C' est cwè, o, ça, l' irlope ?

Dins l' tins, les vîs s' plaijhént a xhiner des ôtes, surtout ås pus doûs et pa des côps, ås afants.

On lzî fjot insi crwåre k' al nute, on plot vey ene biêsse si såver dvant loû . Ke biêsse ki ç' esteut ? I nul dijint jamwês ; i n' årint dja sû .

Les tindeus djint k' c' ere coume en ojê et k' il a purdint co bén ås laces et ås moussetes (lacets a terre). Cwand on lzî dmandot d' a moustrer i djint : " bén tume k' c' est anute ; erse, dji nn' a pris 17 ki dj' a rmetu ou cocassî d' Linchamps . Si dj' a rprinds, dji tul dirê.

Dins nosse payi, on djot k' c' ere coume en ojê, mês on n' saveut nén la couleur ; onk dijot k' c' ere nwår coume ene cornaye. En ôte dijot ki ça aveut la couleur du gros betch, des ôtes, coume ene agasse. Les pus vicyeux fjint l' malin avu ça et les pus benêts et les strupiyîs d' cervele avalint ttafwait.

Or, i s' e fwait k' on djoû, dins on veaedje a coste, onz vlot fwire ene nouvele voye. Et coume adon, on travayot al sucoube et al berwete, i falot bramint des ovrîs sul chantier. I s' e don vnu agadjî on tas d' compagnons et du dzarteus françes ki kerint la djîsse (gîte) et il e minme falu-z a lodjî dins les travures.

Pis, il e cmincî a fwire pus fred ; il e nivlote on pô et il e nive po du bon. tot ç' monde la si rassannot al chijhe amon onk k' on n' frecantot wire ou veadje. Il aveut pindu ene brantche du påkî dzeus sn' uche et i vindot a bwåre. Les oumes î cåzint du ttafwait, des tapeus d' sôrt, des leus surtout. Et po fwire awe peu la djonne coumere ki les siervot, gn ' a n' e onk k' e raconte k' a l' arriere sêzon, lu vî pere sabotî ki wårdot ses 5 moutons avu les vatches dins les tchamps disbanes, aveut vu on gros leu torner alantou des berbis. Lu tchin e pris peu et s' est såve. Lupe sabotî n' e yu k' on rcours ; il e tire ses sabots, pîs i lz e toke onk cont l' ôte, tant k' i plot a courant alantou des berbis C' est insi k' il e parvunu a s' mete kite du leu.

Pîs, il ont vnu a cåzer dl' irlope et des moyins d' la haper. Onk dijot bif, l' ôte dijot baf et nolu n' saveut rén du tot.

- Dji m' va nn' aler prinde yene, dit i onk

- Coumint k' tu vas t' î prinde, dit i l' ôte ?

- C' est bén åjî, ki dit l' premî. Tu prinds on satche du twaye, bén solide et grand assez, tu vas a ene plaece dule l' bwes, eyu k' tu sondjes la vey, tu t' mes å rcwè du vant d' bijhe, durî ene viree du dgnêsses bins spesses. Lu pus malåjî, c' est d' awe kekin po tnu l' satch bén å lådje po k' la biêsse vinje moussî dd' ins, et adon, vitmint loyî l' satch po ruvnu avu.

La djonne coumere, cwand ille e vû k' i n' trouvint personne les î dit :

- Si vos m' payez bin, dji vus bén-z î aler, mi ! Coubin k' vos m' direz ?

Les ôtes s' ont rwaitî tot paf, zes ki buvint leus sous a fwait. Mês la coumere esteut decidee, et al fin, i s' ont metu d' acôrd po 10 francs, deus beles cotes et on moutchwa d' linne.

Et vo les la evoye dilé l' sourd du drî Noranfwè. Il ont posté l' gamene, pu il ont hoûlé et traké dins l' virêye. Kibén d' tins k' ça a duré, ca ? Ene dimeye eure, putete, pu on n' a pus rén etindou.

Li comere contéve ki c' esteut fini et k' il alént rivni. Oyi, waite ! Rén d' tot ça, ele n' a rveyou nolu. Et pu, les leus s' ont amoenné, set u ût k' ahoûlént å pus foirt. Onk di zels a nodé l' gamene et il ont vnou tertos sor leye. Li prumî a cmincî a l' moide å bresse, èn ôte a shû, et cwand il ont yeu sintou l' sonk, il ont fwait l' fén del gamene.

