|
|
Page de Max André Frère Pådje da Max André Frère |
|
|
Page de Max André Frère Pådje da Max André Frère |
dierin rapontiaedje - last update: 2006-02-22.
Dressêye:
Arimeas.
Vicåreye
I fåt si waire po fé èn ureus
On boket di pwin, sacwants rizetes
On cour ki n' fouxhe nén trop nareus
Ki s' såye co atinri ene miete
On trouve tertos si sôrt poenneus
Eyet portant, on leye des gletes
I fåt si waire po fé èn ureus :
On boket di pwin, sacwants rizetes.
El betch k' on dene a si amoureus,
Li kerton k' ås pierots, on djete,
Ou l' ofrande a des målureus
Des vîs testeas k' on n' sait pus mete.
I fåt si waire po fé èn ureus
Max-André Frère, divins Les Cayés Walons 1 (6) 1937, p. 88.
El bos k' on fote dins l' tocoe.
El bos k' on fote didins l' tocoe
N' a ptete nén l' sôrt el mia schuré
Mins s' tchôke n' est nén des pus fayêyes.
O !... ç' n' est nén l' sôrt ki dj' péye après
Mins dji n' erdjetreu nén l' pinsêye
D' esse el bos k' on fote dins l' tocoe
Po cachî d' ranimer ene blamêye
Cure el mindjî, catchessî l' froed,
Distinde les fatigues d' el djournêye
Ni sereut ç' nén tot l' minme des sacwès
Ki valnut bén d' risker l' passêye
Come el bos k' on fote dins l' tocoe !
Max-André Frère, divins "Tchipotreyes", riprins dins l' Antolodjeye do Pris del Veye di Lidje 1927-1961
L' eglijhe est floreye di pantîs
E trin d' erbouchî les trawêyes
K' el bijhe a drovou dins l' clotchî
Å colant d' el dierinne anêye !
Les moxhons k' il ont dismuchîs
Tchîpnut leus poennes a les nouwêyes
L' eglijhe est floreye di pantîs
E trin d' erbouchî les trawêyes
Et mi, reyusse a les rwaitî,
Dj' vôreu k' i m' saetchénxhe al valêye
El pelozea ki l' estoelî
Met dvant l' pocwè des destinêyes!
L' eglijhe est floreye di pantîs
Max-André Frère, divins "Tchipotreyes", riprins dins l' Antolodjeye do Pris del Veye di Lidje 1927-1961
Come on tchén d' tere, å fond del fosse,
L' houyeu s' eva, granznant s' tchimin;
L' bolante air l' estofe, ki l' losse,
Pa côps, ndè displosse ses mousmints...
On n' etind rén dins l' meur ki hosse,
Ki des kéntosses et des cracmints;
L' houyeu s' eva, granznant s' tchimin;
Tot åtoû d' lu, m' Moirt est a s' posse,
Adrovant ses grawes di putin
Po l' rabressî d' on betch di rosse
A cåze k' i vént la wangnî s' pwin...
Come on tchén d' tere, å fond del fosse.-
Max-André Frère, divins "Tchipotreyes", riprins dins "Tournez, moletes !", El Bourdon, 499-489, 1996.
