|
|
Page de textes wallons inspirés de chansons de Jacque Brel Redjårbaedjes e walon sol tipetape di des tchansons da Djåke Brel |
|
|
Page de textes wallons inspirés de chansons de Jacque Brel Redjårbaedjes e walon sol tipetape di des tchansons da Djåke Brel |
dierin rapontiaedje - last update: 2015-05-14
Dressêye:
Ces djins la
I
Po cmincî, gn a l' pus vî
Ene mawe, on laid mouzon
Avou s' nez tot d' triviè
N' såreut pus dire si no, mi fi
Télmint k' i ndè dischind
Ou k' end a dischindou
K' a des pwels dins les mwins
Il est houte, I n' è pout pus
Ene vraiye banse, on berlu
Le rwè n' est nén s' cuzén
Ki s' disfonce tot el niût
Avou ene fotowe lapete
Et k' on rtrove a l' copete
De si ståve ki ronfele
Ossu blanc k' ene afitche
Ki brodele ki rnifele
Crawieus come on stocfeshe
Vos fåt dire, mi fi,
K' amon ces djins la,
On n' pinse nén, mi fi
On n' pinse nén,: on shofele !
II
Et pu gn a l' grand schådré
L' pwel e botons d' sôdårds
Avou des ouys d' araegne
Metchant come on tchén k' hagne
Ki n' dinreut nén ddja l' aiwe
K' il a fwait cure ses oûs
S' a rmis avou Cacawe
Schapêye del rowe Tchåfor
Ki vikotéve d' amour
Et k' c' est n' sereut nén fini
Vindèt des paneas sketés
Des foufes k' nolu n' vout pus
Ses cotes a ras do cou
A djoke so l' rododo
Minme k' on direut bén d' cwè
Djouwrént les matuvus
C' est riské cwand ça trawe
D' peter pus hôt ki s' cou !
Vos fåt dire, mi fi
K' amon ces djins la
On n' vike nén, mi fi
On n' vike nén… on grawe.
III
Après i gn a l' tribu :
Li mere k' est soude d' oraye
Pierdowe dins ses braireyes
A longueur di djournêye
Astok d' ene doye d' obus.
Gn a l' foto do pus vî
Astampé so l' bufet
Il a morou d' astroucåde
Et ki rwaite si marmaye
Magnî leu froede gråyes
Et ça blefe et ça glete
Et ça blefe et ça glete
Et pu gn a l' viye Margot
Ki n' finit nén d' passer
Minme k' i nd ont rén a keure
Veu k' c' est leye k' a l' magot
Et k' i nd ont rén a keure
Do balzin d' ses pôvès mwins.
Fåt vos dire, mi fi
K' amon ces djins la
On n' tchafeye nén, mi fi
On n' tchafeye nén, on minte
IV
Et pu et pu
Et pu i gn a Huguete
Vicante come li solea
Ki m' voet ostant voltî
Ki dj' voe voltî Huguete
Minme k' on s' dit tenawete
K' on årè en cassene
Et des monceas d' finiesses
Avou plin d' cådes ås meurs
On i serè bén å rcoe
On årè sacwants biesses
Et ki si ç' n' est nén seur
C' est k' on est des vraiyès bwejhes
Paski les ôtes sont la
Paski les ôtes sont la.
Les ôtes i djhèt come ça
Ki djonne pea conte viye pea
Ç' n' est nén foirt medicål
Pu ki dj' sitronnreu les tchets
Dj' n' a måy sicroté d' tchets
Ou bén c' est do rtchåfé
Ou bén dj' a rovyî
Ou bén il avént l' rogne
Infin, i n' volèt nén.
Des côps, dji croejhe si voye,
Bouneur et astcheyance,
Ele brait et ele somadje
Berdele k' ele s' end irè
Berdele k' ele mi shurè
Adon, po on momint
Tot djusse po on momint
Adon dji piede li tiesse, mi fi
Po on moumint
Djusse po on ptit moumint
Pask' amon ces djins la
Mi fi, on n' distele nén
On n' distele nén, mi fi
On n' distele nén…
Mes il est ddja wôrs eures, mes djins
Et nolu ki m' ratind.
redjårbé pa Philippe Antoine; arindjmints: Roberto Gobessi, tchanté pa Vincent Delire.
Les vîs
Les vîs, i n' cåzèt pus, ni sereut ç' ki pa côps on pô do dbout des ouys.
Ritches u pôves, c' est des pôves, i n' ont k' on cour po deus, on cour ki poite li doû.
