|
|
Li lete «e». |
E
Li lete «e»:
- Ni s' prononce nén å coron d' on mot (come e francès);
- Si prononce «è» dins les mots ou al betchete d' on mot.
Douvént çk' on scrît insi?
Dins li scrijhaedje fonetike da Feller on scrît è a tchaeke côp
k' on prononce «è», minme s' i gn a nén moyén di s' brouyî:
lès pièrdants dèl fièsse vont a mèsse (les pierdants del fiesse vont
a messe). Les apurdisses rovièt foirt sovint di scrire ces accints la
pask' i «sintèt» k' i n' siervèt a rén. Do côp, li scrijhaedje do
walon dvént foirt pezant (ås ouys) et tot l' monde fwait bråmint des
fåtes.
E rfondou walon, li rîle a shure est: tos les «e» (sins accints) dins on mot
sont prononcîs «è».
Por vos î rtrover
Gn a djusse deus afwaires a radjouter:
- Dins des mots k' i gn a, li «e» sins accint pout eto ni nén
s' prononcî dins sacwants pårlers: boledjî (prononcî bolèdjî
ou boldjî), ledjir (prononcî lèdjîr ou ldjîr),
pezant (prononcî pèzant ou pzant), i sereut
(prononcî i sèreut ou i sreut) et co sacwants ôtes.
- Dins des mots k' i gn a, li «e» sins accint si pout eto prononcî «é».
C' est sovint des mots rpris do francès: velo (vèlo ou
vélo), fonetike (fonètike ou fonétike),
telefone (tèlèfone ou télèfone), vert (vért
ou vêrt)...
Do côp, on n' sicrît «è» (avou èn accint) ki dins ces cas ci:
- å coron des mots ou cwand l' mot finit avou -ès: cafè,
après, s(i)pès, des grossès måjhons...
- dins l' cawete del 3e djin pluriale di l' indicatif prezint:
i vikèt, i tchantèt...
- dins «è» (adviebe): dj' è vou. Purdoz è. Mins nén dins «e»
dvancete: e m' mwin, e bwès...
- po l' årtike omrin pa dvant voyale «èn»: èn ome, èn åbe
(li femrin
årtike c' «ene»: ene feye, ene båshele,
et l' omrin årtike pa dvant cossoune
c' est «on»: on batea, on tchvå)
- po les foûmes tchålerwetresses des mots: ni, mi, ti, si:
èn, èm, èt, ès.
Des mots corants
- Å coron d' on mot: rôze, blanke, djambe, messe, tchante...
- Les mots ki si scrijhèt et s' prononcî come e francès: les, mes,
tes, ses, des, elle...
- Les ôtes mots: pierdant, berbis, fiesse, tiesse, messe, esse,
boket...; del, efant, scheter, mete, dringuele, meyeu...
- Les mots k' i fåt fé atincion: et et eyet (si prononcèt
èt et èyèt); e dvancete (prepôzicion) si prononce
è: i l' a e s' mwin, i va e bwès... (= dins li).
Lijhoz avou vost accint:
- I les a dné a mes efants po leu dringuele.
- C' esteut ene sakî k' esteut ene miete arindjî.
- Metoz des etiketes so l' ebalaedje.
- Il est ddja eteré, li vî Ness?
- Dj' a rescontré l' priyesse a messe et nén al fiesse.
- Nos serans co rade tcheyous dins les yebes.
- C' est pezant a solever.
- Vos estoz bele, dins vosse novele cote.
- Dj' eva avou m' vweteure et nén avou m' velo.
- I s' raletche li betchete di ses doets.
- C' est piron parey.
- Il a peté s' tiesse conte l' årmwere.
- Ene rossete båshele k' a ses mwins blankes come del farene.
- Djôzef, vos estoz biesse si vos n' voloz nén aler e scole.
- Ele tchantéve dedja cwand elle aveut set ans.