dierin rapontiaedje - last update: 2014-07-05

Dressêye:

• Årtchuveke, et meyeu kel Påpe.

Årtchuveke, et meyeu ki l' Påpe.

Po-z aler dire messe ås Hongrwès d' Vå-Mareye, dji fjheu deus cints et dijh kilometes å trin, pu trinte-ût kilometes a scleye, åd triviè del Praireye, dins on payis tot plat ou çk' i gn a nén èn åbe ki crexhe, nén on bouxhon, nén ene coxhe. Rén k' del nive et sacwants bassès måjhons par ci par la.

Li trin arivéve a dijh eures al nute, et onk di zels mi ratindeut tchaeke côp, afeye onk, afeye l' ôte, avou ene sicleye et des tchvås. Dj' î a stî on côp avou des boûs.

Ci côp ci, c' esteut Miclåjhe (Colas) k' esteut al eståcion... I fjheut foirt froed; li vint shofléve di Schoice; on boket d' lune pindeut pa dzo les miyons di blankès stoeles.

- Ebén, k' è djhoz, Miclåjhe ?... Ni sereut ç' nén mia d' coûtchî vaici et do pårti tot timpe å matén, purade ki d' nos aler kékfeye piede å mitan del Praireye ?... Tant k' dj' årè sopé, i serè tård !

- Ayi, mins nonna ! mi respond i. Dj' a prometou a m' feme do-z è raler tot d' shûte, et djel conoxhe bén : si nos n' arivans nén, ele pinsrè ki nos estans pierdous, edjalés.

- Bén, i n' fåt nén ça. Mins conixhoz foirt bén l' voye ? Ni nos piedrans ns nén dins l' Praireye ?

- Dj' a des bons tchvås, Monsieu l' curé. Zels, i n' plèt må di s' piede: i sintèt leu ståve. Vos voeroz: so troes eures, nos serans el måjhon.

- Come vos vloz, Miclåjhe ! Tot ou çki vs iroz, dj' irè.

Nos avans pårti eviè onze eures, bén gaiy tos les deus. Nos aléns droet å Nôr, et l' bijhe nos côpéve sol costé... Miclåjhe mi dvizéve des djins del colneye; mi, å corant des gazetes, dji lyi djheu les noveles di Hongreye, då Canada et d' tos costés... Les tchvås alént bon trin.

(a shuve)

Jules Pirot, foû di: Contes d' å lon et did près, Duculot, Djiblou, 1950. divins: Un littérateur wallon du Canada, da Lucien Leonard, sins leu sins date.

 (La même page en tenant compte, en partie, de l'accent de l'auteur) Modêye disfondowe.