|
|
Tecse: «Les djonnes maryîs e paradis» da Gusse Laloux. |
|||
|
|
Tecse: «Les djonnes maryîs e paradis» da Gusse Laloux. |
|||
Leyî a dischindêye on tchår tcherdjî? On sere comifåt l' mecanike; on met on gros cougnet ås rowes. Ô! Ayi, ça! Mågré ça, i gn a des côps... C' est come 'l astchait...
Ces deus la, i sôrtént djustumint del måjhon comunåle do s' awè maryî. Ont i seulmint oyou l' tchår roumdiner so les cayôs del rouwale, adon k' tos ls ôtes petént å diale? Sibrôtcheye å meur, ene comere, avou ene des grandès rowes; li tchår bådele après ça so ene tiesse di pire et l' tamon, an risbictant a peté l' ome el pwetrene et l' a maké. Co deus al grosse poite do paradis.
Come, li djoû k' on s' mareye, on s' a rischuré tot noû a cfesse et al comunion... on n' a pus nén ene acsure a dvu rakeuze, ni co a rassercî, Sint Pire les a fwait moussî tot droet sins ene ridite. Pus k' a s' pormoenner pal bresse dins les beas djårdéns...
...«Savoz bén cwè, m' fi? dit-st ele li comere. Nos n' plans nén co dmorer insi eshonne. Nos n' estans nén co maryîs a l' eglijhe.
- Ayi, c' est l' vraiy, k' alans n' fé?
- Vinoz, n' irans conter noste afwaire å vî sint k' est vaila a l' ouxh, wai!»
... «E bén mes efants, dit-st i Sint Pire, vos fjhoz bén do mel dire. Dji n' î åreu nén sondjî, mi!... Ratindoz on pô... Rivnoz dmwin après nonne.»
Mins l' londmwin al vesprêye, a l' ouxh do paradis, on s' boureut; ene chîlêye di tos les diales: «Schoûtez mes ptits vayants, tårdjîz ene miete, co sacwants djoûs... I n' fåt nén pinser ki dj' vos roveye, savoz. Mins i vs fårè rivni... Metans!... Djudi del samwinne ki vént.» Et les deus djonnes maryîs end ont ralé ene miete peneus. Co pus d' dijh djoûs a transi!
Cwénze djoûs après. Bè! On freut l' mariaedje li mårdi del Porcioncule... Et on repeteut dedja po les prumirès veupes då Cwénze d' Awousse! Tofer on ratna. Todi on mehin!
...«Po bén fé, po vos maryî,... Et l' vî sint si schôpeye on pô e si hanete... A moens k' do fé come po fé, la! Mins po shure li djeu, i fåt on curé, et... sk' a ci, nou moyén do-z è leyî moussî onk vaici.»
