Croejhete: Li plaece di l' addjectif e walon.

Ene piceye di grammaire: li plaece di l' addjectif e walon

Savoz bén k' èn addjectif epitete (li ci k' est acoplé avou on no), ça a sovint ene plaece bén da lu, k' on nel pout aler stitchî ewou çk' on vout?

Insi, vos dirîz e francès un petit garçon et nén un garçon petit.

Et c' est l' minme dins tos les lingaedjes... do côp, e walon eto!

Insi, e walon, vos n' dirîz nén on valet ptit mins on ptit valet.

Djusk' a la, c' est åjhey, dwai? Waitîz a vos, asteure, ça dvént pus interessant.

E francès, vos dirîz une maison blanche, mins e walon, on n' direut måy ene måjhon blanke, on direut ene blanke måjhon...

Vos veyoz l' diferince, don? E francès, l' addjectif si boute pa drî li no, mins e walon, i s' vént mete pa dvant.

Ça n' est nén todi insi, mins c' est l' veur/vraiy surtout avou:

Les addjectif di coleurs: ene rodje vweteure, do bleu papî, des noerès botes...
Les addjectifs ki dvizèt del cogne d' ene sacwè: ene ronde finiesse, des cwårêyès finiesses, ene lådje rowe...
Les addjectifs ki cåzèt del cwålité d' ene sacwè: del benite aiwe, del froede bire, do tchôd cafè, do bolant cafè, on stroet djårdén...

Dji n' a nén dit ki l' addjectif walon si meteut tofer pa dvant li no. I gn a des disrîlêyes (acsepcions). Par egzimpe:

On boet do vén francès, nén do francès vén. Mins vos poloz bén dire walon scrijheu ou scrijheu walon et Roman payis.

Vos poloz aveur on rodje drapea et on djaene drapea. Mins s' il a les deus coleurs, les addjectifs sont retchessîs pa drî leu no: on drapea djaene et rodje.

Po s' afaiti

Si vos avoz bén compris l' droet do djeu, il est tins do fé èn egzercice po s' afaiti...

Fijhoz insi: Li måjhon est blanke --> C' est ene blanke måjhon.

Li biyoke est vete -->
Li rowe est cwårêye -->
Li vatche est påjhire -->
Li gamén est pouri -->
Li tins est fayé -->
Li cahute est viye -->
Li lodjisse est mannet -->
Li voye est bele, longue et droete -->
L' åbe est grand -->
L' usteye est nouve -->
L' osti est noû -->
Li finiesse est hôte et lådje -->
L' ouxh est stroet -->
Li bawete est ronde -->
Li toet est novea et rodje -->
L' oraye est grande -->
Li taetche est ptite et noere -->
Li djournêye est longue -->
Li dint est grand -->
Li ponte est longowe -->