dierin rapontiaedje - last update: 2007-02-17.

Dressêye:

Tchansons

• Ene pitite tchanson e walon

Cårire

• Jesebel dins les medias

Biyografeye

• Si pådje so l' eciclopedeye "Wikipedia"

Pitchote a midjote, li wangneuse del bate del tchanson e walon passe so nos medias nåcionås.

Jesebel ezès medias

Al tévé, po cmincî, so ene emission " Wallon nous " prodûte pa Ludovic Bastin, ey adjinçnêye å pair do pôce pa Vincent Deleclos. Del bele resclame, mins n' a nén do tins assez. Gn a trop di djins k' i lzî fåt dmander cwè et come, po rmete tot çoula so ene eure di waitaedje.

Vos, vos avoz djusse 3 munutes po dvizer. Et responde a des kesses come : " Pocwè av' vinou al bate ciste anêye, poy ki vos avîz ddja wangnî e 2002 ? "

Ci n' est nén come al radio, avou l' Jani Paquay. La ene clapante emission, wice k' on-z a polou berdeler, inte femes. Metans del tchuze des tchansons do Grand Pris, des cåzaedjisses [paroliers] et des compôzeus d' muzike.

Di l' anêye, dj' a les pinses di vudî ene sitroete plake. Tot payant di m' taxhe, ca n' a waire di måjhones di plakes ki boutnut voltî avou des tchanteus e walon. Gn a bén Sowarex, mins c' est ddja prins.

Brigitte Hallet (c' est l' vraiy no da Jesebel), li 27 di djanvî 2007, eplaidî divins "Li Rantoele" l° 41, bontins 2007.

Ene pitite tchanson e walon

I.

Dj' a vnou å monde dins on coron,

Èm papa djouwéve di l' acordeyon,

Èm mame tchantéve tofer dins s' coujhene...

Ene vraiye radio libe po les vijhenes...

Des liårds, on nd aveut ptete nén bråmint,

Mins tos les djoûs, nos esténs contins

Eyet nos tchanténs tertos eshonne,

Des cråmignons et des årgudinnes...

erfrin

Dji so droci po vos tchanter

Ene pitite tchanson e walon...

Ene sacwè ki vos frè danser

Come å vî tins di nos tayons...

Ene tchanson po vos rapåpyî,

Po k' vos traeyéns fouxhexhe rovyîs

Ene petite tchanson e walon...

Come å vî tins di nos tayons...

II.

A l' campagne, les djins estént so l' ouxh,

Tot ratindant k' el bea solea s' muche,

Come ene rodje bale padrî no teri,

I dvizént eyet blaguént voltî,

A no måjhone, c' esteut todi fiesse...

Al shijhe, å son di l' acordeyon...

Asteure, dji pinse bén k' les djins sont biesses,

Elaxhîs après l' televuzion...

III.

Remoure ses souvnances, ça n' sieve a rén,

El vicåreye, oyi, dj' el sai bén,

N' est nén totes rôzes et viyoletes,

Sav', dji vos di tot setch et nete:

"Soçons, i våt co mia rire ki braire,

Pask' el xhinêye est bråmint pus bele...

Adon, ådjourdu ostant k' ayer...

Avou l' muzike nos serans todi fels..."

André Gauditiaubois - Muzike: Marc Keiser 1989-2006