A leu måjhon, ça sint memoscåde, prôpristé et l' cåzaedje did dinltins.
K' on vicaxhe a Nameur, on vike tertos o viyaedje cwand k' on vike trop lontins.
Årént i témint ri ki leu vwès si crevåde cwand k' i cåzèt d' ayir ?
Årént i témint brai ki les låmes rilujhèt åd triviè d' leus påpires ?
Et s' i tronnèt on rén, c' est k' 'le aviyixh come zels, li viye ôrlodje d' årdjint
Ki djemixh sol tchiminêye, ki dit åy, ki dit non, ki dit : " Djo ! Dji vs ratind !
Les vîs, i n' revèt pus, leus lives dôvièt sol tåve, leu viole est e bokets.
Leu ptit tchet vént d' mori, li ptite gote do dimegne èn les fwait pus tchanter.
Les vîs, i n' bodjèt pus, leus djambes sont bén trop roedes, leu monde est bén trop ptit :
Ndaler do lét al vite, pu do lét å fotoû, et pu do lét å lét.
Et cwand k' i sortèt co, onk et l' ôte astokés dsu ene djin ki les aide,
C' est po shuve o solea l' etermint d' on pus vî, l' etermint d' ene pus laide,
Li tins di s' mete a braire et d' rovyî po ene eure li viye ôrlodje d' årdjint
Ki djemixh sol tchiminêye, ki dit åy, ki dit non, ki dit : " Djo ! Dji vs ratind !
Les vîs, i n' morèt nén : on djoû, i s' edoirmèt, c' est come ça k' i morèt,
Etot s' tinant pal mwin, pask' il ont peu di s' piede, mins portant, i s' pierdèt.
Et l' ôte k' a dmoré la, c' est l' bon u c' est l' måva, li djinti u l' contraire.
Po l' ci des deus ki dmeure, i gn a rén avou ça : i s' ritrouve en infier.
Lu, vos l' voeroz motoit, leye ossu, pa des côps, on djoû k' i ploût, tchagrin,
Balziner l' tins evoye, tot s' escuzant d' esse la, d' esse co la si lonmint.
Et s' såver, dvant vozôtes, po l' tot dierin des côps, bén lon d' l' ôrlodje d' årdjint
Ki djemixh sol tchiminêye, ki dit åy, ki dit non, ki dit : " Djo ! Dji vs ratind !
...
Ki djemixh sol tchiminêye, ki dit åy, ki dit non, et pu ki nos ratind.
redjårbé pa R. Mouzon, divins: L' Avenir du Luxembourg, 12-12-1995.
Mi, dji n' sai nén
Mi, dji n' sai nén
Pocwè k' i fåt k' i nive so Lidje,
Pocwè gn a tant d' noûlêyes,
Pocwè k' i fåt k' on reye.
Mi, dji n' sai nén
Pocwè l' pavêye, å long des voyes
Est come di l' aiwe ki court todi
Tot do long des meurs, coleur di croye,
Ki n' sepèt nén, nén pus ki mi...
Mi, dji n' sai nén
Pocwè k' les åbes sont moirts tot å
Long des boulvårds,
Et mi, tot seu, po plorer la
Come si tot n' esteut nén trop tård...
Mi, dji n' sai nén
Pocwè gn a Mouze, ki s' endè va
Lon erî d' mi,
Mi ki n' sait rén, ki dmaner la,
Come s' ele pôreut djourmåy rivni...
Mi, dji n' sai nén
Pocwè l' froed vint mi vént cpicî,
Et broûle mes lepes,
Pocwè l' froed vint m' vént kihagnî,
Kihatche mi coir, edjale mes mwins...
Mi, dji n' sai nén
Pocwè k' ces mwins la s' ont djondou
Totåtoû d' mi
Come po mî dire k' a pårti d' ouy
Vos n' serez måy pus addé mi !
Mi, dji n' sai rén, rén did tot ça,
Çou k' dji sai, c' est k' dji vs inme todi.
redjårbé pa Paul Rouelle, divins: Coutcouloudjoû, l° 26, setimbe 1997.
Eté 2001: la Princesse Mathilde est enceinte
Matile
I.
On-z a tant brai après l' Noyé
K' a Brussele il est arivé:
Matile ratind famile !
Filipe k' est portant pacifike,
Lyi a dné on bon côp d' fizik,
Matile ratind famile !
D' ene bele manire, elle a stî soukêye
I gn a s' botroûle k' est tote inflêye,
Matile ratind famile !