So ç' tins la, les buveus avént rintré å cafè et ci n' est k' pus tård, k' il ont rsondjî al gamene. Mins cwand il ont rarivé al plaece k' elle ere, i n' dimoréve pus k' kékes lokes.

Ça a stî fini por zels avår la. Il ont saiwé d' tot costé et on n' les a pus rveu.

Vla comint k' des grands flandrins avént arandjî l' tchesse a l' irlope.

Ou cabaret des Wez, les chijheus djint :

- C' est drole, on cåze todi d' irlope et dji nn' ans jamwês pont vû.

- C' est k' tu n' tumes nén so l' ocåsion, la !

- Mês, ke biêsse ki ça pu-z esse ? Ile e des pates coume les ôtes biêsses ? E-t ile des poys, des crins u bén des soyes ? E-t ile des plumes coume en ojê ? Russanne -t ile a ene rougne, a ene couluve u a ene gurnouye ? Dji sros curyeu d' sawe !

- Alons, dit i on tråjime, lu vî Leyon nn' e co pris erse ; i m' e dit k' i lz aveut metu ou cocassî ki passot djusse. I m' e co dit k' i m' a mousturrot, s' il a purdot. C' est tot çki dj' ses.

Et les ôtes schoûtint, betch båyî. On-z esteut tins du moes d' setambe, en plin moumint du rpassaedje des grives et les tindeus avént bon d' aller ou bwe, don ! Mê, l' vî Leyon, k' esteut tindeu ossi, batot les mazês ossu et c' est po ça k' i djot k' i machot l' irlope a des roussetes.

In bea djoû, il e arive ou cafe ene lete du djonnes djans ki dmandint a passer on djoû u deus so l' payi.

Lu cabartî, ki n' ere nén pus malin k' i n' falot, les î e dne sn' acôrd, a lzî fjant mancion del irlope k' on purdot ås grivlires, ki c' ere lu vrê moumint du rpassaedje et k' i srot bon du vnu avu on fusik u deus, po-z a scroter kekenes.

Il ont rusponduk' i vnint avu deus fusiks. Mês l' caftî aveut bén dit k' on' trakot nén l' irlope avu des tchins.

Dins les cîs del vile k' ont arive ou cafe, gn aveut kekinkes ki doutint on pô, mês ki n' ont rén dit sul moumint. I weyint bén ki l' cabartî aveut l' air du s' foute du zes, mês n' ont rén fwait parete. Il ont payî on dmi ås trakeus k' estint la, pîs, il ont dit : "A dmwin, s' i fwait du timp ! "

Lu landmwin å matin, dins la bande des citadiins, gn e trwås ki n' ont nén volu aler ou bwès et k' ont dmere la. Les ôtes ont stî amon l' vî Leyon, po k' i les monne.

Mê Leyon, ki lz aveut vu acouru d' å lon, e rintre mete ene echerpe, on gros tricot et ene bounete du linne et s' mete a tossî coume on pwatrinire.

- Dji sus apotike anute. Dji n' såros jamwê v' monner, mê alez vey çutla k' dji v' dis. Tunez, vla deus gamins ki vont v' l' aler kê.

Cwand il e arive (c' ere on vî buveu), il e dit :

- Dji vus bén v' monner, mês a payant, coume du djusse ! "

Et les vla voys ou bwes, sins fumer et sins cåzer, coume lu vî aveut dit. Mês dins les trwas grivlires k' il ont fwait, i n' ont rén vu ki rsannot a ene irlope. Il ere du pus d' deus eures del vespree, cwand i s' ont decide a rvunu. ou cafe et dire ås ôtes k' i n' avént rén vû, ki l' timp n' siervot nin.

Mê, dins on cwin, ene vîe fame les schoûtot.

- Alez vey çut la d' ma pårt, i vz a mousturre yene al chijhe.

Il ont don stî avu çti la drî les håyes et il ont yu la farce k' on counut avu les crotes.

I nu lzî dmerot pus k' a decamper å pus vite. I nn' åront souv' nance, del irlope !

Coume l' irlope est ene biêsse imajinire, nén etounant du n' a jamwê pon vey.

Rutape al machine pa Yves Joblin la dja mwintes aneeys et rmetu so compiutrece pa Louwis BAIJOT, a gare du Grêde,lu 10 du fevrî 2002