|
|
Jacques Lefebvre |
|
|
|
Jacques Lefebvre |
|
dierin rapontiaedje - last update: 2015-10-24
Dressêye:
Tchansons tchantêyes so des paroles di des cåzaedjisses
Arimeas et cåzaedje di tchansons k' il a scrît lu-minme
Biyografeye
Dji so coûtchî al tere
Dj' a do sonk tocosté.
Ttaleure, i srè trop tård;
Curé, dji va mori.
Cwand dj' a ndalé sôdård,
Pocwè k' ti n' m' as rén dit
Ttaleure, i srè trop tård;
Curé, dji va mori.
Dji n' rivierè pus m' mame;
Ele va rçure on laid côp
Avou l' noer telegrame
Il est mort en héros
Dji srè moirt pol patreye !
Biestreye !
Voci al coine do bwès,
C' est voci k' dj' a toumé
Cwand dj' a veyou m' valet
Sôdård di l' ôte costé.
Nos esténs tot pierdous
Dj' avéns sogne tos les deus.
Ttaleure dji serè moirt
Curé, dji va mori.
Dji vôreu k' on m' rabresse,
K' èm feme soeye addé mi
Po m' prinde divins ses bresses
Dj' a peu, dji va mori
Dj' va mori pol patreye,
Biestreye !
Cwand c' est k' ti frès t' pretchaedje
Dji vôreu bén, curé,
Dji vôreu bén k' ti djhaxhes
K' on n' a nén l' droet d' touwer
Si ti piedes djusse di tere (?),
C' est ene benediccion
Po les emantcheus d' guere
Telzî does bén, laron !
Dji vôreu k' on m' rabresse
Dj' a do sonk tocosté
Dji n' aveu k' ene djonnesse
Mi veye, on m' l' a hapé.
Dj' a morou pol patreye !
Biestreye !
Jacques Lefèvre so ene muzike da André Capitinne, divins Bruno Picard, face au public, Libråmont, 1985.
I.
I gn a dedja kékès anêyes,
Cwand dj' esteu djonne tchanteu walon,
Dj' aveu des novelès idêyes
Sol manire d' adiercî ene tchanson.
Mins les ancyins del Walonreye
Håynît leus pîs a tot côp bon
Tot gruzinant traze et traze feyes
"Vinoz Mareye" et cråmignons.
Et cwand dji magnive del makêye
Tot rawårdant l' renovåcion,
Dji croe k' dj' a dit céncwante feyes :
Vocial co les vîs betchs avou leus vîs råtchåds
II.
On-z a ricnoxhou mes paskeyes
Di Djudla-Mouze disk' a Fléron
Dj' a minme sitî mon Dick Henscher
Fé ene plake en otoproduccion.
Asteure les djins s' rincèt l' oraye
Avou mes novelès tchansons
Mins dj' a sondjî, li nute passêye
Tot m' voeyant al televuzion
K' on djonne gamén d' traze ans et dmeye
Dijheut tot tchôcant sol boton :
Fåt-st assoti, vocial co ene feye
Nosse camaeråde Lefeve avou ses vîs råtchåds.
III.
Ça m' a dné del miråcoleye
Sol conflit des djeneråcions
Totafwait candje å pus abeye
El societé d' consomåcion
Mins dj' a tuzé k' e l' an deus meye
Les rokeus årént leu pinsion
Et s' il arive k' on prezinte co
On vî clip el televuzion
On djonne gamén d' traze ans et dmeye
Dirè tot voeyant l' emission :
Fåt-st assoti, vocial co ene feye
Li vî Michael Jackson avou ses vîs råtchåds.
Philippe Corthouts, redjårbé e walon et tchanté pa Jacques Lefebre, foû di Chansons pays, compilation (1982-1987), prodût på CRIWE.
I.
Dji n' t' a nén rovyî, camaeråde;
Nodidju, t' es-st evoye pus lon
Ki cwand nos fjhéns des porminådes
A Beafayi ou Tchivrimont
Po sognî nosse miråcolêye
T' as hapé l' peket do curé;
Ns avans vudî tote li botaye;
Cwand dj' î tuze, dji reye a tchoûler.