Pus nou må d' tiesse, pus nou tracas
Nos dansrans tertos l' mazourka.
Pitite Matile, k' avoz vs fwait la !
II.
Dvins les pårtis democratikes,
On n' djåzrè pus del republike,
Matile ratind famile !
Li rinne, li rwè n' sont nén pice-crosse,
I nos dinront do souke al loce,
Matile ratind famile !
Nos magnrans do rosti-boli
Nos dvénrans tertos des markis
Matile ratind famile !
Tos les chomeus, tos les parias
Vont poleur fé leus antruchas
Merci Matile, po tot çoula !
III.
Tos les cis ki fjhèt des pronostiks
So l' boune santé di nosse Beldjike,
Matile ratind famile !
Pôront asteure fé leu saeyin
So li spexheur di vosse vantrin,
Matile ratind famile !
Serè ç' ene båshele, on gamén ?
Kimint s' pasrè vost acoûtchmint ?
Matile ratind famile !
Serè-t i prince di Guinguelom ?
Arè-t ele droet a s' Té-deyom ?
Pitite Matile et les medias !
4
A Lidje on-z a ddja deus princesses;
E nosse cour, elle ont l' meyeuse plaece
Julie et Melissa.
E tot cas, si c' est on valet
Pocwè nel lomrîz vs nén Tchantchès ?
Matile et les Lidjwès !
Et basti po voste eritî
On palå el plaece di Bavire,
Matile ratind famile !
L' efant sereut sins falbala
Li Ptit cint-meyes di nosse Djus-d'-la
Pitite Matile, on n' vos dit k' ça !
redjårbé po l' etrevéns do ratindaedje del princesse Matile pa F. Nyns, divins: "Intrez don", l° 3 (erire-såjhon 2001).
Les bierdjîs
I.
Vo les la rarivés avou leus grands tchapeas.
Leus camizoles di linne, wai, shuvèt les tropeas,
Les bierdjîs.
Dolmint k' l' ivier est houte, abeye ås pasteraedjes;
Et cwand l' yebe est rossete, i rdischindèt o viyaedje.
Les bierdjîs.
Sol tins k' leus biesses boevèt, i s' ascropèt e rond
Ey onk apougne ene zûne so on xhuflet d' sizon
Les bierdjîs.
II.
Les pus vîs savèt tant so totes sôres di cayets
Ki tote nute i contèt, et les djonnes djins schoûtèt
Les bierdjîs.
T' as l' Zande avou ses diales et ses Pépés Crotchets,
Et ses noers leus-waerous, ki vs croeyoz k' i vs hapèt.
Les bierdjîs.
Li Gusse, lu, c' est des fåves a s' kipixhî tot l' coir,
A disratchitchî l' front d' on mårlî so s' lét d' moirt;
Les bierdjîs.
III.
Et pu gn a des beas djonnes k' ont leus ouys si spitants
Ki les cméres do viyaedje è rovièt leus galants;
Les bierdjîs.
Leus ouys les dismoussèt, ces ouys k' ele vôrént bén
Aveur divant leus ouys disk' a dmwin o matén.
Les bierdjîs.
Et vey did près leu boke eterêye dins leu båbe
Såf cwand gn è stritche on rire ki rdjibele so les åbes.
Les bierdjîs.
IV.
C' est k' i nos dizôrnèt; i n' sont nén come nozôtes
On tuze a leu vicaedje, on croet esse di leu monde
Les bierdjîs.
Magne les minmès fadêyes, raweye li minme froumaedje,
Et s' broye ene djaeye u deus po les mete o pårtaedje.
Des bierdjîs.
Ashî tu dvant l' breujhisse po cure sacwants crompires
Mins ç' n' est nén avou ça ki to drovrès l' bårire
Des bierdjîs.
V.
La les aireurs do djoû; deus troes berbis boerlèt
Gn a l' berå ki pestele; les bedots djibotèt
Les bierdjîs.
Adon, il ont ralé avou leus grands tchapeas
Leus camizoles di linne rishuvèt les tropeas
Les bierdjîs.
Viè des cråssès pasteures so les tienes, ezès vås,
Avou des ôtes vijhéns k' elzès schoûtront låvå,
Les bierdjîs, les bierdjîs, les bierdjîs…
redjårbé pa L. Mahin, rimetou après côp avou èn ôte arindjmint, so ene muzike da B. Picard eyet J.Cl. Benedetti, divins "Les Cahiers Wallons" l° 10-1993; rassonré pol modêye e rfondou li 26 di fevrî 2002.
