c (ou ç) eyet s (ou ss)

Po scrire li son /s/, å pus sovint, les scrijheus sicrijhèt del minme façon k' e francès et dins les ôtes lingaedjes laténs, çou ki vout dire avou on «s» ou on «c» sorlon les cas:

• do sonk (sondjîz å francès sang, a l' espagnol sangre, evnd.)
• ene raece (francès: race)

• ene fiesse (ki provént di feste, do latén festa)

Waitîz a vos!

Come e francès,

• «s» divént «ss» inte deus voyales: dissu, passer, djusse, tchessî, ritchesse...
• «c» divént «ç» pa dvant on «o», «a», «u» ou ene cossoune: prononcî --> prononçaedje, çoula, çou ki m' fåt, façon, c' est ç' måjhon la, ça va...

Al diferince do francès, on ni scrît måy «t» ou «sc» pol son «s»:

• francès «dictionnaire», walon «diccionaire»
• francès «nation», walon «nåcion»
• francès «science», walon «syince»
• ...

Po s' afaiti, ratournez e walon ces mots francès ci:

1. C'est lui.
2. Ce n'est rien.
3. Ça va.
4. Prononcer
5. Essieu
6. Dessus
7. Écrire
8. Bête
9. Tout seul
10. Cela
11. Association
12. Nous prononçons
13. Été
14. Décider
15. Attention
16. Essayer
17. Montrer
18. Patience

• Luçon shuvante.
• Alans rzè al mwaisse-pådje des cours do Noû Lovén.
• Alans rzè al pådje moennrece do walon e scole.