dierin rapontiaedje - last update: 2014-01-31

 Dressêye:

Sicrijhaedjes

• Maraichère ambulante Li martchande di vete djote
• Enfants en traineau A xhamea
• Vieux maçon Li vî maçon
• Oisiveté A èn ome coûtchî å solo
• Dîner d'adieux So on ptit soper
• Boute-en-train A Tchåle R.

• Ouvrir une lettre Å fwaite d’ ene lete

 Version originale (pré-Feller) des textes publiés sur cette page Mwaisse modêye (scrijha di dvant Feller) des scrijhaedjes di cisse pådje cial

Vicåreye do scrijheu

Maraichère ambulante

 Li martchande di vete djote

Rafûlêye e s’ bleuse cote,
Ele vént insi d’ Djalhé,
Et, dvins les rowes, ele brait
Di s’ greye vwès « del vete djote ! »

Dispoy å matén ele trote,
Saiwant les stroets pazeas,
Rafûlêye e s’ bleuse cote ;
Ele vént insi d’ Djalhé.

Cwand n’ end a pus flibote,
Come ele n’ a waire di frais,
Avou si ptit malkea,
Elle e rva-st e s’ hobote,
Rafûlêye e s’ bleuse cote.

Divins "Antolodjeye des powetes vervîtwès", p. 133

Enfants en traineau

 A xhamea

El grande waide, avou leus xhameas,
I gripèt, tote ene atelêye ;
Et, tot tapant des braidireyes,
Ont i don bon, ces ptits gurzeas !

D’ esse dislaxhîs, k’ i sont-st etaits
Djans, loukîz m’ on pô d’ kéne virêye,
El grande waide, avou leus xhameas,
I gripèt, tote ene atelêye ;

Adon, come d’ on caniboestea,
On laireut stramer les aweyes,
D’ ådzeu, il ahuzèt-st al valêye
Et s’ dispårdèt d’ tos les bijheas,
El grande waide avou leus xhameas !

Divins "Antolodjeye des powetes vervîtwès", p. 134

Vieux maçon

 Li vî maçon

Li vî maçon, so l’ bastimint,
Sins s’ bouxhî djus, kimince si djådje,
Et, tot loukant, å lon, å lådje,
I clape voltî kéke vigreus rfrin.

D’ abitude, prindant foirt bén s’ tins,
Il est djinti come ene imådje.
Li vî maçon, so l’ bastimint,
Sins s’ bouxhî djus, kimince si djådje,

Mins, a doze eures, (minme) s’ il a ene brike e s’ mwin,
Oubén si l’ tins s’ mete a l’ disbåtche,
I tape tot la, dschind d’ èn astaedje.
A l’ eure, i rmonte, bén påjhulmint,
Li vî maçon, so l’ bastimint.

Divins "Antolodjeye des powetes vervîtwès", p. 134

Oisiveté

 A èn ome coûtchî å solo

Ni toumez nén forbou, paret,
Et s’ prindoz todi bon coraedje
Ca s’ vos fjhoz tos si deurs ovraedjes
Vosse pôve coir s’ end aflåwirè.

C’ est des målès droukes k’ on vs fôrrè
Adon po vs rimete e-n alaedje ;
Ni toumez nén forbou, paret,
Et s’ prindoz todi bon coraedje

Sai dj’ eco s’ on vs riwerirè !
Ca l’ docteur, sins wai d’ harbotaedjes,
Evoye ås cint diåles ‒ k’ els araedje ‒
Les målureus ki s’ î fiyèt.
Ni toumez nén forbou, paret !

Divins "Portraits, tåvleas, glawes et lawes", p. 107

Dîner d'adieux

 So on ptit soper

Divant k’ i n’ bagaxhe, Felicyin
Vla mostrer k’ esteut amiståve
Et come i cwitéve li vijhnåve
End aveut prevnou sacwants djins.

I rashonna kékes parwesyins
Et, po fé les oneurs di s’ tåve,
Divant k’ i n’ bagaxhe, Felicyin
Vla mostrer k’ esteut amiståve

Ala minme cweri, nondontchén Kékès viyès poyowes è s’ cåve
Et ses invités, gote haeyåves,
Insi lyi dnît on mwaisse côp d’ mwin
Divant k’ i n’ bagaxhe, Felicyin.

Divins "Portraits, tåvleas, glawes et lawes", p. 75

Boute-en-train

 A Tchåle R.

Tchåle, t’ esteus pé k’ èn assoti
Li djoû k’ nos magnîs l’ cråsse crompire
Amon l’ Felicyin, et dj’ pou dire Ki ti nos as bråmint dvierti.

Si t’ fré tuzéve a nos dfraiti
C’ est twè, saiss, ki nos a fwait rire.
Tchåle, t’ esteus pé k’ èn assoti
Li djoû k’ nos magnîs l’ cråsse crompire.

Avou çoula todi djinti ;
Tes ouys estént plins d’ aloumire.
Mins on tûtléve ôte tchoi k’ del bire,
Et sins esse gote èn ebusti
Tchåle, t’ esteus pé k’ èn assoti !

Divins "Portraits, tåvleas, glawes et lawes", p. 76

Ouvrir une lettre

 Å fwaite d’ ene lete

Tot rintrant, ouy, dji louke e m’ boesse :
Li posse vineut d’ î mete ene lete
Avou l’ firme d’ on gros filateur.
Dji m’ di : vci d’ l’ ovraedje, ké bouneur !
Dj’ end aveu djustumint mezåjhe.
Djudjîz on pô si dj’ potchive d’ åjhe
Tot tuzant a l’ ôre arivé ;
Dedja, dji fjheu on fameus nez !

Dji n’ prinda nén l’ tins d’ magnî m’ tåte.
Dji m’ dijheu : « ké bon camaeråde !
Come si lete vént bén a propôs !
I m’ a seur ricmandé beacôp !
I n’ a waire portant k’ dj’ el kinoxhe.
I fåt croere k’ a d’ l’ ovraedje a rdoxhe
K’ i pinse a mi po m’ endè dner…
Dedja, dji fjheu on fameus nez !

Dji prin m’ loirgnon et dj’ l’ adjustêye ;
Sins rprotche, dju båjhe cisse lete beneye :
Elle aléve combler tos mes dzirs ;
I m’ shonna k’ ele vineut do cir !
Et, tot l’ discatchtant, dji m’ rafeye…
Mais, milhu, ç’ n’ esteut k’ ene paskeye,
Et dj’ esteu crånmint couyoné…
C’ est aprume ki dj’ f(ijh)a on bea nez !

Divins "Portraits, tåvleas, glawes et lawes"