Nos esténs e vacances dins les montinnes. On s' aveut djoké po mareder, so on ptit parkigne.

Dj' a yeu tot fwait d' magnî dvant ls ôtes. Come dj' aveu m' biciclete avou mi, dji l' a rexhou foû do cofe et aler dsu. Dj' a dischindou pa ene pî-sinte. Cwand dj' a volou frinner, les frins n' alént nén. A on tournant, dji n' a seu tourner l' guidon, et dj' a toumé dvins on revier. Li velo s' a spotchî dins les fonds, mins mi, dji m' aveu-st enûlé, et dji voléve come èn oujhea, come t' as l' ome-araegne al tévé.

Tot d' on côp, gn a yeu totès sôres di biesses ki s' ont ratroplé, pu griper ene dissu l' ôte et m' vini rascode.

I m' avént apresté on grand lét por mi coutchî. Adon, dj' a tcheyou edoirmowe.

Cwand dji m' a dispierté, gn aveut toplin des biesses åtoû d' mi. I m' fijhént des sierviteures. Dji n' saveu nén pocwè. Cwand dji m' a levé, come li lét esteut foirt hôt, i s' ont adjnoyî, et m' fé come des montêyes avou leu dos. Cwand dj' a avnou al valêye do lét, dj' a veyou on buro, avou des meurs di totes les coleurs di l' airdiè.

Dj' a dmoré sol buro; dji m' a ashî sol tcheyire. Adon, gn a les biesses ki s' ont ratroplé åtoû d' mi. Elle avént eto des colés avou des pieles di totes les coleurs di l' airdiè. Cwand dji m' a yeu ashî, les pieles des tchinnes s' ont metou a rglati come des stoeles. A ç' moumint la, gn a l' tcheyire k' a monté å hôt, tot tournant. Les biesses n' è rivnént nén. Ele cåzént inte di zeles, et dire :

- Divant d' mori, li Rwè des Grands Bwès aveut dit: "li ci u l' cene ki s' ashidrè sol xhame do buro, et l' xhame monter å hôt, ci serè lu (u leye) vosse novea rwè (u vosse novele royinne)".

Adon, cwand dj' a ridschindou so tere, i m' ont anoncî:

- Bondjoû, Mådjusté; vos estoz l' novele Royinne des Grands Bwès.

Mins, a ç' moumint la, dj' a oyou houpler dvant l' ouxh :

- Djihinne, Djihinne !

C' esteut nosse mame eyet m' fré Djôzef k' estént a cweri après mi. Dj' elzî a rcriyî:

- Vo m' ci ! Cial, divins l' grand bwès.

- Dins ké bwès ? Gn a des bwès totavå les tienes

- Li grand bwès ki les åbes sont come des fleurs. C' est on grand bwès k' i gn a nou parey.

- I va; on l' a veyou. Dimeure bén la, sins bodjî. Nos alans houkî les djindåres å telefone.

C' est çou k' il ont fwait.

Tant k' a mi, dj' a båyî, ca dj' aveu soumey, et dj' a stî rcoûtchî.

Tot m' essoctant, dj' a sintou k' i gn aveut ene sacwè ådvins di m' taxhe.

*************

Cwand dji m' a rewoeyî, gn aveut èn elicoptere ki tournikéve dizeu l' grand bwès. Moman, popa et Djôzef estént dvins, et criyî après mi. L' elicoptere s' a pozé en on clairisse, emey li grand bwès. Mes parints boerlént :

- Vinoz, Vinoz, dj' è rirans.

Cwand dji vla monter dvins l' elicoptere, les biesses mi ritnît. Ele mi djhént :

- N' è va nén; nos t' alans basti ene bele måjhon. Et nos t' dinrans troes eurêyes tos les djoûs: didjuner, dinner et soper.

Gn aveut nosse pa ki m' haetchive addé lu d' on costé, et les biesses di l' ôte des costés.

Dji djha azès biesses:

- I m' fåt ndaler. Dji so l' feye da nosse pa. Dji n' såreu dmorer dé vozôtes po todi.

Adon, les biesses m' ont leyî ndaler. Si m' ont ele diné ene grosse corone.

- Nos t' voléns fé ene sorprijhe. Mins asteure ki vo t' la-st evoye, nos t' bistokans avou cisse corone.

Cwand dji m' a ashî dins l' elicoptere, dj' a sintou k' i gn aveut åk divins m' potche. C' esteut ene bele tchinne, dås minmès coleurs ki les cenes ki pindént å cô des biesses, mins co pus bele, avou tos leus poirtraits metous so des medayes ki pindént après l' tchinne.