dierin rapontiaedje - last update: 2006-11-06.

L' aiwe d' Ourdoug Nour

Adon vos såroz, eyet c' est l' peure verité, ki l' Grand Sire a co fwait ene ôte bele et ahessåve afwaire ; so totes les mwaissès voyes ki triviersèt l' province do Catay eyet ses vijhenes (. . .) il a fwait planter des åbes des deus costés, a deus ou troes asdjamblêyes d' onk l' ôte, eyet ki sont d' ene sôre ki dvént grande eyet foite.

Marco Polo

 

Dj' a atchté on tiket d' bus, eyet dji toûne dispu troes eures dins les rowes d' Ulan Batôr. Li bus arive å coron del ligne, i ratoûne, eyet rfé l' minme voye dins l' ôte sinse djusk' a l' ôte dibout.

Li veye est ptite ; i gn a k' deus avnowes. Kékès djins passèt, piyane miyane. On camion saetche ene nûlêye di poûssire ki s' disfwait tot doûçmint, e rtoumant. Gn a deus avions pa samwinne po rexhe foû d' Ulan Batôr, tos les deus po Moscou. Di d' la. . . Mins dji n' a nén des cwårs assez po prinde l' avion. Li govienmint mongol m' a leyî on ptit cwårtî å shijhinme ostaedje d' on grand bastimint ene miete å dfoû d' Ulan Batôr. Dins l' tins, dj' î travayive bråmint. Dji scrijheu des letes a gåtche, a droete, a l' Ofice Mongol des Etrindjirs, a l' Ambassade (divant k' on l' sere). . . Mins alez, vos, trover eyet payî ene sakî ki sepe ratourner mes letes e mongol ! Gn a ddja ene bele sinte hapêye (mins kibén d' moes, d' anêyes ? ) ki dji n' sicrî pus nole påt.

Vaici dins m' potche, dji sin l' copeye do contrat ki m' a amoenné chal. Mi bouye, c' esteut do planter des åbes tot l' long di l' aiwe d' Ourdoug Nour, des Raucarii mongolesca, les seus åbes ki sårént tni å tins k' i fwait avår ci. (vo nos la å coron del ligne)

S' apinse mi contrat, dji n' riçureu k' ene pitite paye tot l' tins k' dji travayreu, mins on côp k' les erives d' Ourdoug Nour deus côps ene pitite cintinne di kilometes serént plantêyes di Raucarii, dji toutchreu l' gros lot. Li djoû ki dj' end a ndalé, dji n' a pont fwait d' fiesse, ni rén : dj' aveu pierdou mes parints estant gamén. Dji n' aveu pont d' kimere eyet pupont d' camaerådes po dire, dispu k' dj' aveu sôrti des Facultés ahessî d' on diplome di planteu d' åbes. On moes après, sins cåzu m' aveur rindou conte di rén, vo m' la å boird di l' aiwe d' Ourdoug Nour, avou ene dozinne d' ovrîs, èn eterprete eyet troes camionlêyes di plantes di Raucarii. Nos voyaedjéns a môde di caravane, avou nos troes camions, nos deus djips eyet nos cwate barakes.

Des côps k' i gn a, Ourdoug Nour tchereye des aiwes télmint spesses ki ça n' est cåzu k' on brôlisse. L' aiwe n' est jamwais foirt fonde, mins télmint noere rodje k' on n' voet nole påt åd triviè. Ourdoug Nour passe, si doûçmint k' on n' såreut dire s' ele court po d' bon ou si c' est ene idêye, å mitan d' on dezert di yebes, sins èn åbe, ene rotche, ene cahute. Ene tere pår coployeye, fwaite tote etire di tienes jamwais foirt hôts. Des pleus, des pleus, eyet des yebes ki bloncèt å vint, sins låtchî. (vo nos la å coron del ligne)

Nos avans ataké a planter des Raucarii a pô près å mitan del coûsse d' Ourdoug Nour. Nos plantréns tot dischindant l' aiwe. On côp ki ç' prumire mitan la sereut fwaite, nos ratacréns a pårti del minme plaece, mins ç' côp la, tot rmontant l' rivire djusk' å sourdant. C' esteut å moes d' djulete ene boune såjhon po planter avår ci ; å vraiy, i gn a cåzu pont d' såjhon ciddé. L' airaedje ni candje po insi dire jamwais k' e l' ivier, cwate moes å lon. I gn a ki l' nute eyet l' djoû : i toke a nonne, i djale a meynute.

Å dbout d' sacwants moes d' plantaedje, dji m' a rindou conte ki l' ovraedje n' aveut waire avancî.

Po cmincî, l' aiwe d' Ourdoug Nour si ctoirdeut come ene coloûte, ele si stindeut come po s' ralongui. Tenawete eto, c' esteut målåjhey do dire eyu çki l' aiwe passéve : pa plaeces, gn aveut pus k' on trô a mitan rsetchi, ou des basses plik plok. Des ôtes côps, c' esteut l' contraire : gn aveut télmint des bresses d' aiwe ecramyîs k' on n' saveut pus l' kék å djusse k' i faleut shure. On rmontéve on bresse, tot plantant des Raucarii, ci pwis la, on s' rindeut conte ki ça n' esteut k' on rixhot ki s' tapéve e l' aiwe d' Ourdoug Nour.

Po n' rén arindjî, les mapes estént må fwaites - en esprès, motoit -, on n' saveut jamwais k' a pô près eyu çk' on-z esteut : li roye d' Ourdoug Nour s' arestéve pa plaeces, ou s' dispårti ; oudonbén, gn aveut pus k' ene rîlêye di ponts el plaece d' ene roye.

(vo nos la å coron del ligne)

A waitî d' ariver å dbout, dji m' a-st avizé ki l' rivire n' aveut pont d' coron : ele si coreut-st evoye dins cint bresses, et adon dins on grand frexhåd sins cogne. Eyet l' contrat voleut k' dji plantaxhe tot costé. Dji n' sai ddja s' on-z î a parvinou.

On djoû, dji m' a dit k' ça sereut kéke feye mî do fé dmey toû po-z aler planter tot l' long del prumire mitan di l' aiwe, cwite a rivni vaici pus tård. Mins cwand ns avans rivnou en erî, nos n' avans pus trové, so trinte ou cwarante kilometes, ki des åbes moirts eyet rassetchis : l' aiwe aveut candjî d' plaece ; ele s' aveut cployî come on sierpint eyet rider evoye cénk ou shijh kilometes pus lon. (vo nos la å coron del ligne)

Il a falou rataker.

Nos n' savéns ovrer k' ût moes l' an. Li restant do tins, nos aléns mete nos barakes dilé on hamtea pierdou, å mitan d' cint tiers ashids sol tere d' on côp eyet sk' a todi, rascovrous d' grandès djaenåssès fenaesses ki bloncént, bloncént, tofer, tofer. Dji n' aveu nén ene vesse a foute, des moes å lon. Måy ene barbôjhe ki ridéve sol cir.

Mwints côps, del nute, dji m' ashideu sol soû di m' barake po rwaitî les cints, les meyes di stoeles kissemêyes lon pa dzeu m' tiesse. Dji rawårdéve. I m' a falou lontins po comprinde çou k' dji péyive après. Dji m' agrancive todi d' aporçure ene cligntante loumrote rider doûçmint, sins brut, avå les stoeles. Mins ni Boeing 747 Tokio-Helsinki, ni Iliouchine 6 Kiyev-Beijing. Rén n' bodjive. Rén po schaver on lujhant royon el noereur. Rén po croyî ene roye bén droete dins l' kissemreye des stoeles.

A tins a eure, sins k' dj' åye rén dmandé, li Ministere fijheut candjî les ovrîs et amoenner des noveas Raucarii; mins si l' aiwe d' Ourdoug Nour n' aveut pont d' coron, ele n' aveut nou sourd nerén ; ele sikepyive come ele moreut : dins on grand frexhåd k' on n' sait wice k' i cmince eyet wice k' i finit.

Télfeye, dj' aveu des tchôcmwårs. Dj' esteu stampé å boird d' Ourdoug Nour, et dji lyi criyive dissu : mi schoûtress, po fini ? Est çki t' courrès eyu çki t' does ? Est çki t' shurès l' voye ki dji t' dirè, eyet nén ene ôte ?

Li londmwin, portant, l' aiwe aveut candjî s' tchimin. Ou ele s' aveut pårti e deus. Ou elle aveut cårémint disparetou, come po s' foute di mi. Et on djoû, nos nos avans rtrové sins åbe. Pus nén on raucarius. Dj' avéns planté al dilongue di cwate ou cénk pitits bresses, nén lon erî do sourdant, pinséve dju. Mågré ça, a tchaeke tournant d' Ourdoug Nour, on-z e discovreut des ôtes, des pus lådjes, des pus firs, ki rglatixhént come do keuve, eyet s' kitourner åtoû des tienes avou on brut d' yebes riftêyes. Eyet pa drî tchaeke tiene, surmint, co ene fotche, ene basse rissouwêye, ene fagne sins cogne. . .

I gn aveut nén des Raucarii assez po totes les aiwes del Mongoleye. I faleut eraler a Ulan Batôr, dimander mes liårds, peter å diale å pus abeye, ni pus måy pinser ås aiwes d' Ourdoug Nour.

(vo nos la å coron del ligne)

L' eployî do Ministere m' a dmandé kî çki dj' esteu, çou k' dji voleu. I n' aveut måy oyou djåzer d' mi, ni do programe di rplantaedje, ni rén. Il a hemté.

- Rivnoz l' samwinne ki vént, dit-st i, ene miete djinné, dji m' va cachî après les papîs.

Li samwinne d' après, cwand i m' a rçû, il aveut on grand franc sorire.

- Dj' a rtrové vos papîs, dit-st i.

I m' riwaitive d' asto. Si mwin esteut so on ptit moncea d' vîs foyous, djaenåsses, breunåsses, raloyîs d' ene grosse elastike.

- Dji voe vaici k' vosse contrat esteut. . . do. . . do fé planter des Raucarii mongolesca tot l' long di l' aiwe d' Ourdoug Nour, so les deus boirds eyet do sourdant å coron. . .

- C' est djusse.

- Ci n' esteut nén rén, surmint !

A-t i veyou k' dji fjheu ene xhinêye, ki dj' aveu ene grosse bole e m' gozî ? I prind èn air djinné, pu ratake a lére, avou on doet ki shût les letes ecomelêyes do vî åbécé mongol.

Adon. . . Adon. . . Dji voe k' vosse paye, on côp l' ovraedje fwait, diveut esse di. . . di 200.000 tougriks. E bén. . . inte di nozôtes soeye-t i dit, gn a ddja sacwantès anêyes ki ça n' våt pus grand tchoi, 200.000 tougriks ; dispu k' nosse manoye a stî ravalêye. . .

- Dji nd a d' keure.

- C' est vos k' ça r waite. . . Dji djheu ça insi. Adon. . . Dji voe chal a l' årtike 8b do contrat k' i fåt evoyî des esperts po rpasser les ovraedjes eyet waitî si totafwait a stî fwait comifåt.

- Cwand çk' i nd iront ?

- Ô, ça, dji n' è sai rén. I fåt vey kî s' end ocuprè ; s' i gn a des djins d' libes ; dimander les permis ; fé les papîs ; aeurer l' bezogne ; trover les cwårs. . . Mins ni vs è fjhoz nén ; a mezeure ki l' afwaire avançrè, on vos scrirè po vos tni å corant.

C' est l' vraiy, par après, dji rçuveu tenawete on papî ou l' ôte, pa côps ratourné dins m' lingaedje, pa côps nén. Å dbout d' on tins, li brigåde d' esperts a stî metowe so pî, les permis acoirdés (vo nos la å coron del ligne), les cwårs ramexhnés, les omes rashonnés. Il ont pårtou. Adon, pus rén.

(vo nos la å coron del ligne)

(vo nos la å coron del ligne)

Ayir å matén, dj' a rçû l' lete ki dji n' ratindeu pus après. On-z aveut l' oneur di m' fé saveur ki totes les coratreyes avént stî fwaites, sins è rovyî ene. Totafwait esteut å Ministere, å buro da Monsieu on Té, ki cåze mi lingaedje eyet ki m' riçureut ouy.

Dji n' a nén stî mouwé tot lijhant l' lete. Gn a ddja lontins k' pus rén ni m' rimowe, eyet d' ayeur, dji saveu bén çou k' Monsieu on Té aveut a m' dire. Dji n' a nén rindjî mes deus troes clicotes dins l' vî grand saetch ki dj' aveu l' djoû k' dj' a-st arivé. Dji n' a nén catourné dins totes les plaeces eyet rwaitî pal finiesse, come on fwait cwand on cwite ene måjhon k' on n' rivierè pus. Dji n' a nén vudî les ridants. Dji n' a nén stî mouwé tot serant l' ouxh al clé.

Dji n' a nén stî mouwé cwand dj' a bouxhî a l' ouxh do buro da Monsieu on Té eyet ki ci-chal m' a-st arinné :

- Ostant vos dire platezak ki l' rapoirt des esperts n' est nén bon.

Eyet dji n' a nén crankyî cwand dj' a etindou k' so des kilometes eyet des kilometes, gn aveut nén on raucarius al dilongue di l' aiwe d' Ourdoug Nour ; k' on-z aveut rtrové des rîlêyes d' åbes moirts eyet souwés a des plaeces lon erî di l' aiwe ; ki, ni å sourd, ni å coron, l' ovraedje n' aveut stî fwait.

Dj' a moussî foû do buro ; dj' a-st atchté on tiket eyet dji m' a-st ashî dins l' bus.

Asteure, dji toûne dins les rowes d' Oulan Bator, come ene wesse dins ene botaye. Li bus arive å coron del lene, i ratoûne, eyet rfé l' minme voye dins l' ôte sinse djusk' a l' ôte dibout.


Lorint Hendschel, foû di "Did lon", "Les Cahiers Wallons".


 Pådje moennrece da Lorint Hendschel.


* Si des mots difficiles se présentent à vous sur ces pages, allez voir s'ils ne sont pas expliqués dans le Splitchant motî do walon (avec brève traduction française), ou dans le Wikipedia, l'encyclopédie en wallon (suivez: "Pordjet Esplicant Motî") ou encore sur le "Wiccionaire".


 (Index des sujets traités en wallon unifié) Djivêye des sudjets diswalpés e rfondou walon.

 (Index des auteurs dont les textes sont disponibles en wallon commun) Djivêye des scrijheus k' ont scrît u k' ont stî rashious e rfondou walon.

 (Back textes en wallon commun) Erdalans sol pådje des scrijhaedjes e rfondou walon.

(Back homepage) Alans rzè el mwaisse-pådje

(homepage wallon commun) Alans rzè eviè l' pådje moennrece do rfondou walon.


Sicrijhaedjes eplaidîs so les fyis avou l' åjhmince do scrijheu. Sacwants bokets scrîts tot notant des accints do walon polèt aveur sitî ene miete rassonrés po poleur shuve pus åjheymint les mwaissès rîles do rfondou walon.

Édition en ligne explicitement autorisée par l'auteur. Certains textes, écrits d'abord en régiolectes, peuvent avoir subi des modifications mineures pour faciliter leur insertion dans le projet d'orthographe wallonne unifiée.