Page de ? Faucon.

? Faucon, sicrijheu e picård di Bince, rimetou e walon.

dierin rapontiaedje - last update: 2004-11-17.

Dressêye:

 


A on djeråd.

 

Salut, fré ås penas, dji vos raguide dins l' bos

Schafoter sacwants glands ey agroyî l' pus gros

Avou vosse crotchou betch ossu noer ki gayete

E l' estitchant t't etire å molén d' vosse gazete.

 

Ki vos m' shonnez djoli avou vosse cote di soye

Coleur di cinde ttavå vosse dos et vosse poitra.

Avou vos beas bleus iys ki m' ravizèt tot d' cresse

Adon ki si dj' såreu, dji vos dinreu ene caresse.

 

A cwè pinsez, hon, m' fi, e vos tnant acwati

Å pî d' on vî mesplî, ki est tot raskerpi ?

Vos sintoz les veas d' måss aflaxhî les ploumetes

Å long d' vosse tavlêye tiesse disk' å fond d' vosse foslete.

 

Est ç' e les tchamps eyou çki vos nd alîz mexhner

A les meumeures des bos ki vos fjhént tot blefer

A les poes, a les pronnes, les ceréjhes, les gurzales

Raftés dins nos djårdéns cwand vos l' avîz a bele ?

 

Est ç' a les ptits cous-lvés, a les somes ki vos fjhîz

E vos serant, a deus, sol brantchete d' on noejhî,

Et après ça sotea, e båctant peviè l' cir

Å triviè des fouyas vos xhuflîz come on miele.

 

A ! vos sondjîz, bén seur a nos beas ptits godets

Ki skepeyront torade dins nos bos tot dorés

Et k' adon, rapôpyî, vos cachroz ene kipagneye

E djouwant å tchet muchyî dins les taeyes raverdeyes.


Joseph Faucon, divins Mes frés ås penas, Imprimerie commerciale industrielle, La Louvière, sins date.