auteur; Author index; Dressêye des oteurs.
(Back textes en wallon commun) Erdalans sol pådje des scrijhaedjes e rfondou walon