Di ç' tins la, nos avéns saze ans,
Et dvant les båsheles do cwårtî,
Nos passéns come deus tcharlatans;
Ça fwait do bén d' esse ene sakî.
I fåt bén dire ki cial dizo
N' aveut waire d' atotes e t' cwårdjeu
Mins si t' n' as nén toutchî l' gros lot,
Dji n' ti roveye nén, vî copleu.
II.
Dji n' a nén rovyî, camaeråde,
K' e walon, nos inméns djåzer;
Di ç' tins la, ci n' esteut nén l' môde;
Ça fjheut on pô målaclevé.
Et tot bas, tot xhuflant on dmey (???),
Asteure, on n' pout pus ndè pårler,
Po nos spårgnî des maladeyes,
Dj' a minme sitou bagué
Dji nd a ndalé foû del fabrike
Wice ki nos avans passé nosse tins,
Manire do hagnî so nosse tchike;
Et nosse crosse, on nel hapéve nén.
Dji n' so nén co presse do rovyî
Minme si asteure, dji fwai l' tchanteu,
Dji l' a wårdé, mi cour d' ovrî,
Dji n' so nén candjî, vî copleu.
III.
C' est bén pô d' tchoi, ene vicåreye,
Cwand po nd aler, dji l' a veyou;
C' est bén po ça k' asteure dji reye;
Minme si on conte ki dji m' è fote.
Minme si dji fwai l' tchanteu comike;
Çoula n' m' espaitche nén do ramter;
Tot metant des stoeles el muzike,
Po dire kékès verités.
Dji n' raetche nén sovint sol peket;
Dji so kécfeye on pô spitant;
Mins, voess, dji n' sai nén si dj' irè
On bea djoû ås troes-feyes-vint-ans.
Ça fwait do bén do rire on côp;
Dji n' a pus l' gosse d' esse målureus;
Tchoûler, ça n' m' ahåye nén beacôp.
Mins, dji n' t' a nén rovyî, copleu.
IV.
Dji n' a nén rovyî, camaeråde,
Nodidju, t' es-st evoye pus lon
Ki cwand nos fjhéns des porminådes
A Beafayi et Tchivrimont
Po sognî nosse mirancolêye
T' as hapé l' peket do curé
Ns avans vudî tote li botaye
Cwand dj' î tuze, dji reye a plorer.
Djôzef vos pôreut dire li grand meur del fabrike
Et l' odeur di foumire ki dmeure divins les brikes
C' est ene voye k' i cnoxheu dispoy k' esteut gamén,
Céncwante ans en erote l' alnute et l' åmatén.
Il a ene pitite pinsion et i dmeure avou l' feme
Divins èn apårtumint so ene måjhone del comene,
I tuze, Djôzef, i tuze.
Et kécfeye, i s' rapinse di ç' tins la, del djonnesse,
Avou les camaerådes, il aveut rlevé l' tiesse
Divant les grands monsieus et les magneus d' souweur,
Adon gn a-st ene blamêye tot e fond di s' loukeure,
Li feme mzuréve li pan, do vî pan tot souwé,
On aveut di ç' tins la, do coraedje, del volté,
I tuze, Djôzef, i tuze.
Et kécfeye, i s' dimande si ça valéve les poennes
D' aveur fwait tot çoula do tins k' il esteut djonne.
Les cis k' sont-st å povwer sont todi martchoteus
Et toplin des ovrîs vôrént divni bordjeus.
Li djustice et l' amour seront todi coûte djoye
Cwand ene revolucion ni dispasse nén l' manoye,
I tuze, Djôzef, i tuze.
Djôzef vos pôreut dire li grand meur del fabrike
Et l' odeur di foumire ki dmeure divins les brikes.
Jacques Lefèvre, divins: Scrire, UCW, 1993.
