dierin rapontiaedje - last update: 2012-03-20.

 Dressêye:

• C' est l' cafè
• Mwaisse modêye
• Redjårbaedje pås Walons del Wisconsene
• Dipus d' racsegnes sol tchanson e l' eciclopedeye Wikipedia

On cafè

I

Atrapez bén vite li trimouye
Et s' moloz, Bete a toû di bresse;
I fåt ki, dsu tot, dji tegne l' ouy,
Mins, fijhoz rôler l' tourniket
C' est ene fiesse di manaedje,
I nos l' fåt fé peter,
Dimwin on rprind l' ovraedje
Ådjourdu fåt tchanter.

Respleu

C' est l' cafè, cafè, cafè,
Ki fwait cacter les comeres.
Abeye li cocmwår å feu,
Po fé do bon cafè.

II

Nos n' invitrans nén l' grande cuzene
Come on djindår fåt esse posté
C' est todi letchî dins l' coujhene
Ele fôre ses mwins pa tot costé.
Ele vos pougne didins l' souke
C' est vraiymint ene pitié.
Ou bén vla k' ele s' ecrouke
K' ele wåde si amisté.

å respleu

III

C' est come ossu li grosse Titine
Avou s' sandronete di triviè.
C' est todi mete e s' capotene
Elle a l' gozî todi douviet.
Ou bén, c' est s' nez ki gote,
Et dåbore si minton.
Ès-n alinne ki sint l' gote…

å respleu

IV

Dijhoz m' a kî Djhan Cloke rishonne
Gn a-t i pus laid didins l' payis.
Si feume et lu vont bén eshonne;
On pout dire k' i sont assôrtis.
Deus vraiys vizaedjes di dresse
Des tchveas come li nierson
Nosse bok, cwand k' si pwel dresse
N' a nén si laide façon.

å respleu

V

Avoz veyou les feyes da Téjhe,
Avou des fleurs so leu bounet ?
Elle ont basse vowe po vos rconoxhe,
Cwand ele ont bouté leu coirset,
A kî volnut ele plaire
Avou leus beas rubans ?
Pont d' pwin didins l' årmwere
Et ça vout des galants !

å respleu

VI

Ele frént mia d' aprinde ene påter.
Après ça, roter travayî.
Fé des hotchets ou vinde del tere,
Nos n' avans pont di sot mestî.
Leu mere rexhe d' ene pôve cote
Manaedje todi croté;
Leu pere, d' ene pôve coulote,
Trawêye pa tot costé.

å respleu

VII

On dit k' ele cournut dissu l' fôre,
Po-z atraper des beas fourôs.
Ça n' nos rgårdêye nén, c' est leu-z afwaire,
I n' fåt nén casser les cwåreas.
On côp d' ouy a catchete,
Ça s' esplike assez bén.
Bete, atacans l' gozete,
I fåt k' on s' boute e trin.

å respleu

VIII

Ci n' est rén d' ene pitite ribote
Cwand on n' dit pont d' må di s' protchin.
Totaleure nos boerans l' fene gote
Disso l' cafè, ça frè do bén.
Nos savans ki Tetene
A des cwårs dins s' ridant;
C' est ene si bråve vijhene,
Ele vos trompe e priyant.

å respleu

IX

Nos n' avans pus rén dissu l' tåve,
Levans nos tertotes; alans e.
Nos n' avans pus rén didins l' cåve,
Nos plans roter, les plats sont nets.
Pa l' bresse, purdoz Mimiye,
Alons, Mamjhele Mitchî;
Bonsver la copagneye,
Alez radmint coûtchî.

å respleu

Charles Wérotte, divins : Antolodjeye de powetes walons namurwès, Lucien & Paul Maréchal, 1930.

C' est l' cafè

Respleu

C' est l' cafè, cafè, cafè,
Ki fwait cacter les comeres.
Abeye li cocmwår å feu,
Po fé ene boune djate di cafè.
Tchantez, djonnesse,
Tchantez les beas, tchantez les beles;
Vinoz danser
Al grande fiesse di Brussele

I

Po l' grande fiesse dj' a l' esperance
Ki l' tins serè bea sins mizeres
Dji vs egadje po l' prumire danse
C' est l' mia ki tot cwè ki dj' pou dire.

II

Nos båsheles åront des rubans
Des fleurs pattavå leus tiesses
Des beas fourôs a falbalas
Po l' dimegne et po l' djoû del grande fiesse.

III

Purdoz vos camaerådes avou
Tchessîz bén lon les mizeres
On boerè tot do long do djoû;
Rotez et s' boutez e l' caftire.

III

Non, c' est vos ki dj' inme si bén
Dji m' espwere ki dji n' vou rén piede
Vinoz m' caressî on ptit moumint
Et m' rassurer ene pitite miete.

tchanté pa Albert Vandertie, foû di : Antolodjeye do foclore walon, vol 7 (les Walons d' Amerike